مرض بسبب الحزن

الحالة
مغلق ولا يسمح بالمزيد من الردود.
هذا نتا !!!!! ؟؟؟ .. يا خويا ما كنتش حاطك حساس هكذا ... و لكن صح معاك حق مرّات تصرا
---
نصيحتان :
1- نصيحة على المدى القريب :
نقّص الماكلة هاذ ليامات، و كون تصيب غير الخضر و الفواكه و الماء لمليح برك .. و تمدّد كلما تلقى فرصة باش يقل الظغط على القلب .. تجنب الأماكن لي فيها الجو مكهرب و لي فيها ناس ثقال (ممكن التفسح في الخلاء أفضل) .. أعمل على تشريح الحدث و تفكيك خلفياته دون نزع الصفات الإنسانية من الشخص أو الأشخاص لي نشعوك (حتى لا تسرف في فكرة الإنتقام) .. لا تنسى أن هذه الحادثة هي في الحقيقة لصالحك لأنها كشفت لك حقيقة أولاءك الأشخاص (جات فالصغيرة خير من في لكبيرة) .. يعني راك كشفت مواقع الألغام و تهنّيت منهم .. جات منهم خير من جات منك (هوما لي ظالمين ماشي نتا) .. ليكن في علمك : الحزن أفضل من الغضب .. الغضب شيء سيء جدا جدا جدا .. إن لم تتمكّن من إيقاف غضبك حوله نفسيا إلى حزن فذلك أفضل لصحّتك (الحزن يثبط عمل الجسم بنسبة ما أمّا الغضب فيهدّم الأعصاب و كامل الجسم) .. إحذر من عزّة النفس المبالغ فيها ... إسرح بخيالك في أفكار إيجابية و أحلام و أمنيات جميلة تذكّر ذكريات جميلة .. و أعلم أنو كل شيء يفوت .. و الضربة لي ما تحطمك تقوّيك.


2 - نصيحة على المدى البعيد :
أحكم قلبك هاذاك حطّو على الطابلة و جر عليه بالموس .. لازمك تقسى من لعباد .. يلزم مع ليام وحدة وحدة حتى ترجع جدرة و حلّوف !!!! .. (هذا أفضل دوا قدرت عليه أنا).
ما تخافش ماكش رايح تفقد إنسانيتك خاصة مع لي يستاهلو حبك و ودّك .. غير يقدمو ليك و تعرفهم رايح ترجع معاهم حنين بشكل لا يوصف !!!! .. تعرف علاش ؟؟ .. لأنو كل طاقتك العاطفية كنت مبلّع عليها الباب حتى يجو لي يستاهلو فإذا بيك لما تفتحلهم قلبك رايح تكون معاهم بشكل عاطفي و انساني عجيب.
ق أنا لي حساس ههههه مش حساس تاع يقطف الأزهار ويحافظ على مشاعر القطط ههههه بصح تالمون أنا جامي ننشع ناس ولا نجرحهم نهار تجيني تضرني وراني ذكرتلكم مش نشعات تخصني كاين نهارات نكون عاجز نقدم يد المساعدة برك نبات قاعد خاصة لاهلي وأقاربي وربي يحفظك نصائح تاعك تدون في كتاب تاع صح ربي يحفظك
ما تخافش على. خوك لانو ممزوج من كلش حديد في وقت الحديد وريشة في وقت الريشة ربي يفتح عليك أبواب الجنة يارب نشاالله ندير على نصيحة من نصائح..
 
السلام عليكم
كيف الحال جميعا
توحشتكم
علبالي توحشتوني (مي مشكيتش:mad:)
المهم ربي يشافيك خويا حكيم
كيما تعرف عندي خبرة في الامراض النفسية كنت طبيبة نفسية بكري هههه
انا هدا الحالة تصرالي بزاف مي عندي دواها ان شاء الله
انا قبل 3ايام صراتلي ضربت فيها تبحرية علاما
ولا ادا كنت بعيد على لبحر قد ما يحبس عليك الصطر شويا روح لكاش بلاصة خاوية وقعد تعيط وفرغ واش في قلبك
وروح حوس ونركزلك على حاجة كول وفحشش روحك ضربة ضربة ههه
ومتنساش قرا القران و كي تحكمك هدا الحالة صلي ركعتين
ومتعطيش للعبد قيمة كثر من قيمته الصح في المعدة هههه
 
احسن علاج ليها الحلبة مع ما فيه رقية
انا عليا الحلبة وانت عليك الرقية ونتلقاو بحكيم في الجامعة ونغريسوه كي نكونو موليين.

كاين اللي يستعملوا الحجامة كاين اللي يعالجوها بالادوية وكاين عجايز وشيوخ يقولو انهم ينحوها والشفاء بيد ربي.
 
الخلعة والله ما نشفاش لروحي نخلع ممكن خلعة تاع كاش افيشاج في جامعة ههههه باسكو صح والله ما نخلع حتى في مواقف الموت ما نخلعش ههههه
و الله أعلم
 
اسمها الخلعة لكنها متعنيش الخلعة اللي نعرفوها اسمها العلمي " النشعة" قادرة تصير لاي انسان في أقل من ثانية بسبب مفاجئ.
ذرك حكيم ريحت ولا مازال باه نسرّحوا الطاقم الطبي الحاضر هذه الليلة معنا على المباشر من مستشفى المهابل ههه خايف نخلوك وحدك تنتحر.
 
وعليكم السلام ورحمة الله وبركاته واش يفوت على الانسان من انفعالات ترجع على صحتو انا راني هك وصراتلي شحال من مرة لكن نفطن لروحي ونندم وتاني قنعت بلي المشاكل تفوت وتعدي وصحتي كون تروح متوليش مالا جرب تمشي، بمنطق صحتي اولى ولي قاسني نفوتو ونكمل حياتي ان شاءالله ماتشوف شر خويا لعزيز
 
السلام عليكم
كيف الحال جميعا
توحشتكم
علبالي توحشتوني (مي مشكيتش:mad:)
المهم ربي يشافيك خويا حكيم
كيما تعرف عندي خبرة في الامراض النفسية كنت طبيبة نفسية بكري هههه
انا هدا الحالة تصرالي بزاف مي عندي دواها ان شاء الله
انا قبل 3ايام صراتلي ضربت فيها تبحرية علاما
ولا ادا كنت بعيد على لبحر قد ما يحبس عليك الصطر شويا روح لكاش بلاصة خاوية وقعد تعيط وفرغ واش في قلبك
وروح حوس ونركزلك على حاجة كول وفحشش روحك ضربة ضربة ههه
ومتنساش قرا القران و كي تحكمك هدا الحالة صلي ركعتين
ومتعطيش للعبد قيمة كثر من قيمته الصح في المعدة هههه

هالبدر المشرق هاذا هو يبان من وقت لوقت لكن متفكرينك متخافيش. تابعة للطاقم الطبي الحاضر اليوم عند خونا حكيم وكيما قلتي صحيح ربي يبارك فيك ديما الانسان يهرب للراحة النفسية وميحاولش يبقى ديما يتبع في الهموم لانها لا تنتهي طول العمر بل تتجدد ويخرج ديما الجديد. لكن الانسان يحاول ينقص من الاهتمام بيها قدر المستطاع.لانو ولاشيء يستاهل فقط العبد يحس انو كل شيء متوقف على صالحة او على انسان ما.
 
انا تاني كنت هكدا ولكن جبتها فى صحتي
لكن فيه سببين
الاول كنت كي نسكت يحوسو بعض ضعاف النفوس ياكلولي حقي ونسكت منهدرش ولو الحق مما يخليني نقنط وتغيضني عمري
ثانيا لقيت انني نعاني من امراض عضوية ابدا مكنت مريضة بيها
واكتشفت ان لازملي رقية شرعية+ نخرج واش في قلبي (اصلا يقولو هاذا انسان صريح على عكس الساكت على الحق لان ميحبوهش الناس
 
السلام عليكم
يظهرلي انو الاخوة كفو و وفاو من خلال الردود ..و كل واحد فيهم عاش الحزن بطريقتو.. كيما انا في الكثير من المواقف تحكمني غصة و تركبلي حاجة ف القرجومة(البلعوم) و لابيتي باي باي لا أكل لا نوم و نبقى نتحصر على عدم الرد في تلك المواقف بطريقة مناسبة..حتى ف الليل يبنالك السيناريو لكن بعد فوات الأوان ههه
طبعا الحزن مضر بالصحة و يختلف تأثير على حساب عمر الشخص ..تخيل شخص كبير يحزن حزن شديد ..أمر طبيعي اذا حكماتو لاطونسيو و اصيب بالشل و يتبوشالو عرق -الله لا يبلينا-..هذا كامل بسبب الحزن ...اذن من الامور الحسية و المشاعر السلبية شوف وين ممكن توصل حتى الامراض جسدية

و عليه الواحد لازم يتعاطى مع الكثير من الاشخاص و المواقف بالبلادة و البروده في ردود الفعل ..و ما لازمش يرجع القلبو حتى ينتفخ. و تفرغ زعافك في الأشخاص الخطأ...روح اتمشى بعيد في مكان مريح خاصة في الليل.. ابكي عادي مش عيب..كامل بكينا.. اجري..مارس رياضة..و الأفضل انك تقابل لي زعفك تفرغ لو كلش و تتهنى من الحمل الثقيل..
طهورا ان شاء الله خويا حكيم.
 

سلام عليكم خاوتي هذي مدة حاب نحكي على حاجة مخوفتني بزاف وقلت بالاك عندكم علم وهي المرض الداخلي بسبب الحزن..
عندها مدة مش بعيدة ساعات تصرالي مواقف نحس صح بمعنى الحزن تغيضني عمري فيهم ولانو عقليتي ما نرجعش وما نخرجش واش كاين في قلبي مؤخرا رجعت نحس بألم فضيع في المعدة وبعض الاعضاء الداخلية وكي نقلكم فضيع يعني فضيع كنت نسمع بناس تموت من الحزن بصح ما كنتش نتخايل انو رايح يصرالي هك وصراحة توسوست مالغري واحد كوراج وكلش بصح سبحان الله القلب لحمة كيما يقولوا
مهم رجعت كي نحزن على مثلا جاست دارهالي عزيز ولا يجرحني واحد بكلمة مش مليحة نحس بألم فضيع حتى وحد نهار صدقوني غير قعدت شاد كرشي من السطر والبروبلام ماعنديش أمراض معدة حمد لله ناكل مليح بصح الالم هذا كي عاد يرتبط بالحالة النفسية تاعي وسوسني كاش نصائح ما تبخلونيش..
هذا دليل لايحتاج شاهد اثبات على ان قلبك طيب وضميرك اصفى من عين الدأب ...
لكن ان شاء الله مافيه الا كل خير ولو انه بودي لو تروح لطبيب مختص بأمراض المعده يكون افضل ...
ان شاء الله ما تشوف شر ...
 
انا تاني كنت هكدا ولكن جبتها فى صحتي
لكن فيه سببين
الاول كنت كي نسكت يحوسو بعض ضعاف النفوس ياكلولي حقي ونسكت منهدرش ولو الحق مما يخليني نقنط وتغيضني عمري
ثانيا لقيت انني نعاني من امراض عضوية ابدا مكنت مريضة بيها
واكتشفت ان لازملي رقية شرعية+ نخرج واش في قلبي (اصلا يقولو هاذا انسان صريح على عكس الساكت على الحق لان ميحبوهش الناس
كاين واحد الانسان يحكيلي قالي كنت من كثر المشاكل مع الناس والاهتمام والانشغال بمواجهة مشاكلهم وتهجماتهم مرضت وقريب رحت فيها السكر الضغط ..الخ قالي بعد دخولي المستشفى في احد المرات وحسيت بالخطر بدلت اسلوبي كليا في الحياة كلية من الالف للياء وعرفت قيمة الصحة فمنين نتلاقى بيه نلقاه يضحك فقط ويمزح ويڨسر قال قضيت صوالحي مع الناس أولا اللي عندي او عندوا معايا مشكل رحت ليه لدارو وفريتها بالربح او الخسارة قال بعدما صفيت حسابات الناس ونحيتهم من راسي بديت اسلوبي الجديد وين كاين بذور نتاع هم او غم نزيلها فورا ونفوت عليها واهتممت باحوالي الشخصية والصحية والدينية والان الحمد لله.
هاذي تجربة ممكن تصلح مع انسان ومتصلحش مع آخر لكن لما ذكرتي الصراحة ربي يبارك فيك احيانا الصراحة ولا هم القلب.
 
السلام عليكم ورحمة الله وبركاته
اعاني من نفس المشكل
طهور ان شاء الله
تحياتي احترامي وتقديري
في امان الله وحفظه
السلام عليكم ورحمة الله وبركاته..
ماذا أقول لك يا اخي..ساتحدث بشكل سطحي عن الحزن لان نصائح الأعضاء الكرام ماشاء الله لا قوة إلا بالله كفت ووفت اولا :
المشكل ليس في الحزن وانما في كيفية تجاوزه.. فالحزن امر حتمي يجب ان تؤمن بحتمية وجوده. فنحن نتعرف على كرم وعطاء الله بالنعمة ونتعرف على لطفه وقوته ومساندته في الاوقات العصيبة وهذه حكمة الله في وجود الفرح والحزن لذلك قال الله تعالى :(وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ (139) إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ ۚ وَتِلْكَ الْأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنكُمْ شُهَدَاءَ ۗ وَاللَّهُ لَا يُحِبُّ الظَّالِمِينَ (140)) فالكل يمر بهاته الفترة.. لذا تقبل حزنك.. لا تطيل في حزنك وفي نفس الوقت لا ترفضه فانت في النهاية انسان بداخلك قلب وليس حجر فمن الطبيعي ان تنكسر.. اكيد نسأل الله العافية فلا احد يتمنى الحزن لكن فقط عندما يصيبك تكون جاهز لذلك وتكون متيقن بان لا راحة في الدنيا ولاسلام من الناس ..
والاهم ان لا تصاحب حزنك لاتبني حول نفسك حاجز من الهم والغم.. لو اردت ان تصاحب صاحب كثرة ذكر الله صادق اللجوء الى الله قال تعالى : وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ (97) فَسَبِّحْ بِحَمْدِ رَبِّكَ وَكُن مِّنَ السَّاجِدِينَ (98)وَاعْبُدْ رَبَّكَ حَتَّىٰ يَأْتِيَكَ الْيَقِينُ(99)
كن مع الله يكن معك.. والذي نفسي بيده لن يخذلك
وسيجبر خاطرك.. اكثر من الاستغفار والدعاء.. ارجع الى حصن مسلم تجد فيه ادعية الهم والحزن والكرب..فكما اخرج ذي النون من بطن الحوت فباذنه تعالى سيخرجك مما انت عليه...
ثانيا:لكل انسان أربعة جوانب مهمة في حياته. جانب روحاني(علاقته بالله) .. مادي(العمل والدراسة..).. اجتماعي(علاقاته.. اقاربه..ومعاملاته..). وجانب صحي
اذا حصل لك مشكل لا قدر الله في احدى الجوانب فحاصره ولاتدعه يتفاقم إلى بقية الجوانب مثلا البعض يصيبه مشكل في الجانب الاجتماعي كأن يتلقى إساءة من شخص ما فيحزنه الامر ويدع حزنه ينتقل الى الجانب الصحي فبحزنه يهمل اكله او الرياضة التي كان مواظبا عليها فتضيع صحته ويصبح المشكل اثنين ..فلاتدع المشكلة تتفاقم ولا تتتركها تطغى على بقية الجوانب بل اجعلها تقوي احدى الجوانب مثلا مشكلتك الاجتماعية كسرتك وكسرك هذا جعلك تلجأ الى الله وكلما لجأت اليه يقوى جانبك الروحاني... و ان شاء الله تصل الفكرة
ثالثا: اخبرهم كيف يعاملونك : اذا لم تخبر الغير كيف يعاملونك اكيد سيؤذونك وان لم يقصدوا ذلك فاذا قام شخص بفعل ما ولم تخبره بان هذا الفعل يؤذيك فهذا ذنبك هذا حقك ويجب الا تسكت عنه افصح عن ماتحب ومالاتحب ارسم لهم حدودك لكي لايتجاوزوها لتكون مرتاح البال وتكون متيقين بانه هو المخطئ ان تعداها وبهذا لن تظلم احد.. وان تجاوزوا الحدود رغم رسمك لها فهذا يرجع اليك اما ان ترد له بالمثل وهذا ليس عيباااا لكن الافضل والاكمل ان تصفح عما فعل(العفو عند المقدرة) فتظهر حسن خلقك وتتجمل بخلق نبينا عليه الصلاة والسلام.. وكذلك يظهر قوتك اي عدم الانتقام رغم قدرتك على ذلك. هكذا سيقوى قلبك ولن تبالي ان جرحت
لانك قمت بماعليك ويبقو هم بينهم وبين ربهم.. المهم لاتبادر انت بالسيئة كن طيب القلب حسن الاخلاق.

ثالثا:اهم شيئ وارجو تطبيقه :الجانب النفسي، لديه دور كبير.. اما ان يخفف عنك حزنك او يزيد الطين بلة.. اربط حزنك بافعال ايجابية مثلا اذا حزنت قم بالجري الخفيف.. او العب رياضة ما واربطه بافكار إيجابية تحدث مع نفسك دوما بايجابية.. ولا تربط حزنك بشيئ سلبي مثلا كلما حزنت تقول ان معدتي تؤلمني اذا بقيت تكرر ذلك ستعَود دماغك على فكرة حزن يساوي ألم.. وتصبح كل ما حزنت تتألم جرب العكس انزع من راسك فكرة حزن يساوي الم حتى وان شعرت بالم حقا قل هذا الم عادي حالة كاي حالة وستمر جرب وباذن الله سترى الفرق..


واخير واكررها الجأ الى الله راجع حسابتك معه هو من كتب عليك حزنك وهو من سيرفعه عنك بأذنه تعالى
اسف على الاطالة اتمني ان لا اكون قد خرجت عن نص الموضوع .. وارجو ان اكون افدتك ولو بكلمة

اسأل الله ان يذهب عنك حزنك ويفرج عنك همك
ويريح قلبك ويشرح لك صدرك ويرزقك بكل ما يريح بالك ويبعد عنك كل ما يؤذيك والسلام عليكم ورحمة الله.
 
راني وليت هههههه
تشفا العام اللي فات نورمالمو كقتلكم بنتي عندها إمساك مزمن أفيدوني مع العلم أنو حالتها مستعصية
كنت نسويفي مع الطبيب حتى قالي نديرولها سكانير بالاك دير عملية جراحية نقصولها مصرانها أيا كوصلت للعملية حبست
اديتها عند مرا داوي و ترقي علابالك واش كان السبب
قاتلي بنتك حساسة و تخلي فقلبها
مثلا بنتي الثانية كنزعف عليها تبكي
مصح اللولى فالغالب تسكت والمشكل تخليه فقلبها و هذا سبب ليها مشكل صحي وهو الإمساك مع الغيرة مع اختها و مناوشات الدار تأثرت
و قاتلي العلاج تاعها ريحي معاها خليها تحكي
ودوا رقات لها في زيت الزيتون هذاك الزيت حطيتو في بوقالة مع تين مجفف قبل ماتاكل تاكل ملعقة زيت قبل 3 مرات باليوم وقاتلي الانسان عموما كيتقلق مكلاه ياكل حتى يهدا و كتروح ترقد ندهن ليها كرشها بذاك الزيت و نقرا شويا قرآن
و صدقني لمدة ثلاثة سنوات نسوفري و في أربعة أشهر شفيت تماااااما و لله الحمد
ونا كنت متوقعة مستحيل تبرا
و سبحان الله شفيت نتمنى تتبع هاذ الخطوات راح يفيدوك خصوصا شرب الزين
ولا كانت عندك خلعة فالدار يرشوك ثلاثة مرات بماء بارد راني حكيتلك على شيء مجرب بالاك يفيدك و ربي يشافيك ياااارب
 
السلام عليكم

قال تعالى
"الذين آمنوا و تطمـءن قلوبهم بذكر الله
ألابذكر الله تطمـءن القلوب "
عليك الاكثار من ذكر الله و تحل مشكلتك و تيقن أخي أنك ستندهش من نفسك بحيث كل
ما تتلقاه من جروح لا تؤثر فيك مهما بلغت درجة الجرح
أراح الله بالك أخي حكيم
 
  • أعجبني
التفاعلات: Hakan
صح كاينة منها ... انت علمي و راك عارف تاثير التوتر على الهرمونات و الغدد و هذا ياثر على هذا و زيد و زيد ....
المهم نصيحتي ليك لي جربتها شخصيا و فادتني بزاف
هي
1 تعامل مع رب البشر ليس مع البشر ... بمعنى اذا ديرت اي حاجة مليحة متستناش شكر من الناس او انهم يوقفو معاك كيما وقفت معاهم ... دير فبالك بلي ربك كريم و مينساش و اكيد هو يجزيك ( علابالي بلي خاي قافز مع راسو و داير هاد الهدرة في بالو بصح ديرها فقلبك و حسها اكيد راح ترتاح)
2 اليوڨا .. و الله غير تفيد 100%
3 الرياضة ...
ربي يرزقك الصحة و العافية يا رب
 
  • أعجبني
التفاعلات: Hakan
عَنْ عَبْدِ اللَّهِ هُوَ ابْنُ مَسْعُودٍ قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " مَا قَالَ عَبْدٌ إِذَا أَصَابَهُ هَمٌّ وَحُزْنٌ اللَّهُمَّ إِنِي عَبْدُكَ ابْنُ عَبْدِكَ ابْنُ أَمَتِكَ نَاصِيَتِي بِيَدِكَ , مَاضٍ فِيَّ حُكْمُكَ , عَدْلٌ فِيَّ قَضَاؤُكَ , أَسْأَلُكَ بِكُلِّ اسْمٍ هُوَ لَكَ سَمَّيْتَ بِهِ نَفْسَكَ أَوْ أَنْزَلْتَهُ فِي كِتَابِكَ , أَوْ عَلَّمْتَهُ أَحَدًا مِنْ خَلْقِكَ , أَوِ اسْتَأْثَرْتَ بِهِ فِي عِلْمِ الْغَيْبِ عِنْدَكَ , أَنْ تَجْعَلَ الْقُرْآنَ رَبِيعَ قَلْبِي , وَنُورَ صَدْرِي , وَجَلاءَ حُزْنِي وَذَهَابَ هَمِّي , إِلا أَذْهَبَ اللَّهُ هَمَّهُ وَأَبْدَلَهُ مَكَانَ حُزْنِهِ فَرَحًا " . قَالُوا : يَا رَسُولَ اللَّهِ , يَنْبَغِي لَنَا أَنْ نَتَعَلَّمَ هَؤُلاءِ الْكَلِمَاتِ ، قَالَ : " أَجَلْ يَنْبَغِي لِمَنْ سَمِعَهُنَّ أَنْ يَعْلَمَهُنَّ "
 
بارك الله في جميع من قرأ و وضع ردا وكتب نصيحة بالفعل انهالت علي نصائحكم كما ينهال الغيث على. الارض الجافة فينعشها فيخرج الخير والزرع منها حقيقة وددت لو وضعت لكل أخ وأخت ردا يليق به ولكن الوقت ضيق و بديت الدراسة تاعي ربي يهنيكم كامل أدعولي نستقيم مع ربي سبحانو وننجح في دراستي بدون تعب او نصب بارك الله في الجميع
 
السلام عليكم
انا قبل مانقرى موضوعك ونقرى ردود الاخوة اكل كنت نظن انو انا برك اللى عندى مشكل الكتمان ونقلق ونزعف غير بلخف هكداا يديرلى الواحد جاست عيان نبدى كيما يقولو ناكل في قطوطى ههههههه مى منحكى لحتى واحد وحتى كى انا نحس انووشخص ما راه غضبان ولا زعف علياا منريحش مالغرى يكون يستاهل نبقى ندى ونجيب ونقنط في روحى حتى بديت نحس بالم شديد وضيق تنفس ودووك كى قريت الموضوع ديالك عرفت انوو المشكل راه من الكتمان بانواعه اسر الله خواطركم
 
  • أعجبني
التفاعلات: Hakan
سلام عليكم خويا
اول شيء ربي يشفيك ثاني شي نتمنى تقرا ردي مليح وتخمم فيه
علاه تحزن جربت قارنت روحك مع ناس اخرين مشلولين ناس مكفوفين مع اخرين محرومين من عايله مهم قارن روحك بناس راهم يتمناو بلاصتك وعلاه يغيضك تصرف عزيز ياما وياما جانا من الاهل والاصحاب والجيران الطمعة فربي سبحانو لو مخلي صلاتك صح ازعف لو مقصر مع ربي حقك تخاف وتزعف لو ظلمت عبدووكل عليك ربي هناك تخاف من انتقام ربي لكن علاه تحزن وتقنط روحك راح تجاوبني تقولي مش بيدي نقولك لالا بيدك تبع طريقة انو وقت يصرالك شي اي شي تحس بالحزن أو تعرفو يزعفك ثمثم القى بدائل اخرج ع ناس مثقفين تقسر في امور بعيده كل البعد على السوجي اللي قهرك القى بديل فالقرآن فالمسجد تتقلق تستغفر تروح تقعد فيه نص ساعه معليش ترتاح كاين بزاف بدائل مي احنا لالا نرجعو لقلبنا ونزعفو انت محتاج وقفة مع نفسك تعاهدها ما تخلي شي يقهرك مهما يكون الموت وعظمته وبرحمة ربي نتجاوزوه لما يموتنا عزيز ونعيشو ويروح ألم فراق الاحبة فكيف ما تقدرش تتغلب على حزن سببو ناس راهم عايشين حياتهم
عيش حياتك اخي اعطي جل وقتك لربي والله هذي عن تجربة فترة بعدت على امور بزاف وكنت مع مرضي وظروفي هناك قلت خلاص دنيا ما تستاهل مرضي ومن ربي وعباد علاه نتقلق منهم ركزت نحفظ قرآن وراني نداوي والحمد لله نفسيا مرتاحه ولو جسديا متضررة لكن خرجت روحي من حزن ضرني بزاف كيما انت
نصيحة خويا فيدك انت تبدل تفكيرك وربي يقوييك يا رب
 
انا تاني صرالي هاكذا نحس بحاجة تحرق في كرشي ونحب نرد حاشاك كيما قلت كنت نزعف وما نحكيش و كي رحت عند طبيب قالي تقلاق وعطاني سيرو تاع تقلاق والله غير الالم كامل راح من هاذاك النهار عندي خمس سنين مام وليت نتقلق وماولاليش الحمد لله
[/QUOTE]
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top