السلام عليكم أختي
بارك الله فيك على الموضوع و ربي يجعلك الشفاء و يعجل لك به و يمتعك بصحتك ما حييت
وعليكم السلام أختي كيف حالك وحال العائلة الكريمة ..اللهم آمين يا رب
حقيقة ما عنديش الخبرة الكافية باه نجاوبك على كل تساؤلاتك و لكن بحكم أنه مجال عمل زوجي فنقدر بإذن الله نعطيك بعض المعلومات
أول شيء قلتيه و هذا اللي بديتي بيه أنها أول تجربة لك في السفر خارج الوطن و هذا الشيء اللي يعانيو منو الكثير و الكثير من الجزائريين أننا لا نسافر عموما بالطائرة بل نستخدم معضمنا وسائل النقل البرية و هي الى حد ما سهلة الاستعاب و لا تتطلب شروط ولكن لو تسافري الى دول الاتحاد الاوربي رح تشوفي أن النقل البري عندهم بالمقارنة معنا جد جد جد جد جد متطور بحيث لو سافر واحد منا صغير في العمر و يفهم الانجليزية و الفرنسية رح يبقى يتفرفش و ما يفهم والو في الخرائط و مواعيد الباصات و متروهات الانفاق و يسقسي في المارة رغم أن كل شيء موضح قدامك الا أننا لم نألف هذا ههههه حنا لازمنا نسقسيو الروسوفور خويا وين رايح و تحبس في لاري ولا لالا أما عندهم فلا أحد يسأل مثل الروبوتات ولا أحد يشتري التذكرة كلش بالانترنيت الاشتراك كلش كلش أكيد رح نحسو بالغربة و بالجهل التكنلوجي هذا النقل البري
والله يا اختي انا قبل لا نسافر كنت درت تقرير فالنت وشفت فيديوهات بالتفصيل كيفاه نتنقل ونروح ونجي وصدقيني من اول يوم وصولي لتركيا مشيت فيها كاللي عندي فيها سنين وعرفت كل تفصيل دقيق بقالي مشكل لهجة مي سلكتها انجليزي مشكل ننتعي مكانش فاول مرة راح نسافر والا وسائل نقل عندهم للني جهزت نفسي حمد لله ما خلصتش طاكسياتتنقلت فترام وميترو ونشارجي لاكارت هذيك نعرف كل تفصيل ووحدي لاني قريت وسقسيت وشفت فاليوتوب ووليت نشوف خرائط حاطينهم فمحكة ترامواي والا ميترو انا مشكلتي كانت مع وكالات السفر نتاعنا هنا حاشا البعض بلاعطية درجة اولى
فما بالك بالنقل الجوي فالحكاية مختلفة سنجد أنفسنا في عالم لا نعرف دخلة المطار من خرجته واااالو و تحسي أنك متروكة ولازم واحد يمسكك من يدك على الاقل يفهمك من أين تحصلين على التذكرة و أين تدفعي الحقائب و مذا تستطيعين أن تتركيه معك و أين ستجدين أمتعتك و من أي بوابة تعبرين و أين تجدين رقم البوابة و من أي جهة الجمارك و عندما أصل كيف أصل الى الفندق وأين هي سياراة الاجرة أم هل الباصات موجودة و ماذا عن المترو كل هذا و انت تحت الضغط انك تسلكي طريق خاطئ انك تحجزي تذكرة و تفوتك الطائرة و هنا قيمة التذكرة تفوق قيمة ثلاث أو أربع رواتب ضغط كبييير
وتخيلي كل هذا وانت وحدك بالعكازات وتجري فحقيبة برجلك والحمد لله جزائريين وين تروحي فبهمالخير وربي ما يخليكش وين تروحي
أنت قلتي أنهم في وكالة السفر قالو أن المرافق سيكون معكم كان لازم تسألي هل هو دليل سياحي بمعنى هل ياخذك و يجيبك و في أي لحظة تطلبيه أم أنه مجرد شخص رح يتكفل بوصولك و مغادرتك و فقط اذا الاول فهذا تكاليفه باهضه و بالعادة يكون في خدمة مجموعة و ليس شخص واحد و يكون مقيم مع المجموعة في نفس الفندق و عندكم برنامج معه و رقم هاتفه عندك و رقم غرفته و تقدري تسأليه أي سؤال, أما اذا كان مكلف بدخولك و خروجك فهنا تلقايه واحد خدام و يعمل خدمة لصاحب الوكالة يعني مجاننا و تعرفي مع كلمة بينهم اذا صرا معاها أي مشكل (ونقصد بمشكل شيء خطير جواز السفر راح سرقة اموال حادث لا سمح الله) يعني غير مسؤول عن تنقلاتك أبدا أما اذا وعدك أنو يكون معاك دليل خاص بيك و دفعتي تكلفة زايدة بكثير على واش يدفعوا الناس عادة لأنه رح يدفعلو أجرتو باليورو و ما لقيتي حتى اهتمام فهنا راهو سرقك
بالنسبة للمرافق والدليل سياحي فرق انا هنا فهمتهم مانيش رايحة سياحة انا نحتاج اللي وصلني للفندق ووقت نعيطلو نهار نحصل نلقاه ويجي يرجعني من فندق للمطار وخلصت هنا ولما وصلت جاني وهو سوري وفهمتو خبرتو اني مريصة بزاف ونمرض فليل وانا ما نفهمش لهجة تركية يعيطولك من فندق تصرف خلصت هنا حق خدماتو ليا واكدت عليهم فالوكالة وقالولي خلاص من.دقيقة وصلني ومرضت وعيطتلو والو تلفون مطفي ووقت وظرت باسبور وصاشي فيها دراهم واوراقي وراديوات ماجانيش وساعدني لبناني فالفندق اللي كنت فيه اتصل بالشرطة وجاو للفندق وميم با ساعة كانو صوالحي عندي وهو ما بانش حتى اخر يوم نرجع وماجاش هو بعث صاحبو وزيد عيطت انا من هناك للوكالة رجعو يقلولي اسمحينا رانا هدرنا معاه ومفروص راه خالص وشوفي كيفاه ديري فوتها ميزيرية مي كي رجعت نعجبك ڨلبت عليهم البيرو وبهظلتهم وكانو ناس هناك باه يكرو معاهم بهدلتهم خرجو من عندهم حطيتلهم خرايبهم بالوحدة
أما في حكاية العمرة فكل ما قلته من قبل ضيفي اليه أن المعتمرين معضمهم فوق الستين سنة يعني مش لازم من يمسكهم من يدهم بل من يعتني بهم كل ثانية و هنا ننصحكم كامل خاوتي و خواتاتي ما تخلوش والديكم يروحو وحدهم للعمرة روحو معاهم يعني التفرفيش تاع المطار حكاية و دواءهم حكاية أخرى و أكلهم و كلش حتى التفاصيل الدقيقة اللي من المستحيل أي دليل سياحي يقوم بها صدقوني يطلبو منهم كل شيء حتى يطلب منهم البعض البحث عن نظاراتهم و فردة حذائهم أكرمك الله و أين نسوها و البعض نسى دواءه في فندق مكة و لم يتذكره الا في المدينة و لا يعرف حتى اسم دوائه ليشتري له الدليل غيره يعني مش محتاجين دليل محتاجين عناية
الله يوصلنا لذيك البلاصة ان شاء الله السفر الجاي لمكة ان شاء الله اذا ربي كتب وحقق الأمنية
أنا لا أقول بأن هناك من الوكالات من لا يتقي ربه في الزبائن بل هناك و مثله مثل أي مجال تلقاي المليح و الحاير لكن أختي يجب علينا أن نتذكر عندما نريد السفر رانا رايحين لبلاد أخرى لا تعرف عنا أي شيء ولا نعرف عنها أي شيء فلا تتوقع من الدليل أن يحل محل أبيك أو أخيك أو ابنك هو مكلف بتوصيلك الى مكان وأخذك منه حسب برنامج مضبوط ليس مكلف بدوائك و الاكل الذي لم يعجبك و لون السجاد في غرفتك
لا اختي الاكيد ما نعتمدش عليهم انا خلصت دراهمي حق خدمة معينة خاصة وضعي خاص نقدر نقوم بروحي ودرست مليح كلش عالبلاد اللي رايحتلها مي الاكيد لما نخلص حاجة او يوعدني بخدمة او غرفة يدبر راسو. خدمتو هذي
تطرقتي أختي الى نقطة مهمة و هي مشكلة الغرف و كون غرفتك التي حجزتها لا تشبه ما أراكي صاحب الوكالة صوره
وهنا أيضا فرق اذا كان الحجز في فندق يجب أن تعرفي اسمه و تبحثي في الانترنيت عنه و عن سعره اذا كان قريب لما يطلبه منك صاحب الوكالة فما هو معروض في النت ستجدينه في الواقع
أما اذا كان السعر بعيد فتأكدي أنه خدعك وأخذ الباقي في جيبه
ولكن هناك حالات حتى صاحب الفندق يتم فيها خداعه أو لنقل ليس خداعه و انما وضعه أمام الامر الواقع خصوصا في المواسم السياحية مثلا فصل الصيف تكثر الطلبات على الغرف و قد يتم حجز نفس الغرفة من قبل زبوننين سهوا و تعرفي هناك معارف و تدخلات فتذهب الغرفة لهذا و ذاك حقيقة مشاكل كبرى فما يجب عليك فعله هو أن تكوني ليليا هههه التي نعرفها لازم ديريلهم السمير هذا هو ما يخيفهم التبهديل و سوف يجدون الحل الله يسهل عليهم و اذا رضيتي بتنازل لازم تعوضيه في مكانه مثلا ناخذ غرفة ضيقة لكن مطلة عالبخر لان صاحب الوكالة مش رح يعوضك من بعد لانه هو أيضا ما عوضوهش لانو يسلكهم قبل و العقد يتضمن هذي الشروط
وانا هناك وليت دوبل ليليا ههه خاصة ما يفهمونيش وانا ما نبغيش نعاير وما يفهمونيش ههه
خيرت فندق حسب ميزانية وشفتو وورالي غرف واخترت وقالي خلاص خلاص كي وصلت للغرفة وشفتها قريب تغميت التواقي مقابلين الحيوط تلفيزيو صغير بزاف طفبه خير من تشعليه كانتشتا نهار وصلت القطرة عندي شفتها قتلو ما خلصتش باه نرقد فالحبس انا فبلادي فيها احباس طبعا كاين عمال يحكو عربية سوريين ولبنانيين لو تركي كنت نكلاطي نعايرو وما يردش ...هودت لباحة فندق قتلو ترجملهم انا يسمزكم ضرك تبدلولي شمبرة نطلع فوق لوتال لالالا ماراحش نقتل روحي نلعبها برك وشوفو تبهديل وزيد يشوف اردوغان كي نقولو حقروني وندير نداء لبلادي وتشوفو كي تتخلط شفت لبناني فمو طاح فالارض كي توم وجيري من خلعة قتلو انا مهبولة غير قولهم نديرها نورمال ضرك يا تتبدل شمبرة يا رجعولي دراهمي والا ضرك تشوفو واش يصرا ..اختك رقظت فاحسن غرفة مي قلبي يغلي على وكالة سفر وخلي وخلي امور بزاف بمعنى حبيت نوصلك مش المشكل فالبلاد اللي رحتلها ووسائل نقل مشكل انا لقيتو مع وكالة سفر
المهم ليسوا سراقين كلهم و ليسو ملائكة و لكن بشر , الشيء الوحيد اللي نقدر نأكدهولك أن عملهم يخضع لضغط غير ربي اللي عالم بيه زوجي مثلا مرض بالسكر و الصدفية و الروماتيزم و هو مازال صغير و كلها أمراض مناعة ذاتية تحدث من القلق تصوري تحجزي طيارة بنص مليار و فندق بميتين مليون مع الاخير يصب الثلج يقولولك كلش ملغي و هو سلك كلش قبل الوقت و فوقها الفنادق كلها محكومة محال يلقالك مكان آخر لزباينك خصوصا في موسم السياحة
ويوي علبالي فيها ضغط كبير ربي يكون معاه مي كاين اخرين والله لو جيت نحكم نغلقلهم الوكالات كاين ناس تخاف ربي وتخدم ولما تجي عفسة كيما قلتي انا عن نفسي نتفهمهم شوي عليهم وشوي عليا مي مكان حتى سبب وما تخدميش خدمتك اغلقي احسن
و زيد مع هذي الكورونا راهو في ثلاث أشهر ما خدمش و ما دخلش فرنك الزباين يطالبو بالتعويضات و هوما دفعوهم تسبيق لشركات الطيران و الفنادق و اللي للآن ما عوضوهم حتى فرنك قالولهم تحكموهم تذاكر لكن الناس ألغات سفرها كفاش يردولهم دراهمهم ؟ تذاكر؟
وي فترة هذي خسرت ناس بزاف ربي يكون فعونو ويفرجها على ربي شركات يعوضولهم
والله هذا اللي عندي أختي كما نحب نخبرك أن الانترنيت أصبحت سهلة جدا تقدري وحدك تحجزي الطيارة و الفندق و كلش بدون اللجوء لوكالة سياحية لكن نصيحة تحاولي تعرفي كلش عن البلد اللي رايحتلو و خط تنقلك من الالف للياء و مواعيد الباصات و كلششش لا تترك الرحلة عشوائية أبدا كل تفصيل لازم تعرفو من مطاعم الاكل الحلال شوف التعليقات التقييم كلش قبل رحلتك
طوووولت عليك سامحينا
سلام
