نحفظ ولا نفهم ولا نحفظ مبعد نفهم
ولا نفهم مبعد نحفظ؟
الجواب نلخصولكم في النقاط التالية :
أي درس ولا أي عنصر ولا أي تعريف حاول تفهمو وأهدرو بالدارجة داخل راسك واحكيه مع روحك مبعد أشفا على التعريف تاعو بالعربية.
مثلا : الحرب الباردة هي صراع إديولوجي بين المعسكر الشرقي بقيادة الإتحاد السوفياتي والمعسكر الغربي بقيادة الولايات المتحدة الأمريكية أستخدمت فيها كل الوسائل ماعدى السلاح
نتا أفهمها هكذا داخل راسك : إيييه ياالدنيا واحد النهار كي خلاصت الحرب العالمية 2 شعلت حرب جديدة ، ناضت بين زوج هوما الإتحاد السوفياتي نظامو اشتراكي والماريكان نظامها رأسمالي ، وهذو الزوج لي ميحشموش متقاتلوش بالسلاح تنافسو بوسائل أخرى إقتصادية وسياسية.
هذا الكلام أقلبو بالعربية بالطريقة لي تعجبك وراح يخرجلك التعريف هكذا
يااا إما :
الحرب الباردة : حرب بين المعسكر الشرقي بقيادة الإتحاد السوفياتي والمعسكر الغربي بقيادة الو م أ، وهي حرب من نوع آخر لم تستخدم فيها الأسلحة بل وسائل أخرى إقتصادية وسياسية ، ومن أسباب هذه الحرب الإختلاف الإديولوجي بين الطرفين.
يا إما تقدر تعرف هكذا
الحرب الباردة : حرب لم تستخدم فيها الأسلحة بل استخدمت فيها وسائل اقتصادية وسياسية حدثت بعد الحرب ع 2 بين القوتين الكبيرتين هما الإتحاد السوفياتي والولايات المتحدة الأمريكية وعرف هذا الصراع بالصراع الإديولوجي
ويا إما يخرجلك تعريف هكذا
الحرب الباردة : عرفت بالصراع الإديولوجي بين الإتحاد السوفياتي الرافض للرأسمالية والو م أ الرافضة للإشتراكية وقد استخدم في هذه الحرب كل الوسائل ماعدا السلاح
وكيما راكم تشوفو من الفهم قدرت نخرج عدة تعاريف ونقدر نخرجلك مئة تعريف آخر لماذا؟؟؟؟ لأني فااااهمها وفهمتها داخل عقلي واش المقصود من الحرب الباردة إذاً تقدر تعبر بطريقتك، وكلها تحسب عليها علامة كاملة لأنها صحيحة المحتوى.
ونفس الشيئ طبقوه مع باقي المصطلحات والدروس ومتأكد أنك راح تخدم في الإجتماعيات في الباك إذا تبعت هذي الطريقة "الفهم ثم الفهم" ، وإذا قدرت تحفظ وعارف روحك متنساش عادي اتكل على ربي واحفظ...
وفي الأخير إن شاء الله استفدتم