سهرة مع ضيف همس الوُرود ( بكواغطها )

[همس الوُرود]

السلام عليكم
مرحبا بالاخت عبير نورت. ​

وعليكم السلام و رحمة الله و بركاته
اهلا أخيتي أماني نورك ​

شكون هي عبير؟ ​

عبير هي بنت عادية عندها صديقة واحدة متحبش تكثر صحابات بزاف
و تحب تخدم وترقد وتاكل مع طاعة الله
شوية مشاكسة مع دارهم و كالم وهادئة خارج المنزل
والحمد لله
​

عبير ورمضان؟. ​

رمضان أحسن شهر يقدر يفوت عليا والحمد لله نحاولو فيه نصححو من أنفسنا اكثر ونثبتو اكثر .. وربي يوفقنا ويبلغنا رمضان القادم ويتقبل أعمالنا ان شاء الله​

وش متمنية في هذي اللحظة؟ ​

ينجح مشروعي باذن الله ​

بلاد حابة تزوريها؟ ​

السعودية​

ولاية زرتيها وتتمناي تعاودي تزوريها؟. ​

العاصمة​

ب وش تشتهر ولايتك؟ ​

بسد بني هارون من اكبر السدود في العالم والاثار الرومانية واول مسجد في الجزائر​

اجواء رمضان عندكم في الحومة وكذا كاينة بنة وجو رمضان ولا والو؟ ​

الحومة من قبل نعم لكن حاليا لا منعرفش اجواء الحومة الجديدة لاننا انتقلنا جدد ​

تعرفي تخدمي قلب اللوز؟​

نعم الحمد لله​

تعرفي تفتلي الطعام؟​

نطبخ الطعام بصح الفتيل خاطيني​

مقولة تتمشاي بيها في حياتك؟ ​

فلتقل خيرا او اصمت
​

شكون اقرب الأعضاء ليك؟ ​

حاليا أظن شيماء @زخرفة حرف ​

اول واحد تعرفتي عليه هنا؟​

Minette فتاة من قسنطينة ربي يحفظها وين ماكانت​

تفضلي اللمة او الفيس؟​

الفيسبوك صراحة لأنو فيه صديقاتي و صديقات سلفيات ماشاء الله يعني يفيدني اكثر​

عادة سيئة فيك وحابة تتخلصي منها؟​

ماننوضش بكري وربي يهديني​

موقف مضحك صرا معاك؟​

مشكلتي تشدني الضحكة كي يسكتو الناس منعرف هذا هو الموقف يلي نحسو محرج ومضحك نفس الوقت ..ونرجع لازم نشرحلهم بلي مانيش نضحك عليهم هادي طبيعتي برك​

نزيد نضرب دورة اذا تفكرت حاجة تهلاو ​

مرحبا حبيبتي ​

 

[الامين محمد]

مسا الخيرات و المسرات

اختي عبير المجرمة
كم تحفظين من القرآن
ما رأيك في شباب هذا الزمان
ما رأيك في محتوى القنوات الجزايرية عموما و في رمضان خصوصا
من هم اقرب الاعضاء اليك في اللمة
هل تصلين التراويح و الجمعة ام لا
العمل ام الزواج
زوج مترفح و غير خلوق ام زوج فقير و ملتزم
علاقتك بالانشاد و الغناء
و هل ما يزال الانشاد في مكانته ام اصبح مثله مثل الغناء بسبب آلات الطرب
افضل سنة في حياتك و لماذا
أسوأ سنة في حياتك و لماذا

ياسر عليك و لي رجعة باذن الله تعالى

 

[إلياس]

الله ييسرلك أمورك ويوفقك آمين​

اللهم امين يارب العالمين اجمعين

 

[بسمة القلوب]

اهلا بوردة اللمة
كم تتمنين ان يكون لديك اولاد في المستقبل؟
ما رايك في الجلباب ؟
ما هي مبادئك الاساسية في الحياة؟
من اي ولاية انتي؟
صح صحورك عزيزتي

 

[همس الوُرود]

اهلا بوردة اللمة

سلام أهلا غاليتي ​

كم تتمنين ان يكون لديك اولاد في المستقبل؟

ههه 2 رجال و 2 بنات ان شاء الله علاش تحشمي فيا​

ما رايك في الجلباب ؟

اللباس الشرعي للمرأة وهو واجب لأنه الوحيد اللذي يستر جميع بدن المرأة وهو لباسي وافتخر به الحمد لله ​

ما هي مبادئك الاساسية في الحياة؟

الدين .. كاين مبادئ بزاف كيفاش نلخصهالك منعرف نختصرهالك فكلمة الدين
منصاحبش بزاف البنات أهم شي صحبتي قليلة و تعاملاتي سطحية..كلش ناخذو بمشورة أهلي وفق الشرع .. أي شخص يتجاوز الحدود يمسح من خريطة حياتي الدين والاحترام اساس التعامل واختيار كل شيء على هذا الأساس يعني انك لن تكسري مبادئك اطلاقا ..
العائلة خط أحمر واي شخص يصل لعائلتي فقد وصلني .
لباس مستور .. جلوس في المنزل .. تعامل مع النساء ..اتخاذ قرارات وفق الشرع .. هذا يعني انك بخير والحمد لله
بلاك نبان عاقلة وسهلة التعامل بصح فالواقع بزاف صعيبة خاصة فالسنوات الاخيرة ههه يعني الحمد لله وعيت اكثر و كل شيء صار عندو حسابو ​

ا

من اي ولاية انتي؟ .

ميلة​

صح صحورك عزيزتي

وانتي زادة ربي يحفظك ​

 

[سعد606]

سؤالي هو الدعاء لي يسهل اموري ان شاء الله

اللهم مثلما أضأت الكون بنور شمسك، أضئ قلب صديقينا الياس بنور حبك،
ضياء لا ينطفئ أبدا، وارزقه رزقا دائما لا ينقطع، وصحة يستخدمها في
طاعتك، وحبب فيه خلقك

 

[إلياس]

اللهم مثلما أضأت الكون بنور شمسك، أضئ قلب صديقينا الياس بنور حبك،
ضياء لا ينطفئ أبدا، وارزقه رزقا دائما لا ينقطع، وصحة يستخدمها في
طاعتك، وحبب فيه خلقك

اللهم آمين يا رب العالمين اجمعين

 

[السلطانة]

وانا البارح ظهرت ندخل روطار

ايا معليهش نسقسيك ذرك


-نشفالك منين كنتي تثرثري في واش راك تهدر زمان كنتي صغيرة ههههه انتي وصحبتك نجلاء وقت كنت انا مشرفة
كنتو تمنشرو فيا في الرسائل هههههههه؟
حقا واش راهي نجلاء كنت نشتيها ديك الطفلة


-واش رايك فزواج الاقارب مع او ضد ووعلاه؟




-شعور معنديش اخت
هل اثر فيك ولالا؟



هل تقدري تديري مرت خوك كيما اختك؟

 

[همس الوُرود]

وانا البارح ظهرت ندخل روطار

ايا معليهش نسقسيك ذرك

وعليكم السلام اهلا ساندريلا زماني ههه
مرحبا اختي تفضلي​

-نشفالك منين كنتي تثرثري في واش راك تهدر زمان كنتي صغيرة ههههه انتي وصحبتك نجلاء وقت كنت انا مشرفة
كنتو تمنشرو فيا في الرسائل هههههههه؟

وي هههه الله المستعان والله البارح وانا نشوف فمواضيعي ونضحك على روحي كنت مهبلاتكم وصبرتو عليا ماشاء الله ههه
وعلاش نمنشرو فالرسائل اختي نمنشرو فالواقع راهي جارتي هههه
معناك نڨصر مش تمنشير وانما نحكو عادي وش يصير فاللمة اكل نعاودوه ..وصراحة بنات الحومة الكل كانو يعرفو اللمة ويحكو وش يصير فيها..
نشفى حكينا عليك نهار تزوجتي هههه حكينا على يدكوالخاتم وغير بالخير متخافيش ههه​

حقا واش راهي نجلاء كنت نشتيها ديك الطفلة

لا أعلم كل وحدة راهي عايشة حياتها اختي ورحلنا من الحومة هاديك أكي تعرفي صداقة الطفولة مرات تخلص وهادي الصداقة خلصت فما نعرف احوالها ماتعرف احوالي وهي ليها صديقاتها وانا ليا صديقاتي​

-واش رايك فزواج الاقارب مع او ضد ووعلاه؟

مع عادي اذا كان الزوج ذو اخلاق طيبة وهي ذو اخلاق طيبة و من عائلة وحدة راهي انتيك .. و المشاكل راهي عند كل دار سما عادي ​

​

-شعور معنديش اخت
هل اثر فيك ولالا؟

أثر فيا لما كنت صغيرة لكن حاليا لالا .. بصح مرات تقولي كون عندي يلي تعاوني فالدار ههه وكلش مكتوب ربي مرحبا بيه الحمد لله​

هل تقدري تديري مرت خوك كيما اختك؟

أكيد صراحة نقدر نديرها كيما ختي اذا دارتني كيما ختها طبعا وتبق البنت يلي حبها أخي و دارها مرتو وام اولادو فاكيد رايحة نحبها ونحترمها ربي يحفظهم ان شاء الله
بارك الله فيك على الاسئلة حبيبتي ​

 

[Golden Man]

مرحبا بيك اختي جيت متأخر شويا بصح ماعليش ماني طالقك والله غير ندي قسمتي هههههه
وتاني "ماكنتش عارف اذا كان راكي من ميلاف يا ترى ناس زغاية والقرارم ولا شلغوم وفرجيـوة ولا نروحو جيهة وحدة اخرى ههههه

كانو زوجات الرسول عموما ينادونهم سواء صحابة الرسول اوجمع الناس ينادونهم بأسمائهم عادي (خديجة, عائشة ...الخ). فما رأيك في بعـــض نساء اليوم التي يرفضون الفكرة وكأنها عيب !! وبدلا من ذالك يفضلن مناداتهم باسم أم علقمة وأم كذا وكذا
وفي تطبيق عملي واش اسمك هههههه

اذا خيرتك بين ختم تفسيــر القرآن أو حفظه.. ماذا تختارين ؟

بيوشيم درستيها في أي جامعة ؟

التلفزيون أو الأنترنت ؟

همس الورود وحب الأكل ؟
همس الورود والرياضة ؟
همس الورود والعلاقات الاجتماعية عموما وصلة الرحم خصوصا ؟


بزاف عليك ..اكتفي بهذا القدر ..فهو قدر المتأخرين

 

[همس الوُرود]

مرحبا بيك اختي جيت متأخر شويا بصح ماعليش ماني طالقك والله غير ندي قسمتي هههههه

أهلا بك عادي راني هنا ​

وتاني "ماكنتش عارف اذا كان راكي من ميلاف يا ترى ناس زغاية والقرارم ولا شلغوم وفرجيـوة ولا نروحو جيهة وحدة اخرى ههههه

لا هادي لا هاديك ميلة صونطر ​

كانو زوجات الرسول عموما ينادونهم سواء صحابة الرسول اوجمع الناس ينادونهم بأسمائهم عادي (خديجة, عائشة ...الخ). فما رأيك في بعـــض نساء اليوم التي يرفضون الفكرة وكأنها عيب !! وبدلا من ذالك يفضلن مناداتهم باسم أم علقمة وأم كذا وكذا
وفي تطبيق عملي واش اسمك هههههه

التسمية شيئ والكنية شيئ آخر فقد كانت امنا عائشة رضي الله عنها تكنى بأم عبد الله وكانت أم سلمة فكانو يحبذون الكنية
اما بالنسبة لاسمي فهو عبير​

اذا خيرتك بين ختم تفسيــر القرآن أو حفظه.. ماذا تختارين ؟

الحفظ ثم أنا حافظة فيسهل علي البحث عن تفسير مع حفظته ان شاء الله ربي يرزقنا ختم الاثنين​

بيوشيم درستيها في أي جامعة ؟

جامعة ميلة​

التلفزيون أو الأنترنت ؟

الانترنت​

همس الورود وحب الأكل ؟

صراحة نحب نشرب الحليب برك و نتذوق بصح الاكل بزاف خاطيني​

همس الورود والرياضة ؟

نموت عليها ومتبعة مع كوتش من اليوتوب فالمنزل الحمد لله​

همس الورود والعلاقات الاجتماعية عموما وصلة الرحم خصوصا ؟

علاقاتي الاجتماعية سطحية جدا ولا احبذ العلاقات الكبيرة لكي أعيش بدون وجع راس والحمد لله.. صلة الرحم الحمد لله رانا لباس بصح كورونا هادي منعتنا مؤخرا نلتقوا مع اقاربنا والحمد لله انها انتهت​

بزاف عليك ..اكتفي بهذا القدر ..فهو قدر المتأخرين

أهلا وسهلا​

 

[أبو عاتكة]

هديتك




زيدي هاذو باه منكونوش سبة في تكسار المواعن جليلوس



بالسلامة واتهلاي في روحك.

 

[Golden Man]

تشرفنا باستضافتك وشرفتينا بمعرفتك أكثر اختي عبير
الله يحفظك وويوفقك لكل خير ..ونتمناولك اقامة طيبة هنا مع اخوتك

كنت نوجدلك في هدية قبل غلق الموضوع ( خفت الشيخ فريد @فريد أبوفيصل يزيد يجيبلك هدية "مهراس كما اتاع الآخرين هههههه ف ستر ربي مادارهاش خيرلك على الاقل مصحف ومواعن ..
ونزيدك الهدية الي كنت ديجا خيرتها تفضلي


//////// ////////// /////////

:: للغلق ::
///////// /////// //////////
والسهرة اليوم مع رجل الاستخبـارات السريـة هكان فيدان @Hakan ​