احكينا خونا فريد احكينا و حط ليفوطو هههه ياخي المدام ماعندهاش الباسوورد تاع اللمة
بالاك نزيدو نخطبولك الزاوجة
يكثر خيركم هههه ياودي علاه تشقوا في ارواحكم
EZZAGETT عليا
في وقت الحطة كانت الاختيارات في الالبسة محدودة وتقريبا متشابهة بحكم انو كان الطراباندو هو المسيطر على اسواق الالبسة والسلعة يجيبوها من الحدود والجديد يلبسوه كامل كموضة جديدة كل عام فكرة جديدة
الكلاسيك والجينز والسيرفات والعربي اربع مودالات للبس
الكلاسيك يستلزم شراء اونصومبل متكامل من قميص وسروال وصباط وصعيب في الاختيار والتنسيق بديت لبستو في مرحلة الثانوية
اما الجينز عندك الحرية في التنسيق يصلح حذاء مع جينز ويصلح حذاء رياضي معاه يمكن تلبس بليغة يمكن تلبس تريكو او فاست او قميص او حتى ديباردور وتفتح القميص هفهافي مع نواضر الريبان او تزير روحك بسنتورة جلد اصلي مزوقة بالبيناز
والسيرفات تكون منفوخة اذا مكانتش تحمل كل الوان العالم متحلاش
المهم مكانش اللبس الضيق نتاع هاذ الوقت كاين التيب او اللارج والالوان مكانش مشكل فيها الا الوردي
واللبس العربي اللي هو القندورة والقميص بلوازمه ستيل سعودي او محلي
بعد مشوار طويل وحافل مع اللبس والتبياش دخلنا مرحلة الزهد والاكتفاء بامور بسيطة واحيانا نلتزم يستيل لا يفارقنا معندناش الرغبة او الوقت كيما بكري في التصناع مثلا عن نفسي اكتفي طوال الصيف بارتداء القميص القندورة لانها سهلة ومريحة وفي الشتاء سراول الجينز العادية مع حذاء عادي وفاست تكون مريحة وخفيفة المهم من داخل تكون محصن مليح من البرد واعني بالعادية في الالوان تكون سانمبل لا رسومات ولا كتابات ولا شخبطات
احب الالوان الداكنة الازرق والبني لا احب ارتداء الفاتح من الالوان الا القميص طبعا يكون ابيض او اصفر ممكن
نحب التناسق اذا كانت اللبسة غير متناسقة وحسيت بخلل منلبسهاش ونلجئ للقميص
منحبش مرحلة شراء لباس ليا لاني اتعب في ايجاد تنسيق يلائمني ويكون بثمن معقول لهذا تبقى تحوس على كل شطر في جيهة حتى تجمع لباس لائق مريح وموافق في السومة على قد حالك
بون نكملو الشريط الوثائقي اللي كتبتو هههه
منين تتكسا؟
كاين الاسواق الطراباندو مبقاش كي بكري الان الخردة والسومة خيالية وكاين محلات لكنها مبالغة في الاسعار تندم كي تدخلها وتحشم كي تجي خارج منها سيرتو اذا قلبلك اللبسة وحطها قدامك وانت اصلا تخمم في السومة ماشي في النوعية وكاين محلات تجيب البسة باسعار مقبولة لكن تصطدم بالنوعية احيانا لكن تظطر لتقبلها احيانا واحيانا تلقى لبسة مليحة مع سومة مريحة تغتنم الفرصة ولا تتسرع في الشراء
في منطقتنا معمرة بالمحلات نتاع الالبسة وانت وصواردك
والله مرات تجي تشري حاجة ليك تولي تخمم تشريها لوليداتك مام المدام نفس التفكير ماهيش متكلفة وتخمم ديما بالتقشف
رانا ااااا مغبونين في الحطة والتبياش هههههه
المهم كي تشوف الوليدات فارحين ومكفيين هاذيك هي حطتنا
وهي المليحة المليحة تجيك باطل من السعودية او فرنسا كهدية المهم القياس الصحيح انت وزهرك.
كيما خطرة جاني سروال من فرانسا كي قلبتو لقين ورقة ديس ولا صون اورو المهم صرفتها ب 24 مية من ذاك الوقت وانا نقلب كل سروال يجيني كادو هههه
انتهت نشرة الثامنة في امان الله
