كل يوم معلومة طبية بالدارجة

[أم إسراء]

سلام الله عليكم ليوم جيتكم بحكاية ومنها نستخلص معلومات مفيدة بإذن الله

نبدا بسم الله ، كاين طبيب اسنان يحكي على أحد الأصدقاء تاعو كان يعاني من ألم فضيع في أذنه ووجهه وقام بمراجعة أكثر من طبيب بالأنف والأذن والحنجرة وبعد الفحصوصات تبين انه لا يعاني من أية مشاكل تسبب الألم بالأذن!!

أيا بالصدفة خبر صاحبو الدونتيست بمعاناتو حتى نصحو يروح عندو للعيادة لإجراء فحص لأسنانه ربما يكون الألم بسبب أحد الأضراس خصوصآ ضرس العقل!!

بعد الفحص تبين أنه يوجد نخر يعني سوسة كبيرة بضرس العقل بالفك السفلي ( la dent de sagesse du bas )! وبعد ما دارلو راديو تبين أنه يوجد تسوس عميق! مما تسبب بحدوث التهاب بعصب الضرس ( pulpite irréversible)!!
تم خلع ضرس العقل بناءآ على طلب المريض لرفضه القيام بالمعالجة و لي هي كيما نقولو تنظيف و حشو العصب ولا trt canalaire

وبعد أيام عيطلو و قالو بلي الآلام والمعاناة لي بقات معاه لأسابيع إختفت!!
و سقساه عن علاقة ألم الأسنان بمناطق أخرى بالوجه مثل الأذن وغيرها!!؟؟

ايا قالو يا صديقي بإختصار:

هنالك بطب الأسنان ما يدعى باللغة العربية
(بألم المنعكسات أو الألم غير المتجانس)
وباللغة العلمية (Douleur référée ) يعني ألم نحسو بيه في بلاصة بعيدة عالبلاصة لي قاعدة دير فالالم لأن الأعصاب جد مترابطة ومعقدة

بحيث أن الألم يكون بمنطقة والمسبب الرئيسي للألم بمنطقة أخرى، بمعنى آخر أن الألم الذي يشعر به المريض يكون في منطقة يغذيها عصب مختلف عن العصب الذي يتوسط الألم الأساسي،
كذلك في كثير من الأحيان يكون الشعور بالألم ب سن بالفك العلوي وبعد الفحص نلقاو أن سبب الألم وجود نخر ب سن بالجهة المقابلة من الفك السفلي والعكس كذلك!!
لذلك التشخيص الصحيح للمرضى لمعالجة الألم جذريآ له الدور الفاعل بإنهاء معاناة المرضى

دمتم
​

بالفعل ما قلته..
بصح وش العلاج أو الوصفة اللي تخلينا نروحو لطبيب الأسنان رح أصير عجوز و أخاف جدا منه هههه لي صديقة دكتورة أسنان أي مشكل توصفلي الدواء عن بعد .
يعطيك الصحة ع المعلومات القيمة.. زيد ديرلنا تحفيز للذهاب لدكتور أسنان

 

[أم إسراء]

السلام عليكم ورحمة الله وبركاته
أهلا بأحبابي الحلوين..

كيف حالكم أتمنى أن تكونوا جميعا بخير يارب ..

اليوم جيت نحكيلكم على مرض شائع جدا جدا خصوصا الفترة الأخيرة ، تسمعو بزاف بمرض السيلياك خصوصا عند الاطفال ولا كيما نقولو حساسية ضد الغلوتين ..

الناس لي عندها هذا المرض عندها حساسية ضد كل ما هو غلوتين ما تقدرش تاكلو بمعنى القمح بكل انواعو ، الشعير بكل انواعو ، والشوفان..

غير ياكلو هذو يجوهم الأعراض لي هي عبارة عن آلام في المعدة ، إسهال إضافة الى نحافة الشخص من شدة الاسهال وكاين حالات يكون كاين انتفاخ ، تعب ، امساك ، عقم وصعوبة في الحمل مرات حتى طفح جلدي او تلف في الاعصاب وكاين بعض الحالات تكون صامتة مكانش اعراض ولكن قليلة بزاف بزاف اغلبها تكون مصاحبة للأعراض لي قلتلكم عليهم ..

والسبب عادة هو مناعي.. يعني الأشخاص لي عندهم مرض السيلياك المناعة تاعهم تهاجم الغلوتين لانو فيه وحد المادة اسمها غليادين آلفا ) gliadine alpha) لي تتعرف عليها المناعة على أنها شيء خطير وتهاجمها ..

بالنسبة للسن لي يقدر يجي فيه هذا المرض من سن ست شهور إلى سن سنتنين ( الاطفال كيما قلتلكم)

وكاين فترة أخرى ممكن يجي فيها بين 20 سنة و40 سنة ( يعني يكون صامت لمدة طويلة ثم يظهر ) وانا شخصيا شفت حالات في المستشفى وين كبار وعندهم السيلياك يعني ما تحطوش في بالكم الأطفال فقط

توجد دراسات تقول أن الرضاعة الطبيعية تحمي من مرض السيلياك
و دراسة تقول أن الاطفال لي يوكلوهم الفرينة قبل وقتهم في سن صغيرة يعني قبل ست اشهر يكونو عرضة لهذا المرض اكثر من باقي الاطفال

بالنسبة للعلاج كاين حل واحد ووحيد وهو تجنب الغلوتين تماما مدى الحياة وراح نمدلكم بعض الأطعمة لي يكون فيهم :
الخبز ، المعجنات ، البسكويت ، الكعك ، المقارون ، الكسكس ، البرغل ، بعض الصلصات ، الحساء الجاهز ، المعلبات والقائمة طوييييلة
والبديل هو الذرة ومنتجاتها والأرز ومنتجاته كيما قلتلكم مدى الحيااااة..

هذي هيا معلومة اليوم ، إن شاء الله استفدتو أحبابي الحلوين ، لا تنسوا مشاركة المعلومة مع احبابكم والدعاء لي في ظهر الغيب
دمتم في أمان الله وحفظه
إلى معلومة أخرى إن شاء الله
مشاهدة المرفق 175042​

بارك الله فيك على المعلومات القيمة.
و كسؤال: هل الهاشيموتو يأثر عليه تناول الغلوتين؟ أو من المستحسن استخدام المأكولات الخالية منه و الاعتماد على ما هو موصوف لمرضى السيلياك؟.

 

[ذات الشيم]

بالفعل ما قلته..
بصح وش العلاج أو الوصفة اللي تخلينا نروحو لطبيب الأسنان رح أصير عجوز و أخاف جدا منه هههه لي صديقة دكتورة أسنان أي مشكل توصفلي الدواء عن بعد .
يعطيك الصحة ع المعلومات القيمة.. زيد ديرلنا تحفيز للذهاب لدكتور أسنان

الناس قع تخاف من دكتور الأسنان
وانا مثلك بزاف نخاف ومشكلتي نضطر نروح مرة على مرة توجعني ضرسة
ربي يجعل صبرنا في ميزان حسناتنا

 

[ذات الشيم]

بارك الله فيك على المعلومات القيمة.
و كسؤال: هل الهاشيموتو يأثر عليه تناول الغلوتين؟ أو من المستحسن استخدام المأكولات الخالية منه و الاعتماد على ما هو موصوف لمرضى السيلياك؟.

المفروض اكل كل ما هو خاص بمرضى السيلياك فقط
حتى الحلوى وكاين تاعهم سبيسيال
لانو بلاك كمية قليييلة برك تأثر سلبا على صاحب المرض
وفيك بارك الله
مشكورة على المرور والتفاعل غاليتي

 

[faith8]

بالفعل ما قلته..
بصح وش العلاج أو الوصفة اللي تخلينا نروحو لطبيب الأسنان رح أصير عجوز و أخاف جدا منه هههه لي صديقة دكتورة أسنان أي مشكل توصفلي الدواء عن بعد .
يعطيك الصحة ع المعلومات القيمة.. زيد ديرلنا تحفيز للذهاب لدكتور أسنان

شوفي اختي الأعراض باينة تشوفي برك لون أسنانك تبدل برك يليق تروحي لطبيب الأسنان ايضا الألم أو انتفاخ أو أي حاجة خارجة على الاعتياد
الزيارة تكون للتفقد برك consultation وبلا ارادتك ماراح يديرولك حتى حاجة بصح يقولولك واش كاين بالاك يمدولك راديو يبين افضل حالة أسنانك يعني خطوة بخطوة باش تنحي الخوف تع العيادة شيئا فشيئا
وطبعا كي تروحي عند طبيب موثوق ويحسسك بالراحة هاد الشي راح يعاونك
عندي بنت خالي هكا لقات طبيبة اسنان ماشاء الله تساعفها وتروحلها غير بلعقل
الله يسلمك اختي نحن في الخدمة

 

[أحلامي]

حطيلهم على التصبغات الناتجة على بيتا كاروتيين يرحم باباك انا منيش قادرة نحط ههههه مي موضوع مهم هلكو رواحهم الناس بالخزعبلات

 

[أم إسراء]

شوفي اختي الأعراض باينة تشوفي برك لون أسنانك تبدل برك يليق تروحي لطبيب الأسنان ايضا الألم أو انتفاخ أو أي حاجة خارجة على الاعتياد
الزيارة تكون للتفقد برك consultation وبلا ارادتك ماراح يديرولك حتى حاجة بصح يقولولك واش كاين بالاك يمدولك راديو يبين افضل حالة أسنانك يعني خطوة بخطوة باش تنحي الخوف تع العيادة شيئا فشيئا
وطبعا كي تروحي عند طبيب موثوق ويحسسك بالراحة هاد الشي راح يعاونك
عندي بنت خالي هكا لقات طبيبة اسنان ماشاء الله تساعفها وتروحلها غير بلعقل
الله يسلمك اختي نحن في الخدمة

الأكيد ما قلته أختي لكن دائما ما أتردد في اللجوء له، رغم تهالك أسناني للأسف ان شاء الله املك القوة الاسبوع القادم لأزوره.
يعطيك الصحة ع النصيحة

 

[faith8]

الأكيد ما قلته أختي لكن دائما ما أتردد في اللجوء له، رغم تهالك أسناني للأسف ان شاء الله املك القوة الاسبوع القادم لأزوره.
يعطيك الصحة ع النصيحة

روحي انا نشجعك ديري consultation برك باش تنحي الخلعة وتألفي المكان من بعد مرة أخرى ابدأي العلاج والله المستعان ما تستهزايش بصحة أسنانك
الله يسلمك

 

[ذات الشيم]

السلام عليكم ورحمة الله وبركاته
مساؤكم سعيد أحبابي الحلوين أتمنى أن تكونوا جميعا بخير

جيتكم بمعلومة جديدة و معلومة اليوم حبيتها تكون خفيفة ظريفة ..

اليوم راح نديكم للقلب ونحكو على احتشاء عضلة القلب ولا IDM ( infarctus du myocarde) ، تسمعو بزاف يقولو IDM واليوم جيت نفهمكم وش هي بالضبط

باختصار القلب تاعنا هو لي يضخ الدم لكامل اعضاء الجسم ولكن هو باش يضخ الدم لازملو الدم ( فهمتوها ) يعني عندو شرايين تغذيه يسموها الشرايين التاجية ( les artères coronaires) هي لي تجيب الغلوكوز والمغذيات للقلب باش يخدم ولكن مرات هذي الشرايين يصرالها انسداد بسبب ترسب الدهون فيها تضياق وبالتالي ما يقدروش المغذيات يوصلو للقلب يولي ما يضخش مليح..

والناس لي معرضة لاحتشاء عضلة القلب هوما :
•كبار السن
•لي عندهم ارتفاع مزمن لضغط الدم
•لي عندهم مرض السكري
•لي عندهم سمنة مفرطة
•لي عندهم حالات في العائلة مشابهة يعني الام ولا الاب صراله هذا المشكل من قبل
•لي عندهم ارتفاع نسبة الكوليسترول في الدم
•التدخين ( مع الاسف اغلب الامراض سببها التدخين )

الاعراض لي يحسهم الشخص :
✓ آلام صدرية وسط الصدر تمتد حتى الذراع الأيسر مع صعوبة كبيرة في التنفس ما
هذي الحالة لي منتشرة عند اغلب الأمراض
مرات يجونا امراض يشتكو من الام في المعدة فقط وكي نديرو تخطيط القلب نكتشفو بلي عندهم IDM يعني تقدر تجي بآلام في المعدة

اذا عندكم اشخاص في العائلة عندهم هذو عوامل الخطر لي ذكرتهم وحسو بهذه الاعراض ادوهم سريعا للاستعجالات.. لانو قبل ست ساعات يمكن استرجاع وظيفة القلب لكن اذا جازو ست ساعات مع الاسف يفقد بدون رجعة وممكن يموت الشخص ..

بالنسبة الوقاية:
• التوقف عن التدخين
• ممارسة الرياضة بشكل يومي
•تقليل الدهون المسؤولة عن الكولسترول
• متابعة الضغط والسكري بعد سن 40

هذي هيا معلومة اليوم أحبابي الحلوين ، قتلكم خفيفة وحسيتها طويلة شوي والله معلابالي كيفاه
نلتقي في معلومة أخرى إن شاء الله
​

 

[ذات الشيم]

تفاعلوا معي حفزوني لإنني أصاب بالإحباط
( أصلا مرات أمر بفترات أحب فيها اعتزال كل شيء ) ​

 

[فادي محمد]

بارك الله فيك وجزاك الله خيرا

 

[إلياس]

ماهي مضاعفاته اذا لم يعالج الشخص عليه

 

[ذات الشيم]

ماهي مضاعفاته اذا لم يعالج الشخص عليه

يموت الشخص للأسف

 

[ذات الشيم]

السلام عليكم ورحمة الله وبركاته
كيف حالكم أحبابي الحلوين أتمنى أن تكونوا جميعكم بخير

أعتذر عن الغياب نفسيتي متعبة جدا بسبب ما يحدث هذه الأيام ولا أجد رغبة في الكتابة كثيرا


وجبتلكم اليوم معلومة خفيفة
حبيت نحكيلكم على داء الكلب ( la rage ) لي مع الأسف أصبح منتشر أكثر من قبل وفي نفس الوقت كاين ناس واعية اكثر من قبل ..

هذا المرض يديرو وحد الفيروس متخصص بداء الكلب نلقاوه أكرمكم الله في لعاب الكلاب أو القطط خصوصا خصوصا الكلاب الضالة وتنتقل للإنسان عن طريق العض ، أو الخدش أو اللحس إذا كان الإنسان فيه جروح في يدو والحيوان قام بلحس تلك المنطقة ..

مع الأسف هذ المرض قاتل قاتل قاتل ثلاث مرات ركزولي عليها بمجرد ما تظهر الأعراض نقعدو نستنو الشخص يموت وما نقدرو نديرولو والو مع الأسف بمعنى ما نستهزاوش أبدا أبدا بخدشة تع قطة ونقولو معليش ، حذاااااري

لأنو مع الأسف يصيب الجهاز العصبي وتبقى الأعراض ثلاثة أشهر بعد الخدش أو العض او اللحس باش تبان..

الأعراض في البداية تكون عبارة عن تنميل في منطقة العض يحس بيها الشخص ويمكن يتجاهلها والأعراض الخطيرة فعلا تكون عبارة عن هيجان الشخص ، اللعاب تاعو يكون بكمية كبيرة ، يولي يحوس يعض حتى هو ( قريب تحسبو انسان مجنون ) بسبب آلام في الفك تاعو والعرض لي يموت بعده الشخص مباشرة هو فوبيا الماء ، الشخص يولي ما يقدر يشوف الما ، ما يقدر يسمع صوتو ما يشربو

لذلك نصيحة لأي واحد مربي قط وتعرض لخدش منو خاصة إذا ما كانش داير الفاكسان أو تعرض لعضة كلب من برا يدير الخطوات التالية قبل ما تجوز 48 ساعة !! :
يغسل المنطقة بالماء والجافيل والصابون جيدا مدة 15 دقيقة
ثم يتوجه خلال 48 ساعة للمستشفى وين ياخذ اللقاح لي يبطل مفعول الفيروس قبل ما يوصل للجهاز العصبي

بهذه الطريقة يقدر يحمي نفسو من الإصابة بداء الكلب لكن للأسف إذا تهاون حتى بانت الأعراض لا يوجد علاج نهائيا

كيفاش تعرفو حيوان مصاب بداء الكلب :
يكون هائج بزاف عنيف وعدواني ، عندو سيلان اللعاب وعادة يموت مباشرة بعد عض الشخص
وكي يموت ويدوه لمخبر التحليل ويفتحولو مخو يلقاو عندو وحد الجزيئات في المخ اسمها (corps de négri ) ..

هذي كانت معلومة اليوم أحبابي الحلوين ،، أتمنى تكونوا استفدتم من المعلومات لي قدمتهالكم
كونوا حذرين من القطط والكلاب ما تلاعبوهمش حتى يأذوكم ولي عندو قط يفاكسينيه باش يتهنى وأتمنى لكم السلامة والعافية

في أمان الله​

 

[ذات الشيم]

سؤال : من مكتشف لقاح داء الكلب ؟

الغش ممنوع ​

 

[إلياس]

لدي سؤال
اذا لم يعالج الشخص على عضة الكلب ماهي آثاره

 

[أم إسراء]

سؤال : من مكتشف لقاح داء الكلب ؟

الغش ممنوع ​

لا ما ضربنيش الزهايمر باستور ولا كيف يسموه

 

[ذات الشيم]

لدي سؤال
اذا لم يعالج الشخص على عضة الكلب ماهي آثاره

إذا كان الحيوان سليم ما يصرالو والولكن اذا كان مصاب بالكلب والانسان ما عالجش يتطور يجوه اعراض داء الكلب التي ذكرتها وبالتالي يموت
لذلك نؤكد نحن الأطباء في حملات تحسيسية دائما انو الانسان ما يتجاوزش 48 ساعة لازم يروح يدير لقاح

 

[ذات الشيم]

لا ما ضربنيش الزهايمر باستور ولا كيف يسموه

برافو سوسو لويس باستور

 

[لمعانُ الأحداق]

ماشاء الله
موضوع مميز وجميل جدا
مليء بالفائدة
بارك الله فيك دكتورة ونفعَ بك

في المتابعة .. ​