تجربتي في فطام طفلي

[يعقوب 1967]

رد: تجربتي في فطام طفلي

مساء الخير ...... الطريقة اللى نستعملها بعدما نفطم صغيرى هى انى نضع قطعتين من الاسفنج على الصدر وهكدا انريح من هديك المعانات يعنى الاسفنج يشفط الحليب بدون ماتشعرى .....
اما فى مايخص رضاعة الطفل الاولى انا بعد ساعة من الولادة نبدا انرضع ماهيش 24 سا لانو مفيد لصحة المراة والطفل لانو نصيحة منين كنت صغيرة نسمعها من امهاتنا اقولو ان الرضاعةبعد الولادة مباشرة تفيد المراة لاستلرجاع الرحم الى مكانه الطبيعى وماتنضرش من الام الولادة منبعد لان الرحم له علاقة بالثدى علميا اتمنى انى افدتكن بما انكن تقريبا فى سن بناتى حفظكن الله

 

[أم أمين23]

رد: تجربتي في فطام طفلي

اختيار موفق لاول موضوع
كم كانت مدة الرضاعة؟؟؟
انا عندي زوج كبار الاول فطمتو 10 اشهر لاني كنت حامل بالثاني والثاني كمل العامين تاعو
وما هي الصعوبات التي واجهتك اثناء الفطام وكيف تغلبتي عليها؟؟
الاول تعبنب من ناحية انو يرقد لازم شاد في يدي والا فوق من كرشي هبلني باش نحاها مرة بالمسايسة ومرة بالضرب
وكم هي المدة التي استغرقتها لتفطمي صغيرك ؟
الاول في سمانة تقريبا الثاني ما حسيتش خلاص يمكن لخاطر خدا كفايتو
ماهي البدائل التي استعنتي بها لتعويد طفلك على فكرة الفطام ؟
الاول دبرو عليا الكبار نديرلو الزنجبيل ياك ريحتو قاوية غير شمو عافها واشنو عوضها بيدي لازم كي يرقد يحكم يدي والا يرقد فوق كرشي قعدت تقريبا شهر وانا هكاك وبالشوي نحيتهالو مع العلم اني انا كنت نمدلو الحليب تاع القرعة في الليل برك قبل الفطم وكي فطمتو كان اصلا متعود على الحليب الصناعي
الثاني ما تعبني ما تعمبتو كمل 23 شهر ووحدو بطلها بالصح لازم ثاني تنحيلو الببرونة يعني استعملي الكاس تاع الصغار والا كان يعرف يحكم الكاس العادي افضل وافضل

 

[امونة الشاوية]

رد: تجربتي في فطام طفلي

السلام عليكم
موضوع جميل وقيم وهكذا نستفادو من تجارب بعضنا
انا حقيقة ابني الاكبر لم ارضعه كثيرا ههه الوسواس مسكين ارضعه 4 اشهر فقط لاني كنت اظن انه كان لا يشبع
اما بنتي الثانية ارضعتها عام ونصف ووليت حبيت ندخللها البيبرون با تشبع مليح
وليت استحليت البيبرون وتهنيت منها هه وليت درتها المر واصبر وهي عقار يباع وذوقو مر جدا يحلل في الماء ويدهن به الصدر او البيبرون او السوسات ولما يمصو الصغير يولي يعاف ويخاف

 

[أم محمد وأمين]

رد: تجربتي في فطام طفلي

السلام عليكم أنا عندي ولدين الأول أرضعته عام ثم أفطمته لأني كنت حامل لقيت صعوبات كثيرة معه خاصة عندما يكون مستيقظا لأنه كان يعتمد على حليبي كثيراً فجعلت الحناء فيه وعندما يراني يبدأ بالبكاء أما في الليل ينام مع جدته (أم زوجي)لأني أسكن معهم حتى لا يطلب مني الرضاعة عندما ينهض في الليل ، أحضر له الحليب الإصطناعي وأعطيه لأمي(أم زوجي)تتركه عندها وعند سماعها له يبكي تعطيه الحليب فيشربه بقي هكذا لمدة 4إلى 5أيام حتى تعّوّد أما إبني الثاني أرضعته حتى العامين ففي تلك الفترة جائني ظرف طارئ لأسفار فوجدتها فرصة وتركته مع جدته لمدة 3أيام وعندما رجعت طلب مني أن أرضعته فجعلت الحناء فيه فكرهه وكلاهما كانا لا يأكلان الطعام أثناء الرضاعة وبعدما أفطما بدآ يأكلان الطعام عادي

 

[بنت الجسور المعلقة]

رد: تجربتي في فطام طفلي

موضوع رائع راني معاكم كشما نتعلم باش كي يجي وقتي نكون ساجية ونعرف هيهيهيههيي D:

 

[ام رحاب]

رد: تجربتي في فطام طفلي

السلام عليكم راني عدت والعود احمد

المهم دوك نحكيلكم على تجربة امي وخالاتي ومن بعد نجي لياا انا

امي تفطم الصغير لما يلحق حوالي عام ونص عاميين باه يكون يعرف تحكم راس الثدي نتاعها اما تطليه بالقطراان ولا الدوا لحمر ولا تدير الكولا مع الشعر باه تولي مقرفة والطفل ينفر منها لاكن قبل ماتفطمه تعلمه البيبرونة وتقطع رضاعة الليل ملي يكون في شهر شهرين المهم يولي الطفل كي يحب يرضع تعطيهاله فينفر منها ويحكم البيبرونة ويناام يعني بسهولة تفطمه وتعوده على الاكل عاادي لاكن المشكل هو الام راها تعاني باه ينشف الحليب تتعتامد على المناشف الساخنة مع المعدنووس وتعطيني الولد يولي ينام عندي بما انو انا الكبيرة ..........

اما خالاتي يعتامدو نفس الطريقة الا انهم يعانو من رضاعة الليل فالحل هو انا يرسلو ولادهم عندي نيمهم مدة اسبوع كي ينساو يدوهم ...

اما انااا رحاب قطعتهالها لما لحقت 9 شهور كنت حامل باختها وما فقتش حتى ولى عندي 3 اشهر حمل اعتمدت نفس الطريقة الا انها كانت تنام عند امي في الليل مدة اسبوع وتهنيت الا انني عانيت باه ينشف الحليب ماحبسش حتى زادت هند

وهند فطمتها الشهر الي فات كي كملت عاميين رحت انا وزوجي رحلة مدة اسبوه هو كان خدام وانا رافقته والبنات خليتهم عند امي لاكن من الصغر علمتها البيبرونة هي الحل الامثل باه الطفل مايعانيييش امالا ولات ترقد بلا رضاعة حتى يوم رجعت مديتهالها ماحبتش ترضع الا انها كانت تسلم عليها وتحب تحط راسها عليها وترقد هادي هي تجريبتي اي استفسار راني هناا
​

 

[يعقوب 1967]

رد: تجربتي في فطام طفلي

ياسيدات انصحكن ادا كانت المرة حامل وهى ترضع ماتفطمش صغيرها الابعد 5 اشهر من الحمل لانه الرضيع ينضر لانه الحليب اللى يكون يرضع فيه فى بداية الحمل يكون فاسد فلازم يرضع اللبة اللى ينزل فى الخامس من مدة الحمل الجديد هكدا تحافظى على صحة صغيرك

 

[بنت لبحر]

رد: تجربتي في فطام طفلي

انا اختي مسكينة رايحة تهبل مع بنتها عندها عامين و 4 اشهر و حبتش تتفطم فطمتها 3 مرات برقية و محبتش و دارتلها المر و الصبر و حطتلها القطران و حطتلها الدواء لحمر والو مسكينة لحاجة لي يقولولها عليها متنفعش رايحة تهبل ههههههههههه مع هي عندها ليسطومة و متقدرش تشرب الدواء على جال بنتها و الطبيبة قالتلها لازم تفطميها باش تشرب الدواء و تبرى مي الله غالب


تعيشوة لي حابة تربح دعاوي الخير تعاونها ههههههههه

 

[يعقوب 1967]

رد: تجربتي في فطام طفلي

انا على حساب تجربتى لو تقدر تصبر عليها تبعدها عليها يعنى تبعثها الجداتها او اختها نهار ولانهارين وتخفف الرضاعة طول النهار وفى هدا المدة تكون غايبة عليها يعنى ماتكونش امقابلتها باش تنسى الرضاعة ممكن تنجح فى فطامها اتمنى انى نكون اعطيتك فكرة ولو بسيطة ونشاء الله تنجحى فيها

 

[بنت لبحر]

رد: تجربتي في فطام طفلي

انا اختي بعيدة علينا احنا في ولاية و هي في ولاية اخرى من المستحيل تمدلنا بنتها

 

[ام منصف]

رد: تجربتي في فطام طفلي

بنت لبحر
لازم تكون صارمة في ذلك
رانا كامل امهات وقولوبنا رهيفين على اولادنا بصح لازم شوية حزم وشجاعة باش تقدر تفطمها
كيما قالتلك السيدة يعقوب 1967 مادام جربت معاها كل الحلول تحاول تبعدها عليها عند عجوزتها والا سلفتها على الاقل في النهار وفي الليل تحاول بطرق اخرى تهزها تسهر معاها تتعبها باللعب ....
صح راح تتعب بصح لازم تغلب روحها
​

 

[ام منصف]

رد: تجربتي في فطام طفلي

أم أمين23
بارك الله فيك عائشة على الاضافة والمرور

​

 

[ام منصف]

رد: تجربتي في فطام طفلي

امونة الشاوية
مليح كي راكي تعاونيهم بالبيبرون باش ما تتعبيش امبعد وتسهل عليك عملية الفطام
انا اولادي ما يحكموهش بكل الطرق حاولت حاولت بدون جدوى
​

 

[ام منصف]

رد: تجربتي في فطام طفلي

أم محمد وأمين
مليحة كي ولفتيهم يرقدوا بعيد عليك هكذا تسهلي على روحك لانو اصعب شيء في الفطام هو الرضعة الليلية
شكرا على المرور
​

 

[مطبخ الأحلام]

رد: تجربتي في فطام طفلي

السلام عليكم

أم منصف الله يجعل كل نصيحة من نصائحك في ميزان حسناتك وأن يكتب الله لكِ مكانآ في جناته ^_^

مزال ماجاوش المواضيع الي يجي فيها الحماس

بالتوفيق للجميع

موضوع جد قيم
​

 

[بنت لبحر]

رد: تجربتي في فطام طفلي

ام منصف و يعقوب 1967 ربي يجازيكم و يحفضكم و اختي قاثلكم بارك الله فيكم. رايحة تجرب

 

[أم أمين23]

رد: تجربتي في فطام طفلي

تفكرت حاجة ما قلتهاش الي تفطم صغيرها وما زال عندها الحليب ما تنساش تروح للطبيب يعطيها حاجة تحبسو لخاطر راه مشكل كبير خصوصا لو كانت حامل انا في الجمل الثاني فطمت وليدي الاول وقعد عندي الحليب حتى حنجرلي وكي ولدت وليدي ما كانش يقدر يمص من واحد فانا كنت نمدلو غير واحد ولاخر ساعة ساعة بلاك حتى خمجلي وعملت عملية مالا ردو بالكم اللعب مع الحليب كي يبقالكم

 

[ام منصف]

رد: تجربتي في فطام طفلي

أم أمين23
يعطيك الصحة على النصيحة
صح الحليب كي يقعد يتحنجر وعندو تاثيرات اخرى حتى على المراة اللي ماهيش حامل لانه ممكن يتسبب لها في مشاكل مرة اخرى اذا حبت تحمل
​

 

[ام فيروزا]

رد: تجربتي في فطام طفلي

موضوع جد رائع اختي شريفة فى القمة مشكورة ونشكر كل الامهات
انا كيما تعرفو عنذي 2 ولاد وعمري مدرتلهم البيبرو والسوسات الاول رضعت عامين غير ايامات وكان ميكلش طول معتمد غير علي حليبى وحليبي كان كفيه بزيادة كون يخرج مع باباه ويطول نمرض من صدري يضرني الحليب وساعات يعود في الدار وشبعان ويعود الحليب هابط واحد الوقت معتش نهبط لدار شيخي غير من الحليب لي يهبط والمشكل انو مكانش ياكل خلاص تلقايني ديما نخمم واش اندير كي نفطمو بصح بقدرت ربي فاتت ساهلة عليا وعليه كيفاه دعيت ربي انو اصبرنى و يصبروا اصبرنى انا على الصطرة نتاع صدري لان كان فيا الحليب ياسر وهو عليا ونضحكم وكانت عجوزتى تقول عنا نكتب لى الصغير كى نفطموه على حاجة كسرة تمر المهم ماكلة باش حبو لرضاعة يتنحالو ويلصق فى حب هذيك الماكلة انا واش درت كى كنت ندعي نقول ياربى حب فى الرخساس ومش دقلة ملا نحطهم كل ليلة عند راسى و صدقونى اموت عليهم ضرك ومكانش يبكى ياسر فى الليل ونحتهالو طول بصح نهار الخامس عطيتهالو في نص الليل برد قلب بصح من هذاك الوقت ميحوسش عليها خلاص
بصح ولدي الثاني هبلنى لحد الان رضعت 16 ,18شهر ماشفيتش كنت رايحا نكملو الرضاعة جاتنى مشاكل وتقلقت فطمت المهم هو كان ياكل بصح متعلق بصدري كي يلحق الليل تلقاونى موجدا روحي يبات يبكى وانا راهي المشاكل وقلقة مكبرتلي قلبي و عذبنى و فاتت ضرك عند 3سنين 4اشهر كي يشوفها يرضعها يدق يدو يلعب بيها يبوسها يموت بالفرحة عيا ينساها

 

[ام فيروزا]

رد: تجربتي في فطام طفلي

ونزيكم انا مكنتش نتقلق من رضاعتي لولاتي انا نفرح ويزيد من نرضعهم بعد منذر كي زيدت بيه قاعد يبكى و حطيت حذيا سكت ورقد وزدت ساعة ورضعت بصح طه خرج جيعان مع حكمت بلاصتي رضعت باه سكت والحمدلله انهم مايمرضوليش ومانعطيهم نى فتامينات ني سروات فتح الشهية راني نمشى معاهم عادي كي تاع بكري كسرة وعسل حر و دهان و بسيسة ومش دقلة