- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلام عليكم أهل اللمة الكرام
ان شاء الله راكم لاباس؟
( لي مايجاوبش على هاد السؤال يسلك الضريبة
على كل حال الاسبوع الجاي يبداو الامتحانات ورايح يكون غيابي طويل شوي على اللمة
مالا قلت نحط موضوع قبل مانغيب، اصلا عندي مدة طويلة ماوضعتش موضوع
( راني مفرطة شوي في قسم واش راك تهدر :$ )
على كل حال رايحة ندخل في الموضوع مباشرة وراهو باين من عنوانو وهو
{الدروس الخصوصية في المجتمع الجزائري}
بكري في وقتنا كي كنا صغار وفي وقت والدينا، كان الاستاذ يقوم بالواجب تاعو على اكمل وجه + التلاميذ تلقاهم
منظمين ويتبعو الدرس ، وهكا يخرجو كامل من القسم فاهمين ، و حتى ولو مافهمش
تلميذ الدرس تلقاه يروح للمكتبات يحوس في الكتب الخارجية على الجزء لي مافهموش ويتعب باه يلحق للمعلومة ،
بصح دركا الاستاذ مايديرش خدمتو وماعندوش ضمير وإذا يدير خدمتو مايلقاش الجو المناسب، ونص التلاميذ غير تشويش
وتمسخير ولعب، وفي الاخير يخرج التلميذ ماش فاهم
درك دير لولدك ولا بنتك ولا خاوتك "ليكور" باه تعاونهم ويحسنو من مستواهم معليش ، بصح باه يروحو يحوسو ولا يجوزو الوقت هادي لالا
اصلا درك الدروس الخصوصية مافهمتش اذا ولاو تجارة ولا موضة ؟؟؟ تبقى حاير:-o
تلقى جارة تتفاخر على جارتها وتقولها ولدي مدايرتلو ليكور في الرياضيات وفيزياء وعربية وفرنسية وانجليزية ورياضة ورسم وجري
وقفز وطبخ ورقص ووووو ، اي دروس دعم ماش دروس تقتل بيهم وقت الفراغ ولا هواية لولدك ،
واصلا داروهم باه يعاونو بيهم التلميذ لما يلحق لمرحلة مايقدرش فيها يستوعب، ماش طفل في حضانة الأطفال
مدايرينلو دروس خصوصية في الانجليزية ، يعني هادا كي يلحق ل 12 و13 سنة يدير دروس خصوصية في تفكيك القنابل مثلا؟؟ :s
وزيد العادة الجديدة لي زادت خرجت الطفل يقول لباباه انا مانقدرش نقرا مع الغاشي ديرلي ليا وحدي ،
يولي الاب يديرلو حصة ليه وحدو مع الاستاذ بمليون للشهر ولا اكثر ، ولا باه مايتعبش الابن يجيبلو طول الاستاذ للدار يقريه :down:
زيد خليه يجوّز الامتحانات في الدار وخلاص
ولي دوختلي مخي وحيرتني
لي كبير ويقرا ثانوي ، درك ماش العبد يهبل
يا ناس فكرو مليح ، الدروس الخصوصية باه تعاون ولدك، ماش باه ترمي دراهمك على طاقة ،
خاطر كاين حتى لي يدير دروس خصوصية عند استاذين من نفس المادة، مثلا يوم الجمعة عند استاذ رياضيات
ويوم السبت عند استاذ رياضيات خلاف ، تبا ماهذا ؟؟
ولا زعما استاذ تفهم عندو ال x واستاذ تفهم ال y ؟؟ تبذير للنقود وتمسخير صراحة
وزيد اذا ولدك متفوق علاه ديرلو ليكور خلاص؟ ، كاين تلاميذ تلقاه الأول على مستوى القسم يجيب معدل 19
" اواه لازم نزيد نعاونو بليكور " :s زعما تعاونو باه يدي معدل 20 ولا 21 مثلا ؟؟ ههه
تبعو في الدار برك واوقف عليه باه يراجع دروسو وخلاص. على الاقل يخلي بلاصة لشخص آخر محتاجها ،
صراحة مشكلتنا حنا علما ولادنا التفنيين، غير يقول الطفل مافهمتش كلمة نروحو نجريو بيه للدروس الخصوصية،
خليوهم يتعلمو ويكتاشفو وحدهم، اشريولهم كتب خارجية وخليوهم يبذلو مجهود وكي مايلحقوش صح تما يرحمها ربي
ماش طفل في عمرو 6 سنين مازال حتى ماتعلمش ينطق الحروف والأرقام تبداه بليكور، هكا ما يكونش عندو مجهود
خاص بيه
على كل حال هذا رأيي الشخصي، ونتوما يا ناس اللمة واش رايكم؟؟
توافقوني في الرأي ولا لا؟
نخليلكم المجال باه توضعو ردودكم القيمة
تحياتي
:$
