علاش غير الزواج برك ؟

[لؤلؤة قسنطينة]

هاو عيطتلي صاحبتي الو الو صافا وي صافا الحمد لله وش صارة كش جديد ..؟
وي حنونة كاين قصيت شعري
اوووه ماتقوليشتزوجتي مدوك دراكم خلاص ,,,شكون هذا وين ,,,؟ومنين ووش يخدم تعرفيه من قبل ,,يسكن في حومتكم ,,عربي ,,قبايلي ,,بولحية و ,, (أسكتي يعطيك ضرسة )
اصبري يامصيبة قصيت شعري بويسك عندي عام وهو مشدود كي الطوماطيشة وقريب خرج منو الدود قلت نقصو قبل مايتدود صافا هكا ​

هههههههههههه الله يعطيك الربح قتلتيني ضحك
والله يخي حالة كاش جديد هادي مرتبطة غير بالخطبة والزواج
خلي بالاك حنا لي ماعندناش الجديد رايح يكون عندنا جديد في القريب مكرا هههه
ربي يحفظك سرسورة​

 

[Hakan]

قريت كامل الردود ان شااء الله مع الصباح نردلكم
راهو مول السيبار يعيط سلام خاوتي وتصبحو بخير
اشربو حليب نيدو مع الصباح لاسنان اكثر صحة وقوة طبيعية ههه​

 

[السلطانة]

وعليكم السلام هههههه فلان ازوج وفلانة ازوجت فكرتني في نسا حياتهم بين عرس فلان وفلان كل يوم يجاراو السوجي هاذا ميفضش في النهار تسمع لكلمة هاذي اكثر من ماتشوف دارككم

 

[sanaya]

هاد التفكير ببساطة يعكس المستوى الثقافي نتاعنا
منيش ضد فكرة الواحد يخمم يتزوج
مي ملازمش يكون الزواج هو محور الحياة
لازم يكون فيه أهداف أخرين وطموحات
نتمنى فهمتوني تشاااااااو

 

[Hakan]

​

السلام عليكم
مسا الزواج ياو اللي يقلق انهم حفظوا كلمة "الزواج نصف الدين" منعرف شحال تتكرر فالنهار كتر على الاذان ههههه ياو كاين خلاف الصيام ووصانا بيه الرسول عليه الصلاة والسلام
مالا واش اللي يحفظ كلمة يتفلسف , تركب فالبيس الهدرة على الزواج وفالسبيطار ويهدروا على الزوااااج , الغنا ولا على الزواج"زوجوني اواي واي بغيت نديها اماما " ابابا راسي حتى الزواج
وغزى الكُتاب تهز كتاب تلقى الهدرة على الزواج بزاااف واش توحموا على الزواج يبانلي ولالهم مرض والمشكل كي يتزوجوا يولوا يغنوا ابابا شيبنا ههههه
معندهمش واش يخمموا فيه من غير الزواج مثلا وزيد علاه يخلوا الصيف باش يتزوجوا فيه اوووو تسما وقت السخانة والبحر تقتلونا بالدربوكة والفريك فالشتا خير الدعوة اموا تحيا
من السبات هههه
موضوعك خلاني نهدر ونشطني بلا فيثامين ههههه
مشكور

اهلا بيك الصحفية نتاعنا ههه
هذيك نصف الدين قاتلهم اسكتو الزوجة ما تعرف حق الزوج والزوج ما يعرف حق الزوجة ومن بعد بقلك نصف الدين
ياي ممكن الزواج يخربلك النص اللي زعما عندك هههه
وي هاكي تشوف في كل محضر يحضر السيد زوااج
مي اللي دوخك نسبة العنوسة كبيرة ونسبة الطلاق كبيرة
ونسبة الطاقة الشمسية عالية ههههه
سلام ​

السلام عليكم
و الله يا خويا امين ق الزواج هذا راهم ردوه زقوق
الواحد من صغرو و يفكر
يا بن عمي راني لسع عندي 20 و راها خدمتلي في قضية الزواج ذا
خاصة مع الدار ...ضروك و الله هذاك النهار برك نسمع بعض الافراد في دارنا يهدرو قالوا نخطبو لفلان لي هو انا
و كذا و كذا
ياااااو مزال ...يااااو
يابن عمي و الله تحير في بلاد الزواج فيها قضية راي عام
بصح الله غالب
اذا كان الزواج هذا الناس صعبوه ...بالسيف يولي زقوق
كن الناس تسهل الزواج ...و الله ما نزيدو نسمعو بمواضيع تاع زوجتي العزيزة و كذا
المهم
الله يجيب الخير برك
بارك الله فيك خويا حكيم ​

هاك تشوف ا الطبيب تكره حياتك التعيسة اللي عشتها بسبب هذا السوجي
حتى تحسب انو خلقت للتزوج كي شغل ناشيونال جيوغرافيك
وي والله جبت فكرة مليحة سهلو الزواج افتحو الحدود هههه اك فاهم
نتزوجو ومانزيدوش نسمعو بيه
مي نسمعو بسوجي آخر اللي هو الطلاق يرجع الراجل يزوخ بالطلاق والمراة تزوخ بالخلع ربي يحفظنا
شكرا للمرور ​

 

[Hakan]

السلام عليكم ورحمة الله وبركاته
ياااه نظن بلي هذا الموضوع يمعني عليا
وأنا أول مرة حكيت على العروس علاش يعني

ها صح تعيا ياو مين تروح يحكوا غير على هذا الموضوع .. ومين تروح الموضوع فلانة تزوجت فلانة خطبت فلانة تطلقت فلانة بايرة هبلونا .. حتى وقت ليكونترول يولو يقولو نروحو نتزوجو

صح الزواج سنة الحياة وفيه خير كبير و فضل عظيم ولكن الناس كثرت كثرت أحكو على الجعلولة و شوية ماكلة أحكو على الرقاد أحكو عاى الستر أحكو على النكت الدراسة مشاريع .. الدين أحكو ومبعد مرة عاى مرة أحكو على الزواج..
تالمو ولاو يتمسخرو والطفلة الي تتلاقايها تقولك مخطوبة عدنا مانمنوش
مؤخرا برك وحدة تقرا معايا تخطبت الناس كامل تباركلها وأنا ماهدىتش كامل فالموضوع خليتهم يهدروا ورحت
حسبتهم يتمسخروا

زدنا قعدنا نقراو فلونفي قعدت ورايا وهاااااا تحكي على خطيبها وكيفاش وبلي يعيطولو بإسم فيه السين و هي جاها إيم تع دراري حولت السين إلى صاد بش يبان كبير
وتحكي وتحكي وأنا في عوض نتبع مع الأستاذة قاعدة نخمم زعما هادي صح خطبوها أوااه أكيد تتمسخر

بالسيف دورت ليها قلتلها نتي صح تخطبتي

يا بن عمي كوارث كوارث .. حتى اليوم كنا نتغداو جات جاية قالو هاااي جات المخطوبة هوما عيطولها وهي مش مقيمتهم كامل أيا قلتلهم خلونا منها حتى ويلا جات تهبلنا بخطيبها:p

بلعقل برك والله كرهنا صح موضوع واحد في العالم يحكوا عليه

ها حابة تتزوجي تزوجي أحكي شوي على الموضوع وخلاص علاش تحصلي فيه

شكرا على ااموضوووع​

هههه رجعتينا لمواضيع الاخ مالك قالك ختشبوها
والله غير يغيضوني منين ذاك الفتيات نحس ما عندهمش الزهر مساكن طول
يشوفو في الزواج هو ودخول الجنة كيف كيف
تشد هذاك الهاتم اللي في يديها ترقد معاه تغسلو طيبلو ديرلو الريحة المليحة
ههه والله شيء مؤسف المهم ربي يرزقك بالزوج الصالح من ميلة خخخخ​

سلام عليكم خوينا حكيم كيراكم ..؟ والله لطليت على قلبي من قبيلا برك قلت وشبيهم الناس يحكيو غير على الزواج الزواج ​

ههه أخاااه أخاه حتى هنا في اللمة غير مواضيع الزواج ​

هاو قصف على البايرات العنوسة وووو هاو على رايكم في الزواج عبر الانترنت هاو وش رايكم اذا تخلي زوجك يدخل للفيس ​

و....و ​

خخخ لدرجة انو كي قدمت استقالتي هنا في اللمة قالولي وش صارة وقيلا تخطبتي ​

شنو هاد شو دخل الخطوبة في اللمة ​

و تدخل للفيس او تتلاقى بأصدقاءك ​

وش كش جديد ..؟ كش خطابة يعني لهذه الدرجة الجديد فقط في الخطابة والزواج والاشياء الاخرى مايتسماوش بالجديد ​

هاو عيطتلي صاحبتي الو الو صافا وي صافا الحمد لله وش صارة كش جديد ..؟​

وي حنونة كاين قصيت شعري ​

اوووه ماتقوليشتزوجتي مدوك دراكم خلاص ,,,شكون هذا وين ,,,؟ومنين ووش يخدم تعرفيه من قبل ,,يسكن في حومتكم ,,عربي ,,قبايلي ,,بولحية و ,, (أسكتي يعطيك ضرسة )​

اصبري يامصيبة قصيت شعري بويسك عندي عام وهو مشدود كي الطوماطيشة وقريب خرج منو الدود قلت نقصو قبل مايتدود صافا هكا ​

​

اوووه عمبالي مدووك ايا صافا نتونسو ​

​

​

تبااا والله بزااااف تعويقة ومرgوووها كامل


/////////////////////////////////

يووووه وأخيراا راح يطلع الرد هذا خخخ ملي كتبتو من قبييييييلا مابغاش يطلع حدث عطل في البيسي ومزية ماراحش وش كتبت
خخ كنت نعصر في روحي باه نخرج لكلام بالدارجة كيما قالها هذاك تع "ميــgريا في دوارنا " "أأأأه خليتينييي نعصر في روحيااااه وانت تعرفي لعربياااا"
....
أيا أشكرني على الرد وعلى المرور أحكيماااا

​

اهلا سارة وانا نشوف فيك طولتي في الرد معليه ربي يشافي البيسي
كاشما نهار تجيك رسالة من حمامة تقلك ها راكي طولتي ما صيدتيش راجل هههه
الزواج رجع هو وزيت الزيتون كيف كيف
يظلو يحكيو على الفوائد نتاعو واهميتو في تبيض الاسنان هههه
شعب مريض ويمرضك معاه خيتي مازالك صغيرة والمكتوب نتاعك ما يديه حد آخر
شكرا على الرد الانيق مزوق على توت فاسون بارك الله فيك ​

 

[Hakan]

السلام عليكم
خلاص يا خويا حكيم نديرو حملة # لا للزواج ولا نطق إسمه
واش يا خويا راهم يمعنيولك واقيل هههه
حنا مشكلتنا مكاش عليمن نهدرو
نروحو للسياسة ونمشرو فيها هاك تعرفنا حبيتهم يرفدونا بقبزة زر هههه
ولا نهدرو على البالون لي يطلعلك لاطونسيو والسكر وكل المشاكل
ولا نهدرو على الخضر والفواكه فالسوق هههه الله غالب يجو يشويوك لوكان تهدر عليهم
ديجا الواحد كي تقولو يماه أشي كاش حاجة يتخبا سامة باش يظهر مرة اخرى هههه
نهدرو على الخدمة الواحد مديقوتي كامل منها ويزيد يجي يهدر عليها ماجياش
الحل الوحيد لي نقدرولو نهدرو على الزواج ( الهدرة برك عليه هههه)
نجو نمنشرو في الناس لي متزوجين ولا لي مخطوبين ولا لعراس
معليش خلاص ضرك نداء الى كل الوحدات ههه
لي يكتب على #الزواج لايعتمد موضوعو وعندو خصم النقاط هههه​

ههههه نديروها الحملة لا للزواج نعم للحياة السعيدة
تتفرج بالتيليفيزيون واش تحب
ماكانش اللي يخربلك في الظام نتاعك تجيب مخلوقة تسمطلك حيااتك
تنحيلك البروتابل وكل يوم تفتشلك فيه
تظل ديرونجي فيك وين رحت وين هبطت
خخخخ حتى الرقاد وما تخليكش ترقد آلاز يا بن عمي السرير نتاعي وحدي نياهاهاهاههاهااا
قالو زواج وما زواج هههه
التمشير فيها فيها لازم ها لازم نسمطولهم الزواج هههه على الاقل يا تزوج اول ما تخم
يا ما تتخممش ومن بعد تتزوج ماشي حياتك تخمام في الزواج ومن بعد تتزوج عى 35 سة
اين العدل خخخخخ ​

 

[Hakan]

السلام عليكم
فكرتني في وحد الفيديو نتاع باك يقول ان هذا البكالوريا اصبح ياكل معك ، يشرب معك اصبح شغلك الشاغل دوك لازم يقولو ان هذا الزواج اصبح ياكل معك يشرب معك شغلك الشاغل ههه صح هو سنة الحياة مي كل حاجة في وقتها مليحة مش النهار كامل و لا العام كامل و حنا نحكو عليه كيما قلت مكانش لي عندو هدف في حياتو ناس ختمت قرآن طلعت للقمر و هوما مازالو يدورو في نفس الموضوع مي نتا مازال مشفت جماعة النسا في الاعراس خاصة جماعة ختشيبي ياو يمرضو تمنشير فلانةتزوجت و فلان تزوج تبالي فارغين شغل
المهم ربي يهدينا و يهديهم ان شاء الله
يعطيك الصحة على الموضوع
في امان الله ​

ياي الباك كامل وتخمملو في عامو مي الزواج حياتك كامل وانت تخمم
حتى ووتتزوج تخمم في الزواج وكل يوم تقول علاه تزوجت انا خخخخ
شعبنا مريض بهذا السوجي كي شغل ما عندهمش في واش يحكيو
هبلوا الله لا تربحهم ههههه آمين المرة الجاية اللي يحكيلي على الزواج
نقلو ياخويا هاتلي 80 مليون وما تزيدش تهبلني بيه ​

كيما قال الاخ سكور اعملوا شعار لا للزواج
انا تبانلي هي قضية عقليات وطبيعة كل اسرة حابة تفرح بوليدها
بصح الوقت تبدل واصبح الشاب هو الي يقرر ماشي الاسرة الي تخطب وتبدلت بزاف عقلية انو يفرضو رايهم
انا كتبت على الزواج لكن من منظور اخر وليس حملة
سلام

ياي حابة تعذب وليدها زعما بيهم الفرح
ياي راهم يزوخو برك وتطفر في الطفل والطفلة
مكانش الي يحبلك الخير كيما روحك
واللي يصحني على الزواج وفي عمري 20 سنة ما يحبليش الخير طول هههه تبا للزواج ​

 

[Hakan]

السلاااام عليكم
بعدو بعدو راني جيت راهو كاين عبد يقيسلي في موضوعي المفضل هههه
المهم مرحبا بيا عندكم، اصلا كاين واحد الاكتشاف هكا كي جيت نرد على الرد تاعك في موضوعي بلوكات لاباج وكي عاودت دخلت للقسم
اكتشفت موضوعك زعما ماش موضوعك بعت اشارة للرد تاعك في موضوعي باه نكتاشفو المهم لا داعي للتصفيق هههه
بصراحة موضوع الزواج لدرجة ولا على كل لسان جيت نرد على ختي "حكاية القمر" ونقولها قلبي يخبط ساع كتبت قلبي يخطب حتى قلبي عداوه هههه
المهم ندخلو في الموضوع، في وقتنا الحالي في اليوم تمر عليك كلمة زواج 4259872 مرة في اليوم ماكانش غير هاد الموضوع ولدرجة ولا حديث الساعة ولينا نحكيو عليه
هنا في اللمة، المهم كيما قلتها تنوض الصباح فرحان عندك أمل في هاد الحياة السعيدة يطبطب الباب تجي وحدة من العائلة علاواه تحكي؟ على الزواج
ورحت للعرس تاع فلانة وتزوجت ودارت وطاطاطا وبطاطا وديت بنتي تما شطحت بقات تشوف معاها واحد العجوزة واقيلا مكتوبها راهو جاي (هيه راهو في الطريق يدير في ليسونس)
المهم تشعل التلفاز تتفرج تلقى غير المسلسلات وكامل زواج زواج زواج الافلام الهندية والتركية الراعي الرسمي لأفكار الزواج، تكره تبدل تلقى قناة الطبخ تقول نشوف الماكلة تلقى لي تقدم تقول
"هادا طبق خصيصا للمتزوجات الجدد"، تبا تهرب تروح تشعل النت تخربش شوي تدخل للفايس بوك مع تدخل تقول بسم الله تحكمني وحدة تقرا معايا "واش راكي لاباس"
كاش جديد؟ يا بنت الناس البارح فليل وانا معاك ماكاين والو افيشاولنا زوج موديلات برك تقولي كاش زواج كاش خطبة؟ نعم بين البارح واليوم تزوجت وجبت 4 ولاد
والكبير فيهم رايحة نزوجو اليوم راكي معروضة، درك يعني هادا سؤال يا عباد ربي؟؟ في 8 ولا 9 ولا 10 ساعات نتزوج؟ ولا نتخطب؟، تكون في وسط امتحان تخرج مدمر نفسيا الصفر
يدير باي باي من بعيد تلقى البنات يدعيو جماعي تقول استنا ندعي معاهم كاشما نقطة ولا زوج ملاح تلقاهم يدعيو "ربي يزوجنا كامل ان شاء الله ونتهناو من الجامعة" اضربوني
بحجرة للراس الله يستركم، حتى المجموعات على الفايس بوك لي زعما سبيسيال تاع المطالعة جهلوني كل مرة تجي معدي تلقى وحدة "تزوجيه يقرأ ويشتري لكِ كتبا ويخاف على عينيكِ
من البي دي آف" ولا راجل كاتب" تزوجها تقرأ وستكون اجمل نساء الكون والخرطي هاداك" انا نقول نسكت ومن بعد واحد الدودة في قلبي تاكلني نولي نقولهم المجموعة مجموعة
مطالعة وتبادل الكتب ماش تاع الزواج وتانيا تزوجيه مسؤول ومتربي ووووو ماش يقرأ وهكاك النافع ربي نفس المنشور يتعاود 1200 مرة في اليوم تبا ولا لي يحب يجمع جامات بزاف
يحطلهم دعاء تاع الزواج ولا المنشورات اعرفي زوجك من شهر ميلادك اعرفي شخصية زوجك من شهر ميلادك اعرفي واش تقول حماتك عليك من شهر ميلادك تباااااا
لدرجة ولا الزواج حاجة كبيرة تولي لي تتخطب كي تجي تتكلم معاك تحكي هكا

تحكي بيديها قريب تدخلك الخاتم في عينك لدرجة الزواج ولا حاجة كبيرة
المهم في اللخر الزواج ماش حاجة ماش مليحة اكيد هو نصف الدين وماكانش مرأة ماتحلمش بدار وزوج وولاد ونفس الشي بالنسبة للرجل مادابيه يروح من العمل يلقى زوجة وولاد يستناو فيه
بصح ماش يبقى هدف وحيد في الحياة، يعني نقرا ونخدم ونطيع والديا ونطيع ربي سبحانو واذا جاني الزواج كسبت حاجة اضافية مليحة اذا ماجاش على الاقل مانكونش خسرت
كلشي وانا نحوس عليها، المهم حنا نتمناو كل طفلة تتستر في دار راجلها وكل شاب يتزوج ويدير عايلة، في االخير تفكرت حاجة قبل مدة قاعدة نحكي مع 4 بنات يقراو معايا
وهوما كل يوم زواج زواج غير انا نتكلم على القراية مالا كنت قلقانة النهار هاداك ومعرف كيفاه نطقت وقلت "ناس راحت تخدم وناس تزوجت وحنا مازلنا في الجامعة حاصلين"
تشوكاو في ربعة وحدة طاحلها الصاك من الشوك ههههه قاتلي مريم راكي مليحة؟ أول مرة نسمعك تحكي على الزواج يسما مادام نتي نطقتي معاناه الحالة صح ماتعجبش ههههه
ربي يهدينا برك، وشكرا على الموضوع واكتر مقطع قتلني ضحك حتى ولات ختي تشوف فيا هو هادا هههههه
​

درتلك رد طويل وعريض ماتجي تكملو يوليو ولادك يقراو فيه معاك هههه (المهم دخلت الزواج من كلمة الاطفال )
تحيــــــــاتي​

انت نديرلك رد وحدك خخخخخ تقديرا لهذا المجهود
هههه واشو يامريم لازم زوجوك ههه ضرك راكي رايحة تتخرجي ماعندكش كاش
سبة باش تخبي روحك هههه
راكي دخلتي للروشار
حنا الرجال ربي بلانا بالخدمة الوطنية وانتوما بلاكم بالزواج هههه
وصحاباتك هذوك يديرولك التوسويس والغمة غير بعديهم خيرلك اموا تعيشي شويا ايامات مليحة
ههه
ربي يهنيك اختي ويفرحك عاجلا غير آجل المهم برك كي يخطبوك ما تنسايناش وتحبسي الاشراف كيما سارة ههههه
سلام ​

 

[Hakan]

تفكرت حاجة تضحك هههه
كانت عندي صديقتي قرات معايا من الليسي
كانت كي تعطس ونقولها يرحمك الله تقولي يهديك ويصلح بالك ويرزقك الزوج الصالح
نشوف معاها نقولها معليش تعطسي مرة اخرى ههههه
المهم صديقتي عطست حتى شبعت ودعاتلي ومابانش خبر على الزوج الصالح هادا
غير نضحك
هيا بزاف عليكم ههه
تحياتي
​

ههههههههههه
يرحمك الله مريم ويرزقك زوج صالح ههههه ان قلت الحمد لله
​

 

[Hakan]

وعليكم السلام هههههه فلان ازوج وفلانة ازوجت فكرتني في نسا حياتهم بين عرس فلان وفلان كل يوم يجاراو السوجي هاذا ميفضش في النهار تسمع لكلمة هاذي اكثر من ماتشوف دارككم

هههههه انت راكي سلكتي وربي رزقك باللي يقر عينيك
مي لازم تتفهمي مشاعر الناس هاتي تكبر ياسمين وترجعي تحكي على هذا السوجي وتقولو للزوج الكريم
روح كاشما تخفلنا واحد لهذي الطفلة هههه ربي يهنيك ختي ​

 

[Hakan]

هاد التفكير ببساطة يعكس المستوى الثقافي نتاعنا
منيش ضد فكرة الواحد يخمم يتزوج
مي ملازمش يكون الزواج هو محور الحياة
لازم يكون فيه أهداف أخرين وطموحات
نتمنى فهمتوني تشاااااااو

صح وهذا اللي نحب نوصلو مايكونش هو الحياة وهو كل شيء
يعني نجكيو عليه في وقتو
اما الوقت الباقي الطفل يبني روحو والطفلة تبني روحها وربي يسهل على كل وااحد ​

 

[أم أُنٌَيسة]

السلام عليكم و رحمة الله و بركاته
بالنسبة لي حاليا الله يلعن الزواج و اللي حاطين روحم رجال
تحياتي​

 

[Hakan]

السلام عليكم و رحمة الله و بركاته
بالنسبة لي حاليا الله يلعن الزواج و اللي حاطين روحم رجال
تحياتي​

خخخ قصف عشوائي متعدد المصادر
ربي يهنيك ختي هههه ​

 

[أم أُنٌَيسة]

خخخ قصف عشوائي متعدد المصادر
ربي يهنيك ختي هههه ​

و يحفظك و يبارك فيك يارب
ربي يهنيك يارب اخي الصغيروني​

 

[،كارينا،]

هههههههههه وهدا لي هدرت عليه انا في موضوعي "كل يوم زواج" وجيتني حكيم افندم يا واحد الباندي وقتلي حنا مايهدرولناش عالزواج ههههههه خطير ياوسمك هههههه
"يماك حطتلك قهوة حليب معاها شوية زواج وليدي راك لحق العشرينات" هههههههه
موووضوع هايل وجبتلك هاد الفوطو الهايل معايا هههه