بــلآدي لحبـيْـبـــة السَـــلآم عليـكُم ~

[ضآحكة مستبشرة]

السلام عليكم و رحمة الله تعالى و بركاته
وشراكم يا احباب قلبي ؟؟
ان شاء الله تكونوا بخير



رمضان عالابواب صحا رمضانكم كل عام و انتوما بخير

عندي مدة مكتبتش هنا الله غالب مكاش الوقت
اليوم جيت نحكي و نعبر و حبيت نكتب موضوعي في هدا القسم
خاوتي يرحم والديكم قولولي الزمان لي تبدل ولا قلوب الناس علاش ضياقت القلوب ولا واحد ميتحمل واحد مبقا حب مبقا وفاء
انتشرت الخيانة الكذب الخداع
راحت البنة تاع المعيشة كل حاجة سامطة العباد في وجهك تبوس و تسلم و في ظهرك تمنشر و تتكلم
وصلنا لدرجة السلام عليكم و منقولوهاش لبعض
ولينا نعيشو في مجتمع فيه غير الفتن البنات كلبو و جهلو لبسة العجب خداع المومنين مطلسة بيه وجها
الشباب ولاو مفتقرين للرجلة تتحكم فيهم غير الغريزة لا دين لا ملة
الوالدين حتى باش يربو ولادهم ولاو ميعرفوش بنتو و مرتو يخرجو معاه معريين و هو ولا على بالو
وليدو يصاحب في مليار طفلة و هو حتى كلمة يا وليدي روح تصلي ولا اخطيك مكاش
صدقوني كرهت كــــــــــــــــــــــــــــــــــــــــرهت مكاش فينا لي ميغلطش بصح لازم نستعرفوا باغلاطنا و نصحوهم و كي ينصحنا شخض ندو نصيحتو بعين الاعتبار
توحشت يامات زمان بكري مالقري عاشو بالهانة بصح الراجل كان رجلة و المرا كانت فحلة قبل ميوصلو لـ 15 سنة يكونو بناو ديارهم
و دوكا الراجل راجل بالذكورة فقط في عمروا ثلاثين سنة و هو يماه تمدلو الدراهم باش يعيط لحنونتو
كي نكون برا و نسمعهم يعيطو لبعضاهم les homme نجي رح نخبط راسي للحيط واشمن اووم تحكي عليه هذاك لي يطبق سروالو كي طفلة و القبلة ميعرفهاش مين جاية و يظل يتبلا في بنات الناس
و لا الطفلة لي غير يولي في عمرها عشر سنين تبدا في رحلة البحث عن الحبيب او الزوج
و هي كي تكون قيس الزواج خبزة في الطاجين متعرفش تقلبها

زمان كانت النية كل حاجة تتخدم تكون مطبوعة بالحب و الناس تعاون في بعض و دوكا كي يشوفوك تموت قدامهم في طريق واحد ميحوسش فيك
بكري كان الفقر و الجوع و الضياف ميخلاصوش الديار معمرين و الابن يتزوج في دار باباه و مرتو تقوم بوالديه مكاش هذي الخدمة تاع برا المرا ايلا تزوجت تولي خدمتها دارها راجلها و ولادها
و ايلا دوكا الخير على راسو و هوما اذا سمعو بالضيف جاي تقول راح يزدم عليهم العدو و لي يحب يتزوج لازم دار وحدو علابيها قليل لي راه يزوج الناس الخدمة شرط في العقد و مذا بيها متعيشش مع العجوز و الشيخ كاين لي يتمناو يجيهم عريس يتيم


اي زمن رانا فيه قمة العار و الانحطاط الأخلاقي الشعب ڨاع قاري و الثقافة

000000 الاخ ميتحرم ختو و تخرج معاه بالفيزو و طابلو في وجها ولا على بالو
الاخت متقومش بخوها تطيح بيه متديرلوش قيمة يحكي معاها تقولو متحكمش فيا
الزوج تكبر مرتو غير شوي يبدا يخمم في الزوجة الثانية تكون صغيرة و بابيشة ولاو مراهقين أكثر من المراهق في حد ذاتو
النسا تخرج سر دارها لبرا تحكي في راجلها متربيش ولادها توصي بنتها كي تطلعي للجامعة بلاكي تخرجي منها بلا متجيبي عريس

وقتاش نفيقو نرجعو كيف زمان نحبو بعضانا نرضاو بواش عطالنا ربي الطفلة تتستر و الشاب يقصد الطفلة من باب دارهم بلا ميخرج معاها الاب و الام يربو ولادهم


وقتاش ينقصو من حرية المرأة وقتاش يفرضوا الحجاب الشرعي في الدستور
احنا مسلمين لكن تصرفاتنا تاع كفار

غزاونا الافكار الغربية مسلسلات تركية عقلية ألمانية تصرف تاع كفار لا رحمة لا شفقة

الى اين نحن ذاهبون يا شعب الى اين

شكون حنا ؟؟

حنا لي غابت الثقافة الدينية على حياتنا
احنا لي في عادات جدودنا سمحنا

احنا لي نعرفوا الرسول غير بالاسم احنا لي نسينا بلي ماتو على بلادنا مليون و نصف المليون شهيد

احنا لي رانا محتاجين لشوية اخلاق شوية تربية شوية رحمة في قلوبنا
و بزاااااف بزاااااف بزاف تقرب لربي سبحانو


انا فرغت قلبي كلامي راهو على فئة من الناس لانو كاين المليح و القبيح مكاش واحد كامل الكمال لله وحده


اليكم الخط أحبابي

اتهلاو في رواحكم و ادعولي بالشفاء و التوفيق

السلام عليكم ​

 

[همس الوُرود]

السلام عليكم ورحمة الله وبركاته
أهلا أختي أسمااء وش أحوالك إن شاء الله تكوني بخير .. ربي يشفيك أختي لا بأس طهورا إن شاء الله

صراحة موضوعك ما شاء الله مميز و عندو معنى كبيير ..

كون نبدا نحكي بلاك نكتب موضوع قد موضوعك أو أكثر ههه

شوفي أختي صح بزاف أمور مش مليحة ووش حكيتيه كلو صح فالصح

تلقاي الناس هدا الوقت تشوفيهم كالأحباب و من وراك راهم حابينك تطيحي انتشرت الغيرة والحسد فقلوب الناس هدا الأمر من بكري كاين لكن مع الوقت الفساد راهو يزيد

كل هدو الظواهر راهي من بعدنا على الله وعدم البحث والمعرفة فالدين

والي تنصحيهم يقولولك حاسبة روحك إمامة ويستهزاو في بالهم الدين صلاة و قرآن تقولك راني نصلي لباس بيا و نقرا قرآن صح حاجة مليحة تقراي قرآن حاجة مليحة تصلي هدي عبادة لله عز وجل .. العبادة أنك تطيعي الله عز وجل كيما فالقرآن الله أمرك بالوقور في البيت
فالقرآن ربي أمرك تتحجبي وتستري روحك
ربي أمرك تطيع الرسول والرسول عليه الصلاة والسلام أمرك بإعفاء اللحى و قص الشوارب
هدا الدين تاعنا تطبق وش قال الرسول عليه الصلاة والسلام ووش قال ربي سبحانه

تتفقه فالدين وتبحث بزاف أمور مزال منعرفوهاش على ديننا رانا بعاد بزاف بزاف

ورغم كل شيء الحمد لله مزال الخير ومزالو ناس الخير منفقدوش الأمل
يكفي أنك تحاربي نفسك الأمارة بالسوء وتحاولي قدر الإمكان النجاة من الغرق فالذنوب

يا الله يا مقلب القلوب ثبت قلوبنا على دينك
وارحمنا واهدنا واعف عنا إنك أنت العفو الرحيم

ربي يهدينا أختي ويصلح أحوال الأمة

بارك الله فيك أسماء على الموضوع الزين​

 

[ضآحكة مستبشرة]

السلام عليكم ورحمة الله وبركاته
أهلا أختي أسمااء وش أحوالك إن شاء الله تكوني بخير .. ربي يشفيك أختي لا بأس طهورا إن شاء الله

صراحة موضوعك ما شاء الله مميز و عندو معنى كبيير ..

كون نبدا نحكي بلاك نكتب موضوع قد موضوعك أو أكثر ههه

شوفي أختي صح بزاف أمور مش مليحة ووش حكيتيه كلو صح فالصح

تلقاي الناس هدا الوقت تشوفيهم كالأحباب و من وراك راهم حابينك تطيحي انتشرت الغيرة والحسد فقلوب الناس هدا الأمر من بكري كاين لكن مع الوقت الفساد راهو يزيد

كل هدو الظواهر راهي من بعدنا على الله وعدم البحث والمعرفة فالدين

والي تنصحيهم يقولولك حاسبة روحك إمامة ويستهزاو في بالهم الدين صلاة و قرآن تقولك راني نصلي لباس بيا و نقرا قرآن صح حاجة مليحة تقراي قرآن حاجة مليحة تصلي هدي عبادة لله عز وجل .. العبادة أنك تطيعي الله عز وجل كيما فالقرآن الله أمرك بالوقور في البيت
فالقرآن ربي أمرك تتحجبي وتستري روحك
ربي أمرك تطيع الرسول والرسول عليه الصلاة والسلام أمرك بإعفاء اللحى و قص الشوارب
هدا الدين تاعنا تطبق وش قال الرسول عليه الصلاة والسلام ووش قال ربي سبحانه

تتفقه فالدين وتبحث بزاف أمور مزال منعرفوهاش على ديننا رانا بعاد بزاف بزاف

ورغم كل شيء الحمد لله مزال الخير ومزالو ناس الخير منفقدوش الأمل
يكفي أنك تحاربي نفسك الأمارة بالسوء وتحاولي قدر الإمكان النجاة من الغرق فالذنوب

يا الله يا مقلب القلوب ثبت قلوبنا على دينك
وارحمنا واهدنا واعف عنا إنك أنت العفو الرحيم

ربي يهدينا أختي ويصلح أحوال الأمة

بارك الله فيك أسماء على الموضوع الزين​

و عليكم السلام و رحمة الله
أهلا عبير وآش راكي صافا
مبروك عليك الاشراف راني روطار هههههه
انا راني تعبانة شوية يسال عليك الخير

و الله يا عبير ختي كي نتمعن في المجتمع نعيا صدقيني غير تغيضني عمري نقول علاش هذو الفتن كامل بلاك علامات الساعة و احنا غافلين و ماشي جايبين خبر
بصح من المفروض كل واحد فينا يساهم في نشر الدين يا لوكان يحفظّ آية لطفل صغير
مجتمع فسد و فسدت اخلاقو لا رقيب لا حسيب غير ربي سبحانوا
واش تحبي ختي النبي صلى الله عليه وسلم قال على وقتنا هذا لي شد في دينو كي شغل شد على جمرة
و جداتي تقولي رانا في زمان تخلطو فيه لديان و يا سعد لي شد في دينو

و الشي لي زدتي قلتيه نتي ثاني مهم ولازم نوقفوا عليه

و فيك بارك الله اختي
شكرا لك على المرور العطر
نورتي الموضوع
و ربي يثبتنا ان شاء الله
​

 

[همس الوُرود]

الله يبارك فيك حبيبتي ~ ربي يشفيك يا رب ويريح بالك
كلامك صحيح أختي أسماء صح بزاف علامات الساعة ظهرت~ ربي يهدينا ويعافينا يا رب
آمين يا رب بورك فيك غاليتي​

 

[الورد الأحمر]

السلام عليكم

مع الأسف كامل رانا ندورو في دوامة مشكلتها احنا وبرك ما نحصلوش في الزمان.

صح كاين أمور تبدلت ممكن على حسب الزمان لي عايشينو مي الأمور هذي تبدلت فينا ع حسب المعطيات الجديدة.

بكري صح كيما قلتي كانو الناس عايشين ع قد الحال بصح يمشو لبعض ويتعاونو بين بعض ودرك تبدلت الحالة ولي تطيح بيه يدبر راسو هكاك ومازالو كاين ناس فيهم الخصال هذي ومازالت فيهم الروح هذي تاع بكري.

لمرا تحررت زيادة ع اللزوم لدرجة رجعت تافهة وبالتالي انتقلت تفاهتها لاولادها بما أنها هي لي تربيهم.

الراجل تراجع دورو في المجتمع رجع وسيلة لجلب المال وإنجاب الأطفال غير هكذا يبقى برك على جنب وما يقولش على روحو ليزوم على خاطر يشبهلهم غير في الكاغكاس باقيها غير يهني روحو وجنابو مي هكاك وكاين كومام لي تخلفو ومازالت الرجلة منهم تنشاف من بعيد.

لولاد ما لقاو والدين مربيين ما يترباو ولي تخلفو والديه مربيين يطلقولو بحجة مازال صغير حتى يكبر بالعقلية هذي وعندهم كي يلحق 30 سنة وين يقولو كبر ومبعد يخرجلهم آفة اجتماعية ويحيرو منين تحول هك وهوما من اللول كانو يربيو في مجرم صغير مي تخلفو كومام لي يربيو في أولادهم بطريقة سليمة.

الزواج نقص والعلاقات الغير شرعية كثرت لغلاء المعيشة وتاني لنقص الوازع الديني والابتعاد عن الدين على خاطر وي الزواج نصف الدين اوك قالك لي يقدر يتزوج يتزوج ومن لم يستطع تسمى ديجا مدلك الخيار الثاني لي هو لي ما يقدر ش يصوم ركزولي على يصوووم مش يعمل علاقات غير شرعية ومبعد يبدا يسب في الانحلال تاع لبنات ع أساس هذو لبنات يعملو في العلاقات هذي مع لحيوط والشجر يخي يعملو فيها مع ذكور معناها الكل يليق ينسبو ماشي غير الطفلة كلش تلمو هي وتطلع هي برك مش مربية الكل مش مربيين.

يبقى أي تغيير نحبو نشوفوه نبداو بيه احنا يقولك كن التغيير الذي تريد أن تراه في الحياة يعني لو كل واحد متمني شي يتعدل يبدا يعدلو في نفسو ممكن غدوة واحد غيرو يفطن تاني ويعدل من النفس الشي ويزيد الثالث والرابع حتى يرجعو بزاف.

عموما مجتمعنا بمعطياتو مازال باه يفيق ومازال باه يتربى ساعات تبانلي لا أمل منو ولازم يمسحنا ربي بنيزك ويجيب غيرنا سع يرجع كاين مجتمع جزائري متحضر على خاطر الحالي في عداد الميؤوس منه.

مغسي يعطيك الصحة موضوع قيم.

 

[Salah eddin]

السلام عليكم
Pاااا...pاااا...pاااا
و الله يا اختي موضع كاف و واف و شامل لكل ما يجب قوله حول المجتمع المعاصر لي رانا عايشين فيه
وراكي عطيتيلي فرصة باه نفرغ انا ثاني
الدعوة تهردت يااااو
الناس تجري ق ورا المادة والمعدة
لا تربية لا جد ماليهم
شوف ذيك المقريبة شوف
ياو انا حاجة مدوختني
ظاهرة لي كوبل هذي و الله يحير فيها الواحد
السيد فراك ما يسعاهش ..فرماجة على روحو كي شقل الحب و كذا
ايا طبقو علينا الحالة هذا الرحمة على والديكم
ياودي ثاني البنات راهم راحو فيها خلاص ...انفلتو كيما الغنم كي تهرب على الراعي
ولات الامور هذي عادي جدا و القدر طاح و لعب السوق
و التلفونات والفيسبوك و الخرطي هذا
و زيد عقلية امي ...وشمن امي ؟؟؟ شني امي هذا؟؟ظ
ياودي راه حرام وش بيكم ؟؟ ...ها افطنوا اسي
و في الجامعو و الله الواحد يشوف العجب
المسلسلات كيما هي تاع الترك و كذا و بوليوود و مانيش عارف وشنهي
ياودي يقلك اذا عمت خفت
ياودي اذا عمت تهردت
القدر طاح
ولى الاب ما يسالش في بنتو
الام خلات دارها و خرجت للشارع
الطفلة خلاص لقات الحرية و ما لقاتش الراعي و الرادع
و الشبيبة خلات عليهم
و الله يجعل الخير
....
ياودي نحمدو ربي لي مازال كاين ناس شوي محافظين على الاصول و التقاليد
و الله يصلح البلاد و يهدي العباد
شكرا جزيلا
بارك الله فيك

​

 

[الحق سلاحي]

السلام عليكم ورحمة الله
تركيز على لبس البعض تصرفاتهم وشكلياتهم شخصياتهم والانزعاج منها فقط هو مشكل اخر لا يمكن ان تستنسخ شخصية او شكلية واحدة على الجميع سنة الحياة الاختلافات الموجودة فيها المتفائلة انت لا تحاولي ان تفرضي فيها لون او شكل واحد لان الباقي ربما ازعجك صح ؟
والله اعلم (اسمحولي استخدمت الفصحى راحت فيا عادة اسفة)

 

[ضآحكة مستبشرة]

اسمحولي مقدرتش نرد عليكم رآني مريضة من ذراعي منقدرش نكتب بزاف


لي عودة ....​

 

[aljentel]

لو خليت خربت ...
لازالت الدنيا بخير .

 

[ليليا مرام]

السلام عليكم اختي
قوليلي انت صح فرغيتي قلبك وحكينا وكل اللي هدرتيه نعيشوه يوميا وضرك دخلت فالحرية الشخصية اللي يهمني انا
وين الحل عيينا ننبحو كالكلاب حاشاكم وي نراه الحل يقراو اللي فالمنتدى صح ممكن عندهم صلة بالشي هذا ممكن بعاد كل البعد وحالهم من حالك رافضين الوضع ذا والواحد يحكم فروحو فولادو والراجل فمرتو لكن راهي بلاد يا لالة وزيدي نقولك
ما تهدروش غير على دزاير تشوفي دول اخرى ماكان لاه نسمي حتى بلاد لانو وين تروحي المليح والدوني تشوفي امور عيوب بلادنا تبانلك اجابيات راهم العرب راحو فيها هذي صراحة مي انا نقولك هذوك النوع وليت ما نعمرش راسي بيهم انا وليت نغير من وحدة دايرة جلباب ومش لازم جلباب تعجبني اللي دايرة حجاب نتاع الصح ولو انا دايرة حجاب مي مليش نشوف للي احسن مني
نشوف لذاك الجون اللي يصلي وعاقل ومتربي ركزي مش لازم مربي لحية لانو ياما جاوني خلعات من الاخوة والدراقاج فالطريق يعني عاقل متربي ويصلي وحوايجو حوايج راجل وشعو عادي ذاك انا نغير لما نشوفو ونعاير خويا او جاري او شي بيه هذوك ليزانديا المقطعين الي راهم نص فخدو معري وشادي مريح فوق شعرو وزقة نتاع حمامة ديرهالي لوك فخدو باللي وشام انا هذاك خسارة فيه حتى نعلق عليه
اللد يهديهم راهي عمت وكيما قال الاخ الجانتل مزال اخير فالامة وفليجون نتاعنا
شكرا ولو موضوع مكرر وهدرنا وهدرنا لكن طريقتك مميزة

 

[الصحافية الساخرة]

السلام عليكم
قبل ما ندخل فموضوعك اسال ربي ان يشفيك و يفرج عليك ياا رب

موضوع يستحق ختم التميز حسيتك خرجتي كل حرف من قلبك صح قوي تعبيرك و لمستني معانيه , واش نقولوا : ربي يصلح احوالنا و متنسايش بلي حنا خرجنا من جيل من جيل بكري اللي هدرتي عليه تربيتهم هوما واش علمونا تعلمنا "جهلنا من مشاكل اللي راها دايرة بينا يا اختي عايشين محرومين من حقوقنا مهمشين وتسقسي من ؟ حنا سقسي شكون رجعهم هكا , مالغري واش فيه من فتن صابرين وشادين فربي , ومع الوقت كل واحد راه يفطن كاين اللي جاحوا عوام وتبدلت فيوم العقلية (ربي يصلح احوالنا)
مرسي على الموضوع

 

[Oussama.GF]

شكون حنا ؟؟

حنا لي غابت الثقافة الدينية على حياتنا
احنا لي في عادات جدودنا سمحنا

احنا لي نعرفوا الرسول غير بالاسم احنا لي نسينا بلي ماتو على بلادنا مليون و نصف المليون شهيد

احنا لي رانا محتاجين لشوية اخلاق شوية تربية شوية رحمة في قلوبنا
و بزاااااف بزاااااف بزاف تقرب لربي سبحانو

نرومالمو مقالتك راهي دور في جرائد ولازم توصل لاسلطات العليا
كلام راقي بالاخلاق راقية
هداي بلاد مابقا فيها والو
ماولناش دولة مسلمة ولانا كفار منافقين
تجي خارج من باب داركم لازم تهبط راسط وتقول ربي يهدي هادو ناس
تجي تحكم في اختك تقولك مدخلكش
تجي تنصح واحد ولا وحدة يقلوك شد نصيحتك عند ولا تقولك روح انصح بيها اختك
بلاد ما بقى فيها والو
نساو بلي هادي بلاد حررها مليون ونصف مليون شهيد
نساو عدات وتقاليد بلادنا
نساو بلي حنا دولة مسلمة ماشي كفار
فيروس اليهودي انتشر بين مجتمعنا وصعب صعب جدا نزعه
لو كانت سلطات تعدل دستور وطبق شريعة اسلامية لكانت بلاد معتدلة
مي حتى سلطات راهي تقلد في تفكير اليهود
مبقاش وش راح نعبر على هادي بلاد
عندهم حق حراقة من هادي بلاد نروح نشوف وين نعيش
مبقاش الخير بينتنا
احسن مقالة مرة عليا وراح نشررها في فيسبوك بس اخت عاشقة الجنة
باش يفيق هادا المجتمع
تحياتي اخوك اسامة

 

[ميمي مرام]

سلام الله عليك اخيتي
ربي يشافيك اخيتي
كامل الكلام لي قلتيه عندك الحق فيه
و الله وقت زمان كان هايل
كي يحكو عليه تحسي بالامان
بصح الوقت لي رانا فيه
لا اله الا الله محمد رسول الله
وقت صعيب بزاف و عقلية الغرب أثرت فينا
ربي يستر ​