يو آر حشايمي .. لازم تخلص !!

[قرصان الساحل]

جانتل مان .. لايديز .. ايتها السادات انور والسادة قهوة من غير سكر ..تحية افريقية مصحوبة بحبات البأس حجم قارتكم السوداء ... اجمل ما بافريقيا الحيوانات البرية والفواكه الاستوائية والشكولاتة المحلاة بالفستق ورقصات غبية على انغام ايااا وهادي دو صون ميل

هل تعلم اخي الافريقي اننا نتشارك نفس الرقعة الجغرافية وهذا ما يجعل منا افارقة ... لا داعي للتصفيق ... اخر اكتشافاتي في رحلتي الى زيمبابوي ...

بعيدا على السماطة ندخل في الصابجاكت لي بغيت نحكي فيه اليوم بخصوص انت حشايمي براس ما غير تخلصها غالية !!!

ما يخفاش علينا ان نعيش في زمن السرعة = المسافة x الزمن ... وصوالح بزاف تبدلو ما فقناش كامل وش صرا والحشمة تاع بكري راحت مع ناسها فالاغلبية الساحقة اليوم اكتسبت صحانية الوجه المدعم بالبيطون ارمي تلقى وجهو صحيح كثر على دال دوصول تاع دارهم ... والحشومي هداك ديما متفرة فيه يخلص ضريبة زيادة اضافة الى ضربية التريسيتي والغاز اللي هي طاكس الحشمة .. كيما قالو ناس بكري كونك ذيب لا غير جبال لي ما يتلاقاوش ...

اليوم بلا حشمة اي واحد يقصدك في تلفونك في لينات تاوعك في طونبيلتك في دراهمك فريجيدار والمصطلح المعتاد ديبانيني ولا سلفني ونردلك وانا من هاد المنبر نقلك بلي كلمة نردلك لن تتم الا ما دمت عليه قائما ... لازم تكون سامط وكل ڥيراج تقلو اي جان صوالحي ... وتزيد تحلل شوية على وجه ربي ربي يرحملك الشوابين يزوجك بشارابوفا نبوس جبهتك ردلي صوالحي !! وكي يردهملك يزيد يشنف عليك اوووو انت قصدناك راح تاكلنا

سامحني اخي الكريم والله ديرونجيتك نورمالمو منحكيش كامل في صوالحي

المشكل ان اغلب هاد الحوايج تلقاهم كماليات مثلا يقلك سلفني لينات تاوعك عندي خرجة مع مدامتي !!! ولا خاصني دراهم نروح نحوس ... او كونترار بكري الجارة دموندي الملح ولا الزيت بويسك معندهاش باه تطيب وترجعو من بعد ...

الشي الاخر الملاحظ على هذه الكائنات اذا لقاوك تحشم يكملو يمصو فيك و متفتاجأش اذا قالك يا خو كمل البليزير تاعك واعطيني نص من الكبدة نتاعك انت ياك نص كبدة تكفيك وزيد عندك بنكرياس يقوم بنفس الوظائف تاع الكبدة -___- ... وي تستاهل عينيا اي عين وحدة تكفيني سي ديجا اني قرصان -___+ ولا نقلك نقدر نسمع بوذنيا ادي عينيا لزوج وكاش ما خصك رجل ولا يد اني هنا خو عندي بالزيادة ...

هاد النوع من البشر المفترس المتشبع بالنظرية الميكيافيلية الغاية تبرر الوسيلة يستغل كل الطرق حتى المعنوية باه يقضي صلاحو والانسان الحشومي سيكون فريستهم المفضلة ... قادر ليلة الكونترول يدي عليك لي كور تاوعك ايه انت اتعب وهو يلقاها بالواجد ... قادر يحرجك ولا يجرحك .. والاهم كي يقضي منك صلاحو فصدقني انت عنده لا تساوي شيء تماما كالمنتخب الفرنسي من غير زيدان.. والاكثر من هذا الفرنسيون نساو خير زيدان تفكرو غير نهار دخل في ماتيرازي بدماغ وقالو عربي


في نهاية هاد الموضوع لي حكيت في بزاف وطولت فيه بغيت نختمو بقول الشاعر ... انتيا روحي وانا ربي يجيبلي ... الحشمة بزاف سلوك حضاري يعاقب به الميكيافيليون .

ودمتم سالمين​

 

[همس الوُرود]

السلام عليكم ورحمة الله وبركاته
أهلا أخي قرصان الساحل هههه موضوع كي العادة على البأس والأفارقة
والله صدقت الي يحشم فبلادنا ياكلوه وزيد يردوه هو الي مش مليح
أنا وحدة تع نسلف معليش بصح كاين حاجة من حاجة
مثلا اللبسة وداك الشي الي يخصني يبوسو عينيهم مانمد مش حاجة تخصني هكا تاعي تلبسها هي نجي أنا حتى لو نغسلها وين نعرف
بلاك عندها بكتيريا هي مش مأثرة فيها وجسمها متعايش معاها كون تنقلهالي فاللبسة نمرض نولي حاصلة
دونك أمور تع قش وكلش والو أما دراهم هههه مزال ماجربتش أنا يحتاجو حاجة ويكونو عندي نمد مانسلفش
بصح ديما لازم تكون كاينة حدود أكيد
بارك الله فيك خويا مشكور على الموضوع ​

 

[أم أحمــــد يــسّ]

موضوع شباب وواقعي..
وبحس فكاهي ماشاء الله..
انا نبدا من الأخير ( قال الشاعر...وعععع ) ههههه هنا حبس وطفي الضوء،
عندك الحق لا حشومة ولا ظرافة تسلفهم ويحسسوك انك انت اللي متسلف عليهم ..ويا يمّا على هذيك النظرة كي تفكرهم بحاجتك ولا حتى تذكر قصة مشابهة يجبدولك من القلب ويبدو موشح الزعاف خخخ...
مع لعرب تجبد خير

 

[قرصان الساحل]

السلام عليكم ورحمة الله وبركاته
وعليكم السلام ورحمة الله
أهلا أخي قرصان الساحل هههه موضوع كي العادة على البأس والأفارقة
بيك اهلا ختي توينكل النجوم ... اه وي هذا واش فيها لافريك تاعكم -_-
والله صدقت الي يحشم فبلادنا ياكلوه وزيد يردوه هو الي مش مليح
واه لي يحشم غادي يمرمدوه جزاء سنمار
أنا وحدة تع نسلف معليش بصح كاين حاجة من حاجة
مثلا اللبسة وداك الشي الي يخصني يبوسو عينيهم مانمد مش حاجة تخصني هكا تاعي تلبسها هي نجي أنا حتى لو نغسلها وين نعرف
بلاك عندها بكتيريا هي مش مأثرة فيها وجسمها متعايش معاها كون تنقلهالي فاللبسة نمرض نولي حاصلة
ايه انت عندك توسويس قصري كي يلبسو ناس حوايجك اخخخ
تاع الصح غير في افريقيا ناس تبدل حوايجها لان اللبسة حاجة شخصية يلبسها مولاها وفقط ماشي الحاجة لي تتسلف ولا تبدل
وهنا فكرتيني في العراس الناس يسلفو حتى ذهب بعضاهم هاذي لي مزال مفهمتهاش كيفاه هذا تلبس ذهب خاطيها ومبعد ؟؟
الف علامة استفهام
دونك أمور تع قش وكلش والو أما دراهم هههه مزال ماجربتش أنا يحتاجو حاجة ويكونو عندي نمد مانسلفش
ايه تمدي كي شغل بنك الخليفة .. حتى بنك الخليفة تردلو مع لي زانتيري -_-
بصح ديما لازم تكون كاينة حدود أكيد
اه وي لازم ديما الحدود صينو تسلكها غالية
بارك الله فيك خويا مشكور على الموضوع
​

وفيك بارك الله اختي يعطيك الصحة على مشاركة الموضوع
تحيـــاتي​

 

[همس الوُرود]

وفيك بارك الله اختي يعطيك الصحة على مشاركة الموضوع
تحيـــاتي​

ههههههه نمد مشي بنك الخليفة بيسك مزال مااحتاجوش دراهم واعرين
ديما دراهم خفاف يروحو عادي هههههههه راني طالبة جامعية برك أصلا ههههه​

 

[Hakan]

موضوع للتميز هههه نرجعلك خويا
راهو مركى بن زيمة اليوم كيما قتلك هههه
مركيني راجع ان شااء الله ​

 

[Skor m@k]

السلام عليكم
الله يعطيك الخير يا خويا هشام ههههههه
اواه مزالك افريقي الاصل ودوريجين ترجماناها برك ههههههه
في هذي لبلاد تحشم يمصولك دمك يرجعو كامل ليفومبير
المشكلة ماشي قال تحشمو يحشم ههههههه هذاك وين يزيد يطلق سلابو عليك
التسلاف هذا داير ظل سورتو عند لبنات حتى التقشيرة طبطب فالليل تسلفها على جارتها ههههههههه
عندها خرجة اورجونس مع الصباح ويماها غسلتهم هههههه
والمشكلة لكبيرة الافكار يخممو فيهم قبل ما يقصدوك باش سور تغيضهم وانت تحشم منهم
منذاك عدت نقول سور وجهم مخدوم بلحديد ولا تاع بلاستيك هههههههه
يابنعمي انا نكون حاصل ومانقدرش نقصد كاش واحد يعاوني في شغل الله غالب حشومي شويا هههه

مي راك طول الغيبة ياخو
منذاك زورنا باش نطلعو المورال شويا هههه
​

 

[الصحافية الساخرة]

السلام عليكم و رحمة الله

هههههخخخههه مقدمة رائعة سيرتوا تاع " رقصات على انغام ايااا وهاذي دو صون ميل " ععهههخخحخ

لا حشمة لا حشاشيم نورمال يسلفوك انت تاني يديروا بيك جولة حول الفضاء ههههه ، يسلفوا كل شي و يكثروا بزااف ، تلقاها عجوزة يا محاينك تجي تسلف ذهب بتاش تروح لعرس ياو هذي اللي شوكاتتي كتر وفاتت عليا هههه و الفايدة ؟؟ البس يا كبري عهههه

ديما تسلاف دونك تسلف دراهم محتاج باين هذي عادي مظطر عندو ديون دوك نهار يولو عندو يرجعهملك ولجالى محبش يرجعهم مولاه ربي ماراهش خدعك راه دار عليه ذنوب برك

مي تاع تجي تسلف الخبز و لا خمار ولا شارجور تاع تيليفون حاجات تقدر تشريهم بصح هوما لا يصححو وجههم ويزيدوا يعاودوهالك شحال من مرة ويزيدو فالكمية والنوعية ههه يوصلك للكوشة تسلفاهو تطيب المرى تاعو حلوى و لا للطوموبيل وليسونس من عندك هههخه نورمال تجي تقولك اعطيني كيلو بطاطا خهههه وهوما كيفك كيفهم ما عندكش وبلاك هوما خير منك فالظروف المعيشية بصح يسلفوا يحبو التسلاف بزااف ،، حتى تحشم تردهم كي يطلبوك في حوايج يكونو عندك وشافوهم ،، سيرتوا هذوك اللي يشوفوك بلبسة جديدة تجي وحدة لعشية لعندك تقولك : " شفت عندك وحد اللبسة فاللون هذا و الفصالة هذي الى تسلفهالي ....... ) ؟؟؟؟؟ وانت باسم الله الرحمن الرحيم وكتاه شافت الفصالة واللون وانت خرجت بيها فالظلمة ورجعت فالظلمة هههه غير تتحير بصح والله ما تديك هههخخخ

ايا قرصان يعطيك الصحة على الموضوع الجميل
وراك مدة غايب رانا حكمناك ههه

 

[قرصان الساحل]

موضوع شباب وواقعي..
وبحس فكاهي ماشاء الله..
من ذوقك ختي ... كون جا شباب وواقعي راهم خطبوه اخخخ
انا نبدا من الأخير ( قال الشاعر...وعععع ) ههههه هنا حبس وطفي الضوء،
وي الشاعر تالمو حشام سمح في حقو قالها انت روحي هو ربي يجيبلو -__-
عندك الحق لا حشومة ولا ظرافة تسلفهم ويحسسوك انك انت اللي متسلف عليهم ..ويا يمّا على هذيك النظرة كي تفكرهم بحاجتك ولا حتى تذكر قصة مشابهة يجبدولك من القلب ويبدو موشح الزعاف خخخ...
ايه تكون مول الدار تولي تحس روحك براني معاهم ... وجوهم تحساب مسلفينهم ماشي تاعهم .. المشكل ما يعطوكش الفرصة باه تفكرهم يشوفوك يبدلو الطريق بالتجربة هادي روحي مهنية
مع لعرب تجبد خير حتى الهجرة الى ملجا ما عندك ما تقولي فيها

مشكورة اختي لي شاركتينا موضوعي ... يعطيك الصحة​

 

[قرصان الساحل]

ههههههه نمد مشي بنك الخليفة بيسك مزال مااحتاجوش دراهم واعرين
ديما دراهم خفاف يروحو عادي هههههههه راني طالبة جامعية برك أصلا ههههه​

معليش المهم تسلكي حق القهاوي في عز التقشف اخخخخ
معليش ان شاء الله ترجعي بنك الخليفة وربما اكثر
كيما قالو الله يجعلنا غابة والناس حطابة​

 

[قرصان الساحل]

موضوع للتميز هههه نرجعلك خويا
راهو مركى بن زيمة اليوم كيما قتلك هههه
مركيني راجع ان شااء الله ​

وي او ماركا البنزو الحلوف اليوم ان شاء الله يرجع صينو يروح لمزبلة التاريخ -____-
وي اني مركيتك خويا تات ليست اتهلا اخخخ​

 

[قرصان الساحل]

السلام عليكم
وعليكم السلام مرحبا سكر خويا
الله يعطيك الخير يا خويا هشام ههههههه
اواه مزالك افريقي الاصل ودوريجين ترجماناها برك ههههههه
وي لافريك هي لي عايشة فينا احنا خاطيينها هههه
في هذي لبلاد تحشم يمصولك دمك يرجعو كامل ليفومبير
ايوه راك جبتها تحشم يحشولك رجليك كان هنا وراح اخخخ
المشكلة ماشي قال تحشمو يحشم ههههههه هذاك وين يزيد يطلق سلابو عليك
هههه وي راك شفتها تحشمو يصيب راحتو الحلوف تجيه على السادسة عشر
التسلاف هذا داير ظل سورتو عند لبنات حتى التقشيرة طبطب فالليل تسلفها على جارتها ههههههههه
عندها خرجة اورجونس مع الصباح ويماها غسلتهم هههههه
ههههه وي ميراطوش خويا ميراطوش يعجبهم الحال المهم يديبانيو خير من والو
والمشكلة لكبيرة الافكار يخممو فيهم قبل ما يقصدوك باش سور تغيضهم وانت تحشم منهم
منذاك عدت نقول سور وجهم مخدوم بلحديد ولا تاع بلاستيك هههههههه
ايه لازم نديرو لاروشارش نعرفو المتيار لي مخدوم بها وجوهم باه ما يغيضك موالو منين يجيك
تكون ركبت وجه كيما وجهو وديرلو كونطر اطاك مريقل هههه
يابنعمي انا نكون حاصل ومانقدرش نقصد كاش واحد يعاوني في شغل الله غالب حشومي شويا هههه
صح الواحد والله يحشم باه يقصد الناس تبانلك ثقيلة مي هوما والله يحيروك منين جابو هاد الوجه
مي راك طول الغيبة ياخو
منذاك زورنا باش نطلعو المورال شويا هههه
اخخخخ مقالولكش بلي كنت في بطن القرش انا نجبد وهو يجبد بالسيف خرجت على قيد الحياة
​

صحيت مالك خويا اني منين داك ندير طلة باه يطلع المورال اخخخ​

 

[فيتامين سي]

ياااااااااااااااااااااااااااااااااااااااه شكون جا :X3:
حمار مات
نشد بلاصة دوك نرجع نخلط في مخي شويا كاش منلقا كلمات معبرة ​

 

[لؤلؤة قسنطينة]

السلام عليكم
اهلا بعودة الاخ هشام، هههههه عندنا شحال ماضحكناش على موضوع كيما هكا
دائما مواضيعك مميزة، وهاد الموضوع بالذات تقول راك تحكي عليا قصدي الحشامين ماش الصامطين
كي يجي عبد يقصدني في حاجة خاصة وقت الدراسة أني نسلف كراريس نحشم حتى نقولهم رجعوهولي عندي امتحان هههه
يقولولي مازال ماكملناش ولا تقولي وحدة راني كل يوم نكتب درس بزاف عليا، تجيك واحد الحالة هكا وتكون رايح تقولها
سامحيني ديرونجيتك اكتبي بعقلك كل حرف في يوم اما انا نشوف ندير فوطوكوبي على كاش وحدة ونحفظ ونتي احكمي كراسي
اكتبي عليه وورا الامتحانات رجعيهولي برك باه نخليه ذكرى خاطر نربي الكبدة على كراريسي ههههه وساعات حتى يدبرو عليك
تقولك نرجعهولك بالأحد لعشية وهكا تقدري تحفظي بيه لغدوة للامتحان هههه قريب تقولها كتر خيرك كي خممتي فيا وماننساش خيرك
وقريب تعرضها في جاك المرسول تعتذر على وقاحتك معاها ههههه، يعني شعب يدوخك تاع الصح هو مايحشمش دبرها
ونتا تحشم طفرت فيك يديروك طريق وكاين لي قدامك يهز حاجتك ويقولك دقيقة حتجتها برك زوج دقايق تولي تقولو معليش ترجعلي
حاجتي نحتاجها؟ يقولك آو هادي تاعي شراهالي بابا عام دينا الاستقلال ويبدا يجبدلك الثورة وحادثة هيروشيما تولي نتا تتوسوس
تقولو صح عندك الحق هادي حاجتك انا لي نتبلى، وبخصوص التسلاف فكرتني بمسلسل الحاج لخضر مول العمارة هههه كاينة فيه حلقة تاع التسلاف
كي هبلوه ولادو قالهم صح مول التاج ويحتاج بصح ماشي يحتاج التاج، يعني الناس تعرف واش تسلف وتحاول ماتحرجش الناس
ومايكونش وجها صحيح، انا ساعات كي نسلف حاجة حتى ولو كراس نكتب عليه نرجعو غدوة بعد ونطلب السماح وندير حسابي
باه مولاه مايبقاش يستناني اكثر من نهار يعني كراس برك فمابالك حوايج خرين
شكرا خويا هشام على الموضوع المميز نظن بالفعل تستحق ختم التميز
بالتوفيق ان شاء الله
تحياتي

​

 

[باتنية و نص]

السلام عليكم
زيْد ابن عمي عندنا؟ يا مرحبا
عاش من زراك البائس الافريقي
شفت الحشامين وش يعانيو ؟
ربي يعيننا انا و @لؤلؤة قسنطينة

شكرا أخي ..مبدع كعادتك

 

[قرصان الساحل]

السلام عليكم و رحمة الله
وعليكم السلام مرحبا بيك ختي الجورناليستا
هههههخخخههه مقدمة رائعة سيرتوا تاع " رقصات على انغام ايااا وهاذي دو صون ميل " ععهههخخحخ
وي انها افريقيا البائسة تجي تحير تفهم يموتو على الدوصون ميل
لا حشمة لا حشاشيم نورمال يسلفوك انت تاني يديروا بيك جولة حول الفضاء ههههه ، يسلفوا كل شي و يكثروا بزااف ، تلقاها عجوزة يا محاينك تجي تسلف ذهب بتاش تروح لعرس ياو هذي اللي شوكاتتي كتر وفاتت عليا هههه و الفايدة ؟؟ البس يا كبري عهههه
هاهاها هادي لي غناو عليها طب الليري عجوزة كبيرة وبغيتي طيري جاية تزاحم في حفداتها ... عليها قالو ناس بكري لي فاتو وقتو ما يطمع في وقت الناس ولي ما شبع من القصعة ما يشبع من لحيسها كلامي لك ايتها العجوزة ان كنت في الاستماع
ديما تسلاف دونك تسلف دراهم محتاج باين هذي عادي مظطر عندو ديون دوك نهار يولو عندو يرجعهملك ولجالى محبش يرجعهم مولاه ربي ماراهش خدعك راه دار عليه ذنوب برك
مول التاج ويحتاج هادي باينة مي الواحد يدير مجهودو باه يرد دين تاعو ماشي يدير النية في الهبال ويخلي الناس تجري موراه
مي تاع تجي تسلف الخبز و لا خمار ولا شارجور تاع تيليفون حاجات تقدر تشريهم بصح هوما لا يصححو وجههم ويزيدوا يعاودوهالك شحال من مرة ويزيدو فالكمية والنوعية ههه يوصلك للكوشة تسلفاهو تطيب المرى تاعو حلوى و لا للطوموبيل وليسونس من عندك هههخه نورمال تجي تقولك اعطيني كيلو بطاطا خهههه وهوما كيفك كيفهم ما عندكش وبلاك هوما خير منك فالظروف المعيشية بصح يسلفوا يحبو التسلاف بزااف ،، حتى تحشم تردهم كي يطلبوك في حوايج يكونو عندك وشافوهم ،، سيرتوا هذوك اللي يشوفوك بلبسة جديدة تجي وحدة لعشية لعندك تقولك : " شفت عندك وحد اللبسة فاللون هذا و الفصالة هذي الى تسلفهالي ....... ) ؟؟؟؟؟ وانت باسم الله الرحمن الرحيم وكتاه شافت الفصالة واللون وانت خرجت بيها فالظلمة ورجعت فالظلمة هههه غير تتحير بصح والله ما تديك هههخخخ
ايه عندك حق المشكل احيانا مش ما عندوش مي يخبي صوالحو لمشاريع اخرى ويحب يبروفيتي عليك ويقلك او لباس عليك ... هي لباس عليا ربي يزيدني يخي ماشي انت لي درتي في جيبي صح راسك يمركي علامة استفهام عملاقة وكيما قلتي لحق بيهم التسلاف لابسط كيما حكاية شارجور ولا طونبيل ولا لبسة هادو حوايج شخصية مش للتسلاف اخي الافريقي
ايا قرصان يعطيك الصحة على الموضوع الجميل
الله يسلمك ختي الصحافية من ذوقك
وراك مدة غايب رانا حكمناك ههه هاهاها حكمتوني بالواعرة يا يما شحال واعرين نتوما

مشكورة ختي على مناقشتك الفعالة للموضوع .. ربي يهنيك​

 

[لؤلؤة قسنطينة]

السلام عليكم
زيْد ابن عمي عندنا؟ يا مرحبا
عاش من زراك البائس الافريقي
شفت الحشامين وش يعانيو ؟
ربي يعيننا انا و @لؤلؤة قسنطينة

شكرا أخي ..مبدع كعادتك

مانحشموش برك كي يعود الموضوع على العناكب تما تظهر قدراتنا الخارقة هههه​

 

[قرصان الساحل]

ياااااااااااااااااااااااااااااااااااااااه شكون جا :X3:
كابتن جاك سباروو
حمار مات
تاع عمي علي مي ماشي حمار بغلة
نشد بلاصة دوك نرجع نخلط في مخي شويا كاش منلقا كلمات معبرة ​

شغل كاين لاشان ميخلاصش مراناش نبيعو في حليب شكاير -___-
كلمات معبرة اووو اني نستنى​

 

[قرصان الساحل]

السلام عليكم
وعليكم السلام
اهلا بعودة الاخ هشام، هههههه عندنا شحال ماضحكناش على موضوع كيما هكا
وبيك مرحبا ختي لؤلؤة .. اييه ربي يدومها ضحكة ان شاء الله
دائما مواضيعك مميزة، وهاد الموضوع بالذات تقول راك تحكي عليا قصدي الحشامين ماش الصامطين
كي يجي عبد يقصدني في حاجة خاصة وقت الدراسة أني نسلف كراريس نحشم حتى نقولهم رجعوهولي عندي امتحان هههه
لو تشوفيها من جهة اخرى انت تساهمين في حالات التسيب الدراسي كيفاه انت تانسيستي تحضر دروسك وتتعب
وهو ضاربها برقدة ومبعدا يجي يلقاها بالواجدة هادي ما فيهاش حشمة صح بلاك في الوسع معليش
مي يبقى نهار للامتحان وانت محتاجة دروسك ويدوهم هنا غير مقبولة منك يا زطشي -_-
يقولولي مازال ماكملناش ولا تقولي وحدة راني كل يوم نكتب درس بزاف عليا، تجيك واحد الحالة هكا وتكون رايح تقولها
سامحيني ديرونجيتك اكتبي بعقلك كل حرف في يوم اما انا نشوف ندير فوطوكوبي على كاش وحدة ونحفظ ونتي احكمي كراسي
اكتبي عليه وورا الامتحانات رجعيهولي برك باه نخليه ذكرى خاطر نربي الكبدة على كراريسي ههههه وساعات حتى يدبرو عليك
تقولك نرجعهولك بالأحد لعشية وهكا تقدري تحفظي بيه لغدوة للامتحان هههه قريب تقولها كتر خيرك كي خممتي فيا وماننساش خيرك
وقريب تعرضها في جاك المرسول تعتذر على وقاحتك معاها ههههه، يعني شعب يدوخك تاع الصح هو مايحشمش دبرها
ونتا تحشم طفرت فيك يديروك طريق وكاين لي قدامك يهز حاجتك ويقولك دقيقة حتجتها برك زوج دقايق تولي تقولو معليش ترجعلي
ايه صح تالمو بلاك وقاحة يخلوك تحشم باه ترجع حاجتك ولا تجبد عليها وتلحق درجة الوقاحة تاعهم ان يزيد يشيخ عليك
في حاجتك انت ويديرلك بروغرام على حسابو هو انهم شعب مذهل من اين لكم بهاته الوجوه المقزدرة ايها الزطشيون ؟؟؟
مي هنا لازم قوة الشخصية والواحد يخمم في روحو تاني ماشي بسبتهم يدخل في لعبهم ويضيع مصالحو على جال
ناس تخمم في مصالحها وفقط
حاجتي نحتاجها؟ يقولك آو هادي تاعي شراهالي بابا عام دينا الاستقلال ويبدا يجبدلك الثورة وحادثة هيروشيما تولي نتا تتوسوس
تقولو صح عندك الحق هادي حاجتك انا لي نتبلى، وبخصوص التسلاف فكرتني بمسلسل الحاج لخضر مول العمارة هههه كاينة فيه حلقة تاع التسلاف
كي هبلوه ولادو قالهم صح مول التاج ويحتاج بصح ماشي يحتاج التاج، يعني الناس تعرف واش تسلف وتحاول ماتحرجش الناس
ومايكونش وجها صحيح، انا ساعات كي نسلف حاجة حتى ولو كراس نكتب عليه نرجعو غدوة بعد ونطلب السماح وندير حسابي
باه مولاه مايبقاش يستناني اكثر من نهار يعني كراس برك فمابالك حوايج خرين
ايه علخاطر الواحد مزال فيه النية والحشمة من الناس ويعرف حق الخير تاع الناس وصدق القاائل
اذا انت اكرمت الكريم ملكته ... واذا انت اكرمت اللئيم تمرد
اللئيم هذا ما يليقلو غير الهراوة ماشي تاع حرمة
شكرا خويا هشام على الموضوع المميز نظن بالفعل تستحق ختم التميز
عفوا ختي التميز في ردك هذا
بالتوفيق ان شاء الله
تحياتي

​

يعطيك الصحة ختي لؤلؤة على مشاركتك لينا حكايتك مع الحشمة
مي نقصي عليك الحشمة مع اللي يحشم
موفقة​

 

[قرصان الساحل]

السلام عليكم وعليكم السلام
زيْد ابن عمي عندنا؟ يا مرحبا الناس تقول زيد ابن عمي عندنا ؟؟ يا فرحتي -___-
عاش من زراك البائس الافريقي
الله يعيشك ايتها البائسة الافريقية دعاو عليا واحد المرة قالك القرصان هذا نرموه في البحر ليلتهمه سمك القرش
وكان لهم هذا ونساو لي حنا نميلو ما نطيحوش اخخخخ
شفت الحشامين وش يعانيو ؟وي ربي يكون في عون خوتنا الحشامين وين ما كانو ويطلق سراحهم
ربي يعيننا انا و @لؤلؤة قسنطينة
امين الله يكون معاكم
شكرا أخي ..مبدع كعادتك
عفوا الابداع في تواجدك

على انغام حشااامة وقتلتني بالقدر كانت معانا باتنية و نص
متنساش ليصباص الواو يزعف
تحياتي​