السلام عليكم و رحمة الله
جماعة الخير صحيتو
ان شاء الله راكم بخير
الحمد لله اسي ههه قولو الحمد لله اسي ...
المهم ...هذي حكاية ... نضحكو بيها و نلطفو بيها الجو شوية ... ايا ركزوا زين بصح
بسم الله ...
في يوم ومن أيام الصيف الحارة ... و السمش فاتحة الكونت .... الزاوش يتشوى في السما ...ههه
قالك هذا واحد السيد مريّح في لاري تاع الطاكسي ... و يستنى ق العافية ... رايح لخدمتو و لا للمارشي المهم هابط يقضي صالحة صاحبنا ...
مااارة هاك ... جات طاكسي ... و الطاكسي هذيك ... طبطوبة... حديدة رايحة فيها وقيلا LADA من تاوع بكري هذوك
السيد روّش بيدو للطاكسي ...حبس الطاكسي ... طلع صاحبنا ...سلام عليكم ... و عليكم السلام ...
اي و الله ....
السيد طلع... الحية الاولى لي لاحظها ... الكارو ما يهبطش ههه و السخانة ... و الكرسي مشرشب و مقطع ...
و الحاجة الي قالتلهم اسكتو...."الشيفوور "
الشيفور هذاك بيه التعب ... قلع صباطو و حطو بجيهة ... و لابس تقاشير تاع الفوطة في عزّ الصيف لا أراكم الله ...أوت...هههه
و الريحة هذيك راك عارف تشمّها بوذنيك ....من قوّتها ...ما تشاوركش قاع ههه
و صاحبنا المشتري ما طاقش ... الريحة ذيك عقبتلو لمخو ديراكت ههه
دار هاك ...شاف هاك ... سكّر نيفو ..بدا يتقلّب .....و الشيفور ما فهمش روحو عادي مسطالي كي يا أيها الناس... و الريحة هذيك تعبّق...
قباّرة راني نقولك ههه
...
المهم السيد كي خلاص ما قدرش ...صد للشيفور : االمعلم ... و الكروسة هذي ...لا ديس "10" ؟؟ ههه
(يقصد لاديس ...معناها عدد الأحصنة 10 .. أي قوة الموتور بقوة 10 أحصنة )
قالو ( الشيفور ) : لالا ...هذي لا أونز " 11 "
...
قالو امالا ق عاود احسبهم ...على حساب واحد الريحة راه عندك عود جيفة هنا
ههههههههه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ان شاء الله تكون عجبتكم
ايا بالعافية .. سلام عليكم