جلسة مع المعلم بعد 16 سنة ..

[Hakan]

السلام عليكم مساء الخير للجميع ، الانسان هذا مكان والو و الانسان لي كيفي مكان والو أكثر ،واش راهو يخرط ؟ هذا السؤال لي راهو في رأس من يقرأ موضوعي لكن ما تستعجلوش عاودو أرجعوا أقراو الموضوع ليس تعبير مجازي نعم بعد 16 سنة ريحت اليوم مع معلمي في الإبتدائي راسي لراسو انا هو و ربي سبحانوا كان معانا ، بدا الأمر العشية على الساعة 17:51 دقيقة وين جاني ميساج في الهاتف نتاعي محتوى الرسالة كالآتي :
( السلام عليكم كلمني من فضلك ولدي )
وبعدها دخلوني رسالتين بلي عيطلي معلمي بسبب ضعف الشبكة في الغرفة في هذا الوقت
بعدها رسالة أخرى ( يا حكيم نحي الكود ولا كلمني )
وبعدها رسالة أخرى ( معاك نور دين معلمك في الإبتدائي )
رايحين تقولوا علاه ما رفدتش وعيطتلوا ( ياخاوتي والله ما حكمتوا من ريزو ههههه

المهم عيطتلوا السلام عليكم سيدي هكاك كنت نقلوا من كان يقرينا كي نرفد اصبعي باش نشارك
واش راك واش خبارك ياسيدي هذي غيبة وصوتي و مشاعري كلها فرح بالمعنى الحقيقي شعور مستحيل واحد يوصفوا او يحسوا غير اذا كان فات عليه ..

وين راك وليدي ،وين راني يا سيدي راني في بيتي .
يخي ما عندكش صوالح ،،، لالا سيدي ماعنديش واذا كانوا عندي نحييهم

معليه وليدي راني في البلاد جيت عندي مدة و جبت رقمك من عند فلان و حبيت نشوفك ..

سيدي وين راك راني جاني

ارواح ليا المكان الفلاني ...

خملت روحي من فراشي اجري اجري سيدي رايح نتلاقى بيه بعد سنوات ..

مع العلم تلاقيتو صدف من قبل مي مكانش موعد ،،،

أيا انا نجري نجري و ذكريات نتاع المدرسة الإبتدائية تجري معايا في راسي تلاقيتوا عنقتوا سلمتلوا على راسو شاف فيا ملييييح وشفت فيه مليييييييح ملييييح و سكتنا وشدني من وذنتي

كبرت يا وحد المفسقل ( مفسقل تعني طفل صغير مشاكس )

ياسيدي كبرنا بصح معاكم مازالنا أطفال ...

كيفاه أخبارك واش غيابك علاه ترحل من المدينة نتاعنا ،،، ظروف يا وليدي
كيفاه حتى خممت تعيطلي ،،عيطتلك اول واحد واخر واحد للتميزك عن باقي تلاميذ ،،،
عينيا رقرقرو ودمعة غلبتني زدت عنقتوا وهو يبتسم

مالا متوحشني يا سيدي كيفاه ما نتحوشش لي علمني نكتب الحروف و نقرا الكتاب و كلش ..

المهم تبادلنا الذكريات و الحكايات و كلش فات عليا وعليه كي كنت تلميذو وتذكرنا الحكايات و التلاميذ زملائي وزميلاتي ساعتين راح نقول انهم اجمل ساعتين لسنة 2023 ، فاللهم لك الحمد والمنه على هذا اللقاء ،

وين رايح نروحوا نتعشاو سيدي في البيت وتشوف الوالد وتبات عندي ،والو وليدي طريقي لمسيلة وفايت منا قلت نشوفك و نسقسي على زملائك لي قريتهم ، اصريت عليه ما حبش
وجيت نشارك خاوتي هاذ الفرحة و ننصحكم أيضا
علموا اولادكم حب المعلمين و احترام اساتذتهم والله ثلاثا غير عندهم مكالنة كبيرة برغم كل الجهود التي تحاول أن تقطع هذه العلاقة بين الأبناء والمعلمين .

والسلام عليكم

 

[بدر شاكر]

مشالله تبارك لله رب صدفه خير من الف ميعاد

 

[الامين محمد]

ياتل حتى معليمين تاع زمان جايين حنان
تحس انهم والدينا ماهش معلمينا فقط

حسيت بيك خويا حكيم لاننا تقريبا من نفس الجيل
مازالني كي نلقى واحد منهم ما نخزرش فيه و نحط راسي
و نسلم على راسه و نكبر بيه و نقدمه و ما ناديش باسمه

لحظات مؤثرة فعلا خويا حكيم

 

[*amani*]

وٌعٌلَيِّکْمً أّلَسِـلَأّمً
يااه والله جاتني الدمعة ماعرف علاه
المعلمين هذو عندهم بلاصة وحدها وكيما قال خونا الامين تلقاهم حنان صح ويحبوك ويمدولك ويقروك وينصحوك وكلش يديروه من قلوبهم.. مام انا كنت نقولها سيدتي ههه لدرك كي نلقاها نحشم منها ياحسرا على ليام
من جميل الصدف أنك تلاقيت بيه واسترجعتوا الذكريات وتفكرك وحوس عليك شيىء جميل ومُفرح حقا ❤

 

[Hakan]

مشالله تبارك لله رب صدفه خير من الف ميعاد

نعم صدفة جميلة طلعتلي المورال و وعطاتلي طاقة لبقية العام ان شاء الله .

 

[Hakan]

ياتل حتى معليمين تاع زمان جايين حنان
تحس انهم والدينا ماهش معلمينا فقط

حسيت بيك خويا حكيم لاننا تقريبا من نفس الجيل
مازالني كي نلقى واحد منهم ما نخزرش فيه و نحط راسي
و نسلم على راسه و نكبر بيه و نقدمه و ما ناديش باسمه

لحظات مؤثرة فعلا خويا حكيم

والله صح يبالي كلش كان على بعضاه من المعلمين للتلاميذ كان كل واحد عندو مكانتوا و قيمتوا عند الآخر والله يا خويا محمد ما هزتني الارض من الفرحة راكب معاه في سيارتوا و نسقهوى معاه تقول راني نسقهوى مع كاش وزير من الوزراء بالفعل احترام كبير ربي يقدرنا يا رب وما ننكروش خيرهم.

 

[Hakan]

وٌعٌلَيِّکْمً أّلَسِـلَأّمً
يااه والله جاتني الدمعة ماعرف علاه
المعلمين هذو عندهم بلاصة وحدها وكيما قال خونا الامين تلقاهم حنان صح ويحبوك ويمدولك ويقروك وينصحوك وكلش يديروه من قلوبهم.. مام انا كنت نقولها سيدتي ههه لدرك كي نلقاها نحشم منها ياحسرا على ليام
من جميل الصدف أنك تلاقيت بيه واسترجعتوا الذكريات وتفكرك وحوس عليك شيىء جميل ومُفرح حقا ❤

ياودي هو يقلي واش راه فلان وانا نجبدلوا على حدث معين لهذاك الشخص وهو يقلي الله يبارك راك تشفى وانا نقلوا يا سيدي كيفاش ما نشفاش اجمل لحظات حياتي والله غير فرحت اليوم كأكثر شخص فرح في حياتوا اجمل ساعتين ربي يفرحكم ان شاء الله.

 

[أبو عاتكة]

المعلمين بالاخص عندهم مكانة خاصة عندنا بمجرد ماتشوفو تبتسم وتفرح ياتل تقول بويك اللي رباك وهوما بكري كاو كالاباء وعالم اخر مختلف عن الحالي تماما.
فكرتنا بيهم ندعولهم بالصحة والعافية واللي توفاو ربي يرحمهم كيما معلمي في الرابعة توفى تحت التعذيب في الاحداث المأساوية. اما معلمي في الاولى يعاني من مرض اقعده الفراش عملتلو عرضة هو وجماعة ذاك النهار كان يبكي وفرح قالي اللي اتفكرتني ودرتلي قيمة.

 

[Hakan]

المعلمين بالاخص عندهم مكانة خاصة عندنا بمجرد ماتشوفو تبتسم وتفرح ياتل تقول بويك اللي رباك وهوما بكري كاو كالاباء وعالم اخر مختلف عن الحالي تماما.
فكرتنا بيهم ندعولهم بالصحة والعافية واللي توفاو ربي يرحمهم كيما معلمي في الرابعة توفى تحت التعذيب في الاحداث المأساوية. اما معلمي في الاولى يعاني من مرض اقعده الفراش عملتلو عرضة هو وجماعة ذاك النهار كان يبكي وفرح قالي اللي اتفكرتني ودرتلي قيمة.

ربي يرحم لي ماتوا ويسكنهم فسيح جناته ،ما غلطتش صح كانوا في مكان الاب ، حكالي اليوم قصة عجيبة على طفلة كانت تقرى معانا عندو راهي مرت راجل اليوم ،قلي وحد نهار جا المدينة نتاعنا يزور صحابوا قلي ونا نمشي في الحوانت لقيت زوج نساء منقبات في الشارع نتاع المرشي قلي وقفتني وحدة فيهم قاتلوا سيدي شفيت عليا ههههه قالها يابنتي راكي بالنقاب وين نعرفك قلي نحات النقاب نتاعها وقاتلوا انا فلانة لي كنت نقرى عندك قلي هذاك نهار دموعي طاحوا في الموقف هذا وقاتلوا ياسيدي راك في مكانة الاب نتاعي باش تعرف قيمة المعلم نتاع زمان ماشي كي جماعة الدروس الخصوصية وميتين الف للحصة.

 

[السها]

استمتعت و انا اقرأ ذكريات الطفولة لا تنسى ذكرتني في لقاء بكاني و انا في مهرجان الطفولة تلقيت بماما نجوى الي كانت تقدم زمان الحديقة الساحرة و كنت نحلم نكون ضيفة عندها لكن طبعا كان حلم مستحيل و بدون شعور لقيت روحي نبكي و انا نحضن فيها

 

[إلياس]

لحظات مؤثرة فعلا خويا حكيم
و استمعت بقراءتها دمت مبدعا

 

[Hakan]

لحظات مؤثرة فعلا خويا حكيم
و استمعت بقراءتها دمت مبدعا

شكرا لمرورك خويا الياس بالفعل كاد المعلم ان يكون رسولا

 

[Hakan]

استمتعت و انا اقرأ ذكريات الطفولة لا تنسى ذكرتني في لقاء بكاني و انا في مهرجان الطفولة تلقيت بماما نجوى الي كانت تقدم زمان الحديقة الساحرة و كنت نحلم نكون ضيفة عندها لكن طبعا كان حلم مستحيل و بدون شعور لقيت روحي نبكي و انا نحضن فيها

انعم ختي المعلمين آباء وأمهات ربي يحفظهم ويطول في أعمارهم بالخير و البركة ،وربي يرحم الأموات منهم شكرا لمرورك .

 

[صلوا على النبي]

شفيت مرة روحت زرت معلمتي تع الابتدائية كانت نساتني شوية بصح غير خبرتها باسمي عرفتني ... شحال فرحت والله الاساتذة كاين لي كي تتفكر برك بلي قراوك تحس بالفخر.
هنيئا لك بأستاذك و هنيئا لأستاذك بك الأخ