سلام حبيت نحي من بالي حكاية راهي شاغلة بالي بزاف باراءكم تفيدوني وتنصحوني
خيبت ضني بنت كنت دايرتها صحبتي وختي واعز رفقاتي
وقفت معاها مرا في اتعس ايام حياتها مي هدا الشي عادي كلي عملتو اخت لاختها خيبت ضني بنت كنت دايرتها صحبتي وختي واعز رفقاتي
نحكي من اللول ومن البداية
خطبها واحد لباس عليه ماديا ودينيا نعرفوه كامل ولد المنطقة هي دارهم ماقبلوهش ودابزوها قالولها رفضي على بال كان عندها خوتاتها كبرات عليها ثلاثة
المهم عائلتها تحبني وتعزني دايريني بنتهم ويديرو على كلامي .
نسيت هدا العريس كان باغي يخطب في الاصل اختهم الصغرى وشاء القدر وماتت فلهدا قال نجيب اختها وخلاص على هدا عائلة صحبتي مارضاوش بيه
مي انا جاني امر عادي كي هو راه حاب وهي حابتو قلت نورمال ربي راه كاتبلهم هكا وقفت معاها في هدي المحنة
قلتلها قاع متخميش مغديش نسمح فيك على جال هدي حاجة تاع حلال
حاولة مع عائلتها بدون فائدة قالو ايلا راهي حباتو تروح معاه بصح حنا ما تقارع منا والو قلتلها تكلي على ربي وكل شي ساهل وانا تناشعت مع عائيلتي على سبتها
قالولي مدخليش روحك مي انا درت رايي ووقفت معاها وكملت وتزوجو بصعوبة وقاع الحاجة اللي بغاتها في الجهاز عاونتها بيها جبتلها لاكوافيز عندنا للدار وخرجنا العروس من دار باها وجبتها الى بيتنا
وكي قربو يجو يدوها رديناها لدارهم ورحت معاها لدار راجلها وصدرتها بتصديرتي كامل كنت مزال ملبستهاش كنت مخطوبة فقط المهم فات العرس غايا عند راجلها قاع اللي مدرتهاش في دارهم دارهالها راجلها .
وصيتها على بزاف صوالح كنصائح مع العلم انو هي تكبرني ب5 سنوات .وفوت معاها سيمانة كاملة تاع العرس وتحضيرات اللي من قبل ...
فرحنالها كامل وما صدقنا حتى دخل بيت زوجها بسلام ......
راني عارفة راكم تقولولي وين راهي المشكلة ..............يتبع................
بدينا غير في اتصال على الهاتف وكل مرة تشكيلي على والديها نقلها كل شي يفوت وطلبي منهم السماح وتصالحو وكل شي غادي يولي كيما كان ............
كانت مين تروح لدار والديها يجبدوا اللي فات ويعايروها خوتاتها وتدابز معاهم ...........
نقولها غير صبري انت راكي تروحي على جال والديك ودي منهم دعوة الخير حاجة تانية متعمريش راسك بيها
وشيرا غير تزوجت تبدلت وغير دارت راجل حسبت روحا طلعت للسما مولاتش تسمع قاع للهدرة وزادت في عنادها عدات كامل العائلة تاعها وقطعت الاتصال بيهم
المهم انا وليت معاها وليت مع دارهم نحاول ندير صلح بيناتهم وغير كيف كيف لا حية لمن تنادي
حسبت بلي رجلها وناسو هوما كلشي في حياتها.
شوية بشوية بدات تسقسي على والديها ولدت جابت بنت قلتلها هدى الفرصة تاعك للصلح دي بنتك للجدودها وكان الامر هكدا عادت تروح وتريح بالسمانة وب15 يوم في دارهم
زوجها عندو مرت باه تاني كانت تشكيلي منها ومن سلفاتها كنت نقولها صبري تعياي وديري دارك غير العيب ماشي مليح ماتخصريش معاهم برك انت ...
وهكا تزوجت انا وبدينا في اتصال وكنت ما شفتهاش ملي تزوجت كانت تسكن بعيدة
وهكدا قتلنا الاشتياق لرؤية بعضنا وكيف تبدلت الاوضاع عرضتهم عندي ما حبتش قتلي انتي تجيني الاولى
تفاهمت مع راجلي ولحيت عليه ورحنا عندهم على الرغم من المسافة الطويلة نهار وحنا نتمشو باه لحقنى المهم كيما العادة ديتلها هدية ليها ولبنتها والقاطو صنعتو ليها والتمر تاع ادرار
زعما راني فرحانا كي غادي نشوفها ورحنى رحبو بينا عادي وتلقينى المشكلة الاولى كانو مستاجرين بويت صغير قدهم .ديرونجينا انا وراجلي قالي غدوة نشوروخلاص مرانيش مرتاح
وكان احساس راجلي من اللول صحيح وكان عندو الحق من الاول مكانش باغي وكان عندو احساس غريب غير انا قتلو ماعليش
وسرا لي مايحمد عقباه مرضت تما عندهم وصرا خطا طبي وتدهور الامر وبديت من سبيطار الى سبيطار نتقايس وراجلي خدام جا موعد تاع رجوع الى البلاد تاعنا المهم مشكلة وخلاص
ندمت اللي قاع رحت وراجلي حملني كامل المسؤولية زعما انا تقول كنت عارفة بلي غادي يصرا هكا.
المهم خلاني في المستشفى وراح تما حسيت بلي خلاص مت وانا حية عائيلتي مخبرتهم قاع على بال كانو بعاد عليا وماحبيتش نقلقهم وانا قلت قضيت سيمانة ونخرج مكان لاه نخبرهم وحتى عائلة راجلي بعاد في الجنوب :bravo01:وعائلتي في الغرب :bravo01:وانا في الوسط:bravo01: بقيت ندعي ربي نخرج في اقرب وقت ونريح لاني بديت البكا ورا البكا وزادت حالتي البعد من جهة والمرض
من جهة وكملت عليا صحبتي من جهة ....راجلي كان يبات معايا في السبيطار كان يبات يراقب فيا لا تسوء حالتي ومبعد ما قبلوش تاع السبيطار كان يروح يبات في الجاميعة عند صحابو
الى ان جات ماما وهو وصل وقت كمل الكونجي تاعو .
وراجلي قالي غادي نروح نطلب من المدير ونعاود نولي قلت خلاص المشكلة مخلاوهش يخرج كان غير كي دخل من الكونجي ولهدا قررت نخبر والديا باه يجو عندي
كانت صحبتي تجي مرا في السيمانة عندي ولا ترسل غير راجلها بصح والله ما غادني الحال ولا لمتها انا كنت لاهية غير في همي
جات ماما وجا خويا عندي وخالي عندو صاحبو يسكن في تلك المنطقة خبرو عليا رسلي اخته بدات تجي عندي وقعدت ماما معايا كانت تريح عند صحبتي تما بدات المشكلة ماما حست روحها متقلا عليهم
وبدات كانو راهي مريحا على الجمر تبات برك وغير يجي الصباح تجي عندي تفوت النهار كامل في السبطار عندي وخويا راح في نهارو
ومبعد بدات تعمل صحبتي في وحد التصرفات لماما ما يعجبوش وما حشمتش منها وما قدرتهاش يعني كرهت مني صاحبتي بدات تقلب زعافها في ماما وهدا الامر غادني بزاف
لانو كنى مطرين باه تريح ماما عندها ومبعد وحد النهار زعفت ماما طلبت من صحاب السبيطار يديروها قارد ملاد تاعي ما حبوش قعدت تبات معايا خيانة عليهم والله العظيم صدقوني
قاتلي نحمل هم السبيطار وهم البرد وهم الزعاف ولا هم هديك اللي حلينالها عينيها .
المهم مرت الايام وانا نطلب في ربي يشفيني باه نهني ماما ونريحها ونهني صحبتي اللي كانت فايقة فيا وانا على فراش الموت لا كلام ولا ماكلة
استجاب ربي ليا ورسلي وحد الانسان عاوني بزاف وقاع ما ننساش خيرو حتى نموت لقيت الخير في ناس منعرفهمش كامل
السبب كانت بنتو مريضة ومعايا في نفس لاشومبغ وهي حكات مع باها باه يعاوني ويوقف معايا وكان كدلك دار اللازم وكتر وقف وقفة تاع رجال
وحولني من هداك السبيطار لواحد 2 ومرت شهرين على مرضي لا اكل ولا شرب المهم دعيت ربي ليل ونهار وكانت ماما معايا طول الوقت تبات معايا
ومبعد صحاب خالي اختهم بدات تجي وتجيبلي الاكل وكل ما نحتاج ليه وونستنى هي تاني الله يعطيها ما تتمنى وهديك الصاحبة الاولى كي شافت الناس دايرين بيا ومقلشيني غارت وبدات تحوس غير على السبه باه تدابزني وانا في السبيطار باه تجبد روحها نهائيا .
واش دارت راحت عاودت كامل حكايتي لناس راجلها وشكاتلهم مني وهم كانو بعاد علينا مسافة وقرابة و
حكاتلهم كامل اسراري وصلني انا الخبر بلي راهي كرهت مني وبدات تشكي فلمتها وقلتلها واش داك تخبري الناس عليا حتى تكبر المشكلة ويبداو يحكو عليا في الطالع والنازل وانا خاطيتهم كامل
ومراهم فاهمين والو المهم الكل عرف حكايتي وزادو فيها وهي كانت السبب زعفت منها وكي بغيت نواجها قاتلي خلاص مابقات حتى هدرة انا وانت وهدي التالية بيناتنا وانا تما كنت في السبيطار مزال.
صحا زعفت وقلت ماعليش كاين ربي . خرجوني نريح في الدار شوية ونولي جات هديك اخت صاحب خالي هي اللي خرجتني وتكفلت بكل شي ريحت معاهم مع ماما وتهلات فينا
ومبعد ريحت وخرجت كامل من السبيطار بصفة نهائية .
جا راجلي باه يديني حتى كي ريحت عاد عرفت بلي هداك الراجل اللي وقف معايا في السبيطار وبدا يوصي عليا كان والي تلك الولاية صدقوني صدفة وشوفوربي واش رسلي
ربي قاع ميخليش عبدو وحدو ولا مغبون كنت نقول في الاول راني وحيدة ما عندي حتى واحد شوفو ربي واش رسلي وجا راجلي وتعرف عليه ورجعت لداري غير هي اللي دارت العيب
وخسرتني والى الابد .... ربي حط لنا امتحان غير باه يشوف معنى الصبر ومعنى رد الجميل ومعنى الصداقة وهي خسرت الله يسهل عليها منها لربي .
ومن تما زدت تمسكت بربي اكثر وقويت ايماني اكثر ... وليت نخافة من كل وحدة تقولي انا صحبتك ماوليت ندير ثقة في حتى وحدة وجبدت روحي خلاص من اي تدخل في المشاكل
وربحت ناس جدد ومزال يسقسو على اخباري لانهم شفوني كيفاش تعدبت وراني في اتصال معاهم الى حد اليوم مرت عليها عام .
سامحوني طولت بزااااااااااف عليكم مي كنت معمرة ومحتاجة تتفاعلو معي بردودكم سلااااام.
آخر تعديل:
