نكبة فلسطين مهازل من التاريخ

[فلسطين بيتنا]

مقال زمان كتبته بس حكيت خليني احطه,ما بيصير اشي


بسم الله الرحمن الرحيم نكبة فلسطين ,,,,مهازل يشهد عليها التاريخ كل سنة وبمتل هاي الايام ,,,,بنشوف مهرجانات وكلمات واناشيد وصور ومقالات بمناسبة ذكرى نكبة شعب فلسطين ,,,,وكل سنة بنلاقي كم بني ادم بيطلعوا يحكوا انه هادي اخر ذكرى ومش حتمر ذكرى جديدة الا وفلسطين محررة – وطبعا واضح جدا انه هاد كله ضحك على اللحى والدقون - ,,,,بس هاي الايام الذكرى صارت كبيرة وبتحمل رقم صعب شوي هو رقم 60 ,,,,60 سنة وفلسطين محتلة ,,,,60 سنة


,,,,
لم طلع اللاجئين بسنة 48 من اراضيهم العرب يومها والحكومات حكتلهم انه خروجهم
مش حيطول والجماعة المساكين حكوا هاد موضوع كم يوم وبترجعوا ,,,وهي الاكم يوم سحبوا 60 سنة وصار عنا اجيال جديدة ,,,,ما بيعرفوا الا انه اصلهم فلسطيني ,,,,بس معظمهم بيحمل باسبورات دول تانية ,,,,وللاسف الشديد ,,,ممكن نشوف كتير منهم يفيعوا ويتحمسوا ويحمى دمهم لما يسمعوا اغنية ثوري ثوري ولا اغنية وين الملايين ,,,وممكن يطلعوا بمسيرة ويحرقوا علم اسرائيل – قد ما بنحرق هاد العلم وبالاخير ما بينحرق الا راسنا - ,,,,

بس بالاخير ما بيصح الا الصحيح والمشروع الصهيوني مستمر على احسن ما يكون وبعد ما كنا بدنا نحرر فلسطين كلها من النهر للبحر ,,,,شوي شوي صار طموحنا نرجع 67 وياريت بس هيك ,,,طلعت ناس بتحكي ازا اسرائيل انسحبت لحدود 28/9/2000 بيكون انجاز ,,,,وانا بصراحة مش عارف ايش فائدة انتفاضة الاقصى ودم عشر الاف شهيد والجرحى والاسرى كله نسيوا جماعة رام الله لاند ,,,,المهم بلا هاي المقدمة الطويلة وخلينا بموضوعنا المهم بنظري وهو مهازل النكبة على لسان ناس كبار بالعمر شفتهم هون بالجزائر ,,,,,طبعا كلنا عرفنا كيف اليهود ب 15/5/48 اعلنوا قيام اسرائيل وكيف العرب بهداك الوقت حميت معهم وكل واحد حمل ها البارودة وقال وينك يا فلسطين ,,,,قال ايش الجماعة بدهم يحررونا ,,,,

اول المهازل قام فيها جيوش الخليج بالقيادة السعودية ,,,,طبعا جيوش الخليج بهاد الزمن ما بتعرف تفك الالف من كوز الدرة فما بالكم ب 48 ,,,,طبعا هاد الجيش الخليجي الجبار بقيادة جنرالات السعودية – يجوز اعلى رتبة عسكرية بالسعودية هي شرطي مرور لو اجينا للحق – حملوا حالهم ووينك يا فلسطين وامشي امشي امشي حتى وصلوا مدينة معان الاردنية نط واحد قلهم خلص احنا بفلسطين وشكلوا ما في اشي وكلوا اشاعات – لأ زلمة فهمان – واتصلوا بالقيادة حكولهم خليكم بمكانكم واوعكم تتزحزوا بلاش اليهود ياخدوا هاد المكان والجماعة الافاضل ما عرفوا انهم ما دخلوا
فلسطين اصلا ,,,وقال ايش جايين يحرورنا بجيش بيعرفش خارطة الطريق هزلت ,,


, تاني جيش ويا فرحتي عليه هو الجيش السوري ,,,هاد التاني قلك اسحب اسحب اسحب لوصل صفد وهناك سالوا اول ولد لقيوه عمو ايش هادي المدينة قلهم هادي صفد بفلسطين قالولك خلص وصلنا حطوا هالخيم وجعصوا ,,,ويومين زمان وهم قال بيستنوا اليهود يجوهم – مقامهم بيسمحلهمش هم يروحوا لليهود – المهم بعد هيك كبسوا اليهود عليهم ووين الجنب الي بيوجعكم والجماعة شلفوا على سوريا لأ والنهفة مش هون ,,,بعد ما رجعوا بكم شهر نفس الجيش ونفس قيادته عملت انقلاب بسوريا – يعني ما قدروا على اسرائيل قالوا نفرد عضلاتنا والجيش حميان على الرئيس تاعنا - ,,,,

نوصل لجيوش الاردن والعراق ,,,,هدول نهفتهم نهفة ,,,,الجيش الاردني وصل تقريبا نواحي القدس والعراقي نفس الشي وبس وصلوا غاد هدول الجيوش المتعلمة ,,,ايش عملوا باريكم ,,,,حاربوا بعض كل جيش فكر التاني هو اليهود من كتر ما هي جيوش فهمانة ومتعملة ,,,,,,,,لأ وحسب راي الكبار بالعمر من سكان القدس بهديك الفترة ,,,,,الجيشين قعدوا يحاربوا بعض 4 ايام وبعديها انسحب الجيش العراقي وطلب دعم من العراق والدعم هاد وهو بالطريق كانت فلسطين محتلة ونص دول العالم كمان صارت معترفة باسرائيل ’’’’وبدكم تعرفوا ايش صار بالجيش الاردني ,,,,,,الجيش الهمام بعد ما تعب وهو بيحارب بالعراقي ,,,,كبسوا عليه اليهود راحوا الجنود شلحوا اواعيهم العسكرية ودخلوا القدس بين الناس ,,,,,,,,,,,وطبعا اللي عرف يشرد ويشلف ما قصر ,,,,وهيك راحت القدس الغربية ,,,,,

ضل جيشين ما حكينا عنهم ,,,,,الجيش اللبناني اللي كان لساته عظمه طري – وشكلها لبنان عمره بتاريخها ما كان الها جيش زي العالم – الجيش اللبناني كان مش فاهم ليش هو نازل على فلسطين بالزبط – الحق على اللي بعته ما فهمه انه نازل يحرر بلد عربي اسمه فلسطين – المهم هاد الجيش وصل عكا ومنها على حيفا ورد رجع على الضفة وطلع على بيسان ومنها على صفد ومنها رجع للبنان يعني ما ضرب ولا طلق كل اللي عمله استعراض عسكري بالمدن الفلسطينية – نيالي على هيك جيش مفكر حاله جاي يكزدر لف نص فلسطين وبالاخير رجع على لبنان انا مش عارف مين بعتهم اصلا - ,,,,,,,


واخر جيش هو الجيش المصري الهمام وكلنا عرفنا قضية الاسلحة الفاسدة – وبدكم الحق والله لو كان معهم نووي ما عملوا اشي يعني بدهم يطلعوا احسن من الجيوش التانية – المساكين الواحد يضرب طلق يقتل صاحبه فيه ,,,,,,وبننساش حصار عبد الناصر وشلته بالفالوجة بين الخليل وغزة ,,,,,, طبعا هادي الاخبار كلها هي ملخص للي اسمعته من ناس كبار بالعمر عاشوا النكبة ,,,,وزي ما شايفين الجيش الاسرائيلي ما انتصر بالنكبة الي صار باختصار انه جيوشنا انهزمت وبس وتلقائيا اسرائيل انتصرت ,,,,بس احنا بنحكي انه نهاية اسرائيل قريبة على ايدي المسلمين ,,,,وان شالله نشوف نتيجة من حركات المقاومة بهاد الزمن من حماس وحزب الله وفتح والجهاد وكل الشرافاء ,,,,,


والاهم من كل هاد ننساش وحدة من الدول اللي حيكونلها اثر كبير في مستقبل فلسطين وهي ايران ,,,,,اه ايران محدش يفتح تمه .....ايران اللي بتمثل الداعم الوحيد لحركات المقاومة بفلسطين ولبنان بتصور حتكون عمود رئيسي في ميزان القوى العالمي عن قريب جدا ,,,وبنشوفكم عن قريب في مقال جديد وان شالله يكون عن نكبة اسرائيل ونشوف حرب جديدة بينا وبينهم تكون حرب عن جد اليهود بيواجهوا فيها رجال متل رجال المقاومة الباسلة بفلسطين ولبنان ,,,ووقتها ممكن نحكي عن الانتصار والهزيمة ,,,,

دكتور ابو عمر
كلية طب الاسنان- وهران
15/5/2008

 

[ديالى]

اخي شكراً على مقالك ، وانت قلت في النهاية لايصح الا الصحيح
كما ان هذا الصحيح لايأتي بالمظاهرات وحرق الاعلام والاشعار
والهتافات ، بل بالوحدة بين ابناء الوطن الواحد وابناء الامة الواحدة
والدين الواحد ومقاومة المحتلين بالقوة وليس بالكلمات ، عندها فقط
وفقط سيصح الصحيح .​

 

[غزة الجزائر]

سوف تنتصر فلسطين لان ذلك وعد الله والله لا يخلف وعده
ولكن على يد المسلمين العرب وهم كثر ينتظرون القطرة التي تفيض الكأس
ولبطولات أهل غزة ودحرهم للعدو خير دليل على ذلك فمنهم نتعلم كيف يكون النصر وتتعلم جميع الشعوب
ان ابناء فلسطين قد علمتهم الايام ان ما اخذ بالقوة لا يسترد الى بالقوة
فتحرير فلسطين ليس بالاقوال بل بالرجال امثال اسماعيل هنية وخالد مشعل وغيرهم من الذين صدقوا الله ولا نزكي على الله أحدا وامثال الشهداء الابرار الذين ضحوا بأنفسهم من اجل الوطن وعددهم كثيير ولكن الوطن غل لا يكثر عليه شيئ .