قصة حبي مع خالد الجلفاوي * أستحلفكم الله أن تقرأوها وتضعوا ردا*

[دمعة حزن من قلبي]

قصة حبي...بقلمي​

السلام عليكم إن شاء الله تكونوا كامل بخير اليوم بعد أن ملأ قلبي حزنا قررت أن أفتح قلبي لكم ​

أفتح قلبي لكم عن قصة حب عشت فيها أروع اللحظات​

أنا فتاة أبلغ من العمر 17 سنة ادرس سنة ثانية ثانوي مقيمة بولاية سطيف ناجحة في دراستي ومتفوقة فيها منذ الصغر والحمد لله لدي حلم بإكمال الدراسة بتخصص ممتاز وإن شاء الله يتحقق هاذ الحلم في القريب العاجل.​

أنا فتاة مررت بالعديد من المشاكل منذ صغري علمتني هذه المشاكل والظروف أن أكون صبورة وهذا ما كنت وما أنا عليه الآن واجهت كل الصعوبات التي مررت بها واستطعت المحافظة على دراستي التي هي أكثر شيء متعلقة بيه في هاذ الدنيا​

أبي الحمد لله موفرلنا كلش مايخصنا والو لكن منذ صغري امي مريضة مرض نفسي مرضها يعكر صفو حياتنا ورغم كل شيء واجهنا كل شيء وتحدينا كل شيء كنا نحن أولادها سندها وكنا لا نتركها دقيقة تعاني وحدها مرض أمي هو أنها كثير القلق والتوسويس من ـأبسط الأمور خاصة إذا تعلق الأمر بالشرف وقيمة العائلة فقد سبب وأن مرضت أمي عدة مرات ولن تتصورا معاناتنا يوم مرضها ​

تبقى الأم أما مهما صار وهي لي حملتنا تسعة أشهر وجميلها لا يرد مهما فعلنا ​

المهم كبرنا وصلت للرابعة متوسط إجتهدت كثير وحصلت على معدل ممتاز أفرح عائلتي وأمي على وجه الخصوص انتقلت للمستوى الثانوي اخترت أن أكون علمية الشعبة درست عامي الأول بصفة عادية والحمد لله​

تفوقت كالعادة .​

لم أكن من الفتيات المقتنعات بالحب في هاذ السن كنت فتاة أملي الأول والأخير هو الدراسة والدراسة ورفع رأس العائلة عاليا خاصة الأب وأرد له جميل كل ما تعبه من أجلنا​

لكن في يوم من الأيام حدث شيء لم أكن أتوقعه كنت في برنامج المحادثات" سكايب" في يوم من أيام العطلة قمت صدفة بإضافة شاب من الجلفة كان ذلك بالضبط في يوم 24 مارس 2009 ​

ألقيت عليه السلام وعرفته بنفسي ​

رحب بي ومن ذاك اليوم وأنا أدردش معه أحسست بأنه إنسان صادق وصريح معي في كل شيء​

وليت أنا أكثر صراحة كل يوم نصارحو بحوايج عليا وعلى عائلتي حتى انو صار يعرفني تمام المعرفة ​

المهم صرنا نحكيو مع بعض ​

كان كل ما يدخل نحكيو لبعض كل وش دار في يومو​

كل واحد يقولو وش شاف في هاذاك اليوم​

تناقشنا في بزاف مواضيع ​

حتى اننا ولينا متعلقين ببعض وكلما نحكيوش مع بعض ​

انحسوا في زوج بان هناك حاجة ناقصة ​

المهم كملت هاذ الصداقة حتى جا النهار الي صارحني فيه ​

قاالي بلي راه تعلق بيا وحبني ​

وناوي مني الحلال ​

واعطاني كل الحلول باش تكمل شمعة هاذ الحب ​

قالي اذا تحبي نجيك للدار نخطبك نجيك​

اذا تحبي نتلاقاو كل تطلعي للجامعة ​

لكن كنت دائما مربوطة بظروفي ومشاكلي وعائلتي ​

في الأول تصدمت كنت راح نبلوكيه ​

قلت انا وش همي فيه راه يعقب في الوقت ​

لكن لم أجد هاذا في كلامه ​

كان يحترمني كل الاحترام​

لما صارحني مالقيت وش نقولو​

المهم كملنا نحكيو وأجلنا هاذ الحكاية تاع الحب بقينا نحكيو مع بعض​

صار هو كلش بالنسبة ليا ​

ملا كل حياتي نحكيو كل شيء ​

نحكيلو مشاكلي همومي دراستي كل شيء ​

والله شاهد كنت صريحة معاه في كلش ​

كنت مكانتو عندي اكثر من صديقاتي كامل​

كانت معزتو كبيرة كثر من معزة اختي الكبيرة​

بطل بساطة صار يمثلي كل شيء ​

حبيتو حب صادق وعذري ​

ورغم كل شيء بقا بيناتنا هاذاك الاحترام​

ومع الوقت طلب انو نشوفو لان حقي كيما قال هو​

المهم راح للسيبار وشفتو رغم خجله الشديد استطاع انو يخليني نشوفو​

المهم شفتو كان متوسط الجمال يبان شاب جدي ​

شاب تنطبق عليه كل الصفات لي قالها​

من بعدها بايام بعثلي صورتو ​

بعد ما شفتتها تعلقت بيه أكثر ​

وكملنا نحكيو مع بعض ​

كنت نفهمو مليح ويفهمني بكل بساطة صار كلش ليا وصرت كلش بالنسبة ليه​

هدرنا على مسألة الإلتقاء والتخطيط للزواج مرات​

لكن كل مرة ​

يضع لي كل الحلول لكن انا ظروفي ضاغطة عليا جدا ​

اولا امي المريضة لو عرفت بالامر ماراحش ترضا عليا حياتها كاملة وراح تمرض المرضة لي عمرها لا راح تمرضها​

ثانيا أبي ​

بابا رجل خدام والناس تحترمو وواضع فيا ثقة ما يتصورها أحد​

حتى أنو دايرلي حاسوب وحدي ​

وأنترنت ​

ومنحني كل شيء نحتاجو والحمد لله على أب مثله​

والامر الثالث أخافتي هو إخوتي ماتتصوروش الضغط لي دايرينو عليا​

كل شيء بالحسبان ​

الامر هاذا يخوفني بزاف بزاف منهم والحاجة الاهم انو خايفة لا نفقد دراستي للابد لي هبا تمثلي كلش كلش في حياتي​

المهم قال لي بأنو يريد جواب وحل لهذه المشكلة​

كل مرة نجي نحل المشكل ما نقدرش ​

نبداو نحكيو فيها نوليو نتوقفو ​

المهم كنا دائما نأجلوها وبقينا نحكيو مع بعض وكل يوم يزيد حبو ليا ويزيد حبي ليه ​

كل ما نحكيوش مع بعض نتقلقو تاع الصح ​

المهم جا النهار ​

اين انجرحت مع أنو لم يجرحني بأتم معنى الكلمة ​

لكني انجرحت منه لاني كنت تحت ظغوطات ومشاكل كثيرة ​

_ وهو اعلم بها_ لاني ما نخبي عليه والو​

المهم ​

بعد ما حسيت بالضغط قررت انو نقولو اني ما نقدرش نكمل معاه ​

وانو كنت نحاول دائما نقولو بطريقة غير مباشرة​

لكن هو من شده حبو ليا كان مايحب يفهم والو​

حاب يفهم حاجة وحدة انو قصة حبنا راح تكمل وتنتهي بالزواج​

المهم انا صارحتو ويا ليتني لم أصارحه​

كان اسوأ يوم في حياتي حسيت بأني جرحتو​

المهم تفرقنا البارحة​

وهو يقولي اني غدرت بيه ​

واني خدعتو ولعبت بيه وبمشاعرو​

وانا هاذ الشيء عمري لا درتو والله نحاول غير نفهمو ونحيلو على خاطرو​

بعد ما قالي هاذيك الكلمات​

مارقدتش ليل كامل ​

وانا نبكي ومجروحة ​

حسيت بالذنب هل أنا خدعتو ؟؟؟​

انا قلتلو نخليوها على ربي ​

يجي النهار لي نتلاقاو فيه انا وانت​

ونعرفو بعض ​

لكن هو لم يقتنع ​

المهم انا مجروحة بزاف منو ​

وحاولت نعتذر منو لكنو ما حب يفهم والو وتجرح مني بزف​

ماعلاباليش وش راح ندير ​

انا راني تدمرت اكثر من ما تدمر هو​

انا راني نعاني كثر من ما راه يعاني هو ​

بالمناسبة هو راه عضو بيناتكم لكنو قليل المشاركات ​

راني حابة نعتذر منو ​

وبعد تفكير طويل ​

قررت ​

انو راح نضحي ​

قررت بلي نسمح في حوايج​

لكن بعد ماذا ؟؟​

ماظنيتش يغفرلي حتى حاجة بعد كل اللي صار ​

انا نتمنى منو يسامحني ​

ويفهمني كيما موالف يفهمني راه يعرف مليح الظروف لي نمر بيها ​

أنا غلطت ​

وأعترف يخطئي ​

لكن الحاجة لي لي حابة نقولهالو طول ما كنت معاه ولا مرة فكرت نخدعو​

ولا مرة فكرت في واحد غيرو​

هو الوحيد لي ملا عينيا ​

هو الوحيد لي ملا قلبي​

والله شاهد عليا ​

انا حبيت نوجهلو هاذ الرسالة ​

وان شاء الله توصلو ويفمها مليح​

ونستنا منو رد في الرسائل الخاصة ​

واريد رأيكم بكل صراحة ​

وأرجو أن تساعدوني ​

في الأخير نقول حاجة ​

اذا ما فهمنيش او ماحبش يسامحني ​

نقولو الانسان خــطاء وماكانش لي ما يغلطش ​

واذا انت كرهتني بعد هاذيك الهدرة لي هدرناها ​

ومابقيتش تحبني ​

انا راح نتقبل اي جواب ​

سلامي لكم وأرجو ان لا تبخلوني بأي شيء ​

 

[podolsky]

السلام عليكم

واش نقولك ختي الله يكون في عونكم
حبيت نقولك انو هاذا الاخ كان واضح معاك من الاول.... ويبان بلي حبك من قلبو وكان راجل بمعنئ الكلمة واختصر كل الطرق وقالك نجي نخطبك ....حبيت نصارحك انا شخصيا غاضني الحال واش حباتو يدير اكثر من انو يجي من الباب ويخطب .....وديري في بالك اذا جاء يخطبك ماراحش تلقاي اي مشكل مع العائلة لان هم الوالدين الوحيد انو يزوجوك لراجل يستاهلك .....وبعدي عليك هاذ الوسواس
وانت وعلاه تجرحي فيه بدون سابق انذار ...ياخي كونتو بيان ...
بصراحة انا ما فهمتش وعلاه قلتيلو هاذ الشي.....مادام انو ناوي الحلال ....
ما نيش حاب نزيد عليك خيتو .....مي سامحيني خييتو جرحتيه
والسلام

 

[مروة]

السلام عليكم
و الله قصتم روعه
وادا كان يحبك صح راح يسامحك و يرجعلك مع انك انت ما درتيش غلطة و ادا راح تكونوا لبعضاكم مهما تفرقتو ربي يجمعكم وانا نقترح عليك تصلي صلاة الاستخاره و تشوفي مليح
ربي يجمعكم و الله لايفرقكم وربي يخليكم لبعضاكم
تقبلي مروري اختي
ربي معاك و ربي يهنيكم ببعضاكم و اهتمي بقرايتك العام الجاي الباك ربي ينجحك و من بعد اهدروا في الموضوع هدا مازلتي صغيره اوكي حنونه
شكرا لك
وربي معاك

 

[المشتاقة للجنان]

و عليكم السلام و رحمة الله تعالى و بركاته

ما شاء الله على القصة حسيت بيك باسكو مجرباتها
و الله الكثيرات يقعن مثلكي
مي تظني بلي مش حاس بيك لا
بلاك راه حاس بيك مي حاب ينسحب
يا اما للابد و اما يفكر واش يدير في دي القصة
و نتمنى نهاية مفرحة لك و الله
مي حاجة وحدة هي دراستك و بما انك متفوقة
كملي للجامعة و تمى يحلها الف حلال
تقبلي مروري سلام​

 

[x123]

سلام اختي

هي من جهة جرحتيه و من جهة نقدر ضروفك الصعبة
كان ممكن تشوفو حل وسطي و كل واحد يتفهم وضع الاخر

 

[@marwa@]

أنا نوافق صديقتي مروة في كل شى قلتو لكن نوسيك في حاجة واحدة رودي بالك تفرطي في قريتك و ربي يهنيك انشاء الله و الي مكتبه ربي باه تشوفيه اختي

 

[mirhane]

اهلا بك اختي
هو من كلامك باين بلي ايحبك وانشاء الله ايسامحك او تلقاو حل لضروفك الصعبة​

 

[SweET Ange]

السلام عليكم
حبيت نقلك متخليش الظروف تاعك تاثر في نفسيتك وفي قراراتك خمي دايما بلي كاين لي يعاني اكثر منك المهم انتي متخمي في حتى حاجة الان بوسك عندك العام الجاي باك ولازم عليك تحقي واش كنتي حابة ديري لان غير قرايتك لي دوملك
وهو اذا كان من مكتوبك اكيد ماراكي رايحة تكوني غير ليه اذن هوني الامر عليك
ولا تشعري بالذنب لانك فعلت ما ترينه صواب وانتي الادرى بظروفك...

 

[himina]

عليها يقولك السكايب ماشمليح صح تشيخي مع صحباتك ولا بنات اخرين مليح في الفايدة مي لدرجة هاذي وانت صغيرة عمرك17 سنة ماضيعيش حياتك

 

[RaNiA]

الحق الحق ما نامنش اصلا بحب الانترنت هذا ماكانش منها
و كل هذي الاشياء مجرد خيال برك في رايي
مهما تتصارحو ما تقدروش تعرفو كلش كلش على بعضاكم
بالاك صح تعلقتو ببعضاكم من كثرة ما تحكيو
مي كون عينكم تنساو بعضاكم رح تقدرو
ولاكان يحبك صح كيما راه يقول رح يفهم ظروفك ويخليك بحالك
مي الحاجة لي ما فهمتهاش كيفاه قدرتي تكتبي والله غير عندك جرأة كبيرة
وزيد راكي مازلتي صغيرة ما ضيعييش مستقبلك على جال هذو الامور
ومنا توصلي لفترة الزواج يمكن يكتب ربي وتديو بعضاكم
تقبلي مروري ورأيي
وان شاء الله ما تزعفيش مني​

 

[mannouna]

السلام عليكم ايتها الحزينة والسبب في حزنك راهو باين........
انتي جيتي تفيقي لقيتي روحك في هاذ الغرقة لي ماعرفتيش تخرجي منها حبيت نرد عليك ونتمنى تسمعيني و تطولي بالك معايا :
اولا الظروف اللي عشتيها تقريبا زي الظروف اللي عشتها : التفوق الدراسي، مكانة الاب في المجتمع ، الوضع المادي ...وثاني انت باين عليك عاطفية جدا وانا مثلك تماما في هاذي
حبيت نقولك انو مثلا عندما يكون عندنا بيت ،من كل زاوية يبان بشكل مختلف عن الآخرمن داخل بزي ومن الخارج بزي.........
........................................................صح؟؟؟......
انت من داخل تشوفي في هاذ الشخص هو حبك و هذا هو واقعك وانا اعرف معناها خاصة في هذا العمر لان كل عمر عندو طعم معين
و انا من لخارج نشوف في حوايج اخرى اكثر واقعية :
انت طول عمرك مشغولة فقط في قرايتك و معونتك لامك و داركم و فجأة لقيتي مساحة يهتم فيها بيك شخص آخر توفرت فيه كل الصفات اللي حبيتيها لدرجة انك قلت

قررت

​

انو راح نضحي

​

قررت بلي نسمح في حوايج

والله اعلم واش هاذو الحوايج ؟؟؟
واحد ما يقدر يلوم واحد ويقولو علاه تحب لكن كاين دي كارت اللي لازم يتحطو سير طابل :
اولا كي تتعرفي على واحد بهاذي الطريقة -وانا مشني نظرب في هاذ الشخص- ماشي نورمال و حرام و عيب و النتيجة انك حليتي عليك باب وحرتي واش ديري فيه
ثانيا في عمر ال17 في مجتمعنا مازلتي صغيرة باه يجي واحد يخطبك خاصة انو مش من البلاصة لي تسكني فيها .....
ثالثا حبك لهاذا الشخص قد يكون مرحلي اي مدة و تفوت وديجا ما فاتوش 3 اشهر مللي عرفتيه لازم تكوني متأنية صح انت لقيتي اللي يسمعك بصح القصة ما تنتهيش هنا.
رابعا التضحية نظن بلي لازم تكون من جانبك و تنساي هذا الانسان لان المستقبل مازال قدامك ................ نستنى رايك في كلامي​

​

 

[nassim007]

والله قصة ولا أروع انا بعد تأثرت.......
وش ح نقولك حاولي تفهميه و تقنعيه وان لم يقتنع ماعليش.....
رانا مازلنا صغار علا هذ لحوايج مزال شويا ....حتا انا راني كيفك 17 سنة ههه
و نزيد نقولك غير قرايتك ما تفرطيش فيها باسكو هي مستقبلك وحد لا يدوملك في هذ الحياة أديها كنصيحة من عند زميلك نسيم
و ربـــــــــــــــي يوفقك.........

 

[asma2090]

ولله انا بصراحة لا اؤمن بالحب في النت لكن عندي قصة حبيت نحكيها انا في الكم فروغ وعلبالي ناس قاع تعرفو كنت نعرف وحدة هيا في الخارج تسكن تعرفت على واحد في الكام فروج تعرفت عليه كيما قصتك يا بعد المهم بعد ربع سنين وهي كانت صغيرة هو حبها حب نقي وكان ناويها للحلال ومن بعد هي مكنتش مداير ه في بالها انها تدي واحد من النت اصلا وصدقيني ماشي حكاولي ولا هكدا ان هدي صديقتي المقربة و راهم رايحين يزوج في 27 جوان ان شاء الله انا ما تصورتش اصلا انو كاين حب في النت وكاين وحدة نعرفها تعرفت على واحد في البورطابل وهي اقرب وحدة نعرفها تزوجت بيه وهي عندها 2 ولاد وعايش والحمد لله وانا نقلك رايي اولا كملي دراستك وادا كان من مكتوبك غير هو اللي تديه

 

[sleepingbeauty]

واش نقولك اختي قصتك تشبه قصتي بالضبط و احنا درك رانا مخطوبين لعقوبة ليكم ان شاء الله
ان شاء الله يفهمك و يسامحك و ترجع المياه الى مجاريها
و مادام حاب يجي يخطبك يعني و انت تحبيه فلماذا لم تقبلي ما فهمتش
ربي يوفقك و ما تفرطيش في الدراسة تاعك
​

 

[AMEL2BS]

هو من ناحية اجرحتيه لالا راكي اقتلتيه..... هادا اذا حبك صح.ومن ناحية اصغيرة وحساسة كاينة منها سورتو في لاج انتاعك تحسي ديما بالخوف mais une fois تلقاي واحد يفهمك ويحسسك بالامان تلصقي فيه ...وهادا واش اصرالك امعاه وماتنسايش هو شحال في عمرو وانتي اشحال...وهو واش شاف في احياتو وانتي واش شفتي .....الحب ماعندوش عمر كاينة منها.........mais في حالتك انتيا لوكان حبيتيه صح تضربي اعليه الطابلة ومااتخافي من والو.....الاب انتاعك اكيد قاري وفاهم ومتفهم ومادام دارلك النات ليك وحدك محال يخفى اعليه واش يصرا من بعد واذا على ماماك اكيد ادجيها اصعيبة من الاول ومن بعد تقتنع اذا اضمنلها حبيبك انو يخليكي اتكملي ولا يستناك حتان ادجيبي الباك.....mais انتي واش درتي..... طيشتي خالد للمكتوب وقولتيلو خلط ولا رون في حكايتنا. ...كلشي بالمكتوب راني امعاك فيها وحاجة نورمال بصح اللي ماهوش نورمال انو نخلو المكتوب شماعة انعلقو فيها الضعف انتاعنا والصوالح اللي ما اقدرناش نوصلو ليهم علاش ..باسكو افشلنا من اول محاولة......اذا كان خالد وحبك ليه اكبير اعلاجالو حاولي مرة اخرى اعطيه واعطي روحك فرصة....هو درك راه مدمر وفي حالة المغدور ما تزعفيش منو اذا ماردش اعليك.اسمحيلي اذا قستك بكلامي والله ما قصدي

 

[دمعة حزن من قلبي]

السلام عليكم

واش نقولك ختي الله يكون في عونكم
حبيت نقولك انو هاذا الاخ كان واضح معاك من الاول.... ويبان بلي حبك من قلبو وكان راجل بمعنئ الكلمة واختصر كل الطرق وقالك نجي نخطبك ....حبيت نصارحك انا شخصيا غاضني الحال واش حباتو يدير اكثر من انو يجي من الباب ويخطب .....وديري في بالك اذا جاء يخطبك ماراحش تلقاي اي مشكل مع العائلة لان هم الوالدين الوحيد انو يزوجوك لراجل يستاهلك .....وبعدي عليك هاذ الوسواس
وانت وعلاه تجرحي فيه بدون سابق انذار ...ياخي كونتو بيان ...
بصراحة انا ما فهمتش وعلاه قلتيلو هاذ الشي.....مادام انو ناوي الحلال ....
ما نيش حاب نزيد عليك خيتو .....مي سامحيني خييتو جرحتيه
والسلام

شكرا لك الأخ على إبداء رأيك بكل صراحة

انا معترفة بخطئي بأني جرحتو


وراني مجروحة بزاف من روحي

 

[دمعة حزن من قلبي]

السلام عليكم
و الله قصتم روعه
وادا كان يحبك صح راح يسامحك و يرجعلك مع انك انت ما درتيش غلطة و ادا راح تكونوا لبعضاكم مهما تفرقتو ربي يجمعكم وانا نقترح عليك تصلي صلاة الاستخاره و تشوفي مليح
ربي يجمعكم و الله لايفرقكم وربي يخليكم لبعضاكم
تقبلي مروري اختي
ربي معاك و ربي يهنيكم ببعضاكم و اهتمي بقرايتك العام الجاي الباك ربي ينجحك و من بعد اهدروا في الموضوع هدا مازلتي صغيره اوكي حنونه
شكرا لك
وربي معاك

شكرا لك أختي على الرد أخذت بنصيحتك وصليت اليوم مرتين صلاة الإستخارة

وبالنسبة للدراسة الحمد لله واحد ما يغيبهالي وراني مادتلها الاولوية قبل كلش

وان شاء الله يجيبلي ربي لي فيه الخير ليا وليه​

 

[دمعة حزن من قلبي]

و عليكم السلام و رحمة الله تعالى و بركاته​

ما شاء الله على القصة حسيت بيك باسكو مجرباتها
و الله الكثيرات يقعن مثلكي
مي تظني بلي مش حاس بيك لا
بلاك راه حاس بيك مي حاب ينسحب
يا اما للابد و اما يفكر واش يدير في دي القصة
و نتمنى نهاية مفرحة لك و الله
مي حاجة وحدة هي دراستك و بما انك متفوقة
كملي للجامعة و تمى يحلها الف حلال

تقبلي مروري سلام​

شكرا لك ختي على الرد وشكرا على النصيحة وكيما قلتي ان شاء الله اذا سامحني في الجامعة يحلها ربي الف حلال​

 

[دمعة حزن من قلبي]

سلام اختي

هي من جهة جرحتيه و من جهة نقدر ضروفك الصعبة
كان ممكن تشوفو حل وسطي و كل واحد يتفهم وضع الاخر

شكرا لك أخي على المرور الطيب

وشكرا لك على تقدير ظروفي أنا جرحتو ومستعدة للإعتذار منه


وان شاء الله يفهمني ونديرو حل ان شاء الله​

 

[دمعة حزن من قلبي]

أنا نوافق صديقتي مروة في كل شى قلتو لكن نوسيك في حاجة واحدة رودي بالك تفرطي في قريتك و ربي يهنيك انشاء الله و الي مكتبه ربي باه تشوفيه اختي

شكرا لك أختي على المرور الطيب

الحمد لله الدراسة قبل كل شيء ومتهلية فيها مليح وراهي بين عينيا

وان شاءالله يجيبلنا ربي لي فيه الخير​