مغامرات حمة في رمضان

الحالة
مغلق ولا يسمح بالمزيد من الردود.

السوفي حمة

:: عضو شرفي ::
إنضم
2 أكتوبر 2007
المشاركات
2,260
النقاط
583
محل الإقامة
الوادي
الجنس
ذكر
كنت راقد وسمعت باب الغرفة يدقدق والحاجة تنادي: يا حمة ربي يهديك نوض راح الحال شكون رايح يجيب القضيان من السوق ؟؟؟؟ قلتلها نزيد شوية برك ونوض راني رقدت روطار درت فيها قصرة مع تاركان وعبيدو ومختار في اللمة.
قاتلي شكون هاذوما واش من لمة درتها البارح راك مخرجتش من الدار، يا يما على وليدي راهو تخلوض في عقلوا وبدا يهترف ...
خفت ليما كاش ما يصرالها قلتلها لالا راني كنت نحلم، قالت هيا نوض برك يالله، قررت نزيد شوية لكن سمعت صوت الجنرال ماجور وبلا منحس بروحي كنت واقف قدام ولابس حوايجي قالي واش يا سي الشباب لضرك الرقاد، هذا واش قريت علموك رمضان للرقاد وإلا عمل وعبادة ؟؟؟؟ ( عرفتوه شكون ؟؟؟إيه هو بابا القائد الأعلى للدار ).
المهم جابولي القفة وماما خرجت ورقة صغيرة قلت الحمد لله قضية خفيفة نكملها ونرجعلك يا فراشي العزيز، بالصح الفرحة متمتش قالت لالا مهيش هاذي وخرجت ورقة نتاع جورنال ... تلفت مرة أخرى لفراش وقتله باي ضرك نتلاقاو في الليل إن شاء الله ...وبدات الحاجة تملي في القضية : لحم أحمر بلا عظم ولا شحم للطجين لحلو، لحم مرحي وبلاك يزلبحوك للبوراك ، لحم بالعظم للشربة، خضر .......، فواكه ...... وفي لخر قالت عندك الدراهم وإلا نعطيك، واش رايح نقول ... معنديش يقلك وين راك تدير في دراهمك علاه هذا مطعم الرحمة تاكل باطل .... قلتلها عندي ، زيدي كاش ما نسيتي قالت لالا منكثرش عليك عرفة راك تخمم في مستقبلك ولازم تحكم إيدك شوية في الصرف لكن إذا عجباتك كاش حاجة أخرى إشريها .....
هيا رفدت القفة ولا ليست وعمرت جيوبي بالدراهم وردت كواغط السيارة ولمفاتح ورحت للـgراج جيت نوض في المعلمة قالت لالا أنا ثاني صايمة منتحركش ... يا بنتي في طولك، في عرضك، بست الكابو نتاعها، هبطت للروض وبستهم لكن أبدا ....
قلتلها أيا تومبي حتى أنا منستعرفش بيك ... وخرجت وعولت على ربي والنقل الجماعي ... وصلت لاري ونلقى العباد كالدود وبينهم جماعة نعرفهم بداو يخزروا فيا ... وعلى بالي واش يقولو ..واحد يقول واجب جابك يا مصيبة مراناش مخصوصين غاشي ... ولاخر يقول هيه وتلك الأيام زعمة كنت تلعبها بالسيارة هاك جيت برجليك ... ولاخر يقول مسكين واش رايح يواسي مهوش موالف بالتطباع ...
أنا غير وقفت وجاء الباص وبدا التطباع ... بالصح أنا موالف بتطباع العاصمة و الباص نتاع الجامعة ... سبقتهم الكل وركبت بحذا الشيفور ...
ركب الغاشي بعد ما صرا إلي صرا دبازي وشتايم ...هيا الحمد لله فاتت الخطوة الأولى سلامات غير ديمارينا والشيفور يحط كاسيت ( إيه مهوش CD ) وبدا الغناء ومازال غير المغني ينطق ونسمع واحد في الكرسي لخر يعيط ... ماهذا يا عدو الله فسق في رمضان ....... ياوووو أبوعمر الفاروق معانا في الباص ... لحقني حتى هنا ... وبدا يعطي في دروس حول حكم الغناء ... الشيفور بدل الكاسيت وحط درس في عذاب القبر ... الدنيا ظلامت في وجهي ... غير العذاب والموت والسيد باين سعودي ويحكي في حكايات وروايات صرات غير عندهم ... ومازالت مع المحاضرة والشيفور يعطيها فران ساك ويفتح الباب وينزل رفدت راسي نلقاه متقابض مع شيفور تاع باص آخر ... هبطنا وبدينا نهدو فيهم وهو يقلك معندوش الحق يحبس هنا ويرفد الغاشي ويسب ويلعن ... وزاد تدخل واحد آخر يسب في الشيفور نتاعنا ... آآآووو شطون أنتا قالك أنا مولا السيارة وراكم راني دخلت في الباص من لورا كالسيد دار لفران.... وواش يسلكنا غير ذراع .....
والطريق كامل والشيفور يسب ويلعن ويا ويل كل واحد يدوبليه يسمعو واش يكره ظلامت الدنيا في وجهه ... الدودانات مبقاش يشوفهم كل ما نفوتو على وحدة نطيرو في السماء ... قررت نهبط في أول آري ... الحمد لله دخلنا للمدينة الكونفايور بدا يعيط شكون يهبط في سبيطار ... قتلو أنا وهبطت.
تربعت في الأرض وبقيت مريح وأنا نحمد في ربي كوصلت إلى هنا سلامات ... قلت ضرك يلحق الترولي ونمكل معاه للسوق ... لحق واحد حبس عندي وهبط منو كنفايور تقول أرنولد شوازينغر فاتح ذراعية ويعيط أيا سونتر فيل إزرب إزرب ... فيت... فيت وبدا يحكم في الغاشي ويطبعهم داخل الترولي ... أيا إزربولنا الوقت راهو بالدراهم ... وديمارينا ويا ويل كل واحد يقول أحبسولي عند لاري يبدا يعيط عليه هيا خويا أزرب أزرب وما بقا غير يرفدو ويرميه من الكارو ... المهم سهلها ربي ووصلنا سلامات ... ودخلت للسوق ... شفت وحدها أعوذ بالله من الشيطان الرجيم لكن تفكرت الشياطين مكتفة في رمضان مي عرفتها شكون ... هذي ما تكون غير ذهبية بالصح واش جابها هنا ..؟؟؟
وكملت دخلت للبوشي بدا يرحب ويقول واش نعطيك خويا ... ولسانو ينقط عسل قتلو أعطيني كيت وكيت وكيت قال مرحبا خويا ميكون غير خاطرك وبدا يقطع في الشحم قتلو ... خويا أنا طلب اللحم ماشي الشحم .... والسيد وجهو نقلب والعسل ولا حاجة أخرى ... واش هذا شحم ؟؟؟ واش بيكم من وقتاش تعلمتو تاكلو اللحم ... كرهتونا في الخدمة .... وسمعني واش نكره هيا قتلوا هات وخلاص خليني نروح رفدت القفة ووين نروح نلقى نفس المعاملة تقول الناس صايمة باش تتعصب وتتنرفز ورجعت للدار ودخلت رميت القفة في الكوزينة ورميت روحي في سريري وأنا نحمد ربي على سلامتي ... غفلت وسمعت الحاجة تعيط من جديد .... يا حمة نوظ راهو أذن المغرب ... نضت ورحت باش نفطر نلقى الطابلة فارغة ...؟؟؟؟؟؟ قلتلها يما وين راهو البوراك والمحشي والكوتلات و... و...... قاتلي وشنو هاذم منين رايحة نطيبهم أنت النهار كامل راقد ... هاهي الشربة نتاع أمس وشوية تمر وحليب ... وإذا حاب تاكل واش تتخيل نوض بكري وروح تقضي من السوق ......
وثما عرفت راني كنت نحلم ....
 

الـساحر

:: عضو مُتميز ::
إنضم
9 أفريل 2008
المشاركات
821
النقاط
17
و عليكم السلام أخي في الله ..
...
ان شاء الله تمــام الصحــة و العافية ..
يا أخي حمة مغامرتك روعة هههه .. تفكر تسلملي على
الوالدين + لفراش لعزيز
تحية معطرة بالورد
 

كلي امال

:: عضو مُتميز ::
إنضم
29 ماي 2008
المشاركات
599
النقاط
17
العمر
31
السلام عليكم و رحمة الله تعالى و بركاته
اذا ما خانتنيش الذاكرة و قيلا كان عندك موضوع تحكي فيه على الازمة تاع لي بيس
واش اللي خلاك تعاود التجربة و تستعملهم كنت تمشي على رجليك
و زيد الحاجة معاها حق نوض بكري تاكل واش تحب
هدا راه اندار باه من و جاي تنوض بكري و تقضي
 

Moha le sage

:: عضو شرفي ::
إنضم
15 مارس 2009
المشاركات
8,013
النقاط
851
اه عليك يا كمال يعني هذا كامل وكنت تحلم .. ناس تحلم روحها في فيلة في شط البحر مع وحدة عندها la voix تاع mariah carey و لا طاي تاع jenifer lopez و العقلية تاع الكوندو ليزارايس هههههههه

انا كي نرقد نموم روحي نسركل في القمر مافيهش غاشي و احد مايرهجك بعقليتو ..

الفايدة واش نقلك ..انا اليوم خرجت الوالدة ..موالفة تعطيني الكارط هذاك لي فيه القضيان خطراش وليت ننسى .. اليوم كي خرجت معاها خليتها هي لي تقضي بروحها وهي تقلي ونا نقول .. والناس يتفرجو يقولو علاه راه حاي يقضي هو و يماه .. وهوما معلابالهمش بالحلاوة تاع كي الواحد يروح يشري و ينفسها معاه و يخليها هي لي تخير .. كي تديرلها رايها و تجيبلها واش تحب راها تحس بوحد السعادة ماشي كي تكون مريحة في الدار وتجيبلها المصروف

انا توحشت البالو في رمضان عندي وقت مالعبتش .. الصيف وزاد لحق من وراه رمضان الواحد عندو وقت .. ذرك التفنيين راه مداير حالة وما يجي واحد يلبس صباطو غير لافاتت ساعة

واش نكره كي نكون مكونيكتي و يقولولي روح تجيب كشما حاجة .. هيه واش نحكيلك ..نقعد غير نقلهم ذرك نروح حتى نفوت ساعتين ههههه الله غالب ما تلومش

ايا صح فطورك كمال و ساللنا على الحاجة قلها يسال عليك محمد تاع سطيف .. ربي يطولك في عمرها و يحفظهالك
 

remanous

:: عضو مُشارك ::
إنضم
14 ماي 2008
المشاركات
133
النقاط
7
السلام عليكم

ههههه مسكين نهار كامل وانتا راقد وامبعد تحوس على الماكلة

موضوع روعة ومغامرات في الاحلام هايلة
سلام
 

killua0555

:: عضو فعّال ::
إنضم
13 سبتمبر 2008
المشاركات
1,843
النقاط
77
العمر
28
هههه راك جايبها ياخويا حمة و الله فور
طرولى ميشكرش و زيد فى رمضان ههه الى يقضى يقضى عالصباح ولا ميكلش ههههه



برك واش قلت على دهبية مسكينة ميكفهاش السحور تزيد جي فى منامك
 

Rohana

:: عضو مُتميز ::
إنضم
26 ديسمبر 2007
المشاركات
874
النقاط
537
العمر
27
وانا راني نشوف نقول علاش السيد ما زعف ما تنيرفا في هذاك الترولي ما هدر مع الشوفور ما عيط
قاعد غير تعلق حتى نلقاك في المنام بسلامتك ههههههههههههههه

اونايضلي مع لعشية تحوس على البوراك و الكوتلات و المحشي ههههههه المرا الجاي كمل الحلم اوصل لدار مع القضيان او الحاجة طيبلك وافطر تما هههههههههههه

ربي يخليهالك على كل حال . وسلام
 

HAMZ A

:: عضو مُشارك ::
إنضم
15 أوت 2009
المشاركات
342
النقاط
7
العمر
30
محل الإقامة
باتنة
شكرا يا خويا حمة ربي يقدرك على رمضان
 

SaMi_o7

:: عضو متألق ::
إنضم
28 جويلية 2008
المشاركات
4,516
النقاط
323
العمر
31
شكراآآ

ننتظر إبداعاتك الحلمية هههه

،،’’
 

Ninja_09

:: عضو مُتميز ::
إنضم
15 ماي 2009
المشاركات
1,385
النقاط
537
مليح ليسونسيال ماكش تآكل في رمضان مالغري رقاد
 

السوفي حمة

:: عضو شرفي ::
إنضم
2 أكتوبر 2007
المشاركات
2,260
النقاط
583
محل الإقامة
الوادي
الجنس
ذكر
شكرا اخواني لمروكم وتفاعلكم ولي عودة للتعقيب على كل الردود
 

لحظة أمل

:: عضو مُتميز ::
إنضم
6 سبتمبر 2009
المشاركات
639
النقاط
17
العمر
31
يعني قريت هاداك كامل بش تطلع في اللخر كنتي تحلم؟؟؟؟؟؟
امممم
 

السوفي حمة

:: عضو شرفي ::
إنضم
2 أكتوبر 2007
المشاركات
2,260
النقاط
583
محل الإقامة
الوادي
الجنس
ذكر
و عليكم السلام أخي في الله ..
...
ان شاء الله تمــام الصحــة و العافية ..
يا أخي حمة مغامرتك روعة هههه .. تفكر تسلملي على
الوالدين + لفراش لعزيز
تحية معطرة بالورد

شكرا أخي الكريم على المرور
وإن شاء الله السلام يوصل
 

السوفي حمة

:: عضو شرفي ::
إنضم
2 أكتوبر 2007
المشاركات
2,260
النقاط
583
محل الإقامة
الوادي
الجنس
ذكر
السلام عليكم و رحمة الله تعالى و بركاته
اذا ما خانتنيش الذاكرة و قيلا كان عندك موضوع تحكي فيه على الازمة تاع لي بيس
واش اللي خلاك تعاود التجربة و تستعملهم كنت تمشي على رجليك
و زيد الحاجة معاها حق نوض بكري تاكل واش تحب
هدا راه اندار باه من و جاي تنوض بكري و تقضي
وعليكم السلام
الله يبارك عندك ذاكرة قوية
لكن واش رايح نواسي المسافة بعيدة بين الدار والمارشي
أما النهوض باكر، اللمة خلتني بدل كل حاجة في حياتي جامي سهرت لكن ضرك نجيب 3 تاع الصباح نورمال
وإن شاء الله نتعضو من الإنذار وميكونش توبيخ
 

السوفي حمة

:: عضو شرفي ::
إنضم
2 أكتوبر 2007
المشاركات
2,260
النقاط
583
محل الإقامة
الوادي
الجنس
ذكر
اه عليك يا كمال يعني هذا كامل وكنت تحلم .. ناس تحلم روحها في فيلة في شط البحر مع وحدة عندها la voix تاع mariah carey و لا طاي تاع jenifer lopez و العقلية تاع الكوندو ليزارايس هههههههه
انا كي نرقد نموم روحي نسركل في القمر مافيهش غاشي و احد مايرهجك بعقليتو ..
الفايدة واش نقلك ..انا اليوم خرجت الوالدة ..موالفة تعطيني الكارط هذاك لي فيه القضيان خطراش وليت ننسى .. اليوم كي خرجت معاها خليتها هي لي تقضي بروحها وهي تقلي ونا نقول .. والناس يتفرجو يقولو علاه راه حاي يقضي هو و يماه .. وهوما معلابالهمش بالحلاوة تاع كي الواحد يروح يشري و ينفسها معاه و يخليها هي لي تخير .. كي تديرلها رايها و تجيبلها واش تحب راها تحس بوحد السعادة ماشي كي تكون مريحة في الدار وتجيبلها المصروف
انا توحشت البالو في رمضان عندي وقت مالعبتش .. الصيف وزاد لحق من وراه رمضان الواحد عندو وقت .. ذرك التفنيين راه مداير حالة وما يجي واحد يلبس صباطو غير لافاتت ساعة
واش نكره كي نكون مكونيكتي و يقولولي روح تجيب كشما حاجة .. هيه واش نحكيلك ..نقعد غير نقلهم ذرك نروح حتى نفوت ساعتين ههههه الله غالب ما تلومش
ايا صح فطورك كمال و ساللنا على الحاجة قلها يسال عليك محمد تاع سطيف .. ربي يطولك في عمرها و يحفظهالك


صحة فطورك موح
انا تكفيني ماريا كاري وخلي لخرين ليك
ربي يحفظ الحاجة ودايما تعبك هكا وتخرجك للسوق، أنا الحاجة تحب تتقلش تقلي نحب نخرج بعد الفطور وهي لمعلمة وأنا الشيفور لكن هذو ليام الله غالب منيش قادر راك عارفة
والحلم هذا حلمتو لأنني أنا ثاني توحشت نخرج للسوق ونقضي ونشري ومام نتداوس معليش
المهم نخرج، أنا يمكن نتفنين مع الحاجة لكن الجنرال ماجور ممعهش اللعب
صحة سحورك موح
عفوا حضرة المشرف
 

السوفي حمة

:: عضو شرفي ::
إنضم
2 أكتوبر 2007
المشاركات
2,260
النقاط
583
محل الإقامة
الوادي
الجنس
ذكر
هههه راك جايبها ياخويا حمة و الله فور
طرولى ميشكرش و زيد فى رمضان ههه الى يقضى يقضى عالصباح ولا ميكلش ههههه

برك واش قلت على دهبية مسكينة ميكفهاش السحور تزيد جي فى منامك
ههههييييييه المثل يقول
عاند وما تحسد وأنا عاندتك
وذهبية هي إلي جاتني في المنام
واش رايح نواسيلها
 

السوفي حمة

:: عضو شرفي ::
إنضم
2 أكتوبر 2007
المشاركات
2,260
النقاط
583
محل الإقامة
الوادي
الجنس
ذكر
وانا راني نشوف نقول علاش السيد ما زعف ما تنيرفا في هذاك الترولي ما هدر مع الشوفور ما عيط
قاعد غير تعلق حتى نلقاك في المنام بسلامتك ههههههههههههههه

اونايضلي مع لعشية تحوس على البوراك و الكوتلات و المحشي ههههههه المرا الجاي كمل الحلم اوصل لدار مع القضيان او الحاجة طيبلك وافطر تما هههههههههههه

ربي يخليهالك على كل حال . وسلام

واش نترنرفا هذا :confused1::confused1::confused1: حابة الشيفور ياكلني
أنا عاقل مام في لمنام
:001_rolleyes::001_rolleyes::001_rolleyes::001_rolleyes:
معليش المرة الجاية نرقد بكري باش نكمل الحلم قبل المغرب
شكرا على الدعاء وربي يخلي أمهات
وآباء كل المسلمين
 
الحالة
مغلق ولا يسمح بالمزيد من الردود.
Top