السلام عليكم
وحد الظاهرة قلقتني بزاف بزاف كي كنت نقرى في la fac تاع فرحات عباس في سطيف و راني علابالي كاينا في جامعات اخرين تصرى فيهم والله اعلم
العقلية تاع واحد يمسح يديه بالبابة تاع الخبز ( الدخلاني تاع الخبز ) .. واحد يمسح بيها فمو ولاخر ينيطوايي في حبة تاع لانجاص ... ووحدة تمسح بيها يديها من الماء تاع التشينة :confused1::cursing:
انا نتخيل كيفاش هاذ الناس في دارهم وقيل ما عندهمش سرافت .. يتغداو وكي يكملو يجبدو طرف خبز ينحو منو البابا هذيك يمسحو بيها و يرموها
كاين لي لحقت بيهم الجرأة وين يمسحو صبابطهم بيها .. ايه نعمت ربي في الصبابط وفي الجامعة ثاني .. باش تعرفو درجة التقدم والرقي الحضاري لي لحقنالو
ذرك ولات نعمة ربي serviette ولا كيفاش ؟ تالمون متفنينين العين وما يروحوش ليها و ديفوا يكون مكاش الماء .. تلقاهم يمسحو في يديهم من المرقة و يرمو ذيك البابا فوق الطابلة ..
شحال من مرة هاوشت صحابي عليها بصح يقعدو يضحكو ومش دايرين هدرتي في السيريو
والله غير حرت .. المشكل يديروها ناس مثقفين وواعيين زعما ونا ما لقيتلهاش تفسير وراني خايف تكون كاينة في مطاعم تاع جامعات ولا تاع ثانويات بزاف
كي نتفكرها قلبي يوجعني بزاف ..ان شاء الله تكون نقصت ذرك
.
