سلام اخي وائل
والله منين بديت نقرا في موضوعك ونقرا في الردود وانا ميتة بالضحك
وسيرتوا رد الاخت(الحياة كلمة)
نصحوني اصحابي مرة بالزواج .....وقالوا لي بركاك من التعواج
واهي رايحة ترميك الامواج ....اذا بقيت في بحر العزوبية
بقيت في الليل نطلع الحساب......ولقيت كلامهم صواب
وفي الغد بعثتهم نواب .......يطرحوا لاهلي القضية
بابا وافق في الحال ......وقال جيبوا بنت الخال
ويما جاها في البال.....تخطب لي وحدة بدوية
تفاهمنا على بنت المدينة ......قالوا راها فاهمة ورزينة
راهي تخمخم في الكوزينة ....تطبخ طبخات شهية
عولنا قصدنا الدار....حاملين في يدينا النوار
ودرنا رواحنا زوار .....قاصدين البنت المعنية
الراجل يشكر في بنته و يزيد.......قارية ما تركت مسيد
وصحيحة كالحديد .....بنت العلم والتربية
قلت واش هي الشروط ...راني صرت بيكم مربوط
ومالي عندكم محطوط .....ونزيد لكم الشهرية
قال لي يا وليدي سجل .....عشرين صباط باش تبدل
وخمسين سروال مفصل ......ويكونوا ضيقين شوي
وزيد كيلوا ذهب صافي ......وتجيبوا وانت زاهي
والشنتوف ماهو كافي ......راني درت فيك مزية
بنتي راهي غالية وشريفة .......ماتتركش يديها خفيفة
عشرين خاتم في قفيفة.......وتحطهم في يديها هي
كرفاش بولحية ماتنساش ....والمليون لازم يكون معاه
والحايك لازم منو تلقاه .....وتقدموا لبنتي هدية
قال لي اسمع يا سي موح ........بلاك تنسى خيط الروح
باش يزيد لبنتي في الروح........وتبقا ديما حية
تشري لها عشرين لكباش ......والجاج المشوي ماتنساش
جابو لي العروس للبيت ...وكي شوفتها من الخوف بكيت
قالت لي لازمني نبقى حرة .....ويماك لازم ترميها برة
وما تكثرش من الهدرة ......راني طفلة حضرية
قالت خف اطلع البرمي .....قلت يا امراه لازم تفهميني
ترفدي حوايجك وتلمي ......وتطيري اليوم عليه
والله كون ماتتزوجش دير بليزير في والديك (ههههههههههه)
على الاقل يوفروا شويا دراهم للمصروف ويزيدوا يوفروها لاخواتاتك لبنات لزواجهم
راه زواج لبنات لازملوا ديك الحسبة
(هههههههه)
ونعطيك نصيحة اخي ماهيش صباع يديك كيف كيف ولبنات ماهمش كيف كيف والعائلات كذلك والمناطق كذلك وكل منطقة عندها شروط وعادات وتقاليد معينة وكل عائلة كذلك وانتم في عايلتكم كون يجي واحد يخطب بنتكم تشرطوا عليه اللي كنت تقول فيه ولا تطلبوا السترة برك؟؟؟؟؟؟؟؟؟؟؟؟؟؟؟؟
وعلى العموم كاين ناس يشريوا الراجل
ماشي يشروا دراهم
ولا البنت ماولاتش سلعة اللي يدفع فيها اكثر يديها
الله يهديك اخي وائل على تفكيرك هذا
الناس ماهيش كيفكيف
تخمم في نفس التخمام
وعلى العموم شكرا للموضوع
