ماذا ستطبخين اليوم سيدتي..انستي..../الجزء الثالث

[ام أمينة]

انا غدايا كان جواز خضرة بلحم الغنم و سلاطة

صح فطوركم
​

 

[ibtesem]

بصحتك اختي ام امينة

 

[عفاف الجزائرية]

ليوم للغداء درتلهم بطاطا غراتان بالصوص طوماط والفيونداشي والزيتون الاخضر مقطع
وسقيتها بالبيشامل خدمتها بلاصوص بلونش وفرماج
مع فلفل
وسلاطة
وكسرة رخساس نتاع قمممح
وبصحتكم

​

 

[kakpop]

ارجوكم شفت طريقة عمل السفنج و لكن نسيت الصفحة ممكن تعطوني الوصفة

 

[nada242008]

صحا غداواتكم يا بنات
انا اليوم طيبت حمص .. وصفلي راجلي الطريقة وانا طبقت ههههه
كيما الحمص اللي يتباع البرا ..

صحا غداوتكم كامل وسلامي لام كوثر ..ربي يكون معاك ان شاء الله

 

[imane27]

مساء الخير عليكم صح فطوركم بالواحدة
ندى طريقة الحمص راهي تبان جديدة عليا بصحتكم كيفاش درتيها
عشايا لبارح كان سخشوخة ظفر ومسفوف بالدلاع متستغربوش راجلي يحب يكلو هكدا

 

[ibtesem]

اممممممممممممممم يامون جاتك تشهي بصحتكم

 

[ibtesem]

امممممممممممممممم واش نقول على هدي راحلي تعبير هههههههههه
يخي الصحن تاني تاعي كما متفاهمين ههههههههه
انور رجيم هههه

 

[ibtesem]

ارجوكم شفت طريقة عمل السفنج و لكن نسيت الصفحة ممكن تعطوني الوصفة

تفضلي اختي
بقلم اختي تسنيم

السلام عليكم يعطيكم الصحة وش طيبتو مشاااااء الله
اختي ايمان و لالجيرواز طريقة السفنج كالتالي
في جفنة حطي 500غ فرينة+ 3ملاعق صغار خميرة فورية + شوية ملح +3ملاعق كبار زيت وبسيها وبعد لميها بالحليب دافي دريها مثل الكسرة وفي الاخير ضيفي بيضة وهنا خبطيها بيدك وتكون مرخوفة على الكسرة شوية غطيها خليها تخمر وبعد لوزيها في صنية مدهونة امليح بالزيت ولوزيها مثل الكسرة ولما تخمر غير شوية تكوني حضرتي 2 مقالي الاولى فيها 3 ملاعق زيت والثانية فيها الزيت عادي كي يسخن ارفدي بالوزة عبسي في الوسط بصوبعك وجبدي على شكل اسوارة وطيبها في المقلة الاولى غير يتغير اللون لوحيها في المقلة الزوجة وفي نفس الاتجاه وين تغير اللون وبعد قلبيها للاتجاه الاخر
وفي بعض الاحيان نستعمل ملعقة تاع الايسكريم نديرها في الماء وبعد في العجين وبعد في الزيت ولما اطيب اندرها في السكر قلاصي وهذي الطريقة رووووووووووووووعة بزاف وهنا يصبح بيني ويجي خفيف رائع والحبات قدقد مثل المحلات عدنا هنا اي استفسار راني هنا
ملاحظة كل ماتكون لعجينة مرخوفة كل ما تجي هايلة

 

[ibtesem]

عفاف بصحتك الغرتان انا تاني يمكن غرتان مي بدنجال

 

[كوثر الوهرانية]

اهلا بالحبايب
امشكورات خواتي عى دعواتكم و طيبت قلبكم
ربي يخليكم ليا يا اعز اخوة
اليوم عجنت الخبز و درت جواز شوفلار و حميص و خدمت لي بوتي فور يعني من حيت نضت و انا نخدم

لبنات الي طلبوا مني وصفة التورت سامحوني على التاخير
للعجينة
خمسة عبار فرينة و عبر زيت و ملح رشة جوزة الطيب و نلمها بالماء خليها ترتاح نص ساعة
الحشوة نفور السلق و نقطره مليح في مقلة نضع زيت ثوم يتقلوا نضيف ملح فلفل اسود و نضع السلق و نخلط جيد و نطفي النار و من جهة اخرى نحضر صلصة البيشمال تكون تقيلة نضيف لها الفرماج
نخلط السلق مع صلصة البيشمال
نورق العجين و نضعها في مول نضع الحشوة ثم نغلق بعجينة اخرى و نزين بباقي العجين و ندهن بصفار البيض و ندخله الفرن مسخن مسبقا نتركها حتى تحمار مليح

 

[كوثر الوهرانية]

اختي امينة لقد تلقيت رسالتكي اسعدسنس كثيرا ربي يخليك ليا اختي
عفاف طهور ان شاء الله على سلامة اختك يا رب يشفيها و يعافيه و تكمل حملها على خير
اسومة واش بيك اختي معجبنيش صوتك البارح كي كلمتيني عفت عندك حاجة و زدت تاكدت كي قريت واش كتبتي خير ان شاء الله نحي علابالك يا اختي

 

[dahbito]

مساءالانوار على الجميع
صح فطوركم وبصحتكم كامل واش طيبتوا
حبيبتي كوثر ربي يشفي زوجك امين ياربي
وعفوفة ان شاء الله ربي يسهلها لاختك
تفظلوا رابط العجينة المورقة
العجينة المورقة لصنع احلى المعجنات من مطبخي ​

 

[nada242008]

ايمان الشخشوخة جاتك تهبل امممممم
بالنسبة للحمص كيما قلت اول مرة نجربو
تطيبي الحمص عادي حتان يطيب مليح و تخلي الما اللي طاب فيه شوية لازم تكون خاثرة
تقطعي الطماطم وفلفل طرشي يعني مرقد و معدنوس وبصل قطع صغيرة جدا
البصل تذبليه في شوية زيت زيتون غير شوية برك لازم تبقى فيه القرمشة
تسقي الحمص وتحطي عليه الطماطم والفلفل والمعدنوس والبصل وتخلطي وتضيفيلو الكمون وتزينيه برشة معدنوس وزيت زيتون
--
بسومة خبيتلك 2 صحونا ههههه
اليوم بارد نهار حمص صح .. النو عندها 3 ايام ماحبستش

 

[أم نيفين]

مساء الخيرات عليكم يا أحلى لمة
بصح راني زعفانة منكم ...وحدة ماتفكرتني
المهم غدانا اليوم غراتان باذنجان بالبيشاميل

 

[أم نيفين]

​

 

[assia dz]

السلام عليكم، واش أحوالكم إن شاء الله راكم بخير، راني مرة على مرة نجي نطل عليكم، بصحتكم واش طيبتو كل وحدة باسمها كلكم رائعات وفنانات في الطبخ، ما قدرتش نقرا كل الصفحات.
ام كوثر حبيبتي ربي يشفي زوجك إن شاء الله ما يكون غير الخير.
أنا غدايا كان تليتلي بالجاج بصح ما صورتش. وللعشا تاع البارح درت تورت بالسلق صراحة شهاتني فيها أم كوثر لما راجعت الصفحات ولقيتها تاحفتها وكان عندي السلق، أنا درتها بالبات بريزي، والحشو درت السلق مع الجاج والفرماج:

 

[assia dz]

بصحتك ام نيفين القراتان وانت أم ندى الحمص، والله غير صح نهارو .

 

[أم نيفين]

بصحتكم كامل واش طيبتو كل وحدة باسمها
و حبيبتي فريدة بالشفا على مولا بيتك و إن شاء الله تنجح العملية و يرجعلكم بالسلامة

 

[كوثر الوهرانية]

ندى بصحتك الحمص زوجت اخي طيبه بهدي الطريقة يجي بنين
اسيا دي زاد مرحبا بيك يا اختي و بصحتك التليتلي و التورت جاتك روعة
ام نفين متاخزينيش يا اختي والله راكي في قلبي و نستنى فيك تفتحي السكايب باش نطمن عليك بصحتكم القرتا يبان بنين