ماما اعطيني نشري بيتزا...الادارات تاع الجزائر ولاو des crèches

[لاجودان شاف]

السلام عليكم ورحمة الله وبركاته
اهلا بجميع ناس اللمة الناس لملاح وان شاء الله راكم ملاح
اليوم حبيت نتكلملكم على واحد التصويرة شفتها قدامي لكن ماسمحتش الفرصة باه نكتب عليها في وقتها
من اسبوع رحت لاتصالات الجزائر telecom باه نطلب خط تيليفون ارضي:showoff:
مع دخلت هزيت نيميرو ورحت ريحت في البون نسنى دالتي ومكانش غاشي بزاف
كاين زوج سيدات يخدمو وراجل في هذا السارفيس
وانا قاعد هكذاك نتفرج في هاذوك لي دام ونشوف فيهم كيف منهمكين في الخدمة
وغاضوني كيعاد تغداو زيتون وفرماج
وزمان خرجت طفلة صغيرة من واحد الباب خلف لبيروات
لابسة طابلية غوز تاع قرايا وجات تجري عند ماماها
وقاتلها ماما ماحبش يمشيلي الجو زعما jeu ارواحي ديريهولي
ماماها قاتلها روحي برك ديري وحدك هاكي تشوفي فيا مع الناس
مالا الطفلة مسكينة غضبت
وبدات تضرب في ماماها بالبونيات للظهر-دبزات- وتبكي
ماحا ماحا ديريلي جو ديريلي جو :crying_1:
هيا السيدة لخرى لي تخدم مع امها شافتها تبكي وهي قاتلها
وشبيك سمسووووومةi-o: وعلاه تبكي خلاص ماما خلاص
هيا ارواحي نعطيك تشري شيكلات - علك وشيوينgوم -
هيا مع سمعت بلي فيها شوينgوم راحت تجري ليها
واانا مازلت مريح نسنا وهو خرج طفل :santa_1:واحدآخر كثر من هاذ البنت بعامين برك
وجا لماماه ..تكى عليها وقالها : ماما ماما جعت :sad:
قاتلو اصبر قريب نروحو
قالها ماحا ماحا :crying_1:اعطيني نشري بيتزا
هيا عطاتلو وخرج هو وختو راحو يشريو
جات دالتي قتلتني الفرحة وقعدت مع لادام هاذيك ندير في لادوموند تاعي
زمان وولدها وبنتها رجعو هو هاز بيتزا وهي تمضغ في العلك
والفرحة والسعادة تقتل فيهم
هيا وبداو يزحلقو في لادال دوصول تاع la poste :sheer:عجبتهم ههههههههه
هام رايحين ها جايين ..هار رايحين هام جايين
وانا نتفرج
وقاعد نخمم قلت سبحان الله ادارات ومؤسسات الجزائر كيف ولالو
دي كراش des crèches
وغاضوني بزاف لوليدات هاذو قلت نورمالمو راهم في الدار يقراو ولا يروبزيو
بصح الله غالب ماماهم حبت تشري picanto بيضة
ونتركو المجال ليكم
هل شفتو هاذ الظاهر عندكم في مؤسسات وادارات الدولة اصطحاب العمال لأولادهم لانهم ماعندهمش وين يروحو ؟؟؟
وفي الأخير
:re_gards::re_gards::re_gards::re_gards::re_gards::re_gards::re_gards::re_gards::re_gards::re_gards::re_gards:
​

 

[إنسانة ما]

وعليكم السلام ورحمة الله
بارك الله فيكم
أنا هاذي الصورة شفتها مراااااااات ومراااات لما كنت أدرس، آخر سنة جامعة بالأخص لما كنت نحضر لمشروع التخرج.
أستاذتي عندها بنت وولد وزوجها أستاذ جامعي ثاني وعندو منصب إداري (رئيس القسم)، هاذي الأستاذة أغلب الأوقات تفوتها في الجامعة بحكم التدريس والعمل مع الطلبة لي تشرف على مذكرة تخرجهم (من ضمنهم انا). هاذي الأستاذة أبناءها دايما في الجامعة، من المدرسة للجامعة ومن الجامعة للمدرسة، ما يعرفو حتى مكان إلا المدرسة والجامعة والبيت للنوم.
المشكل أنو أوقات كنا نتأخرو في العمل حتى الساعة السادسة أو السادسة والنصف مساءًا والأطفال معنا، أوقات يكون عندنا عمل يوم الجمعة والسبت والأطفال معنا. يعني هاذ البنت والولد لو عرضو مكاننا مذكرة التخرج لتحصلو على أعلى علامات، كانوا مواكبين معنا العمل أول بأول.
وكان لعبهم فقط مع أعوان الأمن في الجامعة والحيوانات المتواجدة في المخابر.
مشهد ما ننساهش أبدًا في يوم كان السبت -على أغلب الظن- أنا أعمل والبنت كانت بجانبي تكتب تعبير بالفرنسي (زعما تتعلم لغة): كتبت فقرة تتكلم فيها عن يومياتها -زعما- مفادها أنو يوميا تذهب للمدرسة لتدرس وبعدها تذهب مع والدها وأخوها وأمها للجامعة ثم تعود للبيت. لما قرأت ما كتبت قلت في نفسي: سبحان الله، بنت في عمرها 8 سنوات ما تعرف شيء خلاف المدرسة والجامعة، وين طفولتها؟؟ وين لعبها؟؟ وين حياتها كطفلة صغيرة؟؟؟
وأيام بزاف كانو يغيضوني، تتركهم أمهم معي وتروح لعملها ويكون وقت الغداء 1 أو 1.30 بعد الظهر، وهاذ الطفلين يكونو ميتين بالجوع والمشكل أنها محرمة عليهم أنهم يأكلو من عند أي بشر.
والله كانو يغيضوني بزاف لأنهم ما عاشو طفولتهم كما ينبغي.
أعتذر طولت لكن هاذ القصة فكرتني في تيتا وعبدو.

​

 

[nour mary]

و عليكم الســـلام
نون جامي شفتها
مي مساكن هاد لولاد
تلقاهم ماعاندهومش وين يروحو
الدنيا ماعادش فيها الامـــان بالاك ماعاندهاش وين تخليهم تجيبهم معاها

شكرا على الموضــــوعـــ ​

 

[adel-mz]

سلام
واش راك مستر لاجودان لباس شوية ،الحمد لله
ههههههههه
عجبتني هذه الحادثة قمة شعار دز طبع تحيا الجزائر
تاني لو كان غير اغتنمت الفرصة وراني متاكد بعد ماشفت القصة وعلابالي بلي راك ذكي ودرتلهم كيما ولادهم ،ايا زعمة جات دالتك وقتلهم ماحا ماحا :crying_1:اعطيوني خط ارضي ههههههه ،غير متحبيتش تحكيها ههههههه
واش نقولك ياحبيبي والله يالمؤسسات اصبحت هاكذا كل واحد يقولك ماشي نتاع باباك الى ان وصلت الى الملكية الخاصة كل عامل ،واحد يجيو ولادو واحد يتصرف في متريال المؤسسة كيما يحب ،والجياح متحكيش ،
بارك الله فيك يا الشاف

​

 

[secret de coeur]

وعليكم السلام خويا لاجودان
نا هاد العفسة جامي تلاقيت بيها باسكو خاطيني مؤسسات الدولة ههه
مي اكيد كاينة بزااف منها
بالاك هادو النسا مالقاوش وين يحطو ولادهم .. جابوهم للخدمة معاهم
مي نورمالمو ممنوع لازم تلقالهم مربية ولا ...i-o: اي شخص يرعاهم في غيابها
مش تمرمدهم معاها .. على كل لازم المرأة اذا بغات تخدم توفق مابين دارها وخدمتها
مرسي ع الموضوع الهادف
+ عجبتني تاع البيكانتو ههه
سلااااام ++
​

 

[touffik]

وعليكم السلام
والله مشكل كبير للام تخدم ولا تربى الله يكون فى عونهم

الله غالب شباب تعاليوم ره يبغى لى تخدم

 

[دروب الرحمة]

هذي فالسيام اللي كنت نقرا فيه
شفت أستاذات يجيوهم ولادهم وبناتهم
الله غالب كيما قلت حبو بيكانتو بيضا
النسا عياو واش يخرطو (حاشا اللي محتاجات صح)
مارسي عليك

​

 

[♥SaMoù Là MoDèsTe♥]

و عًلًيْكٌم آلسًلـآم

إيـهـ أنآ شفت هآذي الظآهرة بزآآآآف
تآع أطفآل موظفي المؤسسات العمومية
يلعبو ويدورو في المؤسسات كأنهآ منآزلهم

والله حآلآت يتأسف لهآ الوآحد بزآف
لأنهـ عوض مآ يتربى الطفل في دآرهم مع أمو
أصبحت المؤسسة هي اللي تربيهـ
هذآ هو حـآل الخدآمآت
​

 

[بلد المليون]

سلام عليكم
علاه نشوفها يـــاو عايشتها
سي سيرتوا اللي يكونوا يخدموا في مجال الصحة معندهمش كامل وين يقعدوا تشبع منهم سبيتارات
بصح واش دير هدي دي الخبزة​

 

[ماكانش]

ههههه
راحتلك يا لاجودان ماشفتش شاف سارفيس تاعهم ؟؟؟ هههههه

 

[إيمان قلب]

السلام عليكم
يعطيك الصحة خويا لاجودان , حتى انا كنت ناوية نحكي في هاذ الموضوع هههه معليهش راك سبقتني
بخصوص اني شفت الظاهرة , والله شفتها وعفتها , فالسبيطارات , فالليكولات , فالجاميعة , فالإقامة , فالبلدية
وانت راك شفتها في لابوست
عندنا واحدة تخدم فالبلدية , كي يكملو ولادها القراية يروحولها للخدمة كي قلنالها كون راكي كشما عند من راكي تخليهم
قالتلنا ماكش اللي قبلهملي
هيا واش نقولو كي تدخل لكاش مؤسسة تحسابها لاكراش
يعطيك الصحة خويا على الموضوع + اذا خلاوني هههه
​

 

[اقبال1]

هههههههههههههه و الله غي من كثر ما حكيتها بالتفصيل حتى تخيلتها قدامي حاضرة ..يعطيك الصحة

بصح انا لي ما فهمتهاش و علاه هادي " الماما " ما حطتهمش في دار حضانة ... و + انا نقول ديما هادي الحنينة تاع " ماما " عندها زوج ولاد علاه ما تقعدش تربيهم في البيت خير ليها هي و للولادها prq تربيهم مليح و يتعلمو مليح خيرمن يترباو في حيطان و لادال دوصول في la poste زعما باه يحكمو la place تاع يماهم ؟؟؟؟؟هههههههه

انا عني ما شفتهاش كي كنت نقرا و كي خدمت بصح نحب برك نقول حاجة لكل " ماما " باسم هادي الكلمة ضحي على جال ولادك و قعدي في الدار ربيهم prq هوما اولى فيك من la poste ..

 

[bachboucha]

ايه نقولك المراة العاملة و اللي عندها الاولاد ربي عالم بيها ماتدريش واش راهي محتاجة .. بالاك الراجل مايصرفش عليها لازم تصرف هي ... نحكي عن تجربة باسك كنت صغيرة نروح ساعة عند يما نجيب المفتاح و من بعد نروح نروح للدار الوالد متغرب كل مرة يطايش فبلاصة و الام عاملة الله غالب واحد مايهز واحد لا عمتي لا الجدة كانو يبغيو يحكموني و انا كنت نورمال يعجبني الحال كي يقولولنا فالقسم شكون ماماه خدامة نهز يدي غير انا نزوخ بيما زعمة خدامة الصغر مي كي كبرت عرفت واش صبرت ماما علاجالنا واش عقبت ... البرد و السخانة و هى مرة هنا مرة لهيه ... مي جامي كان غرضها بيكانتو بيضا لا كانت باغية تقري ولادها و تعيشهم ... لا تسالني عن دور الاب فهو كان غير موجود اغلب الاوقات .... شحال سوفريتي يا ما لعزيزة و حملتي علاجالنا خدمتي برة و الدار و زدتي حملتي هدرة العايلة و السلفات لعجوز و حتى الجيران و الحمد لله يا ما كبرتينا و قريتينا و فرج ربي علينا ....
شكرا لك على الموضوع بالرغم انك حكيت غير على لي بغاو بيكانتو مي كاين بزااااااااااااف بغاو يربيو لولاد خاطر الراجل الله غالب مايفك مايصك يقولك اخطي راسي برك​

 

[nawal 88]

شفنا مكثر من هكا والله لعجب راني نشفا كي كنت نقرا في الابتدائي كانت تجيب المعلمة بنها صغير والله اقلامنا وحوايجنا كامل سرقهملنا وحنا الله غالب كنا نشوفو فيه ونضحو بصح الواحد كان قلبو يعصر
+
هههههههه قتلتني بالتزحليق تاعهم ههه تخيلتهم ​

 

[القطة الزهرية]

سلالالالالالالالالام
والله ياخويا هدي ملي كنت صغيرة وهي كاينة نشفى كانت معلمتي الحبيبة اجيب ولدها معانا يقرا في القسم وانا وحدة من الناس كنت نحصل في خالتي تديني معاها للخدمة ههههههههه والله هك ولات الحالة عيش تشوف زعمة مالقات وين تحط ولادها يجيو لعندها خير ...ربي يجيب الي فيه الخير... شكراااا

 

[لاجودان شاف]

مشهد ما ننساهش أبدًا في يوم كان السبت -على أغلب الظن- أنا أعمل والبنت كانت بجانبي تكتب تعبير بالفرنسي (زعما تتعلم لغة): كتبت فقرة تتكلم فيها عن يومياتها -زعما- مفادها أنو يوميا تذهب للمدرسة لتدرس وبعدها تذهب مع والدها وأخوها وأمها للجامعة ثم تعود للبيت. لما قرأت ما كتبت قلت في نفسي: سبحان الله، بنت في عمرها 8 سنوات ما تعرف شيء خلاف المدرسة والجامعة، وين طفولتها؟؟ وين لعبها؟؟ وين حياتها كطفلة صغيرة؟؟؟
وأيام بزاف كانو يغيضوني، تتركهم أمهم معي وتروح لعملها ويكون وقت الغداء 1 أو 1.30 بعد الظهر، وهاذ الطفلين يكونو ميتين بالجوع والمشكل أنها محرمة عليهم أنهم يأكلو من عند أي بشر.
والله كانو يغيضوني بزاف لأنهم ما عاشو طفولتهم كما ينبغي.
أعتذر طولت لكن هاذ القصة فكرتني في تيتا وعبدو.​

وعليكم السلام
صحيح كيما قلتي وشمن طفولة تاع ابن او بنت صغير
تفوتها في الجامعة تسنى ماماها باه يروحو كيف كيف للدار
وشمن طفولة تاع بنت تفوتها مع ليزاجون تاع الجامعة والطلبة والطالبات
وماماها غير تصبر فيها بالششيكولا والبيتزا تاع الفوايي المعبيه عفن:sad:
يعني يخرج الطفل من روتين وضيق القسم والجدران
باه يروح يلعب شوي ويرفه على روحو
يروح يتفرج في الفيران والقناين مصارنهم على برا في المخبر
ملييح
وتلقاي دارهم من كثرة الفراغ لي فيها سكنها الجن
تالمو واحد ما يدور فيها
ومن بعد يجيبو اخ سلفي يرقيهالهم
يعطيك الصحة
:re_gards:​

 

[لاجودان شاف]

و عليكم الســـلام

نون جامي شفتها
مي مساكن هاد لولاد
تلقاهم ماعاندهومش وين يروحو
الدنيا ماعادش فيها الامـــان بالاك ماعاندهاش وين تخليهم تجيبهم معاها ​

شكرا على الموضــــوعـــ ​

وعليكم السلام ختي
صح ممكن مكانش وين يروحو
ومكانش بلاصة مضمونة تقدر تكمن عليهم فيها
بصح وعلاه ماتحسش الخدمة وتقعد في دارها تحكم ولادها
ونمدو لبوست لشاب عازب متعزب في العزوبة
وهكذا نقدرو نزوجوه ونكونو قضينا على 1 بالمية من البطالة
وش رايك ختي
شكرا
:re_gards:​

 

[لاجودان شاف]

سلام

واش راك مستر لاجودان لباس شوية ،الحمد لله
ههههههههه
عجبتني هذه الحادثة قمة شعار دز طبع تحيا الجزائر
تاني لو كان غير اغتنمت الفرصة وراني متاكد بعد ماشفت القصة وعلابالي بلي راك ذكي ودرتلهم كيما ولادهم ،ايا زعمة جات دالتك وقتلهم ماحا ماحا :crying_1:اعطيوني خط ارضي ههههههه ،غير متحبيتش تحكيها ههههههه
واش نقولك ياحبيبي والله يالمؤسسات اصبحت هاكذا كل واحد يقولك ماشي نتاع باباك الى ان وصلت الى الملكية الخاصة كل عامل ،واحد يجيو ولادو واحد يتصرف في متريال المؤسسة كيما يحب ،والجياح متحكيش ،
بارك الله فيك يا الشاف​

وعليكم السلام
والله لاباس مستر عادل السوال عليك
قتلنا البرد برك شوي :sad:
+
شفت هذاك السيناريو
كاش نهار تقولك خويا دقيقة برك عاوني نبدلو لاكوش للطفلة:scared:
وتقدر تقولك حبيت ذرك نطلقلك الانترنات
سكتلي الطفلة برك من البكاi-o:
+
هههههههههه هيه لو يمدولي تيليوف في البلاصة انا نحكملهم ولادهم
صحيت عادل:re_gards:​

 

[تاج الجزائر]

السلام عليكم

كيما هاكا صرات عنا في الخدمة وحدة تقري عنا جابت ولدها مولاعامين وشوية قالت

ندخله تحضيري

ايا راك عارف مديرنا بزلافة طعام ترشيه:glare: دخلهلها

شوف وين وصلنا المعلمة نتاع تحضيري مرة كبيرة باغي تخرج لاتريت قعدت تخرط فيه

في لاكور ومشيطها في القسم قاع ما يرتبش صغير مسكين بزاف ما يعرفش

حكموهلها غير يامات وقالولها دبري وين ديريه

هيا ثاني تتفش خلت لاكريش وجايباته عنا

ناس عقليات كاين لي ما عنهاش حل وين ديره تخاف عليه ولا ما نعرف وكاين لي

يبروفيتو :glare:

انا نخليك ضرك كثرت عليك الهدرة :shay:
​

 

[لاجودان شاف]

وعليكم السلام خويا لاجودان

نا هاد العفسة جامي تلاقيت بيها باسكو خاطيني مؤسسات الدولة ههه
مي اكيد كاينة بزااف منها
بالاك هادو النسا مالقاوش وين يحطو ولادهم .. جابوهم للخدمة معاهم
مي نورمالمو ممنوع لازم تلقالهم مربية ولا ...i-o: اي شخص يرعاهم في غيابها
مش تمرمدهم معاها .. على كل لازم المرأة اذا بغات تخدم توفق مابين دارها وخدمتها
مرسي ع الموضوع الهادف
+ عجبتني تاع البيكانتو ههه
سلااااام ++​

أهلا بيك ختي
تهنيتي مالا من ادارات الجزائر
هيا عفسة توجور كااااينة
وهي صح مالقاتش وين تخلي ولادها
بصح كاين لي كراش تاع البريفي تقدر تدي ولادها لثم
وراهم يربيو لولاد احسن تربية باه يخرجو جيل ثوري حتى هوما
وش تبالك تربيلك بنك ولا بنتك
وحدة وجها تاع حديدوان من الماكياج ونهار كومبلي وهي ترحي في العلك وتهدر في الكيت
يعني باين ولدك راح يخرج مجاهد كبير
+
هههpicanto باه كي تخلص الخدمة تهز باط قاطو من عند لقسنطيني
وتروح تشرب بيه لحليب
بيسك تعبت مسكينة نهار كامل وهي تخدم... تعبت
مشكورة ختي
:re_gards:
​