خواطر مجاهد تمجيدا لاخيه الشهيد

نبيلة شباح

:: عضو مُشارك ::
إنضم
29 جوان 2011
المشاركات
412
النقاط
9
لم اعرف اي قسم ساكتب هذه الابيات لكن المهم ان تقرؤوها وتفهموها جيدا هي حكاية شهيد يرويها اخوه

في سنة 55 الاستعمار جمع جميع الاعراش
سكان احمر خدو الى مراكز المحتشدات والى واد الاوراس
منهم عرش اولاد ايوب وتاجوت وعرش اكباش
بعدما احرق ارضنا ونهب اموالنا حتى في ديارنا ما خلناش
اعمل علينا حصار وانقطعت علينا الاخبار
كثرت فينا الامراض ونقص علينا المعاش
وكانت عائلتنا تسكن في قرية لعشاش
وكان جارنا التهامي وعمر بن معاش
حتى سنة 57 رحلنا الاستعمار بالقوة حنا ما شتيناش
الى بلدة مشونش وفرقنا على الاحواش
حنا سكنا في دار خرفية بنت حناش
والاخ الشهيد كان يخدم مع الثورة من البداية ما خلناش
مسؤول اللجنة على سكان دوار لولاش
حتى واحد النهار كنا قاعدين في جماعة ما فقناش
حتى وصلونا الحركة وحنا في الجنان ما علبلناش
وفيهم الصالح بن فلان الكلب الغشاش
وصرى في الدار والحانوت التفتاش
الوثائق الي فيها اسرار الثورة ما القاوهاش
في الحين قبضوا عليه وكان وراه محمد بن فلان لغشاش
قال خوك نرفعوه للبحث ويرجع ما تخافش
كدار نظر فيا النظرة الاخيرة
وراح من ذاك النهار ماشفناه وما ولاش
يا خاوتي الدمار ذاك النهار ما يتنساش
وصلوه لمركز الجمبير فيه العسكر من جميع الاجناس
شهدوا عليه ثلاثة بيوعة من كان نواحي فلماش
طلقوا عليه السب والشتم واسرار الثورة منو ما ادوهاش
ربي عالم بهم انا اساميهم ما ننسهاش
الاستعمار البغيض بعذابو ما خلاش
عذبوه بانواع العذاب حتى بالنار الي ما تطفاش عشرين يوم تحت الارض الماء والماكلة ما شافهاش كل العذاب الي شافو ولفرنسا ما عترفلهاش
طلبو عليه اربعين الف قالوا اذا ماهيش صرف مانقبلهاش
دفعناهافي غدر العدو ما فتناش
بعدما عرف روح ما يرتاحش من العذاب ما يحياش
قال للقبطان الفرنسي جوكلة يا غشاش
اذا كنت فرنسي حر داويني او اقتلني مانبقاش
في ذيك الليلة قتلوه في واد العتروس طيشوه
والعدو على حملو ما خلناش

حتى في مقبرة الشهداء مادفناش
روحو عند ربي انشاء الله مايعذبهاش
والخونة في جهنم وربي عليهم ما يرضاش
التاريخ ما ينسى وكتب على الشهداء ماخلاش
ربي ذكرهم في القران والاية ما خفهاش
الشهيد اسمو محمد الصالح والمعروف (حم)عند العراش
استشهد صغير وعمرو 32 بلا تفتاش
في شهر اوت 57 بلا نقاش
خلف وراه طفلة صغيرة الهدرة ما زالت ما تعرفهاش
محرومة منو حتى صورة باباها الاستعمار حرقها ما خلهاش
يا خاوتي عيني عليه تبكي ما تسحاش
وقلبي من غش الخونة ما يبراش
نكتب هذي القصة تبقى للاجيال القادمة ما تتنساش
مكتوبة بدم الشهداء الي ما يتمحاش
خوه( محمد الصالح )المجاهد يكتب عليه ما يعياش
نطلب من ربي اذا انسينا شيء ما يحاسبناش
يا قارئ هذي القصة عليها ما تلومناش
اللغة راني ما قريتهاش كتبتها يوم 27 رمضان 1403 وقت التمسية مازالنا ما فطرناش
وارجو من اخواني واولادي ما يضيعوهاش
ملاحظة

اسم الشهيد واسم قائل هذه الكلمات لا يختلفان فاسمه الحقيقي هو الشهيد خلفالي محمد الصالح
رحمه الله واسكنه فسيح جنانه واطال عمر اخيه المجاهد خلفالي محمد الصالح .
لعدم التشهير لم اشا ذكر اسم الحركي الذي وشى بالشهيد .
شرح لبعض الكلمات
ماشتيناش =لم نحب
ما فقناش =لم ننتبه
ما ولاش =لم يرجع
مركز الجمبير =هو مركز انشاه العدو في قرية مشونش نواحي ولاية بسكرة
فلماش =دوار عرش اولاد ايوب وتسمى سيدي مصمودي تابعة لبلدية المزيرعة ولاية بسكرة
ما تسحاش =لا تنقطع
 

om djawad

:: عضو مُتميز ::
إنضم
20 جوان 2011
المشاركات
518
النقاط
17
والله هاذ القصيدة هزتني ياسر
ربي يرحم الشهداء
وربي يجازيك على نشرها
 

نبيلة شباح

:: عضو مُشارك ::
إنضم
29 جوان 2011
المشاركات
412
النقاط
9
السلام عليكم يا اهل الخير ارجو من الجميع وخاصة من قرا هذه الابيات ان يترحم على قائلها لانه قد انتقل الى رحمة ربه ربي يرحمو ويجعلو في مرتبة الصديقين والشهداء قولوا امين
 

HAMZA USMA

::أستاذ:: :: مشرف ::
منتديات التعليم المتوسط
طاقم المشرفين
إنضم
8 أكتوبر 2012
المشاركات
10,656
النقاط
1,566
العمر
27
محل الإقامة
زرالدة الجزائر العاصمة
الجنس
ذكر
ربي يرحم جميع الشهداء وجميع لي ماتوا على هاذي البلاد
موضوع جد جد رائع افدتنا بارك الله فيك و جزاك خيرا اخي في الله المزيد من هده المواضيع الجد المفيدة

 

نبيلة شباح

:: عضو مُشارك ::
إنضم
29 جوان 2011
المشاركات
412
النقاط
9
ربي يرحم جميع الشهداء وجميع لي ماتوا على هاذي البلاد
موضوع جد جد رائع افدتنا بارك الله فيك و جزاك خيرا اخي في الله المزيد من هده المواضيع الجد المفيدة

شكرا على المروريا اخي
 

أبو العبــــاس

:: عضو مُتميز ::
إنضم
10 سبتمبر 2009
المشاركات
1,270
النقاط
43
محل الإقامة
سيدي خالد...بسكرة
الجنس
ذكر
رائعة ما حملت لنا هذه الاسطر التي تصف معانات وعذاب اخواننا في عهد الظلم ..بارك الله فيك ورحم الله صاحبها وغفر له.
 
Top