هو نورمال وهي ماشي نورمال فهمتو كاش حاجة؟

Ice Queen

:: عضو مُشارك ::
إنضم
5 نوفمبر 2010
المشاركات
163
نقاط التفاعل
1
النقاط
7
السلام عليكم
ان شاء الله راكو لاباس بخير عايشين حاجة ماراهي خاصتكم في اللمه مع خاوتكم
المهم اليوم جيت نحكي في موضوع والله ماعلابالي كيفاش نسميه مالقيتلوش اسم نحكيلكم الحكاية وممبعد نخمم في اسم
عندي خالتي تزوجت عندها حوالي 3 سنين ربي مازال مانابش عليها بالدراري وكي تزوجت سكنت وحدها ماشي مع عجوزتها . جاز العام الاول تاع الزواج نورمال من العام الثاني بداو المشاكل كل ماتروح عند عجوزتها تبدا تسمعلها في الكلام الفلانية راهي بالجوف والعلانية راهي تزوجت موراك راهي بزوج ذراري. ويابنتي لا راكي مريضة داوي روحك انا وليدي مايقعدش بلا ذراري
حتى ولات ما تروحش عندهم المهم راحت للطبيب دارت التحاليل وكلش وقالها الطبيب بلي مابيك والو
وكي دار راجلها التحاليل لقاو بلي هو السبب ماشي عقيم ولكن عندو مشاكل يلزم تتعالج ومع الوقت باش تجيب نتيجة وها الشئ كامل صرا وخالتي ماحكات حتى لواحد حتى ليماها ماقالتلهاش
وحد النهار كي راحت عند عجوزتها زادت جبدتلها الموضوع تاع الدراري وبدات تزيد في الهدرة خالتي ماقدرتش تصبر وقالتلها المشكل ماشي فيا راهو في وليدك انا بنهاري نجيبلك 10لا حبيتي.يا خاوتي من هاداك النهار مازادتش هدرت ولاجبدتلها الموضوع بالعكس ولات تصبرها وتدعيلها .
وهنا لحقنا للب الموضوع لي علابالي بلي نسا بزاف يعانيو منو علاش نحكمو على المراة العقيمة بالاعدام بينما الرجل عادي يعني المراة العقيمة عندها خيارين يا اما تطلق او تعيش مهانة تحت اقدام عجوزتها او ضرتها
علاش المراة كي تكون عندها مشكلة في الانجاب واحد ما يوقف معاها يا اما راجلها يطلقها وهو الاكثر شيوعا او يتزوج عليها وواحد ما يعاتبو او يحاسبو
بيانسير هو راجل ويدير واش يحب
ولكن من جهة اخرى الرجل كي يكون عندو مشكلة في الانجاب زوجتو توقف معاه حتى الاخير
علاش المراة لوكان تتطلق من هاد الرجل واحد ما يتفهمها الكل يوقف ضدها اليس من حقها الانجاب وتكوين عائلة ,علاش المجتمع تاعنا قاسي لهذي الدرجة

يعني هو نورمال وهي ماشي نورمال فهمتو
انا من وجهة نظري المراة لاكان راجلها عقيم ماشي عيب لا تطلقت منو وعاودت بنات حياتها من دارة وجديد مافيها والو ولا لالا

وانتوما واش رايكم


 
أهلا بيك ختي
عييت نقرا اسمك هههههه

يعطيك الصحة على الموضوع الباهي
هذ الظاهرة كاينة بزااااااف، كي يتأخر افنجاب يبداو يلومو في الزوجة ولو السبب في الراجل، كأن العقم عند النساء برك ...
أنا واش نحب، ان الزوج والزوجة يكونو متفاهمين بيناتهم وراضيين بقضاء الله
لاهوا يزوج ولا هيا تطلب الطلاق
ولكن وينهم الأزواج كيما هذو ...
وحتى لو كان طلبت المرأة الطلاق عادي جدا لأن الذرية من حقها ...
يعطيك الصحة على موضوعك الرائع

+ تقييم
 
حكايات تأخر الحمل راهي شايعة في لعوام الأخيرة بزاف

والمرا تصبر خاطر تقلك مانابش عليا ربي راني صابرة معاه وخلاص بصح هو يقول لازم نجيب ولاد ولازم يحملو اسموا
بصح انا تبالي الراجل كي يعرف روحو مايضنيش لازم يقول للمرا الا تقبل تكمل معاه ولا من حقها تجيب ولاد يونسوها والعكس
شكرا اختي لطرح الموضوع وربي يرزق كل محروم

 
مرحبا
ببساطة الراجل نورمال يحمل اسم مطلق فالمجتمع تاعنا
عكس المرا لي مالازمش تتسمى مطلقة .....
يعني الطلاق هادا يجوزو المجتمع للراجل و يحرموا على المرا .....
على هادي تلقاي المرا صابرة مع راجلها خاطر ماتحبش تتطلق ..و ترضى و تقول هادا مكتوب
و بالاك تلقاي لي تكون صابرة مع راجلها سيرتو ادا كانت امكانية الانجاب متوفرة ....بنسبة كبيرة
اما الراجل لالا قادر يتكبر على المكتوب مادام ربي حللو 4 نسا .....
فرصة الانجاب عندو راهي متاحة و متوفرة ...
------------------
وحتى ما نجمعوش كاين لي يوقف مع مرتو و العكس
و كاين لي يسمح فيها و العكس للنسا تان .....
مي الاغلبية تاع الرجال يعاودو الزواج
---------------
وكي نخمو فالامر بموضوعية نلقاو بلي الراجل من حقو يجوه ولاد ادا كانت مرتو عاقر
و المرا تان تغيض خاطر ماشي في يدها تكون عاقر .و العكس ....

فالنهاية دايما كاين استثناءات و نلقاو زيجات ناجحة
جيرانا عندهم كتر من 30 سنة زواج و ربي مارزقهمش باولاد مي عايشين ...لاباس عليهم ( مانعرفش واش مخبي مي الظاهر يقول بلي مهنيين )

شكرا على الموضوع الرائع
و على الالتفاتة لهده الظاهرة



 
اعتقد الراجل مكتوبو في يدو ادا طلق حتما سيتزوج مي المرا ادا طلقت شكون يضمنلها انها تعاود الزواج ولا لا لذا المراة تكون اكبر صبرا وتحملا لهذه الحالة ،وهذا مايعنيش انها مهانة وتاني الراجل لازم يرد الجميل للمراة هادي ووقوفها معاه ... ...مجرد راي​
بارك الله فيك اختي .
 
اهلا اختي
ههههههـ راك مكثرة من *علاش*
المهم ..
عندك الحق اختي المرأة تصبر كثيرا مع زوجها مهما كان الي بيه
ولكن الراجل على اي عيب في المرأة يطلقها ولا يجيب عليها ذرة خاصة في حكاية الذراري هدي
انا نقول من حقها المرأة تطلب هي طلاقها وتعيش حياتها اذا كان هو المريض

 
H@teM، تم حظره "حظر دائم". السبب: مخالفة القوانين
السلام عليكم
هادي كاينة صح ها الضاهرة
ملقيتش فاه نبرر علاه هك هههههه
mais راهي من بكري مش من ضرك
وكيما سمعت في ناس زمان يقولك لمرا عندها
زوج حوايج تجيب الدراري وتتهلى في الدار
مش كيما ضرك طورت الحالة وعادت نلقوها
في كل بلاصة ههههههه
هادا ريي ومنيش عارف
يعطيك الصحة الاخت على الموضوع الهايل
.....عجبني توقيعك .....
 
السلام عليكم ورحمة الله وبركاته
والله اختي عندك الحق
ما عرفتش واش نقولك
ربي يهدينا ان شاء الله
 
اختى هدى حاجة عادية من حق اى ام تفرح بدرارى ديال ولدها
+
هدى حاجى تخص الزوجين الا راخم متفاهمين بينهم
انا عندى واحد جارى هنا قعد 13 سنة مجابش اولاد مى عادى صبرلا هو ولا زوجتو وفرج عليهم ربيى يبحانو ب 3 توام
 
سلام اختي ماكاش امرة ماتحبش يكون عندها دراري
مي الله غالب هاديك هي عقلية ناس بكري يحكمو على المرءة بالاعدام ادا كانت عقيمة
يرجعوا يجروا ويحوسولوا على ليتجيب دراري كي يعرفو المشكل ماشي فيها حاجة باينة يبداو يساسوها
على خاطر راجل عقيم شكون راح تديه سيرتو كــ طلق

 
انا ختي مسكينة 5 سنين زواج تحمل بصح ما يكملش 3 شهور في كرشها و يموت و ما داواو عليها ما والو تالية شيخها قالها انا راني باغي نشوف ولاد ولدي امالي جابوهالنا ضيفة من تما ما ولاتش طلقها ولد الحرام ما علابالهش بلي هادو الصوالح تع ربي ماعليش حسبنا الله هو نعم الوكيل و هي ربي يرزقها ان شاءالله
 
انا ختي مسكينة 5 سنين زواج تحمل بصح ما يكملش 3 شهور في كرشها و يموت و ما داواو عليها ما والو تالية شيخها قالها انا راني باغي نشوف ولاد ولدي امالي جابوهالنا ضيفة من تما ما ولاتش طلقها ولد الحرام ما علابالهش بلي هادو الصوالح تع ربي ماعليش حسبنا الله هو نعم الوكيل و هي ربي يرزقها ان شاءالله
ربي يرزقها ان شاء الله شفتى هادا واش راني نهدر انا لوكان هو لي ما يجيبش ولاد لوكان هي تحملت وصبرت بصح حكم القوي على الضعيف واش تحبي ربي يصبرها ويعوصها ما خير ,
 
أهلا بيك ختي
عييت نقرا اسمك هههههه

يعطيك الصحة على الموضوع الباهي
هذ الظاهرة كاينة بزااااااف، كي يتأخر افنجاب يبداو يلومو في الزوجة ولو السبب في الراجل، كأن العقم عند النساء برك ...
أنا واش نحب، ان الزوج والزوجة يكونو متفاهمين بيناتهم وراضيين بقضاء الله
لاهوا يزوج ولا هيا تطلب الطلاق
ولكن وينهم الأزواج كيما هذو ...
وحتى لو كان طلبت المرأة الطلاق عادي جدا لأن الذرية من حقها ...
يعطيك الصحة على موضوعك الرائع

+ تقييم
بصح اهنا المشكل يبقى حتا لوكان هوما متفاهمين كي تدخل الحماة في الويط والله حاجة ما تسلكها
شكرا على الرد
 
المراة هى دائما ضحية الرجل
 
مشكورة على الطرح اختي
لي عوده باذن الله حجز
 
تعقيب بسيط بس
المراة توجور محقورة
 
هادي هي مشكلة العرب مازالو يدور في دائرة التخلف، ويحصلو كل شي في المرأة، رانا في القرن 23 ويلا ماقدرو يجيبو دراري يتبناو ولد وهادا مكان، بصح حتى في هادي شايفينها عيب، وعلاش لا، والله غير كاين ولاد صغار بحاجة للرعاية، ويقولو علاش الغرب متقدمين علينا معلوم حاربو التخلف وحنى مازلنا فيه.
 
اخت والله وكان جيت متزوج نقدر نعرف علاش الله غالب ماعنديش خبره فالامورات هادو
 
هادي هي مشكلة العرب مازالو يدور في دائرة التخلف، ويحصلو كل شي في المرأة، رانا في القرن 23 ويلا ماقدرو يجيبو دراري يتبناو ولد وهادا مكان، بصح حتى في هادي شايفينها عيب، وعلاش لا، والله غير كاين ولاد صغار بحاجة للرعاية، ويقولو علاش الغرب متقدمين علينا معلوم حاربو التخلف وحنى مازلنا فيه.

تعقيب بسيط بس
المراة توجور محقورة
شكرا لكم عى المشاركة انا مع الفكرة انو المراة دائما محقورة خاصة في مجتمعنا الشرقي
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top