السلآم عليكم ورحمة الله وبركاآته
مرحبا بيا معاكم ومرحبا بيكم معايا
واش راكم مع السخانة؟ ربي يخفف عليكم حر الدنيا والآخرة يا رب
عندي وحد السوجي حابة نحكيهولكم صرالي عندها بزاف شوية تفكرتو مالغري ماعمرتش راسي بيه نسيتو مي قلت نحكيلكم وتحكيولي كاشما صرالكم من هادو الشرات ولا غير انا
خطرة رحت ضيفة لوحد فامي تاعي قصرنا وجوزنا وقت شباب الحمد لله
راجعين للدار آpيي ووحدة معانا تكولي قدي في لعمر (18 سنة ومتزوجة من عام وراهي حامل) ماشيين وداخلين وخارجين في الهدرة على الزواج وواش راهي دايرة ومنا وملهيك سقساتني قاتلي مروة نتي وقتاش حابة تعرسي نشوفوك واش ديريلنا ؟
قتلها انا هاد الساعة لاتية بقرايتي مارانيش نخمم في الزواج وايدا كتب ربي نقرى وننجح ونفرح ومبعد ساهل....اتصورو يا خاوتي واش قاتلي بوج صحيح وكون غير مدتهالي بقصرة بالاك قاتلي ممم ايييه بصح نتي اصلا شكون يديك ؟؟ ياو تبكشت ماصبت واش نقولها + خاطيني البخايص والمعاير قتلها وعلاش مارانيش طفلة كيما لبنات ؟؟ بالاك تشوفي فيا كاش عيب مايقبلونيش بيه !! سكتت مبعد قاتلي خلاص اقراي برك :s
والله يا خاوتي غاضتني عمري اللحظة هاديك وماحبيتش نزيد و نوصل معاها للخصارة
مافهمتش المراة هادي آسكو تغير كي تشوف وحدة في اللاج تاعها مازالها تقرى وهي تزوجت وماعندها حتى نيفو + محبسة لقرايا من بكري آلوغ عندها الحق تتزوج لواش تقعد ؟
وبزاف عفايس دارتهملي ماعجبونيش ولي تكمل عليا تهدر بوج صحيح وماتحشمش خطرة مريحين فوحد لوكازيون قاتلي شوفي ليا....ممم نتي فمك كبييير :s يا درا كي تشنفي كيفاش تولي ههههههه ياا ربي واش البلية هادي عيبتلي فمي تاني لحقت ليه دوك.....
ساعات نقول بالاك مسكينة مخلخلة في جيهة من راسها ولا ناقصة.....شكيت لي تتوحم عليا هههه مالا ماتعيا جيب الفاتشا تاعي هااه :d
المهم حبيت نحكيلكم ونسمع آرائكم في الموقف هادا ومادابيكم احكيولنا كاش لحظات فتو عليهم كيما هادو
ماتحشمونيش نستنى الردود
عبرو كيما تحبو راكم في منتدى الام الجزائرية
:regards01:
salam zina ana tani walahi dirouhali 3amati ana ngoulak ya kheti hadi gira mabiha walou tgir manak mat3amrich rasak bik zina okl
