- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلاااام عليكم ناس اللمة وصح رمضانكم
المهم اليوم ماجيتش نحكيلكم على البريوش احتراما لمشاعركم هههه ولي يحب يعرف واش حكاية البريوش هادي يدخل لهاد الموضوع
http://4algeria.com/forum/threads/448150/
بصح اي اختلال من بعد في المشاعر ماتلومونيش واليوم راهو جاني واحد الهبال هكا
قلت نشارككم بيه المهم ان شاء الله تضحكو واذا ماضحكتوش لازم تضحكو ههههه ماكانش كيفاه :p
المهم يا سيدي البارح ديكونكتيت من اللمة ومع لعشية هكاك العبد جيعان وعطشان ومخو بدا يتخلخل رحت للتلفاز قلت كاشما نخربش شوي بدل بدل .. بدل .. صماااطة
ماكاين والو يصلح هيا قلت نقلبها قناة الاطفال خير من والو، هكا شوي نلقى النملة والصرصور الله يبارك تفكرت الحكايات تاع الصغر وزعما صح النملة كانت شاطرة وهو فنيان ويغني بالقيتارة ومعرف واش؟
شوي هكا غمضت عينيا
و من بعد نفتحهم نلقى روحي قاعدة في الهواء الطلق .. "ياا لطيييف واش هادا وين راني؟؟
ياك كنت قاعدة في الصالون واش جابني هنا؟ راني نحلم زعما؟" نلقى عبد قرصني من خدي .. "آآي بلعقل" ندور نلقى واحد المخلوقة عجيبة هكا قدامي "آآآآآآآععع"
بديت نعيط وهي تعيط انا نعيط وهي تعيط من بعد شفت معاها مليح قلتلها "انا خايفة منك ونعيط ونتي علاه تعيطي؟" قاتلي "نتاستي في لافوا تاعي راني ناوية نشارك في ستار اكاديمي ونولي مشهورة"
شفت معاها مليح قلتلها "شكون نتي؟" قاتلي "انا اليس في بلاد العجائب .. تتمسخري بيا؟ هاراني النملة ماراكيش تشوفي مليح" شفت فيها مليح "والله نملة صح بصح شكون نتي؟" قاتلي "اه تحوسي على السيvي؟؟ يسميوني نُمَيلة متزوجة وعندي زوج ولاد والكونت تاعي فايس بوك نملة مدايرة ليماش تحبي نبعتلك انفيطاسيون؟" قلتلها "لالا ختي انا نقبل غير الطلبات تاع بنات اللمة" قاتلي "واش اللمة هادي؟؟كرهنا من الملمات" قلتلها "ليليا .. مالك .. وقرصان الساحل" قاتلي "قرصان؟؟:s" قلتلها "غير ماتقربيش ليه راهو هاد الايام جايبها ورا الحيوانات وقادر يدورها حشرات" قاتلي "نتي مافهمت والو في هدرتك تقول شينوية وصراحة ماش مالفة ندخل البراني للدار بصح كي راكي وحدك والآذان قرب يأذن ونتي صايمة رايحة ندخلك" قلتلها "علاه تصومو؟؟" قاتلي "ومالا تشوفي فيا نعبد في الاصنام؟؟ هيا ادخلي بركاي بلا هدرة يا بن عمي تقول بالعة كاسيت"
المهم دخلت لدارها واش من كليماتيزور وواش من بلازما وواش من فوتايات وواش من كوزينة الله الله قلتلها "والله راكم عايشين آآه" قاتلي "5 في عينيك و10 في ودنيك زعما مدايرة الروضة وخمسة وستة عند الباب وماطلقتوناش" هيا دورت نلقى راجلها قاعد يقرا في الجرنان
قلت هادي نملة ومتزوجة وعندها دار وانا مازالني ندور في اللمة هه
هيا شوي هكا قالها راجلها "شوفي واش راهم يحكيو في الجرنان قالك المسابقة تاع اشطر نملة سربو المواضيع تاعها في النت قبل الوقت واقيلا حابين يطيحوها ببن عنكبوت آآه راحت البلاد وعلى هادي نلقى النمال الفنيان حاكم البيروات والنشيط مسكين يخدم ومايلحقش" قلتلهم نتوما تاني عندكم تسريبات؟؟ يسمى معليناش راهي مخربة حتى تحت الارض ههههه، هيا من بعد تجمعنا على الطابلة وجاو ولادها كل واحد فيهم هاز تيليفون في يدو الطفل يفطر ويكونيكتي والطفلة تصور في الطابلة قاتلهم يماهم "يا وجوه الميزيرية نحيو التيليفون من يديكم ولا نكوبيلكم الانترنت وتقعدو هكاك" قاتلها بنتها "يما خليني نصور باه يقولو شاطرة ويختشبوني ولا حبيتيني نبقى بايرة؟"
وولدها قالها "يايما راني نشوف في واحد الكاميرا كاشي قالك واحد خلعوه قالولو يماك خرجت تقضي عفسوها هههه"
شوي هكا طبطب الباب راح راجلها يفتح يلقى الصرصور واش من جال في شعرو سروالو مقطع ياك زعما الصرصور هاز كمان ويعزف وراقي
ومعرف واش بصح هادا راهو انوش، قالهم الصرصور "تقدرو تخليوني ندخل نفطر معاكم؟" قالو زوج النملة " اكيد تفضل الدار دارك" قاتلو مرتو "غير هاد المتشرد مايدخلش لداري عام كامل وهو شاد الحيط لا خدمة لا والو يعس في بنات الناس نهار كامل وهو يفايسبوكي وفي اللخر يجي يفطر عند الناس" قالها الصرصور "آمادام نميلة حتى نتي نهار كاملة ونتي مكونيكتيا ونهار كامل ونتي تفايسبوكي وعندك 8000 نملة ابوني و600 خنفوس آمي وتصاورك دايرين حالة تحبي نفضحك؟" المهم راجلها خزر فيها والنملة تبهدلت قاتلو "جوز وليدي جوز خيار الناس ماشاء الله" هيا دخل هكا شاف فيا قالهم "شكون الشابة هادي؟ مارانيش مالف نشوفها في الحومة" اووو انا حشمت
وزعما هبطت راسي حشمني موسيو صرصور قالي "نتي مخطوبة؟" قتلو "حبس كيما راك
ماش عند آخر عمري تخلاص عليا نتزوج بصرصور انا بنت قسنطينة حاجب وعوينة كيما قالتها ليليا انا ديامو" قاتلي بنت النملة "نتي لؤلؤة قسنطينة؟؟ شحال نموت علييك وعلى جالك دخلت للمة" قلتلها "الله يبارك تعرفي اللمة؟؟" قاتلي هيه ومسمية روحي "نملة قسنطينة" هههه قلت الله يبارك من لؤلؤة لنملة قاتلي "معليش تسينييلي؟ يعني تمضيلي" قلتلها معليش هاتي نمضي كي عدت مشهورة انا بديت نمضي نلقى عبد يحرك فيا "اصبرو ماتتقابدوش نمضيلكم كامل"
نفتح عينيا نلقى ختي قدامي قاتلي نوضي او قرب يأذن قلتلها "علاه تنوضي فيا يعني كنت مع الشهرة والنمل" قاتلي على هادي حياتك منملة ههههه نوضي راهو درك يأذن
المهم خاوتي عجبتني حياة النمل لكن للاسف كان مجرد حلم
هادي كانت حياااااتي المجنونة اكيد القصة خيالية لا تقولو الطفلة مهبولة حتى في احلامها هههههه
ان شاء الله تكون عجبتكم هاد التخربيشة نلتقي في عدد مقبل ان شاء الله (راني معولة ندير 18 مشاركة اضافية بعدد ايام رمضان المتبقية ههه)
صح فطوركم خاوتي واتهلاو في روحكم
وان شاء الله نكون رسمت البسمة على وجوهكم
سلام
المهم اليوم ماجيتش نحكيلكم على البريوش احتراما لمشاعركم هههه ولي يحب يعرف واش حكاية البريوش هادي يدخل لهاد الموضوع
http://4algeria.com/forum/threads/448150/
بصح اي اختلال من بعد في المشاعر ماتلومونيش واليوم راهو جاني واحد الهبال هكا
المهم يا سيدي البارح ديكونكتيت من اللمة ومع لعشية هكاك العبد جيعان وعطشان ومخو بدا يتخلخل رحت للتلفاز قلت كاشما نخربش شوي بدل بدل .. بدل .. صماااطة
شوي هكا غمضت عينيا
هيا شوي هكا قالها راجلها "شوفي واش راهم يحكيو في الجرنان قالك المسابقة تاع اشطر نملة سربو المواضيع تاعها في النت قبل الوقت واقيلا حابين يطيحوها ببن عنكبوت آآه راحت البلاد وعلى هادي نلقى النمال الفنيان حاكم البيروات والنشيط مسكين يخدم ومايلحقش" قلتلهم نتوما تاني عندكم تسريبات؟؟ يسمى معليناش راهي مخربة حتى تحت الارض ههههه، هيا من بعد تجمعنا على الطابلة وجاو ولادها كل واحد فيهم هاز تيليفون في يدو الطفل يفطر ويكونيكتي والطفلة تصور في الطابلة قاتلهم يماهم "يا وجوه الميزيرية نحيو التيليفون من يديكم ولا نكوبيلكم الانترنت وتقعدو هكاك" قاتلها بنتها "يما خليني نصور باه يقولو شاطرة ويختشبوني ولا حبيتيني نبقى بايرة؟"
المهم خاوتي عجبتني حياة النمل لكن للاسف كان مجرد حلم
هادي كانت حياااااتي المجنونة اكيد القصة خيالية لا تقولو الطفلة مهبولة حتى في احلامها هههههه
ان شاء الله تكون عجبتكم هاد التخربيشة نلتقي في عدد مقبل ان شاء الله (راني معولة ندير 18 مشاركة اضافية بعدد ايام رمضان المتبقية ههه)
صح فطوركم خاوتي واتهلاو في روحكم
وان شاء الله نكون رسمت البسمة على وجوهكم
سلام
