دروس دورة اللمة الجزائرية لتعليم فنون الطبخ 1

[فايزة1207]

بطاطا محشية بالفطر والزيتون والذرة


صلصة طماطم
حبات بطاطا متوسطة الحجم
كمية من الزيتون الاسود
صدر دجاج او فخض يكون مطبوخ ومقطع قطع صغار
كمية من الذرة
كمية من الفطر
معدنوس
3 بيضات
فرماج شيدر او حسب الاختيار

طريقة التحضير
بعد تنضيف حبات البطاطا نحفروها في الوسط ونملحوها ونديروها تفور
نكونو نحضرو في الحشو
المتكون من دجاج يكون مطبوخ ومفت وزيتون اسود مقطع وذرة وفطر محمص في القليل من الزيت والملح نقطعو فيه القليل من المعدنوس

بعد ما تفور البطاطا
نحشوها بالخليط بحيث ديما نخليو فراغ في الوسط ونرصو الحشو جيدا

نديرو في البلاطو صلصة طماطم
ونسدفو فيها حبات البطاطا المحشوة
اذا كان حبات البطاطا كبار نكسرو وسط كل حبة بطاطا بيضة
واذا كان الحبات صغار
نكسرو البيضة نحطو الصفار في اناء والبياض في اناء
وبعد ذلك نحطو البياض في البطاطا وفوقه نصف صفار

ونغطوهم بالالمنيوم

وندخلوهم للفرن يطيبو

بعد ما يكون طاب نخرجوهم ونحطو فوقهم جبن شيدر

ندخلوهم لمدة صغيرة يذوب الجبن ونقدموهم مع صلصة الطماطم اللي في البلاطو

وهذا شكلها النهائي

بالصحة والهناء

 

[فايزة1207]

كوكيز بالشوكولا

بيضة
90 غ سكر
100غ شوكولا نوار
2 م ك كاكاو
100 غ زبدة
فرينة
رشة ملح
م ص خميرة حلوى

مكسرات حسب الرغبة

نذوب الزبدة والشيكولا على حمام مائي

--

في جفنة نحط البيضة وكمية السكر

ونخفقها مليح

ومن بعد نضيفلها خليط الزبدة والشيكولا الذايبة

ونضيف المواد الجافة المغربلة فرينة + رشة ملح + م ص خميرة حلوى + 2 م ك كاكاو

حتان نتحصل على عجينة متماسكة

نشكلها كويرات بحجم حبة الجوز

وعلى كل كرية نحط قطعتين مكسرات

ونقرصها شوية حتان نتحصل على الشكل المطلوب

ندخلها للفرن لمدة 10 دقائق طبعا حسب الفرن

وبعد مانخرجها وهي سخونة نحطها على شبك او غربال باش ماتفسدهاش الرطوبة وتبقى تتقرمش

--

ملاحظة تقدرو تستغناو على الكاكاو لان مقادير الوصفة هذي تعطينا كوكيز مش حلو فيه مرارة الكاكاو مع نكهة الشيكولا
يعني تقدرو تتحكمو فيها حسب الذوق والرغبة

 

[فايزة1207]

على بركة الله الدرس السادس عشر والاخير

شخشوخة مسيلية

3 حبات بصلة
لحم او دجاج حسب الموجود
4 -5 حبات طماطم
ثوم
ملعقتين طماطم مصبرة(انا كي استعملت الطماطم المصنوعة في البيت تخليت على الطماطم المصبرة)
بهارات ملح فلفل احمر حار كسبر مطحون
زيت
كسبر اخضر
فلفل اخضر حار
بصل اخضر

في طنجرة نرابيو 2 حبات من البصل نضيفولو الطماطم واللحم

(انا استعملت الطماطم المصنوعة في البيت )
وبعد ذلك نضيفو الملح الفلفل الاحمر الكسبر والثوم والقليل من الزيت

نحطوهم على ا لنار ونخليوهم يتحمص اللحم شويا

بعد ما يتحمص شويا اللحم نمرقو ونخلوها تغلي
بعد ما تغلي نحكموالبصلةا للي كنا خليناها نقطعوها كاريات صغار

ونلوحوها في المرقة

نغلقو عليها
بعد ما يطيب
نكونو حضرنا الفتات يكون على هذا الشكل

وطبعا هو عبارة عن سميد وملح ونعجنوها بالماء
نشكلو قريصات نحلوها بالزيت ونطيبوها في الطاجين
ونفتتوها هكذا

بعد تحضير كل شي
نحطو المرقة في التاجرة نتاع الطين

ونحطو فيها الفتات بالشوي ونخلطو حتان تتشرب ويغلي الفتات

في الاخير نقطعو البصل الاخصر رقيق والكسبر الاخضر رقيق والفلفل الاخضر الحار رقيق

ونحطوهم فوق الشخشوخة كي تحضر
وهذا شكلها النهائي

ملاحظة:
نقدرو نحلو القريصات بالماء بشرط العجين يكون شويا يابس ونحلوها بالماء
هنا تجي بنتها احسن
وايضا ننقدرو نقدموها مع الزبدة حرة اذا جات الشخشوخة حارة كذلك تمدلها بنة تانية

 

[فايزة1207]

المسمن على الطريقة المغربية

300 غ سميد
150 غ فرينة
م ك خميرة
م ك سكر
رشة ملح
ماء دافي للعجن

للتوريق
سميد
زبدة ذايبة او مارغارين + زيت

نخلط المواد الجافة مع بعض

ونعجنها بالماء الدافي تدريجيا حتى نتحصل على عجينة لينة وطرية

نشكلها كريات ونخليها تختمر شوية

من بعد نحل كل كرية في شوية زيت وندهنها بالزبدة الذايبة ونرش عليها سميد

ونطويها على شكل المسمن العادي

نخليها ترتاح ونكمل البقية نغطيها بمنديل ونخليها حتان تختمر شوية

من بعد نبدا باول مسمنة طويتها تكون اختمرت نحلها مليح بالوراق

نسخن مقلاة تكون ثقيلة ونحط فيها فطرات من الزبدة الذايبة
نحط المسمن وكل ما نقلبو من جهة ندهنو بالزبدة الذائبة بواسطة فرشاة
نبقاو نقلبو فيها وندهنو في كل جهة حتان تطيب وتحمار

وهذا شكلو بعد ما طاب

ونقدموه مع العسل الحر:up:

 

[فايزة1207]

حلوى الوردات بعجينة فيلو

للعجينة:
3 كيلات فرينة
كيلة مايزينة
1/2 كيلة سمن
2 مغارف ماء الزهر
مغرفة كبيرة لحظة
ملون وردي برتقالي اصفر واخضر
للحشو:
نحتاجو
3 كيلات لوز
كيلة سكر سمسم
قرصة فاني
نرحيوهم كامل مع بعضهم رقيق
مبشور حبة ليمون

[

في اناء نخلطو كامل المكونات نتاع العجينة بعد ذلك نقسموها الى 4 اجزاء قبل ما نعجنوها
نجيبو فناجين كل فنجان نديرو فيه لون ونحلوه بقطرة ماء الزهر
وكل لون نحطوه في كمية الفرينة اللي كنا قسمناها ونخلطو ونكملو نعجنوه بالماء نتحصلو على عجينة طرية
نغطوها باكياس بلاستيكية

بعد ما تكون ارتاحت العجينة نحلوها بالحلال رقيقة شويا ونشكلو دوائر بالكاس نتاع الاينوكس او طابع يكون قيس الكاس نتاع الاينوكس

نحطو ثلاث دوائر بكنب بعضهم البعض والجوانب محطوطة على بعضها
نحطو شويا من الحشو ونبسطوه بلا ما نكثرو

نطبقو الجانب السفلي للدائرة

ما نطبقوهش على بعضو نخليو شويا مساحة من فوق
وندورو على بعضها بالشوية

حتان تتشكللنا وردة

بعد دلك نفتحوها شويا من فوق(الورقات)
ونحطوها تطيب بشرط
نشعلو المرة الاولى الفرن من الاعلى والاسفل
بعد ذلك نغلقو من الاعلى ونتركو الاسفل والبلاطو نطلعوه للاعلى)هكذا يطيبلنا من الاسفل)
وبعده نفتحو من الاعلى ونغلقو من الاسفل والبلاطو نهبطوه للاسفل(هكذا يطيبلنا منا لاعلى)
كي يطيب نخرجوه نعسلوه ونرشوها بالبريون او الملمع الغذائي
وهذا شكله النهائي

بالهناء
في الاخير نتمناو انهم راقولكم كل دروس الدورة وراقتلكم الدورة وكنا خفيفات ظل عليكم
نتمناو الاستفادة لكل الاخوات ولكل من هو في اللمة وحتى ضيوفنا القرعاجين

مع تحيات دوما وابدا العفوفتان

 

[فايزة1207]

ان شاء الله نكون وفقت في نقل الدروس واذا حسيتوا انه فيه خلل او نقص في صورة او نقل قولولي نعود نتاكد والسلام ختام

 

[عفاف الجزائرية]

عن جد وصراحة شكر جزيييل ليك اختي فايزة على نقل كل الدروس
خدمتك تستاهل التقدير الكبير
ربي يبارك فيك ان شالله ويهنيك وين ما كنتي
​

 

[ندى الورود]

كفيتي ووفيتي اختي فايزة
مجهود رائع وتستحقين عليه الشكر والتقدير
يعطيك الصحة والعافية وبارك الله فيك
وجعله الله في ميزان حسناتك

​

 

[oumniati]

شكرا جزيلا ختي فايزة على تجميع الدروس، اطباق رائعة ماكانش لازم تضيع
والشكر موصول لكل من شارك في الموضوع من الوصفات الى النقل والتنسيق

 

[nada242008]

ان شاء الله نكون وفقت في نقل الدروس واذا حسيتوا انه فيه خلل او نقص في صورة او نقل قولولي نعود نتاكد والسلام ختام

بارك الله فيك وجزاك خيرا عن كل حرف نقلتيه

 

[فايزة1207]

لم اقم الا بالواجب لقد استفدت كثيرا من المنتدى فهذا جزء بسيط فقط عرفانا لما تبذلنه ومن كرم منقطع النظير وصدق الوصفات

 

[mari27]

روووووووووووووووووووووعة هاااااااااااااااااااااااااايل يعطيك الف صحة و هناء

 

[Asma 8]

ماشاء الله عباقرة وسيدات المطبخ

ربي يكرمكم ويجازيكم


شكرا جزيلا بارك الله فيك اختي