كسكسي مرقة بيضاء من مطبخى

[imane27]

السلام عليكم
ليوم طيبت طعام مرقة بيضاء
وشفت بزاف لى يسمعو بيه بصح ميعرفوش الطريقة
وللمعلومة حنا فى لعراس لازم طعام يكون مرقة بيضاء فالعاصمة
قلت نحطو موضوع لى حاب يعرف تقاليدنا

فى قدرة حطيت فيها طراف لحم بصلة تكون كبيرة ملح قرفة بودر وعود فلفل لكحل زيت وشوية سمن قليتهم مليح حوالى 5 دقائق

ومرق وحطيت حميصة وخليت الكل يطيب

وفى نفس الوقت شمخت طعام وخليتو ينشف

وفورتو على قدرة المرقة
ونحيتو وشربتو بالماء وعاودت حطيتو يفور لمرة الثانية

وكى طاب لحم نحيتو بجيه وتكون لحميصة طابت تانى درت لفت فالمرقة طيب

وبعد تفويرة لخرة فرغت طعام فى جفنة ودهنتو بسمن

وقبل مانطفى بحوالى 10 دقائق درت لقرعة طيب على خاطر متشدش الوقت

وهنا راه وجد حطيت طعام وستفت لقرعة ولفت ولحم ودرت فوقهم لحميصة والمرقة
ورشيت عليه شوية قرفة لتزين

ملاحضة هاد طعام مجيش فيه انواع خضرة اخرى يا درى لفت وحدو ولا قرعة وحدها ولا فى زوج
وتقدرى دريه بالجاج ولكن تاع لعراس لازم يكون بلحم
انشاء الله تعجبكم طريقتنا​

 

[عفاف الجزائرية]

جاك هااايل ايمانو بصحتكم ريحتو واصلة
يعطيك الصحة اختي لعزيزة
​

 

[السلطانة]

وعليكم السلام
يييم يشهي
احسن طعام عندي تاع المرقة البيضا
تسلم الأيادي
​

 

[Pyar]

امممممممممممم
روعة يعطيك الصحة

​

 

[ملكًة الاحسآس]

وعليكم السلآآآم
اممم يشهي
مآم حنآ البربوشة تآعنآ نديرولهآ المرقه بيضآآ
بصح مآنديروش اللفت كمآ انتمآ :p
يعطيك الصحة​

 

[شاهيندا]

يعطيك الصحة يا ايمان، و الله شهيتينا.

 

[nada242008]

يا عيني على البربوشة العاصمية من يدين قبايلية امممممممممممممم روووعة تسلم الايادي
​

 

[ŚσÚмĨÁ.Ďz]

آمممممممممممممممم ،، سخفتيني سخفتيني :d
يعطيكـ الصححة خرجتلكـ روووعةةة
​

 

[أم أمين23]

بصحتكم واعطيك الصحة باين اشهي وجدي صحن راني جاية ههههه

 

[imane27]

بارك الله فيكم وشكرا على زيارة الموضوع نورتونى

 

[mimi53]

طعام وعليه لكلام جوعتيني ايمانو كي نشوف طيابك حتى نفشل
يعطيك الصحة

 

[زائــــــــرة حلوة]

امممممم جاك يشهّي إيمانوو...يسلمو الأيادي شيف:up:
​

 

[SAMIRA25]

حنا تاني يديرو هدا الكسكسي في الاعراس بصح بلا قرفة و يسموه المحور و يزيدولو كريات اللحم يجي اممم و الا نديروه تاني في العيد الكبير
يعطيك الصحة و بارك الله فيك

 

[بنت الجسور المعلقة]

يعطيك الصحة حبيبة كيما قالت سميرة حنا منديروش فيه القرفة بصح كلشي كيف كيف
كسكسي الحراير
​

 

[prncess fifi]

نفس الطريقة تاعنا امممممممممممم شهيتيني فيها
ا نا راجلي رايحة نهبلو بالمرقة بيضا قالي حتى البركوكس درتيه ابيض​

 

[ام ندى]

امممممممممم يعطيك الصحة بنين بزاف بصح حنا مايحبوهاش مرقا بيضا لازم حمممممممممممممممرا

 

[serinee]

alllah alllah 3ala dak el saksou
mmmmmmmmmm yhabal w ychahi ya3tik el saha 3zizti
​

 

[نور الرحمان]

يجي بنين بزاف يعطيك الصحة ياشاطرة

 

[samah06]

يعطيك الصحة اختي لويزة
وحنا في الشرق ايضا البربوشة تاع لملمة نديروها بيضاء ونحبها بزاف
وعندي نكتة معاها من بعد نقولهالك هههههههههههههه

 

[hadda0425]

يعطيك الصحة لويزة جا روعة
حتى حنا نديروه في العراس باقي الايام نديروه غوج ههههههههه
​