السلام عليكم و رحمة الله و بركاااااته
هذا أول موضوع لي في القسم و إن شاء الله ينال إعجابكم لأنه فعلا لذيذ
هو عبارة عن خبزة المرقاز خبزة بعجينة كلمة تحفة شوي عليها
نخليكم مع مقادير العجينة : 3 كيلات سميد أرطب + مغرفة كبيرة زبدة + الخميرة الفورية + الملح + 3 بيضات كبار و نبل بالماء الدافيء و نعجن و تكون العجينة متماسكة لا طرية و لا يابسة نقسمها و نكورها كرات أكبر من حبة البيض و نغطيها بساشي و فوطة نظيفة و نتركها تختمر
سامحوني ما صورتش المقادير لأنه ماجاش في بالي نديرها موضوع
في هذا الوقت نوجد الحشو : في مقلاة نحط 3 حبات بصل متوسطين و مقطعين رقيق + 2 قرون فلفل حار + حبة طماطم كبيرة + رطل مرقاز نعصر اللحم فقطو نرمي المصران نتاعه + مغرفة كبيرة زيت + نص مغرفة ثوم + نص مغرفة فاح + الفلفل الأكحل +الملح و نحطهم فوق النار يطيبوا
و كي نشوفها قربت تطيب نظيفلها مغرفة كبيرة معجون الطماطم + نص مغرفة هريسة و الحشيش مقطف
و نرجعها شوي برك فوق النار و خلاص نطفي عليها و نتركها تبرد جانبا
نحضر فلفل طرشي و نقطعه دواور و نحطه في صحنة لأننا راح نحتاجوه من بعد
الآن نحطوا الطاجين فوق النار و نبدأ نبسط الكويرة الأولى طبعا تكون المايدة مرشوشة بالزيت و نضربها رقيقة و نغطيها بشوي من الحشو و نرشها بشوي من الطرشي و ندهن حوافها بالبيض
و نغطيها بقرصة أخرى نكونوا بسطناها من قبل
و نرشوا الطاجين بالزيت و نرموا الخبزة نتاعنا
ماراحش تاخذ وقت كبير في الطياب
و من بعد تقسموها على 4 و شهية طيبة
و إن شاء الله تجربوها و تعجبكم على ضمانتي
