مساكم خير وعافية
هاني جيت هاني جيت
مرحبا بيا بينكم وان شالله نكون ضيفة خفيفة الظل بيناتكم
ممكن نتعرف عليكم اخواتي
المهم نحب نرحب بالاخوات الجديدات المشتاقة لامها وام رتاج ونشكر كل الاخوات اللي راهم قايمين بالساحة الفنية من العارضة التقنية لللانتاج للخراج والتمثيل
علابالكم شكون راها متراسة التمثيل ول البطلة ميمييييييييييييي
والله راكي كي العسل تدوري يا ميمي وشافة المطبخ شهرا والدخلة القوية نتاعها
راني نشكر في العازبات نشكرو في رواحنا خلونا من المتزوجات هاذوك ارواحو نديرو حلف وحدنا ارواحو
زعمى دخلت ضيفة وليت نحرد فيهم خخخخ
المهم اني وليتلكم بعشق جديد قصدي بقلب جديد ياو المهم وليت من جديد
جبت تصاور اللي لقيتهم في لاباراي ومازال التصاور اللي في التلفون نتاع خويا داهم معاه كي يوصل يبعثهملي ونوافيكم بالحدث ان شالله
هاذي البربوشة نهار درنا عرضة لعماتي ورجالاتهم صورت يعني ابوبري برك كنت في راس المطبخ وجدت وحطيت وقلتلهم يسربيو
وهاذو الجاجايات الي دوزنتهم واحدة ياكلها خويا في البابور والتانية لاختي بعثناهالها صورت كي دوزنت برك ما لحقتش نصور وهوما طايبين
وهذا غداء لبارح كان مرق حمص بالعصبان اشتهى فيها خويا وباه نبعثو لاختي لابار نتاعها وهي طايبة
تيراميسو كان من المونيو اللي طلبو خويا تاني ايا لقيت هاذو لي بلا جوطابل ساعدوني خدمت عراااام منو دى معاه ياكلو ويوكل المهم الليي فتح الفريجيدار يقول رح نسربيو للعرس صورت شوي برك منو
وهذا عشاء لبارح وينك عفوف قيميني ترا فيه
درتلهم روز بالكروفات على طريقة عفوفتي جاااااااء اكثر من تححححفة وبابا درتهلو بالخضر وجابت اختي تليتلي فرطاس لا حمص ولا خضر بصح بنين تاني وسلاطة ورحمة ربي من فوق
وهذا القاطو اللي درتو لاختي صورت هاذو برك نتاع الجنجلانية بالنيستلي و المقروط ودرتلها تاني البقلاوة والبراج هاذا علاه لحقت وصورت
وراجل اختي طلب المحاجب ايا مع الليل درتهملو باه يبقاولو ملاح
وزعمى نصورلكم الردسة الي كنا فيها الاولاد يتغالاو كي الزيت ولاد خواتاتي بايتين كامل عندنا وخويا يخمل في طاكسيه واش نقوللكم قلتلهم ما نعرس ما نمرض ما تتعبو رواحكم نهار نكون رايحة نجي نبقيكم على خير في دياركم ونجيبلكم كادوات ما تجوني ما تمرضوني
والحمد لله فات كل شي وجاء خويا لعزيز وروح بخير وعلى خير وما يبقى غير الخير والكلمة الزينة
علابالي هدرت بزاف اني نشارجي لايام جايين
هيا تبقاو بخير ونتلاقاو ان شالله
ليلتكم سعيدة
