مرقة بطاطا او جواز البطاطا او راقو البطاطا هذه هي التسميات المعروفة
بطاطا مرقة مشهورة بزاف في الشرق الجزائري
تندار اما مرق احمر أو مرق ابيض
نمدلك الطريفتين : مرقة بطاطا حمرا
طراف لحم أو دجاج أنا نفضلها باللحم تجي بنينة بزاف
حبة بصل سنات ثوم
ففلفل اسود
كمون
فلفل حمار يعني بابريكا تحبي الحار او الحلو
فلفل اخضر حار
حبة طماطم
مغرفة كبيرة معجون طماطم
طبعا بطاطا مقشرة ومقطعة أبراج
دبشة مقطعة رقيقة للتزيين
التحضير :
تحطي قطع اللحم مع البصل والثوم والزيت وتقليهم مليح من بعد زيدي الملح الفلفل الاسود والكمون
و الطمامطم المصبرة قليها مليح ومن بعد زيدي حبة الطماطم مسكرفجة وزيدي قلي ومن بعد مرقي
بالماء المغلى وخلي اللحم حتى يقرب يطيب ولوحي ابراج البطاطا مع قرن فلفل حار
وخليها حتان طيب وطفي عليها وعند التقديم رشي شوي دبشة
هذي البطاطا بنتها كي تجي حارة تولول
بطاطا مرقة بيضاء
طراف دجاج ممكن لحم
أو لحم مرحي طبعا تحطيلو شوي بصل وشوي معدنوس مع فلفل اسود وبيضة وملح وكوريهم
بصلة
ملح
فلفل اسود
زيت
معدنوس
بطاطا مقشرة ومقطعة ابراج شوي خشان
تحبي تحطي القرفة انا ما نحبهاش مع المرق الابيض
تقلي قطع الدجاج مع البصل والزيت نضيف الفلفل الاسود والملح ونقلي
من بعد نمرق بالماء المغلى ونخلي اللحم يطيب كي يقرب الدجاج يطيب تلوحي البطاطا مقطعة ابراج شوي خشان
وتخليهاه تطيب عند التقديم عصري عليها شوي قارص ورشي شوي معدنوس