ساعدوني ربي يخليكم

[مشكلتي]

السلام عليكم يا اهل اللمة
وشكرا جزيلا على هذا الفضاء الي من خ لاله نقدرو نحكو مشاكلنا
الوغ حبيت نحكي لكم قصتي
انا بنت من عائلة محافظة والحمد لله خاطيني كل شيء
مي وقت لي طلعت لسيام وبقيت تما عامين بديت نصاحب ونتعرف على البنات
وبديت نخالط ودخلت في الميليو
تعرفت على ااولاد وبديت نخرج معاهم
من واحد لواحد وخسرت بزاااااااف فسدت طبيعتي
من هاد العام فقت لروحي والحمد لله مي التالي هدا الي راني نخرج معاه ماحبش يخطيني ووين ما نفول له اخطيني يبقى يقول لي نبغيك نبغيك وانا مانحبش نجرحه ولا نخسر معاه
المهم حتى للنهار الي نضت الصباح صليت الفجر ودعيت ربي باش تتوفر اي سبة تكون البب باش يخطيني هداك الولد ونرتاح منه
ونرجع للطريق ونتوب
وقد ما رحت للسيام لصباح كي جينا خارجين عيطوا لي في الادارة وهوما كامل يعرفوا اهلي بالمستشارين والمدير والمساعدين كامل
قالوا لي رانا شفناك معاه شحال من مرة واما تقولي له اخطيني وتبعدي عليه وترجعي كيما كنتي في الاول اما نخبروا والديك
على بالي بلي درت غلطة كبيرة بزاف ماتتغفرش مي الله غالب (كل بني ادم خطاؤون وخير الخطائين التوابين)
في رايكم ربي استاب لدعوتي ولا وش را خاطي كامل
ربي يخليكم خاوتي عاونوني واعطوني رايكم والله غير راني ضايعة
وادعولي ربي يهديني ونتوب هاد امرة توبة نصوح

 

[روز]

السلام عليكم

هذا لي كان يلزم يصير
وهذا لي كل مرة نتكلموا فيه
سمعة البنت سهل كسرها
والرجل ماعندو مايخسر لما يخرج مع بنت
بينما العكس للبنت البنت تخسر الكثير والكثير

يا بنات
الله الله في سمعتكم ..سمعتكم
نتيجة لي ماتحافظش عليها شوفوها في هذ المشكلة

أختي صاحبة المشكلة
هاذي نتيجة طبيعية
كان لازم ديري حسابك وما تتجريش بسهولة لهذاك الجو شوفي نتائجه وين وصلاتك !

روحي اعتذري من الادارة نتاع المدرسة واوعديهم تبعدي على الطريق قبل ليخبروا ولديك وتولي في مشاكل اكبر
واستغفري وصلي وبعدي على هذاك الجو بالتي هي احسن
واجبدي روحك
ونصيحتي وعليك بالرفقة الصالحة شوفي كاش بنات متربيات امشي معاهم
لانهم هم لي رايحين يساعدوك باش أخلاقك ماتتعوجش
اهتمي جدا بنوعية الصديقات
ربي يوفقك

الكلمة الطيبة صدقة
ياريت كل واحد يحاول ينصح بعيا عن التجريح
​

 

[حُلم عابرْ]

والله مالقيت مانقول بزاف قصص تتكرر والنتيجة واحدة ولا واحد اتعّض

إياك وإياك ثم إياك تربطي دعائك تاع الفجر بما حدث ومتخليش الشيطان يدخل عليك

ربي يستر عليك وتتلم الحكاية بين جدارن مكتب المدير وارجعي استغفري وادعي ربي يسترك ( لازم يكون خوفك من الله اكبر من خوفك من اهلك راكي في امتحان ابتلاء لازم تفوتيه بجدارة )

هذا وش نقلك لانك الان في وضع صعيب واي نقد رايح يزلزلك لذا خذي نفس عميق قبل قراءة اي رد هنا

 

[السلطانة]

وعليكم السلام اقطعي العلاقات هادو اختي

افتحي صفحة جديدة في حياتك

صلي صلاتك واخطيك الهيه من الميليو هادا

علاخاطر كون تبقاي هك وتاع السيام يخبرو داركم ترجع حاجة خلاف

 

[¬Đỉaмơŋđ ✿]

وعَليكمْ السَلآم ورَحمَة الله وبرَكآته

هآذي هيَ نتيجة الصحْبة السيئةْ ..
الحمدُ للهِ اللي فقتِ لروُحكْ قبلْ فوآت الأوآنْ و مآدآم عندكْ النيّة في التوْبة فهذا مؤشرْ جيّد [ التآئبُ منَ الذنبِ كمنْ لآ ذنبَ لهْ ]
الأولىَ أن تهْتميِ بدرآستكِ ومسْتقبلكْ وكِي تكبرِي اللي يبْغيكْ يقْصدك منْ البآبْ فالحلآلْ ..

رَبي يهْديكِ أختي ويصلحْ بآلكْ وأحوآلكْ وأنصحكِ بالصحبةْ الصآلحة
​

 

[yousefislam]

السلام عليكم اختي الغاليه اتقي لله في نفسك انت مزالك صغيره على الاقل ضمني مستقبلك وخرجينا طبيبه ولا اي شئ المهم عقلك كلو في اقرايتك ربي يحفضك ونورك ان شاء لله مستقبلك قبل كل شئ

 

[anissa 13]

جميل جدا انك استعرفتي بلي غلطتي وحبيتي توبي
كل انسان قادر يغلط
انت مزالك صغيرة خممي فقرايتك وهاد الولد ماتزيديش تقيميه دوك يكره ويروح
ربي ينجحك اختي​

 

[رابح66]

السلام عليكم
قلت في رايكم ربي أستجاب ولا خاطي هطه ترجع إليك
إن كنت تبت توبة نصوحة وكان تضرعك لله في صلاة الفجر بإخلاص
والشيئ الثاني ترى هل وجدت إرتياح بعد الإنذار من الإدارة ةالمراقبين
والشيئ الثالث أتمنى أن تكون خرجاتك معه لم تذهب بعيييييييييدا ...
أسأل الله أن يغفر لك ويتوب عنك ويهديك إلى الطريق المستقيم.
تقبلوا تحياتي

 

[Hakan]

واش نقلك ختي هذي الدنيا توريلك حوايج بزاااف وامثالك ياما جرحو ناس وعذبو ناس مي الحمد لله كاين ربي وهو الغفور الرحيم ممكن انا ننصحك فقط بشيء واحد وهو ما تخدعيش ربي اذا كنت صح ناوية تيوبي وترجعي للطريق اقلعي عن ذنبك ثم ثم ورايح نقلك بلي اثناء التوبة رايحة تصادفي مشاكل كبيرة لانو هناك امتحان للتائب في توبته حتى ينصف هل هو من المخلصين ام من المراوغين وفي الاخير ماشي ندعو غير ربي يهديك مام حنا تاني ربي يهدينا واذا تبتي عن صح اختي ماذا بيك تدعيلي معاك لانو التائب من الذنب كمن لاذنب له ومعلوم ان النقي مستجاب الدعوة بوركت وان شاء الله يهدي الفتيات اللواتي لازن في هذا المنوال سائرات والسلام عليكم.
​

 

[RoseBonbon]

حبيبتي

اجرحيه دقيقةخير ملي يمزقلك مستقبلك

أصلا هذا ما يحبك والا كان احترمك قرارك

اهتمي بدراستك

ومور القراية روحي مباشرة للبيت وغيري رقم الهاتف كي لا يتصل بك أبدا

 

[red rose]

ربي يهنيك و يعكيك ما تتمنى

 

[عيشة مرة قدور]

سلام عليكم اختي نقلك متقلقيش روحك 1 باش تعرفي تركزي مليح في دروسك 2باش متزيديش تغلطي ونقلك بنسبت لطفل لي كان يحلقك ابعثيلو مع اي حد وقلو خلاص اخطني وخوفيه باهلك بانهم وعرين ولو سمعو راح يقتلوه او يسجنوه واما بمشكل مع ادارة شوفي كاش استاذة مقربة اليك وخبريها بالمشكل وحاولي انها تساعدك وتشوف مع ايدارة وتقلهم بلي انتي خاطيك ومش راح تكريريها نصيحة اختك كبرى ونطلب ربي يفوتهالك خير يارب

 

[red rose]

افتحي صفحة جديدة و بعدي عليه و استغفري الله و توبي توبة نصوحة و ربي يجيب لي فيه الخير

 

[stelllo]

عليك بالاستغفار والخير فيما اختاره الله

 

[Amira28]

ربي يهديك ويهدينا كامل
صح انك غلطتي مي المهم انك تبتي ونتمنى تبقاي على هادي الطريق لانوا هاذي هي طريق الصح ربي يوفقك