- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّــلآم عليكُم يـاناس اللمة الغاليين والطيّبين
وأسعد الله كلّ أوقاتكُم وإن شاء الله راكم كامل بخير
بصراحة كل مرّة ترجع بيا الذّاكرة لذكريات قديمة
سواءاً خلات حزن أو فرح أو عبرة في القلب
و حياتنا راهي كاملة حكايات وعبر و لأني ماعنديش لمن نحكي
جيت لناس اللمة المميّزين لي يسمعوني ويواسيوني
علابالي هبلتكم بذكرياتي القديمة لي كل يوم نوضع وحدة منها هنا
إن شاء الله ما نكونش عليكم تقيلة لأنو علابالي قلبكم كبير وغير نتوما لي تفهموني
المهم ما نطولش عليكم ونظن من العنوان راكم فهمتو ربما جزء من الحكاية
بصراحة أنا فتاة متعلقة بزاااف بالعائلة تاعها بالاك ما نبينش لكن شديدة التعلق
وخاصة الأمّ ، وكلّ يوم راني نكبر فيه كل مايزيد التعلّق تاعي بيها وكأنّي قاعدة نولي طفلة
صغيرة وماش قاعدة نكبر ، ولدرجة تعلقي بيها في كل شي نشاورها ,حتى ملابسي قبل ما نخرج لازم ندي مشاورتها ، اتخيلو لما نروح الجامعة أي خطوة نديرها نتصل بيها غير باه نسمع كلمة "ربي يوفقك" وإذا تأخرت دقائق تتصل بيا وهي مقلقة , صدقوني كل خطوة من حياتي بأمرها وبوجودها وحتّى هي متعلقة بيا بزااف لدرجة تعتبرني أختها وتحكيلي كل مشاكلها ربما تحسني أنا هي الشخص الوحيد لي قادر يفهمها ويحس بيها ، وأنا نفس الشي مجرد ما راني درك نحكي عليها نحس بقلبي يخبط بسرعة ، والله قريبة ليا بزااااف
المهم، لحكاية لي رايحة نحكيها صراتلي لما كنت نقرا في السنة الثالثة متوسط
بالاك كان عمري 14 سنة تقريبا ، بصراحة ماما كانت مريضة بمرض القلب اللي ماتخلقتش بيه
لكن كان نتيجة إهمال الأب تاعها ، المهم ربي يهدي الجميع وبسبب تطور حالتها اضطرت دير عملية جراحية في صغرها يعني شابة وفي سن العشرينات ومن بعد عادت لحياتها الطبيعية وتزوجت عادي، لكن بعد مدة من الزمن ولدرجة المشاكل لي عدات عليهم سواءا من الزمن أو
من النّاس ( لأنها تعبت وقاسات بزااف باه رجعتنا نسا ووقفت وقفة المرأة الصبورة مع راجلها في أصعب المواقف ) المهم بعد هاد المدة عاودت مرضت من جديد وبالضبط في الفترة لي حكيتلكم عليها ( لما كنت في الثالثة متوسط) ، حالتها كانت غير تتدهور وبعد زيارات للأطباء خبروها بلي لازم دير عملية جراحية أخرى على القلب ،
أتخيلو القفص الصدري تاع الإنسان يتحل مرتين, وهاداك القلب لي نبضة منو قادرة تقضي على حياة الإنسان هو مركز ومحور العملية ، الهدرة عليه برك تخلع ,
أنا بصراحة تخلعت وقلت أكيد بعد فحوصات أخرى رايحين يقولولها
ماديريش العملية راكي بخير ، لكن لما بديت نشوف ماما توجد في أوراق دخول المستشفى عرفت بلي مارانيش نحلم , بصراحة حتى التجهيزات الطبية لي لازم ديرهم قبل العملية ومتعبة وفيها خطر , بصراحة كنت نشوف في ماما تطفى قدامي كل يوم وبلعقل,
حتى دراستي وتدهورت وليت عصبية لي يحكي معايا نردلو بعشرة ودايما دموعي في
عينيا حسيت روحي مخنوقة وما عنديش حل لأنو هادي حاجة تاع ربي، من بعد تقرر النهار
لي تدخل فيه ماما للمستشفى ولازم يكون قبل العملية ب 3 أيام ولا 4 ، وأنا وأختي رحنا
لدار جداتي حتى تولي ماما من المستشفى ( لظروف خاصة ) , حتى دار جداتي لي نحبها
ووليت نحس روحي فيها مخنوقة خاطر مارانيش نشوف في شمعة الدار قدامي,
بقيت غير نستنى وكل يوم يجي واحد ويخبرني بحالها في المستشفى, حتى جا النهار الاخير قبل العملية تما قلتلهم لازم نروح نشوفها , وبعد أخذ ورد رحت شفتها , هاديك اللحظة
صدقوني دركا راني نكتب ونبكي لما نتفكرها, دخلت ولقيتها قاعدة على السرير
وكلي تستنا في النهار تاع غدوة ولي قادر يكون آخر نهار نشوفوه فيها, بصراحة مع دخلت لعندها احتضنتها بكل قوة وبقيت غير نبكي , ما عرفتش واش صرالي بصراحة كن جات بيدي بالاك كن راني هربتها من المستشفى غير باه ماديرش العملية المشؤومة,
مبعد بدات تطمن فيا بلي راهي بخير ورجعت للدار وحالتي وحالتها سيئة جدا,
أنا روحت مغمومة وفي بالي آخر مرة نشوفها فيها وماما طلع ضغطها في المستشفى لما شافت دموعي وخافت ماتزيدش تشوفني أنا وأختي,
المهم في الغد دارت ماما العملية وجازت على الموت لدرجة أنو الأطباء بعد العملية
كانو يقولو هادي مستحيل تعيش وتولي للدنيا لكن بمكتوب من ربي سبحانو
رجعت للدنياوبعد ايام خرجت من المستشفى ، أنا بصراحة ماشفتهاش من نهار قبل العملية
حتى نهار خرجت , ولما جات وشفتها بقيت غير نشوف معاها وجها يبان مريض و رقيق خلاص
وكاين بعض الخدوش تاع الآلات لي كانت راكبة فيها , بصراحة رحت سلمت عليها بسرعة
ورحت تخبيت وبقيت غير نبكي وحدي ما حملتش نشوف وجها المنور في هاديك الحالة,
لكن الحمد لله كي ولات بخير وعافية, ومن وراها بدات تتعافى بالشوي ورجعتلنا للدار
ودرك راهي بيناتنا وربي يطولنا في عمرها ولدرك لما نتفكر هاد الحكاية نحسها جزء مظلم من حياتي, بالاك نعيش في الفقر والقهر والظلمو ماتغيبش عليا ماما دقيقة وحدة
علابالي طولت عليكم اسمحولي لكن رسالة ليكم
اتهلاو في والديكم وخاصة الأم والله راهي شمعة ونور الدار
ولوكان تروح قلب ماراح يكون عليك حنين كيفها، ربي يحفظلكم والديكم
ويطولهم في عمرهم واتهلاو فيهم وفي رواحكم
تحياتي للجميع
