- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السّلام عليكم يا ناس لمتي الغاليين والرآئعين
واسعد الله أوقاتكم
ان شاء الله راكم لاباس؟
علابالي هاد الايام راني مهبلتكم بمواضيعي :d إن شاء الله نكون خفيفة عليكم برك
ويعجبوكم هاد المواضيع :$
المهم رايحة ندخل في الموضوع مباشرة بدون لف أو دوران
بصراحة هاد الموضوع عندي مدة وأنا حابة نحكي عليه واليوم باه جاتني الفرصة والحمد لله
وقلت نطرح هاد الموضوع ونشوف رايكم فيه, مالا تبعوني للأخير
بصراحة هاد المدة ولا في هاد السنوات الأخيرة ولينا نتداولو كلمة راحت الدنيا, علاه؟
وهادا لأنو راحت الحشمة وراحت التربية الحسنة وراحت حلاوة زمان وين كان الكبير
بقيمتو وبرايو وبتجربتو والصغير ببراءتو وطفولتو
لكن درك تعكست الآية ولا الكبير بعقل صغير والصغير بعقل كبير, كلي تشوف جسد صغير بعقل تاع واحد كبير و جسد واحد كبير بعقل صغير , والله شي يحير
والموضوع لي رايحة نهدر عليه هو أطفالنا والفهامة الزايدة لي عندهم , حتى ولا العبد يتوسوس من روحو, لو نوليو للوراء ونتفكرو رواحنا كي كنا صغار, كان وقتنا مقسوم ومرتب
المرحلة الإبتدائية مازلنا نلعبو ومازلت البراءة فينا , والمرحلة المتوسطة بدينا نفهمو حوايج جدد حتى كبرنا بشوي وبدينا نتعلمو من الحياة
وللدرك كاين فينا لي تجاوز العشرين ومازال مايعرفش حوايج بزااف
بصح جيل دركا راهو يعرف كل شي وهو في عمرو عام , تحكم طفل في عمرو 5 سنين يقريك ويعلمك حوايج ماتعرفهمش, انا ساعات نحكم لولاد ونحكي معاهم ( خاطر نموت على لولاد الصغار وندير معاهم الزردة ههه :d )والله غير نتوسوس من روحي ونولي نخمم إذا أنا لي راني صغيرة ولا هوما,
يا عجابة طفل صغير في عمرو 6 سنين تسقسيه على القراية يقولك حاب نتزوج؟؟ :s
هادا 10 سنين يروح يحرق للخارج طول
مرة انا في الترامواي راكبة نسمع في طفلة عمرها 5 ولا 6سنين هكاك صغيرة خلاص
نسمع فيها مع يماها تهدر قالتلها قولي لبابا يزين السيارة بالورد كيما تفاهمنا باه نروح فيها عروسة ههههه, انا مازلت حاكمتني السخفة باه نلعب بالبوبيات وهي تخمم تتزوج هههه
مرة بقيت نحكي مع بنت خالتي عمرها 7 سنين تحكيلي على الزواج حيرتني بقيت نشوف, قالتلي انا مانتزوجش مع واحد من العائلة ونديه من الخارج (قاوري) قلتلها الله يبارك وعلاه؟؟
قاتلي باه يكونو عينيه زرق هههه, هادي متشاءمة من جمال الرجال الجزائريين من الصغر ههه, نحكم ولد خالتي الصغير عمرو 5 سنين نقولو واش تتفرج توم وجيري ولا واش ؟؟ زعما نلعبها فحلة وفاهمة عليه :up:, ساع قالي تتمسخري بيا؟؟ قالي حطيلي القناة لي يلعب فيها حريم السلطان , يا لطيف :-o بقيت نشوف , قتلو هيه خلي نحطلك حريم السلطان ونروح انا نتفرج سبايستون خيرلي , انا درك راني كبيرة وشارفة ونحشم نقول قدام ماما بلي راني نتبع في مسلسل حتى ولو مافيه والو , وطفل صغير يتفرج حريم السلطان ويتفرج الأفلام الهندية ويكونيكتي ويعرف الفايس بوك و الله تبقى حاير
انا مرة شفت طفلة صغيرة في عمرها 7 سنين من العائلة والله حكمت صاك فيه الماكياج وبدات تماكيي حتى حرت , كي خلصت تقول عليها كانت عند مختصة في الماكياج
قريب بكيت على روحي هههه , انا كي نهز حماير قريب نديرو في عيني لدرجة مانعرفش
وهي تماكيي وهي 7 سنين, مالا 10 سنين تتزوج طول
والله شي يحير, بصح هادا كامل راجع للوالدين , كبرو ولادهم قبل الوقت, وحدة تطلق النت قدام ولادها حتى يتعلمو الحوايج خاطيين الطريق, ولخرا تحط بنتها قدامها وتتفرج معاها المسلسلات , ولخرا توصي بنتها تجيبلها الأخبار من عند الجيران , حتى قضاولهم على براءتهم نهائيا , أنا ماوليتش نشوف طفل صغير خلاص, وليت أي طفل نشوفو نشوف فيه عبد كبير , سواءاً بهدرتو ولا بحركاتو ولا بتفكيرو
انا درك راني كبيرة كي تبدا ماما تحكي مع بابا حوايج تاع عائلة ومايخصوناش نروح وحدي بلا ماتقولي, خاطر من الصغر علمتنا ماما بلي الصغير بلاصتو مع الصغار والكبير مع الكبار, وعمرنا لاقعدنا معاها وشاركتنا في حوايج تاع كبار
والله مافهمتش إذا حنا لي خرجنا جايحين ولا لولاد تاع درك لي خرجو فاهمين كتر من عمرهم
واش نقول غير ربي يستر على ولادنا ومايروحوش للطريق الغالط
ودركا راهو ليكم الخط وماتنساوش تكرموني بردودكم القيمة
وإذا صادفتكم هاد الظاهرة تعطيونا أمثلة من الواقع
اتهلاو في رواحكم وسلآم
