- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلام عليكم يا ناس اللمة الكرام والافاضل
ان شاء الله راكم لاباس؟؟
عندي مدة ماكتبتش موضوع في قسم واش راك تهدر( لي يسمع يقول عام :d )
على كل حال مانطولش عليكم وندخل في الموضوع مباشرة لي معرف اذا
راهو واضح بالنسبة ليكم وإلا لا، على كل حال لما نقولو يوم المولد النبوي الشريف نتفكرو هاداك اليوم لي تحتفل بيه الاسرة
الجزائرية بفرحة ويكون فيه اجتماع لأفراد العائلة وتكون فيها صلة للرحم
تلقى الأولاد برا يلعبو بالمحارق والبنات بالنجوم ( جبتلكم قصة من تاع الف ليلة وليلة ههه )
يعني اتفكرو برك هاداك الوقت كيفاه كان فيه النية ، عندك طفل صغير ترضيه بزوج محارق ويعدي النهار بفرحة،
تلقى ولاد الجيران يلعبو كيف كيف بنات من نفس العائلة يلعبو كيف كيف، يعني ماشاء الله
والاهم من كل هادا هو مكانة الرسول عليه الصلاة والسلام في قلوبنا هاد الاحتفالات ماعندهاش معنى
الاهم لما نمشيو على سنة نبينا وعلى واش وصانا بيه ، لكن درك يا خاوتي
راهي ولات تقول حرب قايمة نهار المولد النبوي الشريف، تاع هوليود وبوليود وماداروش هكا
واش من بومبات ؟ واش من دخان؟؟ الدم يسيل ،تجي ماشي تقول الحرب العالمية الثالثة قامت، لدرجة كن تعدي من تم قادرة تطير رجلك وتديها معاك هههه
يعني تلقى طفل صغير ماعداش 7 سنين يشريلو باباه قنابل ومتفجرات ومدافع ماش محارق والمشكل بأكثر من مليون وزوج
ملاين، أولتها تبذير وثانيتها قادر ياذي نفسو، يعني تلقا المحرايقة كتر منو في الطول والمشكل لكبير كن جاو ياذيو رواحهم برك نقولو معليش
بصح راهم ياذيو معاهم ولاد الناس، لوكان نحسبو الاصابات لي تصرا يوم المولد النبوي الشريف
نلقاوها اخطر من الاصابات لي في باقي الايام، يعني ماتلقى باه تلعب مع صديقك ترمي عليه بومبة؟؟
انا نسميها بومبة خاطر صوتها ومخلفاتها خطيرة بالاك كتر من البومبة، يعني كيفاه هادي تقعد في يدين ولاد صغار وياذيو بيها بعضاهم،
توصلت يعني بناتنا لما يلحق المولد النبوي الشريف يكرهو؟؟ ولاو يكرهو هاد النهار غير من المضايقات ومن الاصابات
لي يتسبب بيها هاد اليوم، يعني علاه ولينا نخليو هاد اليوم يوم رعب ويوم مشؤوم بالنسبة لينا ولولادنا بدل مايكون
ذكرة عزيزة على قلوبنا، نعرف وحدة كانت تقرا معايا بسبب تهور الاولاد قاسو خوها في عينو حتى ولا مايشوفش
يعني هادي اخلاق مسلمين؟؟ ، نتمنى من الاولياء يوعاو ويبركاو من تبذير الاموال على هاد
المفرقعات " المحارق" لي راهي تاذي الناس وتخليهم يتشاءمو من هاد النهار
درك نخلي المجال ليكم للتعبير
وهل فعلا ولا هاد اليوم يوم رعب بالنسبة لولادنا؟؟
ربي يحفظكم جميعا وربي يحفظ الأمة الاسلامية
وماتبخلوش عليا بآرائكم
تحياتي
