- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلام عليكم ناس اللمة
ان شاء الله راكم بخير خاوتي؟؟
ربي يهنيكم جميعاً
رايحة ندخل في الموضوع مباشرة ونحكي على واحد الحاجة صادفتني اليوم الصباح، هبلتني ودوختني وخرجتني من عقلي
تبعوني نقولكم
اليوم الصباح ركبت في البيس تاع الجامعة باه نروح نقرا كل شي كان مليح الله يبارك حتى البيس كان فارغ ماكناش في بزاف
والشوفور لي كنا راكبين معاه انسان كبير في السن وناس ملاح ويسوق بنظام وبعقلو خلاص، الدودانة ماتحسلهاش
لدرجة يمشي بعقلو، على كل حال كنا نمشيو بعقلنا ومن بعد وصلنا لرونبوا تما خرجت معانا سيارة قريب خبط البيس فيها
بصح ماكانتش حاجة خطيرة يعني حتى البيس ماحسيناش بيه دار ردة فعل قوية ولا،
و المشكلة أول ماحبست السيارة السائق مابانش، خرجت مرتو من الطاقة تعيط وتسب في الشوفور
بأعلى صوتها " يا الاعمى، يا لعور" وغيرها من السب والشتم والشوفور مسكين يقولها اسمحيلي ماتولهتش، صدقوني بهدلتو وما خلاتلوش
بلا حشمة ولا تربية ولا حياء وبأعلى صوتها وخاجرة من الطاقة هكاك وحنا توقعنا الحكاية حبست هنا،
من بعد هبط راجلها لي يسوق وجا لينا للبيس وهو ينفخ في روحو ،فتحلو الشوفور الباب باه يتفاهمو
واول مادخل للبيس قال للشوفور بتكبر" علابالك راني ميليتار "militaire" ، يعني قصدو راك تحت رجليا،
وبدا يعيط ويقولو نتوما حابين تقتلو الناس؟
الشوفور مسكين يقولو والله واقسم بالله راني نمشي بلعقل علاه ديرلنا هكا ياولدي، مسكين خاف على خبزة ولادو
ولاخر يرد عليه ويقولو اسكت كبير وطويل وعريض وماتحشمش وماعندكش الحياء، ويهدر معاه باحتقار واستصغار
ويقولو افهم شوي يا عبد ( قريب يقولو يا حيوان بالاك الذرة الصغيرة من الحشمة لي بقاتلو لي حبستو بالاك)
والشوفور مسكين قريب الدمعة تطيحلو صدقوني بهدلو تبهديلة تاع الكلاب حاشاكم قريب يقولو راك كلب عندي حاشاكم وحاشا قدركم
ومن بعد قالو الراجل هاداك لوين رايح؟،الشوفور سكت وخاف ساع بدا يعيط عليه ويقولو انطق
اني نهدر معاك وجاوبني، ولا رد الشوفور وقالو رايح للجامعة ، قالو امشي قدامي وراني وراك وتشوف كيفاه،
صدقوني يا خاوتي والله العظيم حكمت فمي لآخر دقيقة جيت امرأة برك وحشمت والله كنت رايحة نوقف ليه ونقولو واذا ميليتار
واش فيها؟؟ ولا الشمس والمطر بيدك وحنا ماعلابالناش، واصلا كن جيت راجل احكم مرتك ساع كون ساع معاها ميليتار وربيها
لي خارجة من الطاقة تسب على طول صوتها ومن بعد اتقاوى على الناس الضعيفة ومن بعد استغفرت وسكت، ولا الشوفور
مسكين ماداناش للجامعة وراح للمقر الرئيسي وين يgاريو لي بيس تاع الجامعة كامل وهبط يتفاهم مع المسؤولين تاعو والراجل هاداك
معاه، تما ناضت فوضى في البيس وبداو لبنات يقولو ماش من حقو وحاسب روحو معرف شكون، ولات نطقت
مرأة كانت معانا وقالت " القانون يبقى قانون وإلا الناس ماتترباش ويصراو حوادث"
ساع دورت ليها قلتلها " القانون يتعالج بالقانون واذا هاد الشخص حاب يجيب حقو يتعامل قانونيا ماش بالرتبة تاعو
والمكانة تاعو في المجتمع ويستصغر لي اقل منو، خاطر الناس اول ماتبدا حديث تبدا ببسم الله وهو بدا براني ميليتار، وواش فيها ميليتار؟؟
نظن بالاخلاق تاعو ودناءة المستوى تاعو عرفنا مليح شكون الشوفور والميليتار ، لانو اخلاقو راهي صفر قدام مكانتو"
ولات وحدة قالت هادي نقص تربية، قلتلها بارك الله فيك هاديك هي الكلمة الصواب خاطر ماحترمش راجل قد باباه
وخص غير يقولو اقفل فمك مع انو قالهالو بطريقة غير مباشرة، صار الناس قتلو بعضاهم وتسامحو وهادا ماصرالو والو قاعد ينفخ في روحو
ويستغل المنصب تاعو ويستقوى على الضعاف؟؟ ميليتار خليها في خدمتك ماش تتقاوى بيها على الناس،
ومن بعد هبطونا من البيس خاطر حكمو الشوفور ورحنا في بيس خلاف مع شوفور خلاف، حسب واش سمعت من البنات
بلي مادارولو والو والله اعلم، بصح والله ياخوتي هاد لحكاية طلعتلي النار لراسي
لوكتاه مازلنا نتعاملو بمكانتنا الاجتماعية ونستقواو على لي اقل منا؟
يعني راجل كبير تستصغرو وترخسو قدام الناس وتعاملو بهاديك الطريقة نورمال؟؟ صدقوني قريب الدمعة طاحتلي كي شفت هاداك المنظر
تمنيت لو في الدقيقة هاديك كانت الرتبة تاعي اعلى من رتبتو غير باه نبهدلو ونغسل بيه الارض عى هاد التربية الخاسرة،
صراحة اذا كان المال والمكانة العالية تجردنا من اخلاقنا وترجعنا بلا ضمير مالا ربي يخلينا فقراء
ونموتو فقراء على الاقل مانظلمو حتى عبد ،
على كل حال كاين لي حكيتلهم الحكاية هادي وكانت عندهم نفس ردة الفعل تاعي
وكاين لي حكيتلهم ولاو يضحكو ربما حتى هوما مات فيهم الضمير
ونتوما واش رايكم يا ناس اللمة
مدولي رايكم بصراحة
اتهلاو في رواحكم
وماتبخلوش عليا بردودكم
سلام
