- إنضم
- 23 أفريل 2016
- المشاركات
- 1,022
- نقاط التفاعل
- 3,889
- النقاط
- 171
ايتها الوجوه الشاحبة كيف تفعلون (صحيحة نورمالمو) نخرجو من القوسين مع اشعة الشمس تحية لكل واحد محروق لا يرتدي لا نظارات لا كاسكيطا لا والو انك افريقي ورب الكعبة
بوه باه منطولوش بزاف فكرة الموضوع اي ساهلة حبينا نفتاتحو اليوم جورنان اللمة اللي مهمتو الاساسية التمنشير راح ندير اقتباسات من مواضيعكم ومن ردودكم من قسم واش راك تهدر كبداية ونعلق عليكم ولي يغيضو الحال من هدرتي يخليلي كمونتار قال اودي اجبد عليا منشارك مش عاجبني
المهم نبداو
الموضوع لول لي جا بين عينيا تاع ختنا هادي لي يسموها زهرة الزنبق ويسموه اي سبيك انقليش .. تعالوو اعزائي
لولى يا سي زهرة واش من اعزائي موالفة اجرو ارواحو اي خلات ونهار تنوضي فينا نص ليل دوك بانت ليك تقولينا اعزائي تلعبينا على العاطفة ولا كيفاه قالت اعزائي معليش نكملو
مرات بزاف نشوف بنات لما يشوفو ليجون يبداو يطرطقو فالفرنسي وهي ماراهيش عارفة غير زوج كلمات
بونجوغ وبونسواغ
استناو نحبسو هنا السي زهرة دوك نقلكم من لخر كتبت هاد الموضوع على جال هادوك البنات الزينات ويجي عليهم الفرونسي مليحة حتى وغالطة اي قتلتها الغيرة وحابة النسا كامل يعصبو روسهم ويهدرو عربية يا زهرة البائس من هاد المنبر يدعوك بالمثل لي يقول عاند وما تحسدش خلي هاد البابيشات يعيشو حياتهم ويهدرو فرونسي ولا الغيرة تنطق
--------------------------------
ايه نزيدو نفوتو لموضوع اخر من نصيب شكون هادي عضوة جديدة نرحبو بيها معانا واسمها لاريمان وموضوعها اسمو ما يغيضكمش الحال
اول حاجة في كثير من الحالات نلقاو الشباب ماينوضوش للنسا سواء كانت فتاة ولا سيدة كبيرة باستثاء لعزايز انا مانحكيش عليهم
يا ختي ياك ما يغيضكش الحال مي انا ما نوضش لفتاة مهما تكون وديجا علاه نوضلها تظالو تعيطو على ريسانا المساواة ديتو الخدمة ديتو كلش وزيد اللبسة وش نقلك وزيد جايين تزاحمو فينا في لي بيس واش نروحو نسكنو الجبال ولا كيفاه دوك اه براكات اختي حتى في لي بيس وباغيين تاكلونا شوي وتقولونا هزو حوايجكم وطيرو من المنتدى نخلوكم وحدكم.
------------------------------------------------
نفوتو لموضوع خلاف تاع خونا حكيم واسمو لا اقبل صداقات الذكور
والبرنسيسة وغيرهم
المهم ياخاوتي هذي ايام راني نلاحظ ماشاء الله التواقيع نتاع البنات سواء هنا في اللمة او في الفايسبوك
وحدة تكتبلك :
- لا اقبل طلبات الصداقة من الذكور
- والاخرى لا اقبل رسائل خاصة
-والاخرى اعتذر من الذكور راني مخطوبة
خونا حكيم من عندي او يظال يدق في البيبان حتى ولا لي يروح ليها تضربو بلا اقبل صداقات الذكور تعمر قلبو مسكين جا دار موضوع خفيف ظريف باه يوصل ميساج تاعو خويا هوما ما قبلوكش وحنا علاه وزيد يخي من حقهم يكتبو ما يقبلوش انت حاب تدخل في حياتهم بالسيف لالا خويا راك عاقل ماشي هاك
-----------------------------------
من حكيم نروحو عند عاشقة الجنة لي دارت موضوع بعنوان اجروا عندنا عرس جماعي
شوف ديك الكلمة اجروا تاع ارواحو لخر ما يلحقش كيما كان الحال ناس كامل راحت تجري وش كاين حبت تزوج ناس هنا عليها قالو ناس زمان لي ما لحقش بالرجلة يلحقها بلوشام هكداك انت اجرو تزوجو يخي حالة
ومبعدا حبيبتنا مع لخر دارت هاد الرد
وراكمممممممممممم بطلتوا تزوجواااااااااا ؟؟؟؟؟؟؟؟؟؟
واش ا ختي حابة تزوجينا بالسيف حتى موضوعك دا 16 صفحة كاملة ومزالك تقولي وراكم حابة يولي عندك كراس 32 صفحة يخي حالة ميتين على زواج زوجي روحك انت ومبعدا حيري فينا
-----------------------------------------
نختم عدد اليوم بعضو واسمو ام ياسمين تاع الطمينة مكانش لي ميعرفهاش المهم كتبت موضوع ارواحو تشوفو من 2007
ركزلي على كلمة ارواحو ايه يا ختي هنا جينا وش حابة تقولينا
موضوعي اليوم يحكي خاصة على الجيل الذهبي
لي عاش هذاك الوقت الرائع
نقدرو نقولو الجيل تاع السبعينات ولا اواخر السبعينات والثمانينات والتسعينات حتى سنة 96
يعني اخر جيل قرى نفس برنامج الابتدائي هههه
قبل مايبدلوه
ولحقت عليه التكنولوجيا والنت
ايه كي جينا تحكيلنا على جيل الكارطون هذا تلفون ما عندوش رئيس دولة مكانش عندو ميكرو في الوقت هذاك يعني انت ام ياسمين قعدتي قعدتي وفكرتينا بهادوك ليام ايه تبانلي من دوكا بديتي تحسدي في ياسمين شوفي جيل تاع دوك كلش كاين الحطة الله الله تفكرينا في جيل يشرو تريكو كبير عليه باه يلبسو خوه يخي حالة ارجعي عيشي فيه وحدك هاد الجيل البائس
----------------------
خلاص عدد اليوم من الجرنان كتبتو بسرعة ههه ما تزعفوش مني (زهرة الزئبق ، لاريمان ، حكيم ستوري ، عاشقة الجنة ، ام ياسمين) راني نقسر برك مش عارف هادي الفكرة ادا نالت اعجابكم راح تكون فيها اعداد جاية وادا فيها زعاف وتشناف ديرو رواحكم ما شفتوش ونكبيوها عند هدا العدد
خاوتي خواتاتي سوقو بحذر
تحيــــــــــــــــــــــــــــــــاتي
آخر تعديل بواسطة المشرف:
