- إنضم
- 23 أفريل 2016
- المشاركات
- 1,022
- نقاط التفاعل
- 3,889
- النقاط
- 171
تحية افريقية لكل البائسين في هاته القارة انتم دائما رائعون يا مجانين القرن وغزاة الفضاء وش هاد البوكيمونات اللي تعيش في بلادكم واحد يسموه انوش مافيا ولاخر معلاباليش المهم جماعة الباك مبروك عليكم مرحبا بيكم في عالمكم الجديدة وجماعة لي مكتبش ليهم ربي ان شاء الله العام الجاي وتجيبوه بمعدل شباب بزاف
ندخلو في سوجي تاع اليوم نخلو قارتنا البائسة ترتاح شوية ديما نحكو فيها اليوم راح نسوطيو بركة الماء تاع المتوسط ولا الثانوي ونروحو نحكو على الزماغرة او كيما يسموهم الجالية المقيمة بالخارج ما يخفاش عليكم رانا في وقت تاع الكونجي والزماغرة يحبو يجو يجوزو الصيف هنا اليوم نتكلمو على المظاهر اللي نشوفوها كي يدخلو لعالم البأس وتضربهم صفورية البلاد في مطار هواري بومدين
ايه حبابنا وخاوتنا لي عايشين في المهجر اهلا بيكم في بلادكم مي علاه منين تجو وهاد الكلمة لاصقة معاكم La bas chez nous en France ايه رانا علابالنا ماشي لو كان لصقتوها ماتريكيل في ظهوركم خير باه ما تظالوش تعاودو فيها -_- .. وتانيك كي تجو من عالمكم اللي كنتو عايشين فيه انتوما راكم ضياف ماشي راح تبقاو عندنا العام بكل انا تحيروني كي تجيبو معاكم الفيجيدار والكوزينيار والكليماتيزور ووو هادو كامل علاه اهم كامل عندنا ونبيعوهم تاني علاه انتوما رايحين ترحلو لينا ولا كيفاه ولا فهمنا فريجيدار تاعكم تشربو منو الما بارد وتاعنا سخون.. تانيك من عاداتكم تلبوس تريكو ازرق فيه السردوك ولا تاع البياسجي تاع زعما رانا من ورا البحر اي عفسة تعيي على الدروج صديقي تنجم تلبس تريكو تاع دزاير ولا حتى البرتغال علخاطر هنا كامل نهار لافينال كانو يسيبوتيو في البرتغال وستشفاو في فرنسا كي خسرت.
العفسة الشابة تانيك لي يديروها حبابنا نهار يكونو يصرفو زعما يتبهلل يدير روحو غلط ويجيب ورقة تاع 100 اورو اووو ومبعدا كي شغل يتفكر بلي راه في الجزاير ومبعدا يقول عبارتو الشهيرة اووو ديزولي ومبعدا يبدا يحوس على الدنيار .. اي اي اي آآآر يو أوكي ؟؟؟ رانا حفظنا هاد الدراما جيب الجديد ا الحبيب ..
تانيك الزماغرة كي تجي وتجيب ولادك الصغار علاه تخليهم يلعبو بعاد عليك غير باه تقول الجملة الشهير ''اي محمد فيان ايسي'' غير باه تمعني لينا صواديزون بلي انت ايميغري خليهم قدام عينيك ولا جنبك وهني على عمرك زيد بلاك يخطفوهم ليك وتولي على جال ديك الجملة تسلك في ملاير باه ترد وليدك -_-
ايه والحاجة ليسونسيال الساكوشة لي يجيبها معاه حبيبنا ويعلقها بكوتي يرقد بيها ينوض بيها ياكل بيها يسهر بيها يعوم بيها .. نصيحة فقط مادا بيك ما تجيبهاش معاك علخاطر راك تشبه للرسوفور كي نشوفك نستناك غير تجي في خروبة وتبقى تعيط ايا تافورة بومعطي الحراش اخخخخ خاصك غير الصرف
ايه ويا حبابنا الزماغرة انتوما جايين للجزاير وعيب تجو بيديكم فارغين علاه تجيبولنا الشيفون تاعكم هاديك بكري تحسابو فينا مشتاقين دوك ليجان تاوعنا اهم يلبسو غير في لاكوست ولاريني واش يدير بالشيفون تاعكم .. اه وكي تعودو رايحين منا ما تخلو والو الشمة الدخان وحتى لزيبيس تاع رمضان الجاي والقش حتى السعيدة وتدوها منا علخاطر غالية عندكم ..
وايه اخر حاجة نحكي عليها هاديك Jeune Fille لي تجي شعرها مكريبي ومدايرة لي لينات وزعما تروح عند البحر تبرونزي وتلقى لي جان تاع هنا يشوفوها معاها ولا الخطابة ديري في بالك بلي ما عجبتيهمش انت راه بيكم غير الكواغط باه يودعو بلاد البأس ... ايه قبل ما ننسى الكانيش لي تجيبوه معاكم او كي يجي للجزاير تضربو شمس تاعنا يجيبها شهر وهو مريض مسكين وانتوما شهر تجو باه تجوزه كونجي تولو تجريو بالكانيش تاعم من بيطري لبيطري يمالا خلوه عند جاركم ولا كاش دار يربو فيها الكلاب خير من تجوزو كونجي كامل تجريو وتقولو بلادنا سخونة.
في النهاية انا تكلمت على بعض الظواهر منها ما عايشتها ولا كاين لي حكاو عليها في الفايس بوك ولي عندو مظاهر تاع الزماغرة يشاركنا ونتمنى راكم تجوزو في فاكونص مليحة
تحياتي
آخر تعديل:
..الزهر اولاش 
