- إنضم
- 13 أفريل 2013
- المشاركات
- 14,618
- نقاط التفاعل
- 54,535
- النقاط
- 1,756
- العمر
- 31
- محل الإقامة
- قسنطينة
- الجنس
- أنثى
السلام عليكم أهل اللمة الكرام واسعد الله أوقاتكم
راني فرحانة هاد الايام بهاد البهجة لي في منتدانا كلي رانا في عيد ماشاء الله
ربي يحفظ لمتنا ويحفظ أهلها ويدوم جمعتنا ان شاء الله
المهم ندخل في الموضوع مباااشرة لي علابالي بلي العنوان راهو خلعكم (المهم ماش مباشرة طول بعد قصة طويلة شوي ههه)
مالا يا سيدي هادي قبل اسبوع ولا اسبوعين قاعدة نتفرج في بعض الفيديوهات على الانترنت وفجأة خرجلي فيديو تاع حصة من حصص
قناة النهار الجزائرية وبالاخص حصة "صريح جدا" الموجهة لكل فئات المجتمع و "الكلمة لكي" الموجهة للنساء وانا طحت في تاع النساء
وبالاخص في موضوع او سؤال "واش تشرط المرأة الجزائرية كمهر؟" هيا قلت ندخل نتوقب شوي ونسمع بنات ونساء بلادي واش يهدرو
مالا لي يتكلمو معاها تقولهم نشرط غير الهنا، هيا فرحت قلت نساء بلدي واعيات، ولي عجبتني فيهم وحدة قاتلهم "كن يجيو يخطبو بنتي مانشرط والو على الراجل ومانشقيهش نشرط الهنا وتكون عندو الدار برك" :p ههههه ماشاء الله، يا بنت الناس كاشما خليتي؟ كن غير شرطتي وشقيتي المخلوق خاطر كلمة الدار وحدها راهي خلعت العريس مسكين ورجع منين جا وأكدولي على كلمة برك في آخر الجملة نظن وضعتها للتخفيف من ثقل محتويات الجملة هههه المهم زيد قاعدة نتفرج جات امرأة واول كلامها قالت انا من قسنطينة، هيا فرحت قلت بنت مدينتي ومن قبيلتي خلي نسمع تقاليد مدينتي على لسانها ساع قاتلهم وتبعو معايا "حنا عندنا نشرطو محزمة ذهب" يا لطيف :-o راكي منك صح؟ محزمة بشحمها ولحمها؟
فم المحزمة (قصدي القفل تاعها) برك يسوى بالملاين من 12 حتى مالا نهاية من الملاين هههه وقاتلهم "لازم قندورة فرقاني (يعني قاطيفة)" زدت خلعت القندورة قاطيفة راهي غالية قماشها وحدو غالي والحرج (النقش) تاعها وخدمتها غالية وديرها لعروسة من عندها ماش من ظهر لعريس
المهم المرأة مازالت مكملة قاتلهم "نشرطو تاني الكباش" مهلا يا أختاه :-o كن حتى قلتي كبش ولا كبيّش ولا نصف او ربع كبش ههه ماش كباااش بمدّ الألف المخيفة المرهبة والتي تعود على قطيع من الاغنام
وزادت كملتها " والمهر يكون بين 40 و50 مليون" :-o بدون تعليق هاتيلي 40 مليون هاديك نروح بيهم عمرة احسن، وفي الاخير ختمتها
بــ "وحلويات من كل نوع جوز ولوز وووو" المهم انا افتجأت وخلعت بقيت نخمم قلت يا إما هاد الانسانة حابة تزوخ وتفوخ وتبين روحها بلي
بنت بلاد ويا إما ماراهيش قسنطينية وماتعرفش القسنطينيين كيفاه عايشين، المهم للدرك راكم تتساءلوا عنوان الموضوع واش دخلو بالمحتوى
تبعوني شوي نزيد نقولكم، مالا قبل مانخرج من الفيديو ضربت طلة على التعليقات اسفل الفيديو، لقيت 50 بالمئة من التعليقات
شباب يكذّبو في البنات ويقولولهم كذابات وتشرطو بزاف وبنات يردو عليهم بمقولة ماش كامل كيف كيف، و25 بالمئة شباب يقولو راهي
ليكم نروحو للخارج ونتزوجو قاوريات واقعدو تبورو والبنات يردو عليهم وتقوم الحرب، اما 25 الاخيرة هي لي محتوى موضوعي
ومحتوى هاد الثرثرة كامل هههه لقيت الغاشي يتكلم على القسنطينية هاديك لي طلبت طلبات تعجيزية هي صراحة عندهم الحق ماش لهاد الدرجة
المشكلة هي في بعضهم لي بداو يسبو، كاين لي قال "ناس قسنطينة زواخين وهوما والو" وكاين لي قال"شحال نكرهم ناس قسنطينة يتشرطو بزاف"
وكاين لي قال "من التشراط تاعهم بقاو بناتهم بايرات والقبائليات خير عليهم بألف مرة ومايتشرطوش" وخلي وخلي غيرها من الشتائم انا بقيت بلا راس وخلعت يعني على جال كلمة من مرأة واحدة تبع المادة تسب مدينة كاملة؟؟ على جال عينة من مجتمع تسب أمة كاملة؟ يعني الشعب تاعنا على كلمة يحكم على شعب كامل راهي فلانة بنت فلان لي تكلمت ماش قسنطينة لي تهدر
انا خالتي شرطها 10 ملاين وخاتم خطوبة نقطة وانتهى الصوف من عندها والقطيفة من عندها والذهب من عندها وقش الدار من عندها
هوما تكرمو عليها وجابولها هدايا ذهب لكن من عندهم ماش حنا لي طلبنا خلاااص يعني وحدهم وماش محزمة و40 مليون وووو
واذا على غلاء المهور راهو في الولايات كامل واذا فساد راهو في الولايات كامل وإذا ظواهر اجتماعية خطيرة راهي في الولايات كامل
وهكاك مازال الخير في كل بلاصة ماش الناس كامل كيف كيف، لما نشوف شخص قسنطيني فاسد راهو يمثل نفسو ماش ولاية وشخص وهراني يغلط ماش معناها وهران كاملة تغلط ولما نشوف عاصمي غالط ماش معناها العاصمة كاملة غالطة
والحمد لله خير دليل رانا هنا في اللمة من كل بلاصة وماشاء الله ماشفنا غير الخير من الشرق للغرب ومن الشمال للجنوب نعم الناس تعرفنا عليهم
وخلاونا نديو نظرة ايجابية على بلادنا ماشاء الله
المهم مانطولش عليكم كتر واش رايكم في المجتمع تاعنا لي من نظرة يسب ولي من نظرة يقرا النقص ويسيء الظن
وهل توافقوني على كلامي وإلا عندكم وجهة نظر اخرى
هذا الموضوع برعاية شعار كلنا اخوة :p
اتهلاو في رواحكم
سلااام
