بنات دزاير ميحبوش الزوالي

[فيتامين سي]

السلام عليكم و رحمة الله تعالى و بركاته
على بالي هذي شحال مبنتش في المواضيع مام كفاش نكتبهم و نسيت ظروف الله غالب
دعواتكم ربي ييسرلي اموري و يكملي واش متمنيا
اليوم كنت رايحة نكتب موضوع على الحقرة شفت حاجة ضرتني بزاف بصح انا كيفكم من الشعب معندي مندير من غير ندعيلكم ربي و نتوما دعو ربي يرزقكم الخبزة الحلالية لي تعيشو و تعيشو بيها اهلكم مع موضوع الاخت ميحبوش الزوالي تقريبا عندهم نفس الفكرة قلت راح اليوم نبدل كلش بعد مكانت موضيعي ضحك و تمسخير اليوم نحكي على حاجة تخص الشباب تاعنا لي بغا يعيش بغا الحلال بغا يستقر و ياسس دار
قبل نقوللكم اول مرة نكتب موضوع في يوم و في وقت قصير حكمت الهاتف و بديت نكتب منيش نخمم واش نكتب المهم نكتب من قلبي حاجة صح نامن بيها و منكدبش عليكم

العيد قرب هذو الايام تلقاو لي يبيع الكباش و لي يبيع التبن و لي يبيع الفحم كل واحد يخمم يسترزق باش يعيش
عام و هو يلم يشري فحم باش يبيع
باش اليوم يطيحو عليهم الشرطة شغل دارو حاجة حرام علاش
علاش الظلم وكيلكم ربي
اليوم بكيت الم بكيت عجز بكيت لقيت خاوتي مضلومين من شعب كيفنا و معنديش واش نعاونهم
لكل شرطي ظالم وكيلك ربي ربي ينتقم منك اشد انتقام ربي ينتقم منك
على الوسخ ياك البحر راه مسخ اكثر روحو شوفوه شوفو الخماج لي فيه
جايين من بعيد يسترزقو مخليين اهلهم و احبابهم باش يديرولهم هكدا علاش
ياك نتا تاني راك كيفهم علاش كي تدخل للشرطة تحسب روحك حكمت البلاد معندكش خوك مغبون حس بيه كل مناسبة يحطو نتم في الصيف حطو الفواكه بصح اقسم بالله بلاصة نقاوتها تشعل مكانش لي يخلي حاجة من موراه تفوت صباح متامنش بلي هنا يبيعو باش نتا تديلو خبزتو علاش ياسيدي يخلصوكم و خلوهم يبيعو بصح باش ديرولهم كما الحيوانات علاش واش دارولكم
مي تبعدو شويا و شكون ميعرفش عين الترك ولاية وهران جهة البحر شوفوهم لي الرملة قسموها بيناتهم روحلهم وين كاين العفن ولا نتم كاين حبابهم لي كيفهم
ربي وكيلهم ربي يهديهم ولا يديهم حقيقا كرهولنا الحياة
تاني حاجة نحكي فيها على الزوالي كل انسان نهار ينوي يستقر يخطب 1000 و تقبل وحدة هذيك الوحدة لي ربي مكتبلها هذاك الرجل و البنت يخطبها 10000 و واحد لي يبغي يكمل علاش
اكيد هذاك الواحد ربي كتبلو ديك البنت تستقر معاه
قبل نديرو في راسنا بزاف حجات مي يجي نهار تفهمو و عقلكم يستوعب الحياة ترجع 100000 من شروطكم تحسوهم بايخين تافهين
درك تخطب و ترفض و تبدا زوالي زوالي
علاش يا سيدي دير بلي ديك البنت صلاة استخارة قلبها تزير و قالولكم ربي يرزقكم باحسن منها عادي و جد عادي
موقف صرا لفتاة خطبها شخص خمت طلعتها نزلتها دورتها في عقلها كما دارت تقتنع مقدرتش
الله غالب ماشي قضية زوالي و معلاباليش مي طفل :X3: المهم من بعد الطفلرجع في كل تعليق في الفاسبوك يكتب ميبغوش رجال و حنا الرجال و المسكين
الخلاصة :
يخص نعيشو مع شخص محملناهش باش نبغو المساكن و لا الحقيقة باش يرضي غروره التافه
كامل بنات مساكن و عشنا بالحلال و والدينا تعبو علينا معندها اي علاقة
شفتهم اولاد 100 صبيغة في الشعر و سروال مقطع و لا ادب لا قراية لا اخلاق لا تربية 5 علب تاع دخان في النهار من بعد يخطب ترفض متحبوش زوالي
علاش قاع الحجات لي مقبلتهمش مبانولكش من غير الزوالي
الزوالي لي يشقى و يتعب و الله غالب ملحقش هذا سيد الرجال مي باش تقعد مقابل يماك 24 ساعة و تصرف عليك تمدلك 20 تاع الركبة باش تشري دخان و تجي تحكي على البنات ناس عيب و عار خلي عندك غرام رجولة ولا انقرض شفتو شحال ساهلة
البنات غلاو المعيشة البنات دارو بنات ضلمونا
والله كيفنا كيفكم كل انسان يتعب
المهر غالي بزاف و الجهاز اغلى انت تخطب تتعب و هي تتعب هذي دنيا بغيت ولا كرهت مكانش لي جاياتو باطل مكانش لي قاعد و دراهم يجوه من سما مع الشتاء
بنات يبغو الحديدة علاش نتا متبغيش تكون عندك سيارة !؟؟ قول متبغيش هاه هدر
لا ليك يجوز و لينا لا يجوز
الىجل عيب يحكي على بنات الناس و البنات تاني عيب تبقا رجال رجال حشومة
انت عندك مبدأ قناعة خليه ليك طبقه في حياتك مشقاش تمشي بنات بنات
شفتهم بعينيا البنات و يبدو يحكو مخلاو فيهم والو من بعد يجو اهله لبسة الله لا يشوفكم انحطاط يرجع خروف حداهم يبعبع نتم حداهم يرجع انا نبغي نعيش حياتي و نبغي اها يالكداب قبيلات كانو بنات ناس ميحشموش
فهمتوني نضن علاش قلتلكم كل انسان يصلح نفسه و عيوبه احسن ميتبع عيوب الناس
مشقاش تحكي على الناس كنت راجل ولا مرة ..دنيا دور اليوم ليك و غدوا عليك
في بلادنا كاين زوج واحد لي شاف شويا ضو ميخليش الباقي يعيشو ولا لي مشافش الضو و يضل قالبلنا المخ
مكانش وسط
و اولاد دزاير ميشوفوش داك الولد لي كيفهم و ميخلوهش يعيش لا يشوفو غير بنت الناس و يحكي على اساس هو جاي من كوكب اكشن
فيق لعمرك اخينا
عيش كما يرضى ربي و خلي العباد يعيشو
نتوما تاني لي تقراو موضوعي مشقاش اقولي فيتامينة تحكي بزاف
و متنسوش دعواتكم بالخير راني محتاجتهم ربي يكملي لي في بالي و يسرلي اموري و يسهل عليا قرايتي
و لي عندو انتقادات و لا اراء يتفضل مي بلا متخلعوني
سلام

 

[Skor m@k]

السلام عليكم
اوووووووو حتى انا توحشت نكتب هنا
أياي ممبعد نولي راهو عجبني السوجي هذا هههههههه​

 

[فيتامين سي]

الفقير هو انسان كيفنا يتنفس ياكل يشرب يعيش يضحك الفقير هو انا و انت و الناس كامل
اليوم كاين و غدوا لا البارح كنا و اليوم تبدلنا
الاحتقار مكانش لي يبغيه
انا و هي و اي وحدة نبغي الرجل لي بكلمتو يتقاس رجل كلمة حر 100000 سطر على رجل
ماشي يقولك انا رجل و يبقا في مقهى يعس لي رايح و لي جاي
هنا حقيقة وصلنا قمة الانحطاط
الرجل لي يتعب باش يفرح اهله
اي اب يحب يشوف بنتو هانية
لما يخطبوها يحط شروط اولا اذا عمله فيه حرام ميقبلش و يزيد تبقا المبادئ
رغم عرابة الموقف ابي ميقيلش بسائق طاكسي ماشي ميقبلش زوالي كما يقولو لي يقعدو 24 ساعة حدا ماما الغالية يعسو الجترة واش حكات بصح طاكسي يطلع 1000 بنت و كل بنت يحكي معاها و ينسى اخلاقه و دينه بحجة خدمتي و اختي مننسوش خلوة اكيد بابا يحب نكون هانية
من تفاهة التفكير مرات شخص يقولك رقمك كي متقيموش متبغوش الرجال متبغوش المسكين مضحك
المسكين يعرف باب الدار
شباب اليوم تخباو مور جملة باش يديرو الممنوع كما لي يشرب و يدروgي و يقولك الله غالب مكانش معيشة في دزاير
ناس تتعب و ناس رجل على رجل و يعلق

 

[فيتامين سي]

السلام عليكم
اوووووووو حتى انا توحشت نكتب هنا
أياي ممبعد نولي راهو عجبني السوجي هذا هههههههه​

مرحبا بيك عمو سكاكر
راني نستنا في ردك و نقاشك و تخربيشك

 

[لؤلؤة قسنطينة]

السلام عليكم
عجبتني غير لي عندو انتقادات يتفضل بصح ماتخلعونيش هههه درك نخلعك مالا ههه غير نضحك
والله موضوعك عجبني بزااف يعطيك الصحة، مع أنو الكلام لي قلتيه كامل مالفين نديرو عليه مواضيع
لكن لي عجبني في موضوعك أنك ماحقرتي الرجل ماحقرتي المرأة، عطيتي حق الزوالي مسكين لي يتعب ويشقى
ولي مايلقاش اللقمة تجيه ساهلة لفمو، وحكيتي على بنات الناس لي ولاو يديرو عليهم اشاعات وقلتي في الاخير
كلام عجبني بزاف وهو الانسان لازم يشوف لعيوبو ويحاول يصلحهم ماش يشوف لعيوب الناس وهو معمر عيوب
خاطر هاد التفاهات تاع البنات فيهم والرجال فيهم تلقاي صغار العقول يدورو في الفايس بوك فارغين شغل يبداو
يتقابدو ويسبو ويجوزو في الوقت خاطر كي يدير ديكونيكتي يعيط لوحدة يحكي معاها يعني عندهم انفصام في الشخصية
اما الناس الواعية راهي تعرف الطريق الصحيح، الراجل تاع الصح تلقايه يخدم ويزدم ولو يجيب زوج دورو
ويروح يقصد بنت الناس الشريفة العفيفة لي تفهمو وتقدر ظروفو، والمرأة الحقيقية هي لي تحوس على راجل صاحب اخلاق
ونهار يجي يخطبها تفتخر بيه، يعني الناس الواعية راهم عايشين حياتهم ولي يضلو يعلقو ويتفلسفو راهم فارغين شغل
ومالحقوش لواش لحقو الناس قبلهم على هادي كلشي يعلقو عليه
المهم مالقيت واش نزيد موضوعك ماشاء الله فيه كلشي وربي يكون في عون كل شخص يتعب باه يجيب لقمة حلال
حتى ولو كانت زوج دورو ربي يباركلو فيهم ويوفقو
شكرا فيتامينة على الموشوع الشباب
تحياتي
​

 

[طموحة]

السلام عليكم فيتامينة
موضوع حساس مفادو انه كل من الذكر و الانثى عندو هموم خاصة وفي نفس الوقت كل منهما متجاهل الطرف الثاني وكل منهما يشير باصبع الاتهام على الاخر
وطبعا كاين في كلا الجهتين ناس لاعلاقة شغل حبطو من المريخ في معتقداتهم وانا نشوف انو لايصح ان تحكم على الجنس الثاني على حساب هادو الناس
وعلى قضية الزوالي و القبول و الرفض انا نهدر على نفسي انظر نظرة احترام لكل من يسعى لكسب رزقه بالحلال حتى لو كان الشهرية فرنك
وانظر نظرة اشمزاز لكل شخص متواكل حتى لو ملك مال الدنيا
فقط الانسان ما يتحجج بالفقر على حوايج معندهومش علاقة بالفقر فقرك ليس سبب لسوء اخلاقك ليس سبب لترك دينك
وعندما ترفض عاىلة ما شخص فقير لايعني بالضرورة الفقر هو السبب بل ربما لانه سيء الخلق
وكاين عاىلات تان ربي يهديهم كيما يقولو يرفضو غني سيء الخلق و يقولو عليه ربي يهديه
ومايقبلوش فقير حسن الخلق و يقولو ربي يرزقو
خخخخ خرجت شوية ع الموضوع مي كامل قلبنا راهو معمر من بعض الظواهر
في امان الله وبالنسبة للدعاء ربي يكتبلك كااامل واش راكي متمنية​

 

[Hakan]

انا عجبتني المقدمة ههه والمشكلة انو المعضلة كامل اللي راها تحت المقدمة اسبابها المقدمة نتاع الموضوع {فلسفة ههه}
العدل يانااس العدل يناس العدل يانااس والله اي دولة لما يغيب فيها العدل ويشيع الظلم فيها هكاك واش يصرى
يوم القيامة كي تجتمع الخلائق قبل لا يحاكم الحاكم يحاكم الشعب اللي يقول يوم القيامة {وَقَالُوا رَبَّنَا إِنَّا أَطَعْنَا سَادَتَنَا وَكُبَرَاءَنَا فَأَضَلُّونَا السَّبِيلَا (67) رَبَّنَا آتِهِمْ ضِعْفَيْنِ مِنَ الْعَذَابِ وَالْعَنْهُمْ لَعْنًا كَبِيرًا (68)} لما تشوف مصالح الامن تقهر في الزوالي ولما تشوف مالح الضرائب تقتل الزوالي ثم تعرف انو مكانش معيشة في هذي البلاد
اخطونا من خطبوني اخطونا من زوالي اخطونا من فيكم وعليكم لانو كل هذا مجرد تراكمات نتاع القهر وحنا لانو خوافين وناس جهالا ما نعرفوش القانون اللي يجي يركبنا كي الدواب
نفرغو الزعاف في بعضنا البعض الطفلة تاكل الراجل والراجل ياكل الطفلة انا بصراحة نضن قلت كلمتي في الشطر الثاني نتاع موضوعك في موضوع الاخت @بنت سطيف
حكيم تزحلق من هناا ربي يجيب الخير للبلاد ويحيا الخبز والماطيش مع هذا الليل خخخ سلام​

 

[فيتامين سي]

@لؤلؤة قسنطينة

السلام عليكم
و عليكم السلام و رحمة الله و بركاته
عجبتني غير لي عندو انتقادات يتفضل بصح ماتخلعونيش هههه درك نخلعك مالا ههه غير نضحك
خفت ^^ من وقتاش محطيتش موضوع تعشو تقصفوني و نلم قشي و نهرب :p
والله موضوعك عجبني بزااف يعطيك الصحة،
اللهم امين مع أنو الكلام لي قلتيه كامل مالفين نديرو عليه مواضيع
الموضوع الشائع تاع الدزيريين مكانش لي ميحكيش فيه
لكن لي عجبني في موضوعك أنك ماحقرتي الرجل ماحقرتي المرأة، عطيتي حق الزوالي مسكين لي يتعب ويشقى
الرجل بلا مرة ميسوا و المرة كيف كيف
ماشي لازم يكون زوج بصح يكون زوج او اخ او اب المهم سند في هذي الدنيا و مستحيل نعيشو بلا سند
ولي مايلقاش اللقمة تجيه ساهلة لفمو،
كل انسان يتعب باش ينجح باش يعيش سنة الحياة
وحكيتي على بنات الناس لي ولاو يديرو عليهم اشاعات وقلتي في الاخير
هذا حاجة تغيض ولا اي شخص يقعد يسب يسب يسب و ينسا اهله
تفكرت قصة و حقيقة صرات حكاهالنا عمي
قاللنا في مقهى(منيش نقول عمي مغلطش نقولها و نعاود الرجل لي يقعظ في مقهى يعس الناس ميتسماش رجل فحل ) المهم
قالك واحد كل يوم يسب شوفو بنت فلان و يسب شوفو بنت فلان و يجيبلهم اخبارهم مرة فاتت وحدة لبستها كارثة حتى قالوله هذيك بنتك
يعني دنيا دور لا تقذف المحصنات يجي دورك في اهل دارك
كلام عجبني بزاف وهو الانسان لازم يشوف لعيوبو ويحاول يصلحهم ماش يشوف لعيوب الناس وهو معمر عيوب
انصح مليح مقدرتش ربي يهديهم بصح تعس فلان فلانة و من بعد الكونتور يتمشى و الذنوب يزيدو
خاطر هاد التفاهات تاع البنات فيهم والرجال فيهم تلقاي صغار العقول يدورو في الفايس بوك فارغين شغل يبداو
يتقابدو ويسبو ويجوزو في الوقت خاطر كي يدير ديكونيكتي يعيط لوحدة يحكي معاها يعني عندهم انفصام في الشخصية
يقولون مالا يفعلون
اما الناس الواعية راهي تعرف الطريق الصحيح، الراجل تاع الصح تلقايه يخدم ويزدم ولو يجيب زوج دورو
ويروح يقصد بنت الناس الشريفة العفيفة لي تفهمو وتقدر ظروفو، والمرأة الحقيقية هي لي تحوس على راجل صاحب اخلاق
ونهار يجي يخطبها تفتخر بيه، يعني الناس الواعية راهم عايشين حياتهم ولي يضلو يعلقو ويتفلسفو راهم فارغين شغل
ومالحقوش لواش لحقو الناس قبلهم على هادي كلشي يعلقو عليه
يعلقو لمجرد يحكو ياريت برك يتعلمو و يفيدون معاهم بصح والو لا افادة لا استفادة
المضحك تلقيه يمشي مع بنات تقوله رواح خطب منشرط والو يقوللها لا يخص يروح عند لي ترفضه باش يجي يكتب متحبوش الزوالي
البنت و الولد كيف كيف نروحو لكريق الحلال نسلكو زواج خدمة تعامل كلش
المهم مالقيت واش نزيد موضوعك ماشاء الله فيه كلشي وربي يكون في عون كل شخص يتعب باه يجيب لقمة حلال
اللهم امين
حتى ولو كانت زوج دورو ربي يباركلو فيهم ويوفقو
دراهم الحلال ربي يبارك فيهم و يطرح فيهم البركة
شكرا فيتامينة على الموشوع الشباب
تحياتي
العفو غاليتي
الحمد لله لي عجبك
و الاهم انا ضد لي يحكي في الطرف الاخر مهما حكيت درك فقط لمجرد نقاش
لو نحكو على المجتمع
شخص كمل دا ديبلوم دفع 4 cv و تم الرفض زعف مكانش معيشة في هذي البلاد متبغوش زوالي و رجال
في المقابل لي لقا خدمة دفع 100 و 200 باش صحتله خدمة
يعني تسعى للعمل باش توصل مكانش حاجة بدون مقابل في هذي الدنيا شد مد قعد راك قاعد
العمل تدي غير لي مكتبلك بصح باش توصل لازم تتعب الزواج كيفكيف
تخطب و ترد معندهاش علاقة بالمال و الفقر
تبغي تشري دار تشةف 1000 تشري وحدة عادي
تبغي تشري سيارة تشوف 500
لي تبغي سيارة تبغي تحسن من الوضع المعيشي ماشي متكبرة
كل انسان و عنده نضرة في دنيا هذي انت و انا مختلفين
عادي الاختلاف ميخليش الملل
ماشي لازم وحدة تكون صورة طبق الاصل بصح عيشي وين متأذينيش و منأذيكش
عندك مساحة ليك افكارك قناعاتك مبادئك
الفقر معنده اي علاقة
شحال راني نشعر ربي يبارك
موضوع طويييل كون ناقشوه عمرنا منكملو
بصح الملخص عيس و نعيش مي في حدود الحلال
​

 

[بنت سطيف]

انا عجبتني المقدمة ههه والمشكلة انو المعضلة كامل اللي راها تحت المقدمة اسبابها المقدمة نتاع الموضوع {فلسفة ههه}
العدل يانااس العدل يناس العدل يانااس والله اي دولة لما يغيب فيها العدل ويشيع الظلم فيها هكاك واش يصرى
يوم القيامة كي تجتمع الخلائق قبل لا يحاكم الحاكم يحاكم الشعب اللي يقول يوم القيامة {وَقَالُوا رَبَّنَا إِنَّا أَطَعْنَا سَادَتَنَا وَكُبَرَاءَنَا فَأَضَلُّونَا السَّبِيلَا (67) رَبَّنَا آتِهِمْ ضِعْفَيْنِ مِنَ الْعَذَابِ وَالْعَنْهُمْ لَعْنًا كَبِيرًا (68)} لما تشوف مصالح الامن تقهر في الزوالي ولما تشوف مالح الضرائب تقتل الزوالي ثم تعرف انو مكانش معيشة في هذي البلاد
اخطونا من خطبوني اخطونا من زوالي اخطونا من فيكم وعليكم لانو كل هذا مجرد تراكمات نتاع القهر وحنا لانو خوافين وناس جهالا ما نعرفوش القانون اللي يجي يركبنا كي الدواب
نفرغو الزعاف في بعضنا البعض الطفلة تاكل الراجل والراجل ياكل الطفلة انا بصراحة نضن قلت كلمتي في الشطر الثاني نتاع موضوعك في موضوع الاخت @بنت سطيف
حكيم تزحلق من هناا ربي يجيب الخير للبلاد ويحيا الخبز والماطيش مع هذا الليل خخخ سلام​

كي شفت اشارة باسمي في هاد الموضوع ...جا في بالي "حكيم story"هو اللي كتبه... بمثابة كونتراطاك هههه
شكرا لصاحبة الموضوع على الطرح ...تحياتي

 

[فيتامين سي]

@طموحة

السلام عليكم فيتامينة
و عليكم السلام و رحمة الله و بركاته
موضوع حساس مفادو انه كل من الذكر و الانثى عندو هموم خاصة وفي نفس الوقت كل منهما متجاهل الطرف الثاني وكل منهما يشير باصبع الاتهام على الاخر
طبعا هذي هي كل واحد يبقا يحكي و يتهم في الاخر بصح نسا بلي رانا مجتمع منقدروش نعيشو بلا بعضانا
وطبعا كاين في كلا الجهتين ناس لاعلاقة شغل حبطو من المريخ في معتقداتهم وانا نشوف انو لايصح ان تحكم على الجنس الثاني على حساب هادو الناس
اكيد ..دجا كفاش نحكمو عليهم و البنت عندها اب و اخ و الولد عندو ام و اخت يعني اذا يحكم راه يحكم على اهله قبل كلشي
وعلى قضية الزوالي و القبول و الرفض انا نهدر على نفسي انظر نظرة احترام لكل من يسعى لكسب رزقه بالحلال حتى لو كان الشهرية فرنك
اكيد الحمد لله لي عندنا نفس الفكرة
نضرة احترام و القبول و الرفض نعتبرها حرية شخصية
وانظر نظرة اشمزاز لكل شخص متواكل حتى لو ملك مال الدنيا

فقط الانسان ما يتحجج بالفقر على حوايج معندهومش علاقة بالفقر فقرك ليس سبب لسوء اخلاقك ليس سبب لترك دينك
وعندما ترفض عاىلة ما شخص فقير لايعني بالضرورة الفقر هو السبب بل ربما لانه سيء الخلق
وكاين عاىلات تان ربي يهديهم كيما يقولو يرفضو غني سيء الخلق و يقولو عليه ربي يهديه
ومايقبلوش فقير حسن الخلق و يقولو ربي يرزقو
انا نعتبرها حرية شخصية
ممكن رفضت شخص معندوش دار ماشي بسبب فقير بصح شافت انها متقدرش تصبر متقدرش تعيش نتم متقدرش تربي اولادها تقول من الاول نرفض احسن منطيح في المشاكل كل واحد و الطاقة نتاعو كاين الصبار و كاين لي لا
خخخخ خرجت شوية ع الموضوع مي كامل قلبنا راهو معمر من بعض الظواهر
هههههههه لا مخرجتيش
هو اصلا موضوع اجتماعي كون نحكو فيه منكملوش
نلقو الاسباب و الضواهر و العلاج منكملوش حنا فقط هنا نتعلمو الحوار و نتعلمو من البعض كفاش نعيشو
مجتمعنا معمر بالغرائب
في امان الله وبالنسبة للدعاء ربي يكتبلك كااامل واش راكي متمنية​

اللهم امين ربي يفرحك غاليتي
اسعدني مرورك