لؤلؤة قسنطينة ضيفة العدد الثاني-الطبعة الثانية-طفولتك أيها العضو/ة اللماوي تحت عدساتنا

[لؤلؤة قسنطينة]

مساء النور حبيبتي
اهلا وسهلا بك
اقامة طيبة
جيتك جيتك يا ناموسة كيما قال النمس

مساء الورد والياسمين حبيبتي مليكة
ههههه عجبتني تاع الناموسة هههه، ولا كيما يقول اهليييين هلا والله حيا الله هههه
نروحو للأسئلة، بسم الله​

1_ حبيبتي كيفاش كانت طفولتك؟

طفولتي كانت مزيج لكل شيء، مرح وبراءة وتعب ومشاكل وفرح وحزن ومسؤولية
لكنها تبقى أجمل شيء في حياتي​

2_واش هي اللعبة المفضلة لي كنت تلعلبي بيها؟

الدُمى :Love: كنت نموت على اللعب بالدمية يعني البوبية
ونلبسلها ونمشطلها شعرها ونديرلهم عرس ونزغرت هههه
ونخيطلهم الملابس، يعني كانت من أهم الالعاب لي نحبها​

3_ حبيبتي كنت فبيحة ولا عاقلة؟

ههههه لالا كنت عاقلة خلاص، في الدار هاني نلعب عادي ونضحك ونتقابد مع ختي ههه
بصح ماش لدرجة نسوطي من بلاصة لبلاصة ولا نمس في أي حاجة ونفسد
حطيلي اللعب ونقعد نلعب ولا نجبد ورقة ونرسم ونطيش العالم كامل ورايا هههه​

4_ كانش ديقا درتيها مع بنات الجيران هههه؟

ماكانش، أصلا ماكنتش نخرج نلعب بزاف برا غير من فترة العصر للمغرب
وفي الصيف، ماكنتش نتقابد ولا مع البنات، نشفى عليها وحدة كانت تلعب معايا
وقدي في السن ونحبها بزاف صرا بيناتنا سوء تفاهم بالفم بصح برك يعني ماش حتى شجار
كبير واشيا هي حبت تضرب ختي الصغيرة، وليت دخلت للدار وماحبيتش نزيد نخرج نلعب
ساع جات للدار وطلبت السماح وجابتلي هدية وكتبتلي رسالة اعتذار هههه
كم هي جميلة الطفولة
​

حبوبتي نتمني يعجبوك
ر بي يوفقك
تحياتي:kiss::Love:

أكيد يعجبوني وتعجبيني نتي ككل
شكرا غاليتي على الاسئلة الجميلة
بارك الله فيك
واذا عندك اسئلة أخرى أكيد نتشرف بيها
تحياتي​

 

[Salah eddin]

عندي سؤال جديد ههه

اختي مريم ... كنتي تاكلي الطباشير كي كنتي صقيرة ؟ ههه

​

 

[وحي القلم]

ألف شكرا لك أختي لؤلؤة قسنطينة على الإجابات الجميلة
ربي يحفظك ويعيشك إن شاء الله
وهاذي أسئلة أخرى وجدي روحك أختي ههههه
1- شكون اللي كنت ذابزي معاه أو معاها بزاف وتبشك من شعر بزاف هههه وتعطيك طريحات وتسوطك بزاف ههههه
2- اسم دلعك بالطفولة لحد الآن ينادونك بيه ؟ وماهو ؟
3- من كان يدلعك أكثر أبوك أو أمك في طفولتك ؟
4- شخصيه كرتونية كنت تحبيها ؟ ولماذا ؟


​

 

[زهور الأمل]

السلام عليكم حبيبتي
ان شاء الله ميكونوش
كترو عليك بالاسئلة
زعمة انا ناس ملاح هعهعهع:Love:
المهم متزعفوش مني
وانت لؤلؤة
1 كفاش كنتى تتصرفي في المواقف الصعبة كطفلة ؟
2ماكان اكثر شيء يعجبك في صغرك؟
3كيف كانت ردة فعلك ادا خديتي علامة جيدة/سيئة؟
4اذا مدحوك الكبار على شيء درتيه واش تحسي؟
تخجلي تفرحي او تتجاهلي الامر
5واش كانت اللعبة المفضلة نتاعك؟
6كفاش كانو ينادوك؛(يدلعوك)وهل مازالهم ينادوك بذاك الاسم؟

 

[لؤلؤة قسنطينة]

السلام عليكم
مرحبا ختي مريم فهذا الموضوع الجميل اللي يخلينا نولو نتذكرو كي كنا صغار
الموضوع هذا يخلي كل الأعضاء يولو يتفكرو الصغر ماشي غير صاحبة الاستضافة
عندي شويا أسئلة غدوا باذن الله نزيدو نحطو شويا

وعليكم السلام ورحمة الله وبركاته
اهلا بيك خويا مالك، والموضوع منور بوجودكم وبأسئلتكم الجميلة
ومنها نتفكرو الطفولة تاعنا كامل كيما قلت
ونبداو في الاسئلة على بركة الله
بسم الله

أكبر عيدية ( الدراهم تاع العيد ) لي جمعتيهم في عيد واحد ؟
ههههه والله ماشفيتش بالاك 200 ألف نهدر على الاعياد تاع حياتي كامل
أما تاع صغري بالاك ألف فرنك ههههه لدرجة لي يلقاك يمدلك 5 دج ولا كي يكون حنين بزاف
وماش بخيل يمدلك 20 دج، يسما بكري كنا كيما الروسوفور الصرف بزاف بصح الغلة ماكاين والو هههه

شكون لي كان يمدلك الحصة الكبيرة للأموال فالعيد ؟؟
عندي خالي مازال للآن وانا كبيرة كي يجي في العيد يمدلي 100 ألف ديما يتفكرني انا وختي
ربي يحفظو

كي كانت يماك طيب الحلوى كنت تسرقيلها العجين وتاكليها ؟
أنا كنت مهبلها هههههه
هههههه لالا ماكنتش نسرق، اصلا الوقت هاداك ماكان عندنا الدراهم باه نطيبو القاطو ما نسرق هههه
ماكناش نديرو القاطو من الاساس هاداك الوقت، بصح كنت نسرق عجينة الكسرة ههههه
ساعات ماما كي دير الكسرة تمدلي شوي عجينة وندير الكسرة تاعي طولها 3 سم هههههه

شكون لي كان يفششك ( يدلعك ) فالعائلة ؟
بصراحة كي كنت صغيرة خلاااص كنت أنا أول حفيدة في دار جدي تاع ماما
مالا كانو كامل مفششيني كيما تقولو من خالاتي لجدي وجداتي حتى جدي كان كي يخرج يخرجني معاه
بصح درك كي كبرت تبرا مني ههههه راحت المحبة
جدي بالاك شوي جبد روحو خاطر كبر وجاو جيش تاع أحفاد من بعدي ولا يحبهم خير مني
بصح خالاتي مازالت محبتهم كيما راهي مازالو نحسهم تقول في مكانة الام أو الاخت الكبيرة
ربي يحفظهملي

ماحكاتلكش يماك اذا كنت تعاني من مخارج الحروف كي كنت صغيرة هههه عثير- عصير ؟
هههههه لالا ماحكاتليش واش بيك أنا كنت ذكية من الصغر
كنت برك نقولك الكبش ياكل البريوش هههههههه كي نتفكرها نشبع ضحك
ويخي العبد كي يعود تعبان خلاص يقولك والله طحت "كاو" انا كنت نقولهم طحت كارو هههههه
والله كي نتفكرها نشبع ضحك، نكتب ونضحك ههههه

كي يسقسوك الحلم تاعك واش كنت تقوليلهم ؟
باين طبيبة الله يبارك هههههه
هيه كنت نحب طبيبة ولا معلمة، كنت كل دقيقة نهز اللوحة والطباشير ونبدا ندير في الدروس
بيني وبين روحي هههه كنت نموت على التدريس بالاك كتر من الطب
ومن بعد غير كبرت شوي وليت نحب نكون بيطرية
ساع لا هادي لا هاديك هههه

نحبسو هنا
رانا نوليو باذن الله حطينا العربون هههه​

ههههه عجبتني حطينا العربون
شكرا خويا مالك على مرورك واسئلتك والله شبعت ضحك هههه
ربي يهنيك خويا وانتظر عودتك
تحياتي​

 

[لؤلؤة قسنطينة]

عندي سؤال جديد ههه

اختي مريم ... كنتي تاكلي الطباشير كي كنتي صقيرة ؟ ههه

​

هههههه لالا كنت ناكل الجرذان
غير نضحك لا يحطوها صح هههه
أصلا الطباشير كنت نحبو بزاف مانحبش نفسدو نخبيه في علبة ونكتب بيه من بعد
خاصة اذا كانو عندي ألوان بزاف فيه يعني مستحيل نخسرو في الاكل هههه
وماكانتش عندي شهية جيهتو هههه​

 

[لؤلؤة قسنطينة]

أخي @وحي القلم
وأختي @fadwa maria
اعتذر منكما طاحتلي لاشارج تاع الميكرو
وبالتيليفون الرد يكون أصعب شوي
غدوة بحول الله نكمل نجاوب على أسئلتكم
وشكرا جزيلا لتواجدكم ولاسئلتكم الرائعة ^^
بارك الله فيكم
لي عودة بإذن الله​

 

[آمال بكر]

السلام عليكم ورحمة الله

الطفولة أجمل مراحل عمرنا.. ومن الجميل استذكارها ومشاركتنا لها بالموضوع هاد

فكل الشكر لك أخت أم ياسمين عالموضوع واسمحيلي بطرح الاسئلة على ضيفة الموضوع ^_^

أهلا وسهلا بـ لؤلؤة فلسطين

نورتي حبيبتي

أغلب أهالينا كانو يلقبونا بالقاب ونحنا صغار.. احكيلي شو كان لقبك بالبيت وممكن اذا ما كان الك لقب تحكيلنا بشو كانو يدلعوكي *_^

- تفتكري اصدقاء طفولتك ومغامراتك معهم.. يلا مغامرة صغيرة مع احدى اصدقاء الطفولة حطيلنا ياها هون

- شو كان حلمك وانت صغيرة.. سواء دراسي او حلمك تزوري مكان معين او غيرو وغيراتو >. <

- شي كنتي تخافي منو بصغرك..

ان شاء الله تكون اسئلتي خفيفه لطيفه عليكي وللي عودة مرا أخرى

تحياتي

 

[أم أحمــــد يــسّ]

السلام عليكم...
وإن لم تدعوني فاني رأيت الموضوع صدفة ...
صغيرتي الجميلة ( كيفاه ماتعيطوش في عرس وحدة لماماها؟؟ ياخي حالة هههه)
- وأنا أقرأ صادفتني مشاركة الأخ @فريد أبوفيصل وقلت في نفسي( هاهو سرق فكرتي ههه عذراً)..
كنت سأقول( تعالي ونامي على ركبتي صغيرتي
وحدثيني عن حال صغيرتي؟؟
هل كبرت؟؟ هل صارت مثلما حلمت ذات شتاء؛ بأن ترتدي ماترتديه كل النساء؟؟ ان تلبس فستاناً كعارضة ازياء..ان تداعب خصلات شعرها كل دقيقة امام المرآة؟؟؟
مهما كبرتِ صغيرتي ستبقين في نظر أمك تلك الطفلة البريئة..التي تزينها ابتسامة ملاك..وضحكة ملاك.. ستبقى أناملك تداعب يدي كأنك بنت شهرٍ او شهرين..ستبقى ضحكتك كابنة عامين...
...
حدثيني بنيتي:
- هل كفتكِ أيام الطفولة لتحققي كل أحلامك البريئة؟؟
ان أراد الزمن منحك شوطاً إضافياً للطفولة ماذا ستفعلين فيه؟؟
-حدثيني عن تلك الغصة في حنجرتك...ماذا أخافك وماذا بقي من خوف طفولتك؟؟
-حدثتنا عن دمعة سكنت عيونك الجميلة..وقلتِ " تمييز وعنصرية"؟؟ لما كان ذلك...ما سبب نظرتك تلك ..اتفعل المادة شيئا " أسوداً" بالطفولة؟؟
- اهدتكِ أمك كل الحب وأباك كذلك ، قولي لهما كلمة حفظهما الرحمان...
- لو اعادتنا الطفولة الى حظنها هل كنتِ ستختارين صديقات من المنتدى ليكنّ صديقاتك..اذكري ثلاثة فقط...
- هل نظرتِ يوماً لاحد البيوت وتمنيتي لو كان بيتك ، او لاحد ما وتمنيتي ان كان من اهلك؟؟
- هل امتلكتِ حلماً وحققته؟؟
هل امتلكتِ آخراً ولم يُحقق؟؟
- حين تبكي وتغضب صغيرتي من اهلها وتختلي بنفسها هل تود ان ترجع صغيرة ومدللة كما كانت يوماً،الى ماذا تشتاق؟؟( الله لا يوريك دموع يارب)..
- ......
اتعلمين ان الفضفة على ركبة الوالدة تعتبر جلسة نفسية اصدق من ألف طبيب خاصة وهي تداعب خصلات شعرك..حفظهن الله اجمعين...
آسفة للإطالة ..

 

[لؤلؤة قسنطينة]

مساء النور أخي وعُدنا والعودُ أحمدُ ^^
واعتذر على التأخير
​

ألف شكرا لك أختي لؤلؤة قسنطينة على الإجابات الجميلة
ربي يحفظك ويعيشك إن شاء الله
وهاذي أسئلة أخرى وجدي روحك أختي ههههه

العفو أخي الشكر موصول لك على أسئلتك الطيبة
واللهم آمين أجمعين بارك الله فيك
وأنا مستعدة ههه، نبداو على بركة الله
بسم الله

1- شكون اللي كنت ذابزي معاه أو معاها بزاف وتبشك من شعر بزاف هههه وتعطيك طريحات وتسوطك بزاف ههههه
ههههه ماكنتش نتقابد خلاص حتى بالفم وماكنتش نتشاجر فمابالك بالضرب وولا نجبد وحدة من شعرها
ولا وحدة تجبدني من شعري هههه، كانت أكبر شجاراتي كامل في البيت مع أختي الصغيرة
كاي أختين نتشاجرو على اللعب وعلى أي حاجة تحلى في عيني ولا في عينها، بصح برا ماش مالفة نتشاجر صراحة

2- اسم دلعك بالطفولة لحد الآن ينادونك بيه ؟ وماهو ؟
بصراحة ماعنديش اسم دلع، الاسم الوحيد لي مازالو يدلعوني بيه هو مريومة هههه
سواء من أهلي ولا من أهل ماما أو بابا

3- من كان يدلعك أكثر أبوك أو أمك في طفولتك ؟
بصراحة والديا فيزوج ماش مقصرين معايا، لكن بابا مايعبرش على حبو ولا دلعو ليا من غير مناداتي
بمريومة كيما قلت سابقا، ويعبر على حبو بشراء حاجة نحبها مثلا، عكس ماما هي لي تبين محبها
وتبين دلعها بالكلمات الحلوة والطيبة، أما بابا دلعو ومحبتو كان يبينها كي يعيطلي ويقعدني قدامو
ويشاورني في حاجة مهمة ويسمع رايي حتى ولو ماياخدش بيه يعني كان عاطيني قيمة كيما نقولو
والحمد لله

4- شخصيه كرتونية كنت تحبيها ؟ ولماذا ؟
أنا حتى لحقت لليسي ومازالني مغرمة بالشخصيات الكرتونية ههههه حتى لدرك ومازال فيا هاداك المرض هههه
في صغري مانشفاش بزاف على أقرب شخصية لنفسي لكن نظن ربما هي آش من رسوم متحركة تاع بوكيمون
والسبب لأنو شخصيتو جيدة وتعاملو مع بوكيموناتو مليح بزاف ههههه
والله شي يضحك هههه، هادي في فترة الابتدائي بصح من المتوسط وروح شخصية كيلوا من رسوم القناص
هي المحبوبة عندي لدرجة عدت كي نرقد نشوفو في المنام هههه
​

شكرا ليك أخي على الاسئلة الطيبة والله شبعت ضحك على روحي ههههه
تفكرت الطفولة الجميلة
بارك الله فيك على تفاعلك في الموضوع ربي يهنيك
واذا أي أسئلة أخرى أكيد نتشرف بيها ^^
تحياتي​

 

[وحي القلم]

مساء النور أخي وعُدنا والعودُ أحمدُ ^^
واعتذر على التأخير
​

شكرا ليك أخي على الاسئلة الطيبة والله شبعت ضحك على روحي ههههه
تفكرت الطفولة الجميلة
بارك الله فيك على تفاعلك في الموضوع ربي يهنيك
واذا أي أسئلة أخرى أكيد نتشرف بيها ^^
تحياتي​

أهلا أختي مريومة
الحمد لله على سلامتك
وألف شكر على إجاباتك الجميلة التي سمحت لنا بالغوص في طفولتك الرائعة
ربي يحفظ لك والديك ويرضيهم عليك تترباي في عزهم إن شاء الله
ههههه مدابيك توجدي روحك للأسئلة التي ستطرح عليك فيما بعد
إستمتعنا بإجاباتك عن جميع أسئلة اللماويين الكرام عن طفولتك
موفق بإذن الله أختي
تحياتي


​

 

[لؤلؤة قسنطينة]

السلام عليكم حبيبتي
ان شاء الله ميكونوش
كترو عليك بالاسئلة
زعمة انا ناس ملاح هعهعهع:Love:
المهم متزعفوش مني

وعليكم السلام ورحمة الله وبركاته
مساء الورد حبيبتي وآسفة على التأخير في الرد
وأكيد مانزعفش منك حبيبتي أسألي كيما تحبي ووقت ما تحبي راهو عاجبني الحال والله هههه
يعني خودي كل راحتك ومرحبا بيك في أي وقت
ونبداو نجاوبو على الأسئلة
بسم الله
​

وانت لؤلؤة
1 كفاش كنتى تتصرفي في المواقف الصعبة كطفلة ؟

كنت نتعامل أو نتصرف حسب الموقف لي نكون فيه
كنت علابالي بلي لازم نتحمل المسؤولية وحدي وماكانش لي يوقف معايا ولا ينعتلي
مالا كان لازم عليا نتخذ قراراتي بنفسي وفي أسرع وقت خاطر بعض المواقف ماتسمحش الانتظار
​

2ماكان اكثر شيء يعجبك في صغرك؟

البراءة، والسعادة هاديك لي في القلب رغم كل الصعاب
يعني مجرد تهزي ورقة وقلم وتبداي ترسمي تنساي العالم كامل
ماش كيما دركا كلشي متوفر بصح السعادة هاديك الداخلية ماكانش للاسف
وزيد النية لدرجة تمشي برا وتحطي في قلبك بلي العالم مسالم، عكس دركا في نص دارك وتخافي
​

3كيف كانت ردة فعلك ادا خديتي علامة جيدة/سيئة؟

رايحة تكشفيني يا مصيبة ههههه
كي كنت ندي علامة مليحة باينة نفرح بزاف وغير ندخل للدار نخبر ماما بيها
بصح كي تعود علامة ماش مليحة، ساعات نبداها بالبكاء في القسم نبرد قلبي
أما ورقة الامتحان كانت فيا طبيعة ماش مليحة هههه وهي نخبي الورقة لي فيها علامة سيئة هههه
نخليها في المحفظة ونخبيها مليح، مع أنو والديا ماش من النوع لي يضربو ولا يعاقبو
بالعكس دايما من الصغر مفهمينا بلي لي يقرا راهو يقرا لعمرو ماش لوالديه
يسما هادي عادة سيئة كانت فيا هههه ومن بعد نحيتها​

4اذا مدحوك الكبار على شيء درتيه واش تحسي؟

نحس روحي حاجة كبيرة ههههه خاصة التخربيش ورا التلفاز
من صغري كي تكون ماما ساعات تتفرج وتروحلها الصورة ولا الصوت ندخل انا ورا التلفاز
ونبدا نخربش في الخيوط حتى ترجع الصورة والصوت ونحس روحي درت حاجة كبيرة هههه مزية لي ماشعلتش فيا النار​

تخجلي تفرحي او تتجاهلي الامر

أكيد نفرح كي تعود من بابا ولا ماما أما من عبد براني نخجل بكل تأكيد ​

5واش كانت اللعبة المفضلة نتاعك؟

كيما قلت سابقا اللعب بالدمى، يعني مهبولة بحاجة اسمها بوبية، نحب نمشطلها ونلبسلها
كان حلمي يوما ما نقتني الدمى هادوك لي كبار على شكل رضيع وتوكليلو وتلبسيلو لكن للاسف ماقدرتش نشريهم
نهار يجيو ولادي نشريلهم ونلعب معاهم هههه​

6كفاش كانو ينادوك؛(يدلعوك)وهل مازالهم ينادوك بذاك الاسم؟

كيما قلت للأخ ماكانش عندي اسم دلع معين
من غير مريومة لي كانو يناديوني بيه أهلي سواء القراب ولا البعاد​

شكرا حبيبتي على أسئلتكِ الطيبة والجميلة
استمتعت بالإجابة عنها
وإذا لديكِ المزيد منها فأكيد سأتشرف بها
شكرا غاليتي على كرم مرورك
تحياتي​

 

[زهور الأمل]

شكرا حبيبتي على أسئلتكِ الطيبة والجميلة
استمتعت بالإجابة عنها
وإذا لديكِ المزيد منها فأكيد سأتشرف بها
شكرا غاليتي على كرم مرورك
تحياتي​

وعليكم السلام
مشكورة حبيبتي
على الاخذ بعين الاعتبار هته الاسئلة
بارك الله فيكي ولكي

 

[لؤلؤة قسنطينة]

السلام عليكم ورحمة الله

الطفولة أجمل مراحل عمرنا.. ومن الجميل استذكارها ومشاركتنا لها بالموضوع هاد

فكل الشكر لك أخت أم ياسمين عالموضوع واسمحيلي بطرح الاسئلة على ضيفة الموضوع ^_^

وعليكم السلام ورحمة الله وبركاته
أهلا بكِ أختي الكريمة سعيدة جدا بتواجدكِ هنا
وكما قلتِ جميلة هي ذكريات الطفولة وكثيرا ما نسعد بتذكرها
ومرحبا بكِ غاليتي وبأسئلتكِ الطيبة​

أهلا وسهلا بـ لؤلؤة فلسطين

نورتي حبيبتي

النور نورك غاليتي
وأعجبني لقب لؤلؤة فلسطين كثيرا، صحيح نحن أبناء الجزائر
ولكن حب فلسطين يجري في عروقنا
ونبدأ بالإجابة على الأسئلة
بسم الله
​

أغلب أهالينا كانو يلقبونا بالقاب ونحنا صغار.. احكيلي شو كان لقبك بالبيت وممكن اذا ما كان الك لقب تحكيلنا بشو كانو يدلعوكي *_^

بصراحة كما قلت سابقا لم يكن لدي لقب معين أو اسم دلع معين
ولأن اسمي مريم فكان اسم دلعي مريومة ^^
​

- تفتكري اصدقاء طفولتك ومغامراتك معهم.. يلا مغامرة صغيرة مع احدى اصدقاء الطفولة حطيلنا ياها هون

صراحة كما ذكرت سابقا لم يكن لي أصدقاء منذ الصغر هههه
فقط بعض بنات الحي كنت اشاركهم اللعب في بعض الأحيان
لكنني لم أكن من النوع المغامر الذي يبتعد عن البيت ويقوم بمغامرات خطيرة تبقى عالقة في الذاكرة
كنت أخرج للعب وأحمل معي الحبل الذي نقفز عليه وأخرى تحضر كرة ونبدا اللعب معا
بمجرد ما يؤذن آذان المغرب علي العودة للبيت لأن والدتي لا تسمح لي باللعب بعد المغرب
لذلك ليس لي مغامرات معينة أتذكرها​

- شو كان حلمك وانت صغيرة.. سواء دراسي او حلمك تزوري مكان معين او غيرو وغيراتو >. <

كانت لدي الكثير من الأحلام، هناك منها المادية مثلا كالحاسوب والهواتف النقالة وغيرها من الأمور
التي امتلكت بعضا منها الآن، وهناك أحلام بعيدة مثلا كالعيش في بيت مليء بالدمى والالعاب هههه
أو زيارة فرنسا وهذا البلد بالذات كنت أتمنى زيارته في الصغر لأنني كنت أظن أن ألعاب الباربي تباع فيه فقط هههه
كذلك ولأنني كنت أهوى الرسم كنت أتمنى أن تعرض يوما ما رسوم متحركة وأكون أنا من ترسم شخصيات هذا الرسوم
وكذلك تأليف القصص منذ طفولتي ومن المدرسة الابتدائية كنت أعشق ما يسمى بتأليف القصص
أما الحلم الدراسي كنت دائما ما أتمنى التفوق في دراستي والوصول لمنصب الطبيبة أو المعلمة لأنه كان حلم جميع الأطفال في ذلك الوقت
ولكن كان للواقع حديث آخر وما أجمله من حديث ^^ لأن اقدار الله دائما هي الأجمل
​

- شي كنتي تخافي منو بصغرك..

الظلام، والعجائز هههه اقصد كبار السن الذين يتسولون في الشوارع دائما ما أتخيل أنهم سيقومون باختطافي
مع أنني عندما كنت أدرس في المتوسط كنت على وشك التعرض لحادث اختطاف لولا ستر الله
ربما هذه كانت أكبر مخاوفي في ذلك الوقت​

ان شاء الله تكون اسئلتي خفيفه لطيفه عليكي وللي عودة مرا أخرى

تحياتي

أكيد اسئلتك خفيفة وظريفة ورائعة مثلكِ عزيزتي
سررتُ جدا بتواجدك وبأسئلتكِ وأكيد أتمنى عودتك فهذا يشرفني
شكرا غاليتي على كرم مرورك
ربي يحميك
تحياتي​

 

[حلم كبير]

السلام عليكم ورحمه الله وبركاته

الطفولة آه يا الطفولة

شكرا جزيلا للأخت @أم ياسمينdz على هذا الموضوع وعلى استظافة الأخت الكريمة @لؤلؤة قسنطينة في هذا العدد أخت كريمة وطيبة ما شاء الله لا أشك لحظة أنها كانت هادئة في طفولتها وخجولة ....

بارك الله فيكما أختي الكريمتين ....

الأسئلة كامل سألوهم ما خلاو والو ههههه

عندي سؤال
أنا حتى وكبرت مزال فيا ذاك الانسان الصغير دائما ...ومواقف كي نتفكرهم نحس بنفس الاحساس اللي حسيتو وأنا صغير .... تڤول صراتلي اليوم ...
هل أنت ثاني تحسي هذا الإحساس ولا لالا ؟؟؟؟
ربي يحفظك أختي الكريمة
أكيد كنتي تشبهيلها كي كنت صغيرة ههههه
هدية بسيطة

ههههه

نكبر ونجي يا أهل اللمة ونعيا مشرفة وتستعرفو بيا ..هاااا



تعرفو نكبر ونوريلكم ،...أستناو



إحتراماتي العميقة أختي الكريمة
​

 

[Skor m@k]

السلام عليكم
لقيت وحد الصورة شفتها تفكرت معانات الصغر
ماجيت حفظتها حتى شبعت ضرب من عند يما واع واع واع
مدام سوري مزيا جات فارة لوكان جات طفلة مزالني للضرك نحبها ههههههه
واش ختي مريم كنت تتفاعلي عاطفيا مع القصص والأشعار تاع كتب القراءة كيما حالي هههه

​

 

[آمال بكر]

ما شاء الله عليكِ
إجابات حلوة
كنت افكر انك فلسطينيه من الاسم ... بس من غير انتباه قرأتو غلط
أهلا وسهلا فيكي وربي يسعدك

نكمل الجوله ويلا شوية أسئله تانيين

- مسلسلك المفضل سواء كرتوني أو غيرو
- انت من الأطفال الخجولين ولا كنتِ جريئة ولا كنت من الاطفال المشاكسين يعني لمحة بسيطة

- صورة لك بمرحلة الطفولة , , إن امكن طبعاً السؤال هاد اختياري *_^

- شخصية محببه اليك في الطفولة .. سواء شخصية حقيقية أو حتى كرتونيه
- لونك المفضل ونوعية الملابس المفضلة بصغرك..ضحكينى عليكي شوي كنتي من البنات لكيوت يلي بحبو الفساتين ولا حسن صبي هههه ^_^

وبس , هلا رح أقرأ ردودك ع الاسئلة .. واعذريني ادا فيه شي من اسئلتي مكرر بس لاني لافتح من التلفون بستصعب اقرأ كل التعليقات والاسئلة

تقبلي مروري وفائق الإحترام لكِ وللأعضاء الكرام

^_^

 

[لؤلؤة قسنطينة]

السلام عليكم...
وإن لم تدعوني فاني رأيت الموضوع صدفة ...
صغيرتي الجميلة ( كيفاه ماتعيطوش في عرس وحدة لماماها؟؟ ياخي حالة هههه)

وعليكم السلام ورحمة الله وبركاته
مساء الورد والياسمين حبيبتي أحلام
للاسف راهي الإشارات ماوصلتش للأعضاء ساعات مايلحقوش
هههههه راكي تشوفي من المفروض نتي اللولة لي تحضري
​

- وأنا أقرأ صادفتني مشاركة الأخ @فريد أبوفيصل وقلت في نفسي( هاهو سرق فكرتي ههه عذراً)..
كنت سأقول( تعالي ونامي على ركبتي صغيرتي
وحدثيني عن حال صغيرتي؟؟
هل كبرت؟؟ هل صارت مثلما حلمت ذات شتاء؛ بأن ترتدي ماترتديه كل النساء؟؟ ان تلبس فستاناً كعارضة ازياء..ان تداعب خصلات شعرها كل دقيقة امام المرآة؟؟؟
مهما كبرتِ صغيرتي ستبقين في نظر أمك تلك الطفلة البريئة..التي تزينها ابتسامة ملاك..وضحكة ملاك.. ستبقى أناملك تداعب يدي كأنك بنت شهرٍ او شهرين..ستبقى ضحكتك كابنة عامين...
...

وجمييل جدا هذا التخيل حتى أنه يبعث في النفس الاطمئنان والسكينة
وأكيد أي شخص في هذا العالم يتمنى أن ينام على ركبة والدته ويتحدث عن كل ما يجول بقلبه وعقله
من ذكريات وأحلام ومستقبل بعيد، لذلك دعيني أعيش الوضع وأنام على ركبتك وأحدثك لبعض الوقت عن أحلام تلك الصغيرة
التي كانت تتمنى أن ترى نفسها وهي فتاة ناضجة وابنة العشرين، ولكن مرت العشرين ولم تشعر حتى بمرورها
ولكن ستبقى تلك الاحلام جميلة حتى وإن لم تتحقق​

حدثيني بنيتي:
- هل كفتكِ أيام الطفولة لتحققي كل أحلامك البريئة؟؟

ما كنا لا ندركه في صغرنا أن الطفولة في حد ذاتها كانت حلما جميلا سنستيقظ منه بمجرد أن نكبر
لذلك ربما تعثرت في طفولتي ولم أتمكن من تحقيق الكثير من الأحلام حينها ولكن بعدما كبرت أدركت أنني حققت أجمل حلم
وهو أنني عشتُ تلك الطفولة بكل ظروفها، ربما لم يحالفني الحظ حينها لأشتري الكثير من الألعاب أو لأرتدي
ملابس مناسبة لسني حينها والأكثر شهرة وانتشارا بين أبناء سني، ولكنني تذوقت طعم الطفولة بحلوه ومره
وهذا يعتبر أجمل حلم
​

ان أراد الزمن منحك شوطاً إضافياً للطفولة ماذا ستفعلين فيه؟؟

آه يا أحلام لو نديرلك كابتير إيكرون لمخي وواش الصور لي جات فيه كي قريت هاد السؤال
يعني قد مانحكي مانقدرش نوصف شعوري، جاتني في بالي بعض اللحظات حابة نزيد نعاودهم
يامات كنت نروح نبات عند دار جداتي تاع ماما نقعد عندهم يومين ولا 3 ونهار يجيو والديا يديوني تقولي خالتي
قوليلهم يخليوك تزيدين نروح نتوسل لبابا نقولو نزيد نهار برك يولي يخليني ونموت بالفرحة خاصة أنو خالاتي تما معظمهم
ماش متزوجين، كي كنا نتجمعو في دار جداتي ربي يرحمها مع خالاتي كذلك والضحك والتمسخير في وقت القايلة
يلمونا حنا وبنات خالي يفرشولنا بساط ويقولولنا لازم ترقدو ونبقاو نتمتمو بلعقل بيناتنا هههه
يعني ذكريات جميلة جدا وماتتنساش ونتمنى نعاودها كيما راهي
​

-حدثيني عن تلك الغصة في حنجرتك...ماذا أخافك وماذا بقي من خوف طفولتك؟؟

أنو يتم اختطافي في الطريق، كنت كل يوم نروح من المدرسة بكابوس الاختطاف ولا انسان يتعرض ليا في الطريق
خاطر من لي كنت نقرا في الابتدائي ونرجع للبيت وحدي والطريق بعيد ووسط الحافلة ومسؤولية اختي معي
كان هذا أكبر كابوس في حياتي وكبر معايا لدرجة درك كبيرة كي انسان يبقى يشوف معايا ولا نتوسوس ونخاف
حتى أني مرة قريب تعرضت لحالة اختطاف من عجوز وعجوزة
​

-حدثتنا عن دمعة سكنت عيونك الجميلة..وقلتِ " تمييز وعنصرية"؟؟ لما كان ذلك...ما سبب نظرتك تلك ..اتفعل المادة شيئا " أسوداً" بالطفولة؟؟

المادة والحقد والكره، كل هذه تصنع شيئا أسودًا بالطفولة حتى ولو براءة الطفل ماتخليهش يلحق لهاد الافعال السيئة
بصح هكاك ويفهمها ويحس بيها ولو جزء صغير منها، تدخلي للمدرسة الابتدائية وين كامل صغار وكامل سواسية من المفروض
بصح حتى تما كاين فرق كبير، وعلى هادي كلما ندخلو نقراو في أول عام يسقسيونا واش يخدم باباك باه يبدا الفرق بين التلاميذ
ومن بين هاد الأمور كاينة القصة لي حكيتها للأخ، تاع زميلتي في المدرسة لي قستها في عينها بالبارابلوي بدون قصد خاطر كنت هازتها
ودزونا من الخلف وكنا واقفين في الدروج يعني هي تحتي مباشرة، والمشكلة الطفلة هادي بنت شخصية مهمة يعني باباها مير
وشوفي المدرسة كيفاه تقلبت غير شافوها تبكي قالولها شكون قاسك وكي قاتلهم انا الدنيا تقلبت شبعو فيا سب وشتم يعني خصهم برك يضربوني
وانا حكمت الدمعة هاديك تاع الظلم في عيني وفي قلبي، وبلا بزاف مواقف قداه من مرة يجيو يديرو مسابقات بين المدارس ونحب نشارك في النشاطات
ونحفظ اي حاجة يمدوهالي وفي اللخر ينحيوهالي ماعييت كاين بعض الاساتذة أثناء تحضير النشاطات يجيو يسقسيو عليا يقولو للاستاذة
وينها هاديك لي كانت تتدرب من قبل تعرف تقدم روعة وتقولهم المعلمة تاعي نحيتها وانا نسمع ونفيق بواش صاري، وخلي بزااف مواقف
تخليك تفهم ونتا في هاداك السن بلي المادة هي كلشي وقادرة تتغلب على ضمير وانسانية البشر، أما الحقد والكره أنو تلقى ناس من عايلتك
وقراب ليك لأنهم يكرهو والديك يكرهوك نتا تاني بدون سبب، تروح عندهم ضيف ونتا صغير وتسمعهم يهدرو عليك بأبشع الكلام صدفة
ونتا صغير عمرك بين 5 و6 سنين وهاك تفهمها وتخبيها في قلبك مع أنو سنك مازال غير مناسب لسماع هاد الكلام
لذلك حتى البراءة والطفولة ويمكن للبشر ان يلونوها بالسواد للاسف​

- اهدتكِ أمك كل الحب وأباك كذلك ، قولي لهما كلمة حفظهما الرحمان...

نقولهم ربي يطول في عمركم ويحفظكم لينا، خاطر تعرفي من الصغر ماكناش عايشين كأب وأم وأطفال
لا كنا عايشين كأصدقاء وكإخوة في نفس البيت، صح أنو الاب والام كانو يتحملو كل الظروف
ولكن حنا عمرنا لا حسسناهم بلي رانا اطفال ولازم تشريولنا ولازم تديرولنا وين خليناهم يباتو الليل يخمو كيفاه يديرو معانا
بالعكس كنا نتشاركو معاهم المسؤولية كلي رانا شخص واحد، كي نشوفهم حاصلين في حاجة نقولهم اعتامدو عليا
انا نحكم عليكم المسؤولية، عشنا ماش برك كعائلة عمرنا لا تذمرنا خاطر العشاء ماكانش ولا الغداء ماكانش
والدينا حسسونا كلي راكم ماش ولادنا راكم شخص واحد وحنا كامل نشكلو شخص واحد
نتشاركو الهموم والظروف، يعني كي نتفكر التلاحم هاداك لي غرسوه فيه والدينا منذ الصغر نزيد نحب طفولتي كتر رغم الصعوبات لي فيها
وكتر خيرهم رغم ظروفهم الصعبة كانو ينحيو من لحمهم ويرضيونا بأبسط الامور ويفرحونا
فربي يرزقهم الجنة ويجعلهم تاج فوق ريسانا يارب​

- لو اعادتنا الطفولة الى حظنها هل كنتِ ستختارين صديقات من المنتدى ليكنّ صديقاتك..اذكري ثلاثة فقط...

حبيباتي وأخواتي لو يعود بي الزمن للوراء أكيد سأختارهن كصديقات
وسنمضي معا أيام الطفولة الجميلة، وصراحة اختيار 3 عضوات قليل جدا هههه لأني لو بيد نختارهم كلهم
ولي قراب وعزاز عليا بزااف، منهم أنتِ وليليا حتى ولو عمركم أكبر من عمري بصح نتخيل طفولتي معاكم
(نتي ساعات تكوني في دور الأم ساعات في دور الصديقة هههه)
كذلك اسماء وإيمان وماجدة وهدى وسارة وفاطمة والكثييير من العضوات لو نكمل نكتب اسماءهم كامل
لأنو بزاف بنات هنا عزاز عليا صح ونحبهم ونتمنى يكونو أخواتي ماش غير صديقاتي
​

- هل نظرتِ يوماً لاحد البيوت وتمنيتي لو كان بيتك ، او لاحد ما وتمنيتي ان كان من اهلك؟؟

بالنسبة للبيت نعم ومازلت للآن كلما نشوف بيت نتمنى يكون بيتنا
بكري لما كنت نقرا في الابتدائي ويحكيو لي يقراو معايا على بيوتهم ولي عندو 5 غرف ولي عندو 4
وغرفة للأطفال وغرفة للذكور وغرفة للإناث كنت نبقى نشوف كأي طفل
بصح دركا كي كبرت وليت نقنع بالشي لي مدهولنا ربي ونشوف ديما لي أقل مني وظروفهم اسوء من ظروفي
والحمد لله دائما وأبدا
اما عن الاهل فجامي تمنيت أهل غير أهلي كنت نتمنى برك ساعات لو عندي أخ ولا أخت أكبر مني
يتحمل في بلاصتي المسؤولية ونفتخر بيه قدام زملائي كيما كانو هوما يفتاخرو بخاوتهم وينعتوهملي كي ندخلو للمدرسة
لكن معليش كبرت ووليت أنا المثال لي تشير ليه أختي وتقولهم بكل فخر هاديك ختي لكبيرة وهي لي تقريني وتديرلي البحوث هههه​

- هل امتلكتِ حلماً وحققته؟؟

أحلام الطفولة في حد ذاتها كانت برية وبسيطة مثلا كانت أمنيتي تكو نفيه قناة فيها غير الرسوم المتحركة
وجات سبايستون وفرحت بزاف بيها نهار دخلهالنا بابا ماهزتنيش الدنيا كأني نطير وبزاف أحلام بسيطة تحققت
أما الاحلام التي كنت أتمناها ولم تتحقق في الصغر وتحققت في الكبر كيما امتلاك الامور الاكترونية كيم ا الحاسوب والهاتف النقال
والملابس الجديدة والكبر ودخول الجامعة وغيرها من الامور لي هي بديهية ولكن حنا في صغرنا كانت تبانلنا احلام بعيدة ومستحيلة​

هل امتلكتِ آخراً ولم يُحقق؟؟

بيت، مازال الحلم الوحيد الذي لم يتحقق إلى الآن
والحمد لله على كل حال
معرف اذا فهمت هاد السؤالين تاع الحلم مليح ولالا يعني جاوبت حسب واش فهمت برك​

- حين تبكي وتغضب صغيرتي من اهلها وتختلي بنفسها هل تود ان ترجع صغيرة ومدللة كما كانت يوماً،الى ماذا تشتاق؟؟( الله لا يوريك دموع يارب)..
- ......

تعرفي مشكلتي واش هي؟ أني صرالي نمو عكسي ههههه يعني كي كنت صغيرة كنت ماش سامعة بالدنيا
كي تقيسني حاجة نخبيها في قلبي ودرك كي كبرت وليت ابسط حاجة تغيضني وأبسط حاجة تبكيني
كي كنت صغيرة كنت نحكم دمعتي حتى ولو راهي في رموشي نخبيها وكنت نتحمل اكبر مسؤولية يمدوهالي والديا
بصح درك ضعفت بزاااف ونعترف بيها بدون خجل، درك وفي هاد الوقت بالذات عدت نتمنى نلقى انسان آخر يتحمل معايا العبء
نتمنى كي نبكي إنسان يشوف دمعتي ويحس بيها عكس الصغر كنت متحملة كلشي لداخل، يعني لو مرة نضعف ونتمنى نرجع للصغر
نتمنى توليلي قوتي وهاديك الثقة لي كانت عندي بلي كلشي رايح يكون مليح
​

اتعلمين ان الفضفة على ركبة الوالدة تعتبر جلسة نفسية اصدق من ألف طبيب خاصة وهي تداعب خصلات شعرك..حفظهن الله اجمعين...
آسفة للإطالة ..

جميلة جدا كانت هذه الاستراحة حت ىأنني أخذت فيها كل وقتي
وبقيت أتخيل وأسافر من زمن لآخر
شكرا غاليتي أحلام على اسئلتكِ الراقية والجميلة
أتمنى من كل قلبي عودتكِ مجددا، فقد بحثت عن نفسي السابقة ووجدتها في اسئلتك
شكرا حبيبتي على كرم مرورك
تحياتي​

 

[لؤلؤة قسنطينة]

أهلا أختي مريومة
الحمد لله على سلامتك
وألف شكر على إجاباتك الجميلة التي سمحت لنا بالغوص في طفولتك الرائعة
ربي يحفظ لك والديك ويرضيهم عليك تترباي في عزهم إن شاء الله
ههههه مدابيك توجدي روحك للأسئلة التي ستطرح عليك فيما بعد
إستمتعنا بإجاباتك عن جميع أسئلة اللماويين الكرام عن طفولتك
موفق بإذن الله أختي
تحياتي


​

وأهلا بيك أخي والله يسلمك ^^
والشكر دائما موصول لك على تواجدك ووفائك للموضوع واسئلتك الطيبة
التي جعلتني أعود للوراء سنوات وسنوات
اللهم آمين أخي ربي يحفظك وربي يحفظلك والديك كذلك ويطول في عمرهم ويجعلهم تاج على رؤوسكم
هههه أنا مستعدة لها ان شاء الله لأنو الوضع راهو عاجبني هههه عجبتني رحلة الزمن هادي
شكرا أخي بارك الله فيك وربي يوفقك كذلك لكل خير
وانتظر عودتك وعودة اسئلتك القيمة
وشكرا مجددا لكرم مرورك وتواجدك الطيب
تحياتي​

 

[لؤلؤة قسنطينة]

وعليكم السلام
مشكورة حبيبتي
على الاخذ بعين الاعتبار هته الاسئلة
بارك الله فيكي ولكي

حبيبتي أنتِ وأسئلتك مرحب بكما متى ما أردتِ ذلك
تواجدكِ يشرفني ويسعدني واسئلتك على العين والراس
لذلك الشكر موصول لكِ، ربي يحفظك ويحميك من كل سوء
وبارك فيكِ الرحمن وجزاكِ خيرا
تحياتي ​