اليوم نفروها شربة فريك ولاحريرة ولابويون؟

[السلطانة]

السلام عليكم ورحمة اللصه وبركاته



حبيت نعرف ناس اللمة واش يطيبو كطبق رئيسي؟

قولنا انت منين؟ شرق-غرب-وسط-جنوب-دولة عربية أخرى؟


جاري (شربة فريك)
دشيشة (شربة فريك)
حريرة
حساء

ماهي مكونات طبقكم الرئيسي في رمضان؟




تحياتي

 

[السلطانة]

الشرق(أهلي) :

شربة فريك ونقولولو الجاري
مكوناته:
لحم نقليوه مع الزيت بصل ثوم ملح فلفل اسود لازم يكون فيه نعناع مرحي وكسبر حشيش طماطم حب وطماطم علبة يغلي مليح مع الماء ونخليوه يطيب
مباعد نزيدوه فريك يطيب مليح
نزيدو شوي نعناع من فوق وكسبر مقطع
وشهية طيبة.

الوسطاهل زوجي)

لحم نقليوه مع شوي زيت ثوم ملح كسبر (لفاح) طماطم حب وعلب
يغلي مع الماء نزيدوه دشيشة (فريك)
يطيب مليح نزيدوه شوي نعناع وكسبر اخضر وشهية طيبة

مرات انا نطيبو بالثوم والبصل مع بعض

 

[Hakan]

حنا ناس الوسط بصح في دارنا نطيبوها مخلطة فريك مع مرمز ما نديروش الفريك وحدو و الوصفة كما قلتي نفسها .

 

[جليلوس]

حنا بما انو جهة الغرب نقولوا حريرة
ودخلت عندنا عادات الوسط كيما الفريك والجنوب لي يقولولها المرمز

 

[سكون الفجر]

السلام عليكم ورحمة الله وبركاته
عجبتني الفكرة
وبما انو اختكم فلسطينية من يافا وشوي من بغداد وشوي من دمشق
فنحنا كعائلة عندنا سفرة متنوعة يعني ما عندنا هداك التعصب لعادات معينة
بس كمان عندنا طبق رئيسي لازم يكون موجود بكل سفرة وهو شوربة العدس
يعني اذا الشوربة مو موجودة الوالد بضلو عم يقول ما عملتو شوربة عدس حتى لو هداك النهار طبخنا خروف بالفرن
ما بعرف بكرة كيف مع زوجي واهله لازم هداك رمضان اشارككم كل السفر
المهم يا عسل
عندنا عادات مخلوطة فلسطينية بالاساس بس كمان فيها من هون وهنيك

وطريقة شوربة العدس بنعملها
كاسة عدس مغسول
بصلة
ملعقة صغيرة كركم
ملح
وبنحط شوي زيت بالطنجرة وبنضيف عليه البصل المقطع وبعدين العدس
ونحرك شوي وبعدها نضيف الماء بس يغمر العدس واول ما يغلي
نتركه على نار هادية وبنضل نحركو كل عشر دقايق
لحتى ينضج، وبعد هاي الخطوة اما بنخفف الشوربة او نتركها على تقلها

اما الاطباق خلال الشهر فمتل أي إمرأة فلسطينية بعمل جدول قبل رمضان وبكتب كل يوم بيومه
منشان ما فكر بموضوع الأكل تماما
انما كل يوم بعد الإفطار اذا كان عندي اي شي مجمد فبطالعو وبكون جاهز تاني يوم

عجبتني الفكرة كتير
تسلم ايديكِ

 

[إلياس]

بصحتكم بورك فيك، سلمت يمينك

 

[همس الوُرود]

السلام عليكم
حنا فالشرق نديرو شربة فريك الطبق الرىيسي يلي كون مايكونش وتعمريلهم الطابلة بكل انواع الاكل شغل مادرتي والو لازم حضوره
دوك كيفاش نطيبها صراحة كل مرة كيفاش
مرات بالزيت والسمن مرات بالزيت برك .. نحط لحم يتقلى مليح نزيدلو بصل نقليه بيان ونحط ملح وفلفل اسود.. ومرات ندير طماطم حب فلفل و دبشة يترحو ويتحطو مع بعض كخليط يتقلو يبننو الشربة كي يكونو مع بعض مبعد تمرقي شوي تخلي اللحم يطيب ونزيدو طماطم مصبرة وكي تطيب تمرقي مليح وتزيدي فريك بعد ماتغسليها طبعا و تحركي كل شوي و فاللخر فلفل حار يطلق بنتو ويحررها وبصحة والهنا​

 

[أبو خديجة]

صحا فطوركم أولا
حنا في بسكرة عندنا الجاري=شربة فريك
مقادير الله أعلم مش اختصاصي بصح فيه الحمص ولحم غنمي

اليوم شربة فريك و طاجين زيتون و طاجين لحم الحلو و طاجين كفتة و بوراك و سلاطة​

 

[أبو عاتكة]

في الوسط نقولولها دشيشة :
المهم فيها هو فريك + لحم
تبقى دوما طبق رئيسي بلا بيه تحس روحك صايم بعد الفطور في وسط رمضان نبدلو شوية الروتين ساعة الشربة ساعة المڨطعة واحيانا لحريرة. نبداو نتعبو من دشيشة .

 

[أشــواق 19]

حنا شربة فريك
ونطيبوها كيما قلتي تاع الشرق ماشي الوسط..
منحبش شربة تجي بثوم برك البنة اكلل كي تتقلى في البصل ههه