فقه الحوار بين شيخ وعجوزو في طريقهم للدار

أبو عاتكة

فُـ,ـريڊ أبـٌـٌٌـٌٌٌـٌٌـٌوُفُـ,ـيصُـ,ـلُـِـِِـِِِـِِـِـ
طاقم الإدارة
إنضم
1 أوت 2008
المشاركات
8,542
الحلول
4
نقاط التفاعل
13,921
النقاط
2,156
الجنس
ذكر




حديث جرى بين شيخ وعزوجو في الطريق أو كما تخيلت ان يكون:


- ياتلا ق امشي شوية واشبيك عاطلة هاك،،، هنشطي ذوك الركايب ولا خلاص حبست المشينة...

أحوجي انا اللي عاطلة ولا انتالي تقول تمشي عالبيض راني نطاوع في مشيتك منداري راني خليتك ورايا وراني في الدار نعجن في عجينتي للعشا

- امم تعجن العجين ،،
هاذا مطلوع وهاذا طعام راكي تفتلي فيه...
يامرا اسكتي عليا خير شكون ينجمك انتي في البوليتيكات

واش راك تهدر تحت نيفك ياشيخ ،،هذا ماتعرف انت الحاجة اللي نهدرها تناڨرني عليها فيكم مايكفيكم نتوما المشيخ.
مين كنت كيالعودة راك كنت تتمسرد ومتهني وزاهي وذرك كي كبرت راك تزعق وتتمعكس عليا

...(شوف ڨدامك عتبة كبيرة هاك تتكعول ونحصل فيمن يهزك😇

وكان مقبلتش بيك انا شكون كانت تقبل بيك يخي هز الطابڨ يبانو الضلوع ربنا ولك الحمد ،،، حصيرة مقطعة وطاس بلا ذراع ..

... (عندك هاذيك الصاشي تتلهوث بين رجليك ،، يشرو الحوايج ويلوحو الصاشيات في الشوارع.. يخي

حڨا ق معزة تضل سارح بيها من جبل لجبل وكي يطيح الليل تجي تغني عند راسي

اييييه يالدنيا هذا حق شقايا وتعبي نسيج الزرابي وتفلاڨ الحطب ،، عندك حق تقول هاك

...(بالاك الحفرة ڨدامك شوف وين تمشي زين ،،، الله لاتربح اللي حفرها

- يا عزوج ،،، اتصنتي ليا شوية..

الشيب والعيب وتعيطلي عزوج ،، نهار اللي ازوجتني كنت مزلت نلعب في الزڨاڨ مع صحاباتي خدعوني وانت بشلاغمك ،، راك مولا تسعين عام ولا كثر.

- معليهش اللي كتبهالنا ربي راني نفوتها معاك معندناش قير بعضانا. الڨط والفار.

آ فطيمة ...


خلاص راني سكتت متهدرش معايا تقطعتلي النفس في هاذ العڨبة الله لاتربح اللي بيناها.

-تشفاي يا فطيمة نهار اللي دخلنا حنش للبيت وانتي طرتي من الخلعة وبقيتي طالعة فوڨ ظهري نهار كامل وانا هازك وتعيطي وتبكي والله ماني هابطتها،،، منك حتى تلڨاه ونشوفك تڨتل فيه بعيني. شفيتيلها ؟


أه ،،، إييييه ،،، يااااه هاهاها ،،، هاهاها هاذاك راه ثاني يوم من عرسنا هاهاها أخاه وماصار فيا ذاك النهار وكان ماكش انت كنت نهبل..


FB_IMG_1652733179196.jpg


هيا مالا يالعزوج سرحي ركايبك لا ياكلك الحنش راه ق هنا يدور.


----- النهاية


الله يحفظ جدودنا وجداتنا وربي يرحم من مات ونتفكروهم دائما بالدعاء عند سرد الذكريات.
 
آخر تعديل:
الله الله على الزين تاع الزمن الزين و الجيل الزين
هو الحب الحقيقي بتفاصيله الدقيقة لكن بتعبير و مصطلحات محتشمة

شكرا حبيبنا ابوفيصل
 
ايه نية

وزمان مانش فيه تنوفيق
مكانش الخديعة
الحشمة ووووو..... صح حياتهم كانت بسيطة ان صح التعبير طبعا بصح ذيك البساطة هي اللى شبحت الحالة

 
ناس زمان كانت بيناتهم النية صافيا يتعاشرو بلا خداع، كي يكونو يحكيو مع بعض تقول شعلت بيناتهم وعاود يقلبوها زعاقة وضحك، ودرك يضلو يحللو فالهدرا وغي عطيك تغلط من الأول ينويو الزواج حرب أهلية، السيطرة للأقوى الله يجيب الخير.
حوار جميل وصورة أروع يعطيك الصحة على مواضيعك الشيقة.
 
فكرتني بحنينتي مسكينة ربي يرحمك في ديك الرقدة رحتي وخويتي دار علينا 💔🥺
ياحسراه على ليام كي تجمعنا وتبدا تحكي تنسى همك وهم همك بوحد الطريقة هزلية وفيها المعاني تنخلع كيفاش حفظوهم

عجبني الحاج كي يتصنتلها وهي تنڨرش
باينة العشرة عندها مواليها تبارك الله
الله يكبرنا في فراش الطاعة كيما يقولوا

صحيت @فريد أبوفيصل فكرتنا بوحد اليامات ماتتنساش
 
لي عودة ان شاء الله
انت راني نسالك قداش من عودة راه كبرلك الكريدي. نضحك معاك استاذنا هاني نستنى فيك.
 
شكرا لكل من قرأ وفهم وابتسم .
بالرغم من الاهتياج والارتجاج بقيت تساير زوجها في مشيته وحياته وتحذره من مطبات الطريق ومعوقاته خوفا ورفقا وبالرغم من ماضيه الهزيل و زاده القليل لازالت تلازمه لاخر العمر سترا وصدقا وبالرغم من ثرثرتها ونكدها هو لايزال يصمت تقديرا و حِلما وبالرغم من هرمه وعجزه لا زال يفاجئها ويضحكها ودا وحبا.
سلام ورحمة على كل جد وجدة.
 
فكرتني في جدة و جدي ربي يرحمهم
كانوا يعقبوا عندنا رمضان قبل زواجي اروع الايام رمضان يفوت بركة و نور و ونس
كانوا ربي يرحمهم يتناقروا دائما بالهدرة
خطرة جدي زعف من جدة دار لبابا قالوا انا يا بني كون قدلي السعد راني ما نديش هادي خلاص كون راني ديت وحدة يقولولها زينب هههههه و جدة تسمع و ساكتة بابا بدل حديث و قاله يابابا شوف في المانيا يعالجوا الشياب بالرياضة و عندهم دراجات مخصصة ليهم جدي عجبه الحال ولا يسقسي على رياضة الشياب في المانيا و هنا نطقت جداتي قالتله معليش يا وليدي ديرله الرياضة بالاك يرتاح و تنوضلو نوارة في جبينه بالاك تشوف فيه سيتي زينب ههههه اللي يضحك في داخلو و اللي تحت المخدة و اللي هرب للكوزينة و اللي شرقتله و الله كانت احلى ايام
ربي يرحمهم و يجعل الجنة مثواهم آمين
 
فكرتني في جدة و جدي ربي يرحمهم
كانوا يعقبوا عندنا رمضان قبل زواجي اروع الايام رمضان يفوت بركة و نور و ونس
كانوا ربي يرحمهم يتناقروا دائما بالهدرة
خطرة جدي زعف من جدة دار لبابا قالوا انا يا بني كون قدلي السعد راني ما نديش هادي خلاص كون راني ديت وحدة يقولولها زينب هههههه و جدة تسمع و ساكتة بابا بدل حديث و قاله يابابا شوف في المانيا يعالجوا الشياب بالرياضة و عندهم دراجات مخصصة ليهم جدي عجبه الحال ولا يسقسي على رياضة الشياب في المانيا و هنا نطقت جداتي قالتله معليش يا وليدي ديرله الرياضة بالاك يرتاح و تنوضلو نوارة في جبينه بالاك تشوف فيه سيتي زينب ههههه اللي يضحك في داخلو و اللي تحت المخدة و اللي هرب للكوزينة و اللي شرقتله و الله كانت احلى ايام
ربي يرحمهم و يجعل الجنة مثواهم آمين
حكاياهم سمر وحديثهم عِبر ووصاياهم دُرر غالبا ما نتعمد استفزازهم لاستنفار نكتهم وخرجاتهم غير المتوقعة المضحكة. ربي يرحمهم ويرحم سيتي زينب معهم .
ربي يبارك فيك.
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top