شربة صحية من تحضيري

[السلطانة]

السلام عليكم ورحمة الله وبركاته

ان شاءالله تكونو بألف خير


اليوم جبتلكم شربة بطريقة صحية

المكونات:

لحم ماعز
بصل +كسبر (حشائش) +طماطم نرحيهم مع بعض.
نحطهم في قدرة ونزيد عليهم نعناع مرحي ملح+تابل الكسبر+فلفل عكري(بابريكا) من أجل اللون الأحمر بما أني منحطش طماطم مصبرة
قليتهم على نار هادئة جيدا




كي يتقلاو مليح نزيد عليهم ماء ونخليهم يطيب اللحم






نجيب الشعيرية (الفارميسال)

ونحط منها قد مانحتاج






نخليها تطيب مليح





وهنا قدمتها مع كسرة القمح الكامل المخلوطة بالشعير
وكسلطة اعتمدت جزر مشرشم في الماء والملح والثوم وفوقو صوص زيت الزيتون والليمون .
وشهية طيبة.









سلامي
إلى الملتقى ان شاءالله

 

[إلياس]

سلمت يمناك على شربة اللذيذة تبان تشهي

 

[ام أمينة]

وصفة سهلة و سريعة و صحية
مشكورة على الوصفة
( صراحة ولا مرة تذوقت لحم الماعز )

 

[الورد الأحمر]

يعطيك الصحة وبصحتكم وشحال راني متمنية لوكان الأكل المش صحي هو لي صحي والعكس باش ناكل واش نحب وما نقلقش ع الصحة والوزن

 

[السلطانة]

سلمت يمناك على شربة اللذيذة تبان تشهي

الله يسلمك

 

[السلطانة]

وصفة سهلة و سريعة و صحية
مشكورة على الوصفة
( صراحة ولا مرة تذوقت لحم الماعز )

النور نورك حبيبتي
صراحة لحم الماعز صحة صافية
وميجيش مشحم كيما لحم الخروف
المشكل في الذبيحة تاعو لازم لي يسلخ يعرف يسلخو وينزع الشعر تاعو مليح مليح

 

[السلطانة]

يعطيك الصحة وبصحتكم وشحال راني متمنية لوكان الأكل المش صحي هو لي صحي والعكس باش ناكل واش نحب وما نقلقش ع الصحة والوزن

الله يسلمك ههههههه هذا حلم مستحيل
ياريت جا صح

 

[Fethi.dz]

يعطيك الصحة على شوربة الفارميسال .. مي شدني لحم الماعز .. لم يحصل لي الشرف لتجربته

 

[أبو عاتكة]

ولانها شربة صحية فلازم تكون بلحم الماعز الكثير يفضلونه صحيا عالغنمي
ونعرف ناس عالعام لحمهم ماعز
الشربة هاذي طبيعية 100%
ياريت نعود للاصل ونبطلو مصبرات ومواد مسرطنة
ياتلا ثانكيو على الطبيسي وبصحتكم