- الأوسمة
- 17
شفت فيديو لشخص مصري يحكي و يقول ! ” كنت نستغرب بكري كيفاش واحد يكون مازالو يدعي على حاجة و الغدوة تُستجاب و تتحققلوا تم تم، و أنا لي عندي سنين و أنا نطلب و ندعي و ربي ما إستجابليش ! و نهار لي قررت نتزوج و كنت ندعي لربي باش فلانة تكون من نصيبي فجأة و بدون حتى سابق إنذار كانت من نصيب غيري، حتى الجامعة اللي تمنيتها ما دخلتهاش، أيا و في واحد نهار صادفني باش نروح نصلّي الجمعة في جامع معين ولأول مرة نصلي فيه حضَرت الخطبة و أنا حاس بلي كل كلمة قاصدتني أنا أنا بالذات وربي راهو يعاتب فيا أنا، أيا الشيخ بدا بما عجبكش الرزق تاعي ما كفّاكش حاب تهنى في الدنيا ! حاب كل حاجة تتمناها، هكذا ما توليش دنيا هكذا تولي جنة وأنا مستعد نعيّشك دنيا كيما الجنة، بصح متزعفش نهار القيامة كي تولي تشوف أصحاب الإبتلاءات عندهم جبال تاع حسنات ! و تتصبِّلهم في الميزان صبا و يدخلوا للجنة و يقولوا { الْحمد لِله الذِي صَدقنا وعدهُ } ياك كنت واحد النهار نقي بالفطرة تاعك و سجدت و قولتلي أرزقني زوجة صالحة،و كي صرفت عنك لي حبيت لخاطرش فيها الشر تجي تعاتبني و تقولي علاه نحّيت عليا محبوبتي يا رب، راك حزين psq نحّيت عليك الشر اللي كان في الدعوة تاعك؟ ماشي أنت اللي قولت { و قِني و أصرف عني شر ما قضيت } جربت مرة في بلاصة ما تحزن ! و تقعد تقول ربي ما إستجابليش ! تقعد تتخيّل يا ترى شحال راهو عندك من جبل حسنات شحال من جبل رايح تشوفوا نهار القيامة على كل دعوة دعيتها و متحققتش جربت une seul fois تقعد تشوف شحال من مرة نجّيتك شحال من مرة كنت فالضيق و لقيتها تفرّجت وحدها ! شحال من مرة كنت قريب تموت و طوّلتلك في عمرك شحال من مرة كنت تعصيني في السر و رزقتك بقلب ليّن باش تتوب و تستغفر فأغفر لك وأرزقك الفردوس ! علاه ما تصبرش باش تشوف العوض، قولتلك ” إِنه من يَتقِ و يصبِر فإني و الله لن أضِيعَ أجرَه “ ! أتظن أنني بعيد ! أنا أقرب إليك من وريدك، و روحك و قلبك و نفسك عبدي كُن ربانيا إذا رزقتك سجدت شاكرا طالبا المزيد ! و إذا صرفت عنك دعوتك سجدت حامدا طالبا العوض ،كُن عبدًا لحوحا إذا أبدلت لك دعوتك بالخير ردد الله يعلم وأنا لا أعلم كُن مُحبا لي فأنا أُحبك ! و لا تكن ممن يَعبدُونِي علَى حَرف فإن أصابهُ خَيرٌ إطمَأن بِهِ وإن أصابَته فِتنَة إنقَلب عَلى وجهِه خسرَ الدنيَا وَالْآخِرة ! من هاداك النهار و أنا ندعي ماشي غير باش يعطيني لالا ولّيت ندعي حرفيا بكل حاجة ولّيت ندعي على أبسط الصوالح و أعقد الصوالح، و لوكان اللي راني حابو ما يتحققش راني نبني لروحي جبل حسنات و لوكان يتحقق بصحتي ربي سمع صوتي ꜝ
فأنا مولع بالتفاصيل..