أدخلوا تضحكوا عليآ

[همس الوُرود]

السلآم عليكم ورحمة الله وبركآته

أحممم علآبآلي رآيحين تقولوا وش رآهي تدير هآدي هنآ ومآرآهيش تقرآ و البآك قرب و و و .. حبيت نزهي ألوآني اليوم في هدآ الموضوع بعد مآ كتبت بالأسود لمدة طويلة هههه

رآيحين تشهدوا على يوم جميل :p

أنآ اليوم قررت نحكي على الأكل ..بيسك رآني جيعآنة شوية بزآف إيبآن الي يدخل فيكم هنآ لآزم يجيب معآه أكلة ملآزمش تكون صحية خلونآ من الخرطي تع الريجيم :p

خلونآ نآكلوا ونبحشوا يآك الحيآة فالدنيآ وحدة ؟؟ ولآزم نستمتعوا بكل لحظة ..

أسمعوا بآلآكوا تقولوا عليآ أكولة ولآ سمونية:-o لآلآ مانيش سمونية :p نحب نآكل برك ديفوآ نزدمهآ على المآكلة مآتفهموا فيآ وآلو وديفوآ نآكل كي الزوآوش قآلهآ خويآ :thumb_up02:


حبيت ننصحكم نصيحة قبل مآنبدآ ..في حيآتكم الأليمة جآمي تقولوا فلآنة دآرت ودآرت ومآتقولوش عآفآنآ الله بيسك الأمر يولي ليكم :d

دوك نحكيلكم الحكآية وفهموني مليح

مرآت أنآ كي نجي جآية من ليكور نروح عند مطعمي المفضل ونشري همبرغر و شاورمة ليآ ولدآرنآ بش نخرجوا شوية من أكلآت البيت اللوبيآ والعدس والمآقآرون و الحمص ومشتقآتهم حتى الشخشوخة ونخرجوا من عوآيدهآ

ونروحوا لأكلآت الخآرج ..بالمنآسبة أنآ مآنحبش أكلآت المطآعم بصح دآك المطعم أكلتو نظيفة وهآيلة مآشآء الله

أيآ مرة رحت نشري شآورمة ونلقى 3 بنآت قآلولو وش كلآو هههههههههههههههه تنفسوا شوية قبل مآنحكيلكم

قآلولوا 3 شورمة و 5 سوفلي و قرصة بيتزآ و 3 قآزوز و قرعة مآ ~ بآبآبآبآبآبآ قلت أنآ في قلبي وش هآد الكرش الي عندهم حتى وليت نضحك والله والطفلة هآديك شآفت معآيآ ههههههههههه


المهم فآتو لعوآم والسنين ...رآني زودتهآ فآتو يآمآت برك

وأنآ وصآحبتي قلنآ جآمي قعدنآ نآكلو في مطعم هآيآ نروحوا نآكلوا

وكنآ مرفهين هدآك النهآر عندنآ 1200 دينآر جزآئري

ههههههههه وأنآ وصآحبتي هآدي وسمهآ أمينة مآنعرفوش كيفآش دآير السوفلي هدآ

دخلنآ المهم قعدنآ ويجي مول المطعم أوهووووووه حسيت بلي حنآ شخصية :-h شغل غآرصون وتطرطيقة تع الصبع هههههههههههههههه

أيآ قلنآلو جيبلنآ 2 شورمة

كلينآهم وخلصنآ والله شبعت أنآ قلتلهآ أمينة سيبون

قآلتلي لآلآ أنآ تفتحتلي الشهية ههههههههه

قلتلهآ وش نزيدوا نآكلوا؟؟ قآلتلي أممم سوفلي

قلتلهآ بصح كيفآش مدآير ؟؟

قآلت والله مآعلآبآلي

وبدينآ نتفآهموا نقولولوا سوفلي إدآ رآح معنتهآ هدآ رآهو أكلة كيف الحمص هههه ويلآ قآلنآ شحآل؟؟ نقولولو 02

أيآ جآ السي مول الريسطورو قآلنآ مآزلتو؟؟ هههههه قآلتلو أمينة أيه

قآلنآ وش تزيدو تآكلو قآلتلو سوفلي

قآلهآ شحآل؟؟ قآلتلو 02

وننوض أنآ نضحك

ومبعد حنآ قآعدين نستنآو وتنطق عجوزة كآنت قآعدة حدآنآ قآلتنآ يآ ولآدي أعطو المرأة تشرب ؟؟ وش تشرب قآلتلنآ القآزوز رآهي شرقتلهآ

أنآ مآحكمتش روحي نضت نضحك و أمينة حكمتهآ لعبتهآلي

وتحكم هآديك العجوزة تشوف تشوف تشوف فيآاااااااا خلآيآ

حتى قآلتلهآ المرأة خليهم أو دوك يجيبلي المآ

ومبعد كلينآ السوفلي وتقولي أمينة عبيييير رآني سخفت على البيتزا ههههههههه شرينآ قلنآلو نص قرصة بيتزآ يآخآاااه هداك محكمش روحو قآللنآ مآشبعتوش؟؟

أمينة وجه البوقوقو قآلتلو إيه ههههههه

عبآلكم والله Gرآف مآلgري حنآ بنآت المدينة و نورمآلموت شوية حضآرة ههههههههه ولآت تقولي أمينة بدويآت في المدينة هههههههه

عبآلكم دخلو ورآنآ 3 مرآت بنآت وخرجوا وحنآ مآزلنآ هههههههه

يآو والله حآلة خرجت أنآ مش قآدرة نهز روحي ههههههههههههههههه

حبيت نضحككم برك ونحكيلكم حكآيتنآ وربي يهديني كيمآ ضحكت على هآدوك البنآت رآهي رجعتلي

وكي رحت للدآر حكيت لخويآ شبع عليآ الضحك قآلي الله يبآرك عندكم وحد الكرش يآ لطيف

قآلي مآظنيتكش هكآ عبير ههههههههههههههههه بصح والله من تم مآتغديت مآشربت قهوة العصر مآتعشيت

تحيآتي نآس وش رآك تهدر وحكولي وش أحوآل الأكل عندكم؟؟:p

في رعآية الله

​

 

[لؤلؤة قسنطينة]

رد: أدخلوا تضحكوا عليآ

تم الاعتماد
ههههههه
ندير دورة عبورة ونرجعلك ان شاء الله
​

 

[همس الوُرود]

رد: أدخلوا تضحكوا عليآ

تم الاعتماد
ههههههه
ندير دورة عبورة ونرجعلك ان شاء الله
​

برآحتك أختي

كي ترجعي جيبي معآك أكلة برك :$​

 

[AmiR@RoRo]

رد: أدخلوا تضحكوا عليآ

السلام عليكم
وأخيرا شفنتا موضوع لعبير زاهي ومنور الله الله ههه
يا ختي بصحتكم راكم اكولات من النوع الرفيع هههه
امم بالنسبة ليا اختك عندها الماكلة بالقوسطو
ديفوا تنفتحلي الشهية لدرجة غير معقولة ناكل لي ناكل ما نشبع لحتى ماما تحير فيا تقولي وش بيك جيتي من عام الشر ههه
ونخلطها نبداها بالمالح ندكن ونزيد عليه الحلو وبقدرة قادر ما يصرالي والو سبحان الله ههه
وديفوا تنسد نفسي كما يقولو السوارا ومانقدر ناكل والو يا دوب ناكل شويا باش نحكم روحي ههه
باختصار ماكلتي بالقوسطو لي ساكن فيا بحوالو كل مرة وكفاش تبانلو ههه
صحيتي خيتي وربي يدوم هناك
سلام ~

 

[{مُدَلَّلَتُهُ}]

رد: أدخلوا تضحكوا عليآ

السلآم عليكم و رحمة الله وبركاته

الحمد الله على سلآمة بيلا المشاكسة توحشت نشوفك هنا تضحكي و تلعبي . . توحشت ضحكتك أمصيبة . . ربي يدومها عليك و عقوبة للفرحة الكبيرة ان شا الله

احم نرجعو لموضوعنا لي هو الماكلة . . عشقي الذي لآ يخون أبدا ههه

مع أني مانيش سمينة بصح نبغي ناكل حاجة بنينة صح ما نكثرش بصح المهم تكون حاجة بنينة . .

و عندي هادوك النفحات تع قاعدة في أمان ربي تضربلي في بالي كاش حاجة و نولي كي المهبولة نحوس ناكلها !

بصح البيتزا كي نهبل ناكل 3 طرونش هادي في حالات الجوعية القصوى . . الشاورما سوندويش واحد و انا عمرت كريشتي ما نقدرش نزيد عليه

لا بغيتي الكارثة الكبري ارواحيلي كي نكون زعفانة هيهيهيهيهي ناكل بنادم بلا ما نحس . . صحبتي تقولي يرحملك الشوابين فوتيلنا وقت الماكلة و مبعد ازعفي

هادي هي حالتي مع الماكلة . . بصحتكم حنونتي فرغتوله الحانوت :p مطرح ما يسري يمري و الله يدوم الـgـوسطو ♥

سلآمي
​

 

[ليليا مرام]

رد: أدخلوا تضحكوا عليآ

السلام عليكم
ايييع يا اختي واشبيكم كانو خاطفينكم الارهاب والله صدقيني ممكن انا فالدوار اللي ما ناكلش ولو ملزوم عليا ناكل على جال الدوا والمرض مي ما عنديش شهية على العكس عندي نقص كبير وعييت مع الدواواات ختى ناكل شوي والو اعطوني شوي شهية انت وصحبتك درتو ثورة ياو انا مرات نتشهى بيتزا ندموندي وحدة ناكلم نها 2 ترونش وما ناكملهمش ونوض نروح ما عنديش هذي الفجاعة نتاع الماكلة صحتكم عندك الحق نموتو نموتو وكرشنا نرجعوها ستيرنا نرمو فيها كل شي بصراحة نحب نكون منظمة فمكلتي ما ناكلش وخلاص وما نخلطش عندي امور نحبها باينة ونحب مرات الحلو معناها اما قاطو معسل او باتيسري شوكولا يميميم نموت عليه ندخل كافيتيريل ندموندي باتيسري وكاس كبوتشينو ونريح نستالي مع راسي وما يدورش الذبان قدامي نكون نتامل ونستنى فالشاوي الفحل اين انت ؟ هههه
شكرا بصحتكم قالولي واحد ريستورو فلس مي هذا وين عرفت انك انت السبب

 

[assinat]

رد: أدخلوا تضحكوا عليآ

و عليكم السلام

عنداك كولي و زيدي كلشي كلشي و الكرش قلشيها :p

كلشي انا و ميجينيش كي لمحاجب نختم بيهم كل تحويسة مع لبنات اللي في الماكلة يرجعو لولاد لعابين البارود هههههه

بصحتك الاخت عبير ♥ ​

 

[زهرة اللمة]

رد: أدخلوا تضحكوا عليآ

ههههههههههههه
بصحتكم

ربي يحفظك

 

[Malika Tlm]

رد: أدخلوا تضحكوا عليآ

السلام عليكم
بصحتك ختي وهدي كامل غي ماكلة ههههههه
شوفي والله مرات الشهية تكونمفتوحة ومرات تكون مغلوقه
املا مدام الشهيه نتاعهك راها مفتوحة كولي يا ختي بالصحة عليك بصحج برك حاولي علي لاطاي ههههه
شوفي انا تعرفي قاسيت يامات الشهية راحتلي تعرفي ختك واسم شربت دوا وحلبه
مي درك الحمد لله راها سوا سوا ههه
ربي يديم عليك صحتك ختي
تحياتي

 

[tistissa dj-tissou]

رد: أدخلوا تضحكوا عليآ

سلام ختيتا الحمد اللي شفناك مزهيتلنا الحالة ربي يدومها
ياختيتي مي راكم تاكلوا بزاف الله يبارك هه بصحتكم
انا مع الماكلة واش نحكيكلك ياسيرتو كي نقرا نهار كامل ومنتغداش كي نكمل جوايه ربعة نخرج ديراااااكت طييييييييييييط باتجاه كاش فاست فود ندخل انا واصاحبتي ندخلوا فيها جيب جيب ياااوحد الشر تقول من الصومال تعرفي انا صراحة كي نجوع مانعرفش صلاحي ومانهدرش خلاه حتى نوكل باه ترجع فيا الروح هههخ
وفي الدار تاني كيف كيف عداك انا ماشي خلاه سمينة مي غماس تو مونج تو هههه
بصحتكم ختيتا وان شاء الله تجيبوا الباك وتفرحوا
​

 

[لؤلؤة قسنطينة]

رد: أدخلوا تضحكوا عليآ

السلام عليكم
ههههههههههه قتلوني الاخوات بالضحك
والله انا تقريبا كيما واش قالو الاخوات، مثلا كي نكون فرحانة ماناكلش بزاف
بصح كي نقلق قلقتي نحيها بالماكلة، وساعات لدرجة قلقانة ماناكل والو، يعني كل مرة وكيفاه
وانا طبيعتي نفطر ونتغدا برك، العشاء خاطيني واذا تعشيت غدوة مانفطرش ههههه نوض شبعانة
دوريجين، يعني غدا هو الاساس وناكل عادي ماش بزاف، غير كيما قالت ختي tistissa dj-tissou
كي نخرج من الجامعة على 4 تاع لعشية ونلحق للدار على 5 تقول كانو خاطفيني الارهاب كيما قالت مريومة هههههه
المجاعة وماش كيفي خاطر من لي نفطر على 6 تاع الصباح ماناكل والو حتى 5
هي تقريبا كي نروح لدار جدي تما كي نلقى الجمايع والعايلة ناكل معاهم، بصح في الدار الغدا هو الاساسي برك
الفطور والعشاء نورمال، وخاصة العشاء هو لي نفرط فيه دايما
على كل حال بصحتكم عبورة لغدا هاداك هههه مرة في الفال ماتغيضش
وربي يهنيك ويدوم ضحكتك حبيبتي
تحياتي

​

 

[Hakan]

رد: أدخلوا تضحكوا عليآ

يا بن عمي هذي كرش ولا ثقب اسود ههه بصحتك ختي والله يبارك فيك في الحقيقة
الاكل هذا وبشهادة الوالدة انا ما ناكلش بزااف بصح نزن 86 كيلو مانعرف منين تجي
اما الاكل السريع ناكل حاجة خفيفة برك البيتزا هذا العام درت فيها رايي صرااة كاين مرات ناكل مليح
وكاين مرات لا اذا تغديت مليح ما نتعشاش وذا تعيش مليح خخخ ناكل غدوا الصباح نورمال
ولكن هذا الكلام كامل اذا غاب الفلفل الحار مي اذا حضر نولي انسان آخر كي شغل بركان اللي جات ياكلها
مي الطبيب منعني قالي عندك المصران تعبان يعني ساعات برك ناكل الحار ولهذا الشهية ناقصة
والحاجة الوحيدة اللي ما نسمحش فيها هي الحليب يعني قهوة كراام ياو صباح وعشوة نشربها وناكل معاها حوايج بزااف
هذا قاطو هذا كرواسون بتيبا خبز بالمعجون والزبدة وناكل مليح ماشاء الله اما المؤكولات لخرى نورمال ما ناكلش بزااف غير
ساعات برك ..شكرا وربي يهنيك واخطرة الجاية اعرضيني نروح معاكم ...سلاام..​

 

[zohor kfz]

رد: أدخلوا تضحكوا عليآ

ممممممم الله الله على هذا الموضووووووع هههه
و الماكلة بالنسبة لية حاجة مهمة ههههه ناكول كولش مغير الفواكه و ما جاورها هههه و نحووووووب ناكل اسم هي مخصش حتى حاجة تقلقني منين نبدا ناكل و عندي عفسة نكرها في روحي وقت الماكلة ادا نضت و رجعت نرجع شبعانة و يكون عاد في خطري نكل ههههه
المهم اي حاجة نكلها و نكل غآآآآآاية و وزني حبس في بلاصتو ملي نعقل على روحي و انا نوزن 61 كيلو مزدت ما نقصت
يعطيكي الصحا موضوعكي بنيييييين هههههه

 

[Oussama.GF]

رد: أدخلوا تضحكوا عليآ

سلام عليكم
راكي فوطو كوبي على اختي
تحب تاكل بزاف بصح متسمانش
في كل ساعة تلقيها تاكل
هههههه ملقنلهاش حل
بابا قلنا خلوها تاكل بصحتها

 

[ام أمينة]

رد: أدخلوا تضحكوا عليآ

بصحتكم

انا وحدة كي نكون زعفانة و لا مقلقة لي نلقاها ناكلها

مشكورة على الموضوع
تحياتي
​

 

[فيتامين سي]

رد: أدخلوا تضحكوا عليآ

ههههههههههه قريب متاكلو مول الحانوت شفني مسكين
اش داك تضحكي على بنت الناس اوه راني كثر منك غير خلي البير بغطاه مي انا مناكلش برا هكدا نحشم (وجه الحشمة زعما ) مي نشري غير كرواصو ولا حاجة هكدا اما كنت نقرا في معهد قريب نجرو الحانوت معانا ناكلو و غير ندخلو الاستاذة تهدر معانا نبداو جعنا مفطرناش مرضنا و حنا وخدناها
انا ماشي سمييييينة و ماشي نااااقصة وصط مي كنت ناقصة خير ناكل كما الزاوج كما قلتي و كي تطلعلي ضرك وليت نتمشى ب (كرشي سر سعادتي ) كلشي بمر للمعدة و ادا جعت منولي نعرف حتى واحد و ندوخ و راسي يضرني و نبرد و نرجف هههههه تحسبي لادروg ماشي ماكلة و ادا جعت يخص ناكل حلويات باش نصحصح ولا عصير و منلقاش ندير ما و سكر و منخليش (انا و السكر كارثة )
اي دوك ندورها نظام و ريجيم تنخلعو فيا غير صبرو (مقولتي منذ اشهر )

 

[أميرة تقرت]

رد: أدخلوا تضحكوا عليآ

هههههههههههه بصحتكم
تنوما وحوش ولا بشر يالطيف خخخخ​

 

[همس الوُرود]

رد: أدخلوا تضحكوا عليآ

ههههه قتلتوني ضحك يا الاكولين وهادوك إلي يلعبوها ماياكلوش رآنا فقنالكم
فقنالكم هههه
بصحح أشفاو عليها.. مكانش فيكم الي جاب حاجة فيدو مالgزي وصيتكم
الموعدش
غدوة على11
كي أوصلو ايه كملوا الطلعة التورنة اللولة على ليمنة اتلقااو المطعم
كي تدخلوا تشوفوا 2بناات يضحكو بزـاف بالسكات هههه تلقاوني أنا وامينة
وعلي لحساب
بالنسبة ليا مام أنا مناكلش بزاف بصحح ديفوا نزودها هههه
ربي يحفظكم

 

[أميرة تقرت]

رد: أدخلوا تضحكوا عليآ

ياختي تاكلي بالصحة و حتى واحد ما يقلقك المهم اقراي و جيبي الباك​

 

[همس الوُرود]

رد: أدخلوا تضحكوا عليآ

مبعد ويلا قدرت نردلكم واحد واحد
آآســفة رأني بالتلفون مكونكتيةة