بسم الله الرحمن الرحيم
السلام عليكم
البارح برك كنا نقولو راهو جا رمضان اجرو نوجدولو واش من حشيش شوربة واش من ديول واش من فريك زيتون المارشي هولناه
حتى طب كان هنا وراح قالك غدوا ليلة الشك
بصح انا بديت نفيق للعيد مقبل خاطرش فلفطور بداو اطباق ينسحبو من الطابلا
هنااك ايقنت ان العيد قد إقترب
المهم صباح ربي ناض الواحد دوش كلا شويا تمرات ممبعد دريكسيو للمسجد
الله اكبر الله اكبر الله اكبر ولله الحمد الله اكبر الله اكبر لاإله الا الله
صلينا والحمد لله وهناك بدا التسلام هايليك يا وعدي
لعبتها شاطر انا قلت نخير عليمن نسلم
نبدا بلي معندهمش لحناك خاطرش تنضر شويا
ولي عندهم لحناك ولخدود نخليهم للاخير باش نرتاح هههه
مي فالاخير خرجلي واحد من الانقاض كلاسيتو مع الاول
وخرجلي قالي واقيل مسلمتش عليك
لالا سلمت يا خويا قالي ياك باطل ايا نعاودوها
حسيت تقول مركاولي بيت فالدقيقة الاخيرة هههه
وصلنا لدار سلمت على يما ممبعد وصلت دقيقة الحسم نيهاهاهاهاه
لاول مرة بعد شهر من الصيام راح نتقهوى على ال8 تاع الصباح
هناك ندير الخطة تاع حليلوزيتش كنطر كوريا
الهجوم ثم الهجوم
واش من بقلاوى واش من بقلاوى واش من بقلاوى هههه
معرفتش نسميهم عرفت غير البقلاوى ههههه
المهم نضت كرشي دوموندات نزيدللها لارام هههه
قالك نروحو نغافرو نبداو بماني روح ياوعدي روح
وعند ماني متقدرش تستسلم كول يا وليدي كول
ياماني خلاص شربت فالدار القهوة
بوه بوه باش تقولو مانكم مشحاحا مكلينا والو عندها
المهم متنوضش م الطابلا حتى تسينيالي كرشك ايرور 404 باشي معمرة خضرة
قالك نزيدو نروحو عند عمتي يا الاهي اوومايgوود
واش راكم لاباس صح عيدكم ريحو تتقهواو رنا حطينالم اتفضلو
انا راني حاب نزيد عنيا تلمع تشوف غير لحلاوي
وكرشي غير تعيط يامالك اشبيك ياو انت انسان ماشي جمل هههه
بصح انا لا اعبئ بها لأن كلامها غير مقنع ومفيد هههه
المهم نتبع ديما عقلي ومخي علبالي ميخلونيش حاصل
هناك ندير خطا تاع سعدان 1144 نترقب غير ملبعيد هههه
حتى نولي نهدر غير بعنيا نغمز لخويا ايا نوض خلاص نروحو مقدرتش نزيد
وبصعوبة وجهد كبير انهض
نوصلو لدار نهبط مالسيارة ديركت الى طاكسيفون تاع الدار نعيط لعمتي ههههه
كي نخرج ديريكسيو لفراش والكونكسيو راقد
هاكذا جوزت نهاري المحان تاع العيد
يك ماشي غير انا لي خدعاتو كرشو الله غالب ماشي بيدي هههه
آه نسيت صح عيدكم كل عام وانتم والاهل بخير
ان شاء الله ربي يتقبل منا رمضان ويبلغنا رمضان القادم
سلام
آخر تعديل:
