السلم عليكم
قاضي الغرام
ماعشتش هادي القصة
مي كاين اللي عاشها
قاضي الغرام هو اللي بيناتنا يحكم
كيما بكيت لازم نبكيك
خيري القاضي اللي تشوفيه يوالم
ديري 100 أفوكا يضرب عليك
أنا بكيت ومانيش نبكي على الخدع
ولا كي حنيتي يديك
ولقيت البسمة في عينيك
الحب اللي كان بيناتنا راه تحطم
خاب الظن اللي ظنيتو فيك
أنا مشيتلك بالنية ...والله عالم
ضحيت بالعمر غير باش نرضيك
هذا شحال وانا فالعشق نايم
ندمان اللي درت النية فيك
وغير درتي في صباعك الخاتم
نسيتي هداك العاشق اللي يبغيك
ماتلومينيش ادا حكيت
ماترديش اللوم عليا
راب السور اللي عليه فنيت
زادلي لى قلبي كية
انا خلاص كرهت ومليت
مات الطير اللي كان داري بيا
ربي بلاني ...بالهم تبليت
أنا سباب عمري في هاذ الدنيا
ندمان على الحب اللي حبيتك
قلبي عدويا دارها بيا
اليوم غاضتني عمري وبكيت
طاحت الدمعة من عينيا
أنا عمري والله ما ظنيت من بعد المحبة والولف تسمحي فيا
أنا بكيت ومارديتش اللوم عليك
كان بكيت خليني راني نبكي على حالي
وبكيت على الظن اللي ظنيتو فيك
والله عمري ماكنت نظن معاك هكا يصرالي
كنت حاسبك تبغيني كيما أنا نبغيك
كنت دايرك صح تضحي بالعمر على جالي
كنت نحبك وداير النية فيك
وغير انت اللي كنت دايرك في بالي
تمنيتك بالحلال ....ماشي باه نخليك
كنت متمنيك على طول الحياة تبقاي قبالي
نهار اللي جيت ولقيت البسمة في عينيك
داك النهار علرفت بلي قلبي بوهالي
بكيت ومخابياش الخاتم اللي في يديك
مابكيتش عليك بكيت على حالي
غير خبريني كيفاش عطاك قلبك
أنا قدامك ميت وانت فرحانة
أنا فالقبر وانت البسمة في عينيك
لوكان غير بكيتي في موت حبيبك
ماتبقاش الناس حيرانة
العاشق اللي مات وقتلتيه بيدك
عمرو ا ماراح يكون قبرو في جبانة
وهذا الميت راح يكون قبرو في قلبك
وفوق هذا القبر
تخلق وردة عطشانة
وهاذ الوردة تكبر وتروى من دموعك
حتى يجي النهار تولي كيما البستانة
شحال من قاتلة قتلت قلوب من قبلك
وعاشت طول حياتها على الماضي ندمانة
أنا الندامة عمري والله مانتمناهالك
لكن اللي دار واش درتي عمرو مايتهنا
كامل الشي اللي صار خلاني اليوم نبكي
كل يوم يرجع ليا فالمنام
أنا اللي بوهالي درت عليك وأمنتك
أنا سباب عمري في هاذ المحنة
وين الراه الحب اللي كنت بيه توعديني
والوين راه العاهد اللي بيه عاهدتيني
وين راه الحنان اللي كان في قلبك
وين هي دموعك اللي كانت ترويني
غير في ليلة ونهار دار حالك
اللي يشوف يقول عمرك لا عرفتيني
كيلي مكان والو بينك وبيني
راني حيران يا مرا وحيرني أمرك
كيفاش بين ليلة ونهار قدرتي تنسيني
ياك غير البارح كنتي تقوليلي نحبك
وكنتي تحلفي بالرب غير تحبيني
ولكن ياخسارة نتي عمرك ولا حبيتيني بقلبك
أنا اللي درت عليك وغلطتيني
يا خاينة الحب ربي وكيلك
وربي عالم بيك يا خاينة بلي خنتيني
انا بكيت ومابكيتش على فراقك
مانيش نبكي على كي رحتي وخليتيني
أنا بكيت على الثقة اللي عطيتهالك
وعلى هاذ الشي اللي طاحت الدمعة من عيني
ظلمتيني وماقلت عليك حتى هدرا
شديت فالصبر وفي هواك خليتك
مالقري خنتيني وخنتي العشرة
ومالقري هكذاك بصح جامي قلتلك كلام يجرحك
أنا صح كنت عاطيك قيمة مرا
وربي شاهد ... عمري ولا ظلمتك
أنا لوكان جات عيني فالحقرة
أنت ماراكيش صعيبة باش نحقرك
لوكان جات عيني فالغدرة
حتى كيما راني هاك وقادر نغدرك
