رمضان دون أمك

[قناص الغرام]

صح فطوركم يا حباب اللمة
حبيت نعرف واش يكون موقف كل واحد فيكم مفوت رمضان دون الجلسات العائلية
علابالي مافهمتونيش
أنا درانا في واد سوف طول حياتي نفوت رمضان و العيد مع الدار خاصة مع الوالدة بصح ذرك راني جدارمي في تمنراست
و لأول مرة نفوت رمضان بعيد عن الوالدة
علابالي كاين الي رايح إقلي معليش نورمال
مكنيش نحوس على روحي
الحاجة الي في بالي كي تفوت الام رمضان بعيد على إبنها
أرجو المشاركة بكل صراحة​

 

[مولاة الملاية]

و الله يا اخي لشعور صعيب

ماراحش تجيك الماكلة بلا داركم و خصوصا امك

خيي هادي هي الدنيا و الصبر مفتاح الفرج

و صح رمضانك

 

[ضحية صمت]

عالأقل نتا راك في نفس البلاد .. و قريب منها ..
فمابالك لو كانت أمك في بلد و في قارة .. و ابنتها أو ابنها في قارة أخرى ..
والدراسة الجامعية كانت السبب في بعده أو بعدها عنها ..
الواحد لما يرى مصيبة غيره تهون مصيبته ..
الله المستعان ..

 

[قناص الغرام]

مشكورة ضحية صمت على مرورك الكريم و شكرا لعباراتك الصريحة

 

[قناص الغرام]

و الله يا اخي لشعور صعيب

ماراحش تجيك الماكلة بلا داركم و خصوصا امك

خيي هادي هي الدنيا و الصبر مفتاح الفرج

و صح رمضانك

الله يسلمك الحاجة لولى
علاه تفكريني بالماكلة تاع الام راني بديت ننساها
هههه
مشكورة على مرورك الجميل

 

[لينة]

حاجة صعيبة و الله
كون جيت في بلاصتك و الله كل ليلة نبكي

 

[قناص الغرام]

حاجة صعيبة و الله
كون جيت في بلاصتك و الله كل ليلة نبكي

هههههههههههههه
علاه عليك راني و الله نزهي في روحي ذراع
تقوليلي تبكي وز الله حرام عليك
والله بصراحة قريب نبكي

 

[لينة]

انا الحق صح كي نتفكر ماما و انا مش معاها نبكي
كيما مرة رحت ل الجي و دارنا في عنابة توحشتها خلاه
و في الليل جاتني البكية بكيت
مقدرتش نحكم روحي

 

[لينة]

بصح مش لازم واحد يشوفك تبكي هههههههههههههه

 

[رنيم الغربه]

ههههه عااااادي راك بزززاف قريب منها انا في اروبا و والديا في الجزائر وواش رايك:confused1::crying::wink:

 

[سفيرة الاحزان]

معليش خويا .......كيما يقوالو الصبر مفتاح الفرج ......بصح والله لعندك الحق رمضان بلا امك ولا اي فرد من العائلة ينفصه حاجة
انا عندي امي غير تروح لدار جدي تضل ليلة والله لتفوت علينا كحلة تقول عندنا جنازة........هههههههه

 

[حفيد هواري بومدين]

في سبيل الوطن اصبر
وموت واقف :angel_not:
---
واش رايح نقول لخويا انا مانقدرش نتصور روحي بلا الوالدة وما ادراك مانرمضنش معاها
حاجة صعيبة وماتخافش كلش او في الأجر

​

 

[njouud]

NORMAL courage barek

 

[قناص الغرام]

انا راني 6 أشهر مازال ماشفتهاش ؟
واش رايك
و مازال مابكيتش

 

[قناص الغرام]

هههههههههههه
والله غير عندك الحق
شكرا لمشاركتك

 

[قناص الغرام]

و الله غير شرف لي أنك تفكرتني يا سي فلان مول الكوستيم
شكرا على مرورك الذي كان لي الشرف فيه​

 

[khadjer]

ربي يحفظلك مّيمتك ويخلّيهالك، وتبقى دايمًا راضية عليك، ربي يعطيك الصبر راك تخدم في خدمة شريفة وفي سبيل الله...
أنا خالتي ماتت قبل رمضان بثلاثة أيام، خلّات ولادها مشويّين عليها، كانت هي اللّي مدايرتلهم لومبيونس في الدّار كانت صاحبتهم وختهم وأمهم في نفس الوقت، اللّيلة الّي من قبل ماتموت باتو ولادها الثمانية معاها في السرير رجالًا ونساءً وهوما يبكيو... راجلها بغا يهبل لولا إيمانو القوي، وهاكذاك وراهم صايمين وصابرين ومحتسبين، تشوفوا هاذيك الدّار كيفاه ولّات مستوحشة وهاذوك لولاد كيفاه دايرين والله يقسمو القلب... يتمناو لو كان يزيدو يشوفوها دقيقة، تمنّاو لو كان بقات عايشة ماعليش حاكمة لبلاصة... لكن هيهات هيهات... كامل رايحين ليها... تدّي الماشي وتخلّي الرّاشي... هاذي الموت يا خويا حق بصّح ندزعوا منها.
أحمد ربي لّي ماماك عايشة كي تتوحّشها تعيّطلها وتسمع صوتها، تقدر تروح تشوفها في العطل...
أربح رضاها ودعوتها بالستر والسلامة هذا الدّعاء تحتاجو بزّا...
ربّي يحفظلك ممّاك ويخلّهالك ويطولّلها في عمرها إن شاء الله، واصبر على محنتك ربّي يفرّج عليك ويميتيوك لولايتك نشاالله.

 

[belgacem39]

خويا صحا رمضانك انتا وليد بلادي وماماك راهي لاباس عليها وانتا كوراج وراجل قدها وقدود ربي يحميك وترجع لميمتك سالم وغانم يا ربي رانا كامل فوتناها وقعدنا 9شهور في الصحرى حتا الماكلا يجيبوهالنا بالكبتير المهم تهلا في روحك خويا ربي يحفضك

صحا فطورك

 

[سماح4]

انا يما كي تخرج تحوس لأهلنا تسماط الدار علينا وكي ما نشربش قهوة يديها ما تحلاليش القهوة صح كنت في الجامعة وما نشوفهاش بالاشهر لكن رمضان كنت نقضيه فالدار كي مش عارف واش يكون ،الحق الدار كامل سامطة بلا بيها ربي يحفظ امهاتنا وامهات المسلمين جميعا..آمين.

 

[قناص الغرام]

ههههه عااااادي راك بزززاف قريب منها انا في اروبا و والديا في الجزائر وواش رايك:confused1::crying::wink:

و الله يا رنيم الله يصبرك بصح معليش هذي حال الدنيا
و حاجة مليحة كي راكي في أوروبا و متفكرة البلاد
و أجمل شيء كي راكي معانا في اللمة