يحط روحو قدام باب العرس تماما و يقولك راني راجل

[EL General]

السلام عليكم ورحمة الله
(rodo salam)

مرحبا خاوتي تع اللمة

وشراكم ؟
اذا كان اسم الله تعالى بين أفواهكم فأكيد ستكونون بخي
آمين يا رب

أما بعد :

حبيت نحكيلكم اليوم على لافيرات تع الأعراس
تلقى ساعات كي يكون عرس تع رجل أو تع مرا و لما يكون يوم الحنة و أشدد على حنة النساء المهم ساعات بعض التقاليد و الولايات الجزائرية يخليو باب دخول المنزل مفتوح نوعا ما أثناء مراسيم الحنة هدا لأن المعروضين باش يقدرو يدخلوا و يلحقوا بالحنة نورمال

المهم هنا الخطر الكبير تلقى دي جان 23 إلى 40 سنة تلقاهم مسرسطين قدام الباب (واقفين و دايرين لاشان) ههههه و الله نورمال تصرا هادي يعني اسكو وشيا يديرو هكا كشما تخرج وحدة من الباب و كشما تطيش عينها عليهم أو واحد منهم و يعجبها و ......... الخ

نقولكم و بكل صراحة لأني أحب الصراحة و انسان صريح أنو هادي كاينة في ولايتنا و بكثرة

هنا نحتاجو للناس تع بكري و الشيوخا يربيو لنا ليجان هادوما شويا لأنو ماشي من التربية و الأخلاق الأسرة الجزائرية انك تعمل العملة هادي

+

يسميو رواحهم رجال

تبا لو كانت الرجلة هاديك هي لوكان راني في كل عرس حاضر و ندير هكاكا و نكون أنا الأول في هاد المجال

لأنو ماهيش رجلة هادي رخسة

رخسة لأنو يجيك مول الدار و يقولك وش تدير هنا وش تقولوا ؟

حبيت نعرف اذا كاينة هادي عندكم و لالا ؟

ان شاء الله ماتكونش برك هههه

ربي يحفظ ليجان نتاوعنا من الشر و العين

هدا ماكاين _o:

سلام .
​

 

[adel-mz]

يا مردونه خونا كاين في كل بلاص مي واش نقولك الله يهديهم هادا مكان

 

[nina bonoise]

في كل بلاصة كاين
حتان عادت حاجة نورمال
و عليكم السلام

 

[zahya]

هدي عادة سيئة ولاحظتها في الكثير من المناطق ربي يهدينا ويصلح شائننا

 

[ابوندى]

وين تحط روحك تلقى روحك خويا حسني هادو عباد ناقصين

الناس عقليات بكل اختصار ............كل واحد وكيفاش

 

[الحق سلاحي]

ربي يهدي ماخلق
​

 

[حطيست1]

والله كلام صواب وفي الصميم
رجال حايحين تاع بلاستيك مدرحين
وهو لي غلاو علينا المعيشة هههـ
مانعرف كي يكحل على مخلوقة واش من فايدة
مع انو هو الخاسر باسكو عطاها قيمة فوق القيمة لي تستاهلها هلي
وفي لافان تتحلب هي تاني ويعجبها الحال كي يقيموها
مي لوكان جاو رجال صح يروحو يخدموا على راوحهم ويدير في بالهم بلي سوق النسا سوق فارغ ومسيطرة عليه الجياحة
النوع هذا من الرجال أو وجوه الرخس كيما تقول نتا كارثة وجريمة في حق الإنسانية
يعجبهم الحال كي يجرو مورا البنات والمشكل توجور هوما الخاسرين
ربي يبعد بلادهم على بلادنا برك

 

[إيمان قلب]

وعليكمـ السلامـ ورحمة الله تعالى وبركاته
واش نقولك ياخويا...
ايا ماشي بعيدة غير ليوم برك
كاينة حنة تاع جان في جارنا وراك عارف الحنة تاع الراجل كي تكون والله عشية كاااملة ماقدرناش نفتحو الباب
لخاطر واقفين عند الباب هدرتهم عندنا فالدار تقدر تقول مادخلوش جمعو معانا
هذه اكيد ماهيش رجلة واذا كانت الرجلة هده معناها الله يلعنها
نزيدك تاني في حنة المرأة ولا الراجل ولا حتى فالموت تلقاهم غير كاشما تتلاح عينو على طفلة وتلقاه عند الباب وتاني كاين البنت ناقصة عقل اللي تضل تصيد
مزية مزاال في بعض العايلات الشيوخة لكبار اللي يوقفولهم عند الباب واحد مايعتبهاش
واش نقولو ربي يهدي ماخلق ويصلح الأحوال
وشكرا اخي على الموضوع
يعطيك الصحة
تحياتــــي​

 

[hiba14]

اه العجب لا ماعدناش على الاقل في الاعراس اللي احضرتهم اصلا يلا كانت مكس يطلعو و لا ماكان جتى واحد

 

[07 _H@yThm]

هادي داخله فلحرمه لي ميخافش ع حرمة بنات ناس
ميخاففش ع حرمة دارهم
ربي يهدينا
​

 

[ibtissam ami]

وعليكم السلام والرحمه

راهي كاينه وتكون للاسف صح gع واش راك تحكي

الله يهديهم ويهدينا

تقبل مروري:re_gards:

 

[DARINE05]

والله عيب تول وين وصلنا بفففففف مرسييييييييييييييييييييييي

 

[chemssou007]

كيـ تعود من العائلة راهيـ عاديـ يا صديقي
المشكل كي تعود معروضـ و مشي من العائلة و تزيد توقف في البابـ
هاذيـ حرمة و لا بطلـ​

 

[rima29]

ربي يهدي ما خلق​

 

[ما فهمت والو]

السلام عليكم
يا اخي هاد العادة القبيحة كاينة في كل بلاصة مي واش نقولك الله يهديهم هادا مكان

 

[يوسےفے]

هاذو ناس ما يحشمووووش.......و كلشي داااخل ف التربيه ...كون جاو متربين و طالعين من صغرهم متخلقين ..ما يديروش هاذو الصوااالح ...و نقدرو نرجعو السبب لسوء التربيه من طرف الأهل...و في الأخير هاذو الناس يبقاو فارغين الشغل ...الله يهديهم​