تائهة فهل من مساعدة

[اللؤلؤة البيضاء]

السلام عليكم
أنا من قبل حكيتلكم المشكل تاعي مع خطيبي و واش صرى على جال العرس
تبعو مليح رايحة نحكيلكم بالتفصيل باه تفهموني و تعاونوني:
حلينا هذاك المشكل لي حكيتهولكم و قتلوا معليش كلش ندير العرس مع لوستي و كيما جات جي المهم نكون معاك . كان باقي على تاريخ العرس 20 يوم توفى راجل عمتي و شيخ ختي في نفس الوقت ( إنسان واحد) صراتلي صدمة كبيرة :-oوليت كيما المهبولة وليت نقول من مشكل لمشكل أكبر قلت معليش هاذي الحاجة تاع ربي الأب تاعي قالي معليش إذا حبيتوا توخروا العرس وخروه و إدا ماحبيتوش قالي با ندير بالسكاة و خلاص قبل ما نرجع الجواب لبابا قلت نسقسي خطيبي و نشوف كي قتلو قالي بكل تفهم نفوتوا 40 اليوم و نديروا قتلةا إيه و رجعت الجواب لبابا تقبلو عادي و قالي من بعد نعيتلوا و نهدر معاه ؟
كي هدر بابا مع خطيبي قالوا غير الهدرة لي قالهالي و ديسيدا وحدوا باه يوخر حتى للصيف الجاي
زعفت بزاف لي ماداش رايي كي تناقشت معاه في الموضوع و قتلوا أنا ماراه هامني والوا لا عرس و لا صالة و لا والوا المهم نريح و تريح و هاذي الهدرة قلتهالو على حسابو (هو يقولي مانيش قادر بلا بيك راني نتعذب و نتي بعيدة..........) كي سهلتلوا كلش قالي تكون الشتاء و صحابي مايجوش و أنا لازم ندير عرس شباب يهدرو كامل الناس عليه . حسيتوا خيرني أنا على هاذوك من هذاك اليوم مانيش مليحة من جيهتو كل يوم راني نكرهو كتر هدرتو تبدلت و عقليتو كتر و من بعد فهمت حنا عقدنا هو راه حاسب ملكني و يقدر يدير فيا واش يحب بصح لا لا مليت من كلش مع العلم خيطت حوايجي تاع التصديرة و بعد ما فات شوية وقت لقيت وحدة من فاميلتي خيطت شحال من حاجة كيفي يعني صماطولي و صماطلي كلش و راني حابة نبطل
أعطوني رايكو تعيشوا و سمحولي لي طولت عليكم .

 

[بنت الـ25]

أختي الكريمة
نتي راكي مدايرة قصة وتكبري فالأمور مالgري هي صغيرة
غاضك الحال كي ديسيدا وحدو ووخر العرس علاجال صحابو مش علاجالك ؟
هادي كلها شكليات وأمور سطحية
يلزمك تفوتيها سينو كون تبقاي تخممي بالطريقة هادي رايحة توجعي راسك بالمشاكل دركا ومستقبلا
(خلي المركب تمشي كيما يقولو)
وأي حاجة ما تدوسش على كرامتك متعطيهاش أهمية
​

مع العلم خيطت حوايجي تاع التصديرة و بعد ما فات شوية وقت لقيت وحدة من فاميلتي خيطت شحال من حاجة كيفي يعني صماطولي و صماطلي كلش و راني حابة نبطل

اختي يا اختي ملقيت وش نقلك؟
ربي يسهلك أمورك ولا كان تشوفي في هاد الحكاية مشكلة وش تقولي على أصحاب المشاكل الحقيقية؟
زوري كوكب الاعترافات وانتي تفهمي
سلام
​

 

[رضوة الجزائرية]

فكري ختي مليح ما ضيعيش روحك انا تبان لي هد غير شكليات ماعرفتيش الخير وين راه ممكن في تاجال العرس كوني صبورة معاه وحاولي تسمعي ليه بقلبك وعقلك مهما لي قالو ولا عملو انت رايح تعيشي معاه كزوجة وغدوا مين تصير ليكم مشكل هكدا تزعفي وتفكري باه تطلقي ولا واش فهميني ختي سايري الامو ر كما راهو مكتبها ربي مثل ما يقولو كل

تعطيلة فيها خيرة ماعرفتيش كبري عقلك وقلبك وصبري صبري صبري راهو جايك ما صعب من هدا صبري هدا واش نوصيك انت رايحة تبني اسرة لازم تسمعو لبعض وديما الضغط على واحد
ادا نشوفو بمنظورك انت هو اجل وخلاص وانت كرهت ممكن تبطلي واش رايك فكري مليح بحثي على المشكل لكبير لي تطلقي به مثل ما قلتي راكي عاقدة دوريها مليح تلقايو تافه تاخر العرس وانت زعفت ماشاوركش وماداش براييك فكري
كل هدا يبقى كلام فقط ولي صار صار واش تعملي تخصري روحك باطل
نقول لك سمعي لزوجك وهو تاني وصبري صبري صبري مرات الضغط رايحة تتحملو لمرا برك اصبري وكوني فحلة وقدها
اسفة على كلامي بصح ممكن مازال ماشفتيش من الدنيا رايحة تبداي تتغاضاي وتسكتي باه ما توسعيش المشكل وتتعايشي شكرا​

 

[سمسم السمسومة]

هاذي حاجة تستاهل تبطلي عليه في رايك....العرس حتى اذا طولتي فيه راح ديريه بربي أن شاء الله مدامك مع الانسان لي خيرتيه يكون شريك حياتك في بالي مهيش الحاجة لي تستاهل _مكذبش عليك ولا خدعك _أخر العرس_سهليها تسهال كيما ستنيتي تقدري تزيدي تستناي....و ربي يسهلك و يكملك على خير يا رب

 

[oum acheraf]

les jours passe vite khoudi rayi ou asseberi koulach yejouze ou rabi yehanik nchalah

 

[بلقيس لينا]

يااختي متخليش الشيطان يدخل بينكم فيها خير ان شاء الله منها تشبعي من داركم وتزيدي توجدي روحك واذا راكي واجدة ديري عرس شباب كما راكي تحلمي بيه راه خلالك الوقت وهو ادرى بظروفو بلاك مراهش واجد مليح وحشم يقولك درك تغمضي عينيك افتحيهم تلقاي الصيف جا وتتزوجي ان شاء الله وتتهاني معاه متقعديش دققي في الامر اشغلي نفسك بكاش حاجة متقوليش كرهتو هذي مجرد اوهام متعطيش فرصة للشيطان يخرب بينكم ومتكونيش ناكرة للخير اكيد دار فيك حاجات ملاح وزيد خيرك انتي على كامل البنات باه تكوني زوجتو وام اولادو لهذا كبري عقلك اختي ومتدخليش في حلقة مفرغة اما بخصوص التصديرة عادي وين راه المشكل اللبسة كامل راهي تتشابه لكن كي تلبسيها تلاقي وحدة جاتها خير من الاخرى توكلي على ربي اختي وخلي عنك الافكار السوداء عيشي حياتك واستمتعي بيها فيما يرضي الله وكما قلت لك التاي باكش حاجة متنظريش للحياة من ثقب واحد الزواج راه مسؤولية ابداي تحضري نفسك من الان وتعلمي التسامح ومدي من حقك راه زوجك والزواج مودة ورحمة والراجل متعود ياخد قراراتو بنفسو انتي من الان اعرفي كفاه تغرسي فيه فكرة التشاور واعرفي كفاه تطرحي رايك بلا متفرضيه عليه انتي وشطارتك اختي

 

[ЯǾᵯẫḭṧşẰ]

اختي الحبيبة
أنا نشوف فيها bات غير انت مكبرتها
حنا النسا tjr هكدا عام كامل وهو يقولنا ايه مرة وحدة يقولنا لالا نكرهوه
متخليش الشيطان يدخل بيناتكم
وفيها يخص حوايج التصديرة موديفي فيهم
والباقي على ربي
ان شاء الله ربي يكملك اختي
استغفري وصلي صلاة الاستخارة وشوفي
ربي واش راهو كاتب
سلام
​

 

[وصال]

اختي اسمحيلي هذا تسميه مشكل ياختي خليه يديسيدي واش فيها العرس في الربيع ولا في الصيف وزيد قلت عندك راجل عمتك مات هكذا على الاقل يكون جاز الوقت شويا باش تجوزي عرسك فرح ماشي قرح جابلي ربي مالقري شفت بلي خمم على صحابوا على حسابك بصح كومام تخدمك نتاع الصيف خيرمن الشتاء حتى انت صدقيني متعطيش المشكل اكثر من حجموا وهذي راكي غالطة فيها 100% ولوكان راكي قدامي نضربك بزوج كفوف باش تفيقي من الغفلة ديالك راه باين عليك عييتي ومركيش تفرقي بين الخير والشر استغفري مولاك ومتخليش الشيطان يعمل عمايلوا فيك اوعديني بلي للمرة الجاية راح تكتبي موضوع باركولي على زواجي وخليك من فكرة نبطل ومعلاباليش بويسك راكي تتوهمي في المشاكل ربي يكملك في الخير حنونة .

 

[M3TaZ eLLMa]

السلام عليكم

مرحبا بيك أخت الطيبة

نتمناو تكوني في أحسن الاحوال

ندخل للموضوع

أخت الطيبة كما قالو الاخوة من قبلي انت تصاعبين الامور على روحك لا غير

أساس المشكل غير موجود نهائيا لقد تركت فراغ لشيطان تلاعب بمشاعرك يأخت الطيبة وطبيعة الحال لقاك ظعيفة وسوس
ونجح في عمليتو لهذا أخت لا تعطي مجال للمشاكل التي ليس لها أي معنى أن تحطم مستقبلك الحل هو بين ايديك كما قالو الاخوة قبلي ولا تسلمي عواطفك للحزان كي تعشعش في قلبك وتتخذه مكان لأنو احنا لا نعطي قيمة للمشاكل ونتهور عند حلها لا لا بد أن تكوني هادئة جدا في اتخاذ أي قرار وحاولي تبسيط الامر وتصغيره وبعدها قرري بالمعنى --شوفي الايجابيات والسلبيات نتاع قرارك --ودرسيها مليح وبعدها اعطي مجال التفكير العميق وحينها قرري كما تردين اخت الطيبة ..

أما بالنسبة لقرارك أنا ضد هذا الاجراء لأنو الراجل لم يخطأ في كلامه بل نقول انو لم يستشيرك-- حولي هنا تقرايها بطريقة ايجابية انو قرر في مكانك وكان متأكد أنك ما تعرضيش وخاصة مع الظروف التي حصلت في المدة الاخيرة لكم ..
وهو درس العرس ويحب أن يعمل عرس باهي لأنو بكل صراحة يأخت عرس شتاء رانا كامل نعرفوه راه سوفرونس بأتم المعنى من كلمة إلا للحالات القسوة .. لكن أخت مدام الحال مزال نضن أنو كل عطلة فيها خير
وراجعي أمورك مليح وتخلاي عن قرارك هذا لأنو غير صائب نهائيا كيما نشوف فيه والاخوة ثاني جلهم راهم مع قراري وقرروه قبلي ..

لا تتركي مجال لشيطان الملعون لعنة الله عليه أنو يؤثر فيك بأمور ومشاكل وهمية هي من صنعوا حولي تزيدي تتقربي من الله عز وجل وتدعيه أنو يفرج عليك وقرئي القرآن كثيرا لأنو هو دواء لكل المشاكل

وربي يفرح أخت ويعطيك ما تتمني ويطلعك من هذا المحنى يارب

فكري بعقلك وقبلك وقرري بذاتك وشخصيتك وإن شاء الله ستجدين القرار المناسب

وتقبلي شكري وتقديري

ونتمنى أن نسمع أخبار منك تفرحنا

وبالتوفيق ​

 

[la_safa]

السلآم عليكم ..

اختي مآهيش مشكلة كبيرة , ديجآ يآ اختي حرآم انكم تقصوهآ بلآ مشكل يسمى مشكل ..
انت شآوري مآمآكـ و باباكـ هومآ أدرى بمصلحتكـ قبل مآ تعملي حتى خطوة ,
و يقلكـ كل عطلة فيهآ خير , مآتدري بآلآكـ ربي دآرلكـ فيهآ خير هآذ العطلة ..
انت توكلي على ربي و استخيري , و حآولي تتنآقشي مع خطيبكـ علاش تبدل من جيهتكـ
و افهمي عليه ان شآء الله تلقآي حل , بلآ مآ تخسري علآقة خطبة هكآكـ ~

و ربي يهنيكـ ~
​